1 Che Ishibosheti mwanache ju che Sauli, paŵapilikene kuti che Abuneli aulajikwe kwele ku Hebuloni, ŵapwele ntima ni ŵandu wose ŵa ku Isilaeli ŵakamwilwe ni lipamba lyekulungwa. 2 Nipele che Ishibosheti mwanache ju che Sauli ŵakwete ŵandu ŵaŵili ŵaŵaliji ilongola ŵa mipingo ja ngondo ŵakukugumuchila. Jumo lina lyakwe che Baana ni jwine ŵaliji che Lekabu, wosepe ŵa ŵaliji ŵanache ŵa che Limoni mundu jwa lukosyo lwa Benjamini kutyochela musi wa ku Beeloti, pakuŵapo musi wa ku Beeloti waliji mu chilambo cha ku Benjamini. 3 Ŵandu ŵaŵatamaga ku Beeloti kuundanda ko, ŵautuchile ku Gitaimu ni akutamanga kweleko nti achalendo mpaka lelojino.

4 Chiŵelesi chine chi che Sauli ŵaliji che Mefibosheti mwanache ju che Sauli. Katema ch Sauli ni che Yonatani atatigwe paŵaulajkwe che Mefiboshe waliji ni yaka nsano. Yaaya jwakwe paŵapilikene ngani sya iwa yao iyatyochele ku musi wa ku Yesileeli ŵanjigele ni kuutuka nawo, nambo paŵaliji nkwanguya kuutuka nawo ŵangwisisye ni ŵaliji alemele makongo gose ganagaŵili.

5 Che Lekabu ni che Baana ŵanache ŵa che Limoni mundu jwa ku Beeloti, ŵajawile ku nyuumba ji che Ishibosheti. Ŵaiche kweleko muusi, che Ishibosheti ali apumulile mu nyuumba mwakwe. 6 Jwakulindilila pannango juŵaliji nkupeeta ngano wasimene lugono, ni ŵagonile. Pelepo che Lekabu ni che Baana mpwakwe ŵajinjile munkati. 7 Ali munkati mo ŵajawile ku chuumba chi che Ishibosheti, ŵansimene ali agonile lugono lwakutopela pachindanda, ni ŵammuleje. Ŵankatile ntwe wakwe ni kwaula nawo. Ŵajesile chilo chose achipitaga mu chiŵata cha lusulo lwa Yolodani. 8 Wele ntwe wo ŵanjauchisye che Daudi kwele ku Hebuloni ko ni kwasalila kuti, "Welewu uli ntwe u che Ishibosheti mwanache ju che Sauli jwammagongo jwenu, juŵasakaga kummulaga. Lyuŵa lya lelo Ambuje Akunnungu anlipichisye chisasi che Sauli ni uŵelesi ŵakwe kwaligongo lyenu mmwe ambuje ŵangu mwenye."

9 Nambo che Daudi ŵaajanjile che Lekabu ni che Baana mpwakwe, ŵanache ŵa che Limoni mundu jwa ku Beeloti kuti, "Ngulumbila kwa Ambuje Akunnungu ŵajumi, juŵaukulupwisye umi wangu kwa ŵammagongo wosepe, 10 ajula mundu juŵaiche kukuusalila kuti che Sauli awile, achiganisyaga kuti aiche kwa une ni utenga wambone, nankamwile ni nammuleje ku Sikilagi. Jelejo ni jaliji mbote jiŵapochele ligongo lya utenga wakwe uŵaganisyaga kuti uli wambone kwa uneji. 11 Ana mundu jwangalumbana pakummulaga mundu jwambone ali agonile pachindanda, mu nyuumba mwakwe, uli ngaiŵa yambone kwa uneji kummuchisya chisasi kwaligongo maulago gatesile kwa kummulaga kuti akapagwa pachilambo?" 12 Kwayele che Daudi ŵalamwile ŵandu ŵakwe, akaaulaje. Ŵaakatile makono ni makongolo gawo ni ilu yao kuikoleka mungulugulu litanda kwele ku Hebuloni ko. Nambo ŵaujigele ntwe u che Ishibosheti ni kuusika mu lilembe li che Abuneli kwele ku Hebuloni ko.