1 Che Yoabu mwanache ju che Seluya ŵaimaanyilile kuti ntima wa mwenye waliji nkwakumbuchila kwannope che Abusalomu. 2 Kwayele che Yoabu ŵantumile mundu kwele ku Tekoa ko kuti akansose jwankongwe jwakwete lunda. Paŵannyichenawo, che Yoabu ŵansalile kuti, "Nlinamanile kuti nkulila malilo. Mmwale yakuwala yapamalilo, nkapakala mauta, nambo nlitende nti jwankongwe jwakulila malilo kwa moŵa gamajinji kwaligongo lya mundu jwakwe jwawile. 3 Nipele njaule kwa mwenye nkaasalile ayi ingunsalila yi." Nipele che Yoabu ŵansalile maloŵe gakwasalila mwenye. 4 Jwele jwankongwe jwakutyochela ku Tekoa jo ŵajawile kwa mwenye, ŵatindiŵele ni kukotama mpaka pasi paujo pa mwenye, kwa uchimbichimbi, ni ŵansalile, "Alakwe mwenye, mungamuchisye."

5 Mwenye ŵammusisye, "Ana chikunsauusya chichi?"

Jwankongwe jula ŵajanjile, "Ngulilasika, uneji ndili jwankongwe jwawililwe ni ŵankwakwe, ŵankwangu awile. 6 Nakwete ŵanache achalume ŵaŵili. Palyuŵa limo, paŵaliji kwikonde, ŵatandite kumenyana. Pakuŵapo nganapagwa mundu jwalijose jwakuti ŵaapokolanye, jumo ŵamputile njakwe, ni ŵammuleje. 7 Sambano ntundu wangu wose ung'alawiche uneji jwakutumichila jwenu. Akusakanga nankoposye mwanangu jwammuleje njakwe kuti ŵaaulaje ligongo auleje mpwakwe. Kwayele, tammulaje jwelejo jwati sambano ni jutaŵe jwakwinjila majumba. Atendaga yeleyo, taŵe atyosisye kusyene chilolelo changu chachisigalile, ni ŵankwangu ngaasigalilwa ni liina namose mmeleko pachilambo pano."

8 Mwenye ŵansalile jwankongwe jula, "Mmuje kumangwenu, timalisye chele chindu cho." 9 Jwele jwankongwe jwa kutyochela ku Tekoa jo ŵatite, "Ambuje jwangu mwenye, chileŵo chose chiŵe pa une ni pa ulongo wa atati ŵangu. Kwayele, mmwe ni umwenye wenu nkaŵa ni chileŵo."

10 Mwenye ŵajanjile, "Iŵaga mundu jwalijose tachinjogoya, munyichisye kukwangu, nombejo ngasansausya sooni." 11 Jwele jwankongwe jo ŵatite, "Choonde mwenye muumbopelele kwa Ambuje Akunnungu jwenu kuti asiŵilile jwakuuchisya maulago ga mwanangu jo akatenda chileŵo chiine chekulungwa chakummulaga ajula mwanangu jwine jula." Mwenye che Daudi ŵansalile kuti, "Ngulumbila kwa Ambuje Akunnungu ŵajumi, ngapagwa namose jumo jutachimmulasya mwanagwenu." 12 Jwankongwe jula ŵansalile, "Ngummenda, uneji jwakutumichila jwenu, munechelele mechete liloŵe limo kukwenu alakwe mwenye." Mwenye ŵanjanjile, "Mmechete." 13 Jwankongwe jula ŵansalile, "Kwachichi, mpanjile au ugongomalo wu nkati ŵandu ŵa Akunnungu? Malinga ni intite kusala nkati chele chindu cho, mmwe mwasyene nlilamwile kuti nkwete chileŵo pakuŵapo ngankusaka kunnechelela mwanagwenu auje pamusi kutyochela kwele kwautuchile. 14 Uweji ŵanawose chituwe. Uweji tuli mpela meesi gagajitiche, gati gangakukumbikwa. Namose Akunnungu ngaulaga nambo akusosa litala kuti jwaŵinjikwe auje kutyochela kwele kwautuchile. 15 Uneji iiche kukunguluka ni mmwe, ambuje jwangu mwenye, pakuŵa ŵandu ŵanyogoisye. Nipele, uneji jwakutumichila jwenu, naganisisye kuti, ‘Mmbaya ngakunguluche ni mwenye, panepa mwenye taachitenda achi chindu chiingwasalila uneji jwakutumichila jwakwe. 16 Pakuŵapo mwenye tachimbikanila ni kuungulupusya mmakono mwa mundu jwakusaka kuumulaga uneji pamo ni mwanangu kuti ndyoche mu kupochela aila yatugosele Akunnungu.’ 17 Ni uneji jwakutumichila jwenu naganisisye kuti, ‘Liloŵe lya ambuje jwangu mwenye tilimbe chitendewele muntima, pakuŵa ŵelewo ambuje ŵangu mwenye wo ali mpela katumetume jwa kwinani jwa Akunnungu pa kukombola kulekanganya indu yambone ni yangalumbana.’ Ambuje Akunnungu, Akunnungu jwenu, aŵe pamo ni mmwe."

18 Pelepo mwenye ŵanjanjile jwankongwe jula, "Nkaasisa chindu chachilichose tichinammusye." Jwankongwe jula ŵajanjile, "Mmechete alakwe ambuje jwangu mwenye." 19 Mwenye ŵammusisye, "Uli che Yoabu nombe ali mu chele chindu chi?" Jwankongwe jula ŵajanjile, "Ngulumbila kwa ŵalakwe ambuje jwangu mwenye, mundu ngakombola kusepuchila kunlyo pane kunchiji pa chele chindu chinsasile ambuje jwangu mwenye. Che Yoabu jwakutumichila jwenu jula ni juŵandumile. Jwelejo ni jwasalile une aga maloŵe gose ganansalile, uneji jwakutumichila jwenu. 20 Che Yoabu ŵatesile yeleyo kuti ŵalakwejo mwenye nchiganichisye chele chindu chi sooni. Nambo, alakwe ambuje jwangu nkwete lunda mpela lwa achikatumetume ŵa kwinani ŵa Akunnungu namose nkombwele kugamanyilila ganagose gagali pachilambo."

21 Nipele mwenye ŵansalile che Yoabu, "Mwambone nnope, tiindende che chindu chi. Njaule, nkanjigale ajula jwanchanda che Abusalomu mummusye pamusi."

22 Che Yoabu ŵatindiŵele ni kukotama mpaka paasi kwa uchimbichimbi ni kwapa mwenye upile, ni ŵatite, "Lelo uneji jwakutumichila jwenu ngumanyilila kuti ngundikwe paujo penu, ligongo mmwe ambuje wangu mwenye nchikundile chindu chimendile." 23 Pelepo che Yoabu ŵajawile mpaka ku Geshuli ŵanjigele che Abusalomu ni kummusya ku Yelusalemu. 24 Nambo mwenye ŵatite, "Che Abusalomu atame kwakutalichila ni une, atame ku nyuumba jakwe. Akaika apano kukuunola." Kwayele che Abusalomu ŵaliji nkutama kwakutalika, kumangwakwe ni nganasimanaga ni mwenye che Daudi.

25 Pa Isilaeli pose nganapagwa juŵalapikwaga kwa usalale wakwe mpela che Abusalomu. Kutandilila kusajo kwakwe mpaka peuwo pakwe, che Abusalomu nganakola chilema chachilichose. 26 Kila paŵamyolaga umbo sya muntwe wakwe, pakuŵa ŵamyolaga kakajinji pasyantopelaga, ŵasipimile utopele wakwe, waliji kilo siŵili malinga ni ipimo ya chimwenye. 27 Che Abusalomu ŵaŵeleche ŵanache ŵatatu achalume pamo ni mwali jumo liina lyakwe che Tamali. Che Tamali ŵaliji mwali jwakusalala.

28 Che Abusalomu ŵatemi yaka iŵili kwele ku Yelusalemu ko pangasimana ni mwenye che Daudi. 29 Nipele, che Abusalomu ŵatumile utengwa ku che Yoabu, kuti ajaule kwa mwenye pamalo pakwe, nambo che Yoabu ŵakanile. Che Abusalomu ŵatumile utenga kaaŵili nambo che Yoabu ŵakanile. 30 Nipele, che Abusalomu ŵaasalile ŵakutumichila ŵakwe kuti, "Nnole, che Yoabu akwete ngunda wa shayili chiŵandika ni ngunda wangu. Njaulanje nkauchome mooto." Kwayele ŵakutumichila ŵa che Abusalmu ŵauchomile mooto ngunda wa che Yoabu. 31 Che Yoabu ŵajawile ku nyuumba ku che Abusalomu ni kummusya kuti, "Kwachichi ŵakutumichila ŵenu auchomile mooto ngunda wangu?" 32 Che Abusalomu ŵajanjile, "Nnole, nampelechele utenga nnyiche akuno kuti nantume kwa mwenye, nkaausye kuti, ‘Kwachichi iche akuno kutyochela ku Geshuli? Ikaliji yambone kukwangu ngasigalile kukoko.’ Sambano muungamuchisye kuti ngombole kusimana ni mwenye. Iŵaga ngwete chileŵo, nipele, amulaje!" 33 Kwayele, che Yoabu ŵajawile ni kwasalila mwenye gele maloŵe gose go, nombe mwenye ŵammilasile che Abusalomu. Nombe che Abusalomu ŵajinjile kwa mwenye, ŵatindiŵele ni kukotama mpaka paasi paujo pa mwenye kwa uchimbichimbi. Ni mwenye ŵankumbatile che Abusalomu.