1 Katema ka umwenye wa mwenye che Daudi jakopochele sala kwa yaka itatu yakuyana. Kwayele mwenye che Daudi ŵapopesile kwa Ambuje Akunnungu, nombe Ambuje Akunnungu ŵansalile, sala ji jityochele ligongo "Che Sauli ni ŵapaulongo wakwe akwete chileŵo cha kuulaga, ligongo ŵaauleje Ŵagibeoni." 2 Kwayele mwenye che Daudi ŵaaŵilasile Ŵagibeoni ni kukunguluka nawo. Ŵagibeoni nganaŵa Ŵaisilaeli nambo ŵaliji ŵakusigala mwa Ŵaamoli. Atamose Ŵaisilaeli ŵalumbilile kuti ngisiŵaaulaga Ŵagibeoni wo nambo che Sauli ŵalinjile kwaulaga ŵanawose ligongo ŵasakaga kuti Ŵaisilaeli ni Ŵayuda ataŵale chilambo chose. 3 Che Daudi ŵausisye Ŵagibeoni, "Nkusaka nampanganyichisye ichichi? Tindipe chinauli kwa ugongomalo wantendele kuti nkombole kuchipa upile chilambo chi ni ŵandu ŵakwe Ambuje Akunnungu?" 4 Ŵagibeoni ŵanjanjile, "Umenyani ŵa uweji ni che Sauli pamo ni ŵa paulongo wakwe ngaulipila madini ga feza pane sahabu ni namose uweji kumbulaga Mwisilaeli jwajuli jose." Mwenye ŵausisye sooni kuti, "Sambano nkusaka naatendele ichichi?" 5 Ni ŵajanjile kuti, "Che Sauli ŵasachile kuti atujonanje ni kutumala, akasigalila atamuno mundu jwalijose jwajumi mu chilambo chose cha Ŵaisilaeli. 6 Nipele, ntupeje ŵandu saba ŵachilume kutyochela mu uŵelesi wa che Sauli, ni uweji tutwaulaje kwakwataŵilila paujo pa Ambuje Akunnungu ku chitumbi cha ku Gibea ku musi wa che Sauli juŵajitililwe mauta ni Ambuje Akunnungu kuŵa mwenye." Mwenye ŵatite kuti, "Tinjapeleka kukwenu."

7 Nambo mwenye nganiŵaapa che Mefibosheti mwanache jwa che Yonatani, chisukulu chi che Sauli ligongo che Yonathani ni che Daudi ŵatesile lilangano paujo pa Ambuje Akunnungu. 8 Nambo mwenye ŵaajigele che Amunoni ni che Mefibosheti, ŵanache ŵaŵili ŵa che Lisipa mwali jwa che Ahiya ŵaŵaŵelechele che Sauli, pamo ni ŵanache nsano ŵachilume ŵa che Mikali, mwali ju che Sauli ŵaŵaŵelechele che Adilieli mwanache jwa che Basilai jwa ku Meholati. 9 Ŵele ŵanache saba ŵachilume wo, che Daudi ŵaapeleche kwa Ŵagibeoni, nombewo ŵaataŵilile ku chitumbi paujo pa Ambuje Akunnungu, ŵanawose saba ŵawile kwanakamo. Ŵanache wo ŵaulajikwe pa moŵa gaandanda ga magungulo ga shayili.

10 Nipele, che Lisipa mwali ju che Ahiya ŵajigele kagunia, ni ŵatandiche palwala. Ŵatemi pelepo kutandilila magungulo pagaliji nkutanda mpaka ula pajatandite kunya ni kuganyoya malilo go. Katema kose ko, ŵaiŵingaga ijuni ya mwinani ni inyama ya mwitinji, chilo ni muusi kuti, ikaika pa malilo go. 11 Che Daudi paŵapilikene yaitesile che Lisipa mwali ju che Ahiya, chilanga chi che Sauli, 12 ŵajawile ni kugajigala maupa ga che Sauli ni che Yonatani mwanagwe kutyochela kwa ŵandu ŵa ku Yabeshi Gileadi, ŵaŵagajiŵile pa luŵala lwakusongangana ŵandu ŵa ku Beti Shani pa lyuŵa Ŵafilisi paŵaakoleche che Sauli ni che Yonatani pa lyuŵa liŵammuleje che Sauli kwele ku chitumbi ku Giliboa ko. 13 Che Daudi ŵagajigele maupa ga che Sauli ni che Yonatani mwanagwe kutyochela kweleko, sooni ŵagasonganyisye maupa ga achachanda saba ŵaŵaauleje kwa kwataŵilila ŵala. 14 Nipele, ŵandu ŵa che Daudi ŵagasichile maupa ga che Sauli ni che Yonatani mwanagwe ku chilambo cha Benyamini, kwele ku Sela pa lilembe li che Kishi atatigwe che Sauli. Ŵatesile kila chindu chiŵasalilwe ni mwenye. Pakumala yeleyo, Akunnungu ŵagajanjile mapopelelo kwaligongo lya chilambo cho.

15 Nipele Ŵafilisiti ŵaputene ngondo sooni ni Ŵaisilaeli. Nombe che Daudi ni ŵandu ŵakwe ŵajawile kuputana ngondo ni Ŵafilisiti. Che Daudi ŵapesile nnope pa lyuŵa lyo. 16 Che Ishibi Benobu, jumo jwa uŵelesi ŵa makammandu ŵaŵaŵilanjikwe Ŵalefai, jwele mpamba wakwe utopele wakwe waliji kilo tatu ni nusu, ni ŵaliji ni lipanga lyasambano nchiunu mwakwe, ni ŵaganisisye yakuti tammulaje che Daudi. 17 Nambo che Abishai mwanache jwa che Seluya ŵajawile kwakamuchisya che Daudi. Che Abishai ŵangungumuchile Mfilisiti jula ni kummulaga. Kwayele, ŵandu ŵanlumbilile che Daudi achitiji, "Nganjaula sooni ku ngondo ni uwe kogopela kuti tachimmulaga, ligongo mmwejo nli chikulupi cha Ŵaisilaeli wosepe."

18 Kanyuma, jakopochele ngondo sooni ni Ŵafilisiti ku Gobu ko. Kweleko che Sibekai jwa ku Husha ŵauleje che Safu juŵaliji jumo mwa uŵelesi wa makammandu ŵaŵaŵilanjikwe Ŵalefai. 19 Jakopochele ngondo sooni ni Ŵafilisiti kwele ku Gobu ko. Nombe che Elihanani mwanache ju che Yaili Legimu, mundu jwa ku Beselehemu ŵammuleje Goliati jwa ku Giti, jwati chikumbu cha mpamba wakwe chaliji chekulungwa mpela chitela chakuluchila. 20 Kanyuma jakopochele ngondo sooni kwele ku Gati ko, ni kweleko kwaliji ni mundu jumo juŵaliji jwanleu, juŵaliji ni yaala sita pa kila ligasa ni yala sita pa kila sajo, Yala yosepe yaliji ishilini na nne. Sooni jweleju ŵaliji jwa uŵelesi wa Ŵalefai. 21 Chikammandu ju paŵaatukene Ŵaisilaeli, che Yonatani mwanache jwa che Shimei, mpwakwe che Daudi ŵammuleje. 22 Ŵele ŵandu ncheche wo ŵaliji uŵelesi wa makammandu gagaŵilanjikwe Ŵalefai ku Gati ko, nombewo ŵaulajikwe ni che Daudi ni ŵakutumichila ŵakwe.