1 Ni yaliji, kuundanda kwa kila chaka, katema mamwenye paŵajaulaga kukuputana ngondo, che Daudi ŵantumile che Yoabu ni achakulu ŵakwe ŵa ŵangondo pamo ni ŵangondo ŵa Ŵaisilaeli akaputane ngondo; ni ŵauleje Ŵaamoni ni kuusyungula musi wa ku Laba. Nambo che Daudi ŵasigele ku Yelusalemu.

2 Palyuŵa limo muusi, che Daudi ŵajimwiche pachindanda chakwe, ni ŵajendaga pachanya pa chipagala cha nyuumba jakwe ja umwenye chichajili mpela chitatali. Ali nkwendajenda pansakasa po, ŵammweni jwankongwe jumo ali nkoga kumangwakwe. Jwankongwe jo ŵaliji jwakusalala nnope. 3 Che Daudi ŵantumile mundu kuuchilichisya kuti jwankongwe jo nduni. Mundu jo ŵansalile che Daudi kuti, "Jwankongwe jo ali Batisheba mwali ju che Eliamu, ni sooni ali ŵankwakwe che Ulia kutyochela mu lukosyo lwa Ŵahiti." 4 Nipele, che Daudi ŵatumile ŵantenga akaajigale. Nipele che Batisheba ŵaiche ku che Daudi, nombe che Daudi ŵagonile ni jwankongwe jo. Jwankongwe jo ŵaliji nakopoka pe kumala moŵa gakwe ga pa lwesi. 5 Pakupita moŵa jwankongwe jo ŵalimanyilile kuti akwete chitumbo, ni ŵapeleche utenga ku che Daudi kuti ali ni chitumbo chakwe.

6 Nipele che Daudi ŵampelechele che Yoabu utenga waukuti, "Muntume che Ulia jwa lukosyo lwa Ŵahiti aiche kukwangu." Nombe che Yoabu ŵantumile che Ulia ku che Daudi. 7 Che Ulia paŵaiche ku che Daudi, che Daudi ŵammusisye ngani si che Yoabu, ni ŵandu wosepe, ni kuti ngondo jili uli. 8 Pelepo che Daudi ŵansalile che Ulia, "Njaule kunyuumba jenu nkapumulile." Che Ulia ŵatyosile ku nyuumba ja mwenye, ni papopo mwenye ŵampelechele ntulilo. 9 Nambo che Ulia nganajaula ku nyuumba kwakwe, pamalo pakwe ŵagonile pannango wa nyuumba ja umwenye pamo ni ŵakulindilila ŵa mwenye. 10 Paŵasalilwe che Daudi kuti che Ulia nganajaula ku nyuumba kwakwe, che Daudi ŵammusisye, "Mmweji mbusile lelo pejino, nganimpagwa kunyuumba jenu kwa moŵa gamajinji, ligongo chichi nganinjaula ku nyuumba jenu?"

11 Che Ulia ŵanjanjile che Daudi, "Lisanduku lya lilangano pamo ni mipingo jose ja ŵangondo ŵa Ŵaisilaeli ni Ŵayuda akutamanga mmasakasa ku ngondo ko. Ambuje jwangu che Yoabu ni ŵakutumichila ŵakwe wose aŵisile chigono pakulanguka. Ana ikomboleka uneji nyaule ku nyuumba ngalye ni kung'wa ni kugona ni ŵankwangu? Ngulumbila, ngangukombola kupanganya chindu chanti chelecho." 12 Nipele che Daudi ŵansalile che Ulia, "Mwambone, ntameje apano lelo, malaŵi tinannechele kuti njaule." Kwayele che Ulia ŵatemi mmusi mu Yelusalemu pa lyuŵa lyo. Pa lyuŵa lyaŵili lyakwe, 13 che Daudi ŵammilasile che Ulia kuti akalye nawo chakulya ni kung'wa ku nyuumba jakwe ko, ni ŵantesile che Ulia akolelwe. Namose yeleyo, chilo chila che Ulia nganajaula ku nyuumba kwakwe, nambo ŵagonile pampasa wakwe pamo ni ŵakulindilila ŵa mwenye.

14 Kundaŵi kwakwe, che Daudi ŵannembele che Yoabu chikalata chiŵampele che Ulia anjauchisye che Yoabu. 15 Mu chikalata cho che Daudi ŵalembile yelei, "Mummiche che Ulia pa msitali wammbujo, pamalo pajikogoya nnope ngondo ni mmujilanje chapanyuma asigale jika kuti aputikwe awe." 16 Nipele, che Yoabu paŵaugungumuchile musi, ŵammisile che Ulia pamalo paŵaimanyilile kuti ŵangondo ŵa ŵammagongo ŵaliji ŵamachili kwannope. 17 Achinsyene musi wo ŵatyosile mmusi wao ni kwika kuputana ni che Yoabu ni ŵangondo ŵaŵaliji pamo nawo. Ŵandu ŵampepe mu ŵangondo ŵa che Daudi ŵaulajikwe. Che Ulia jwa lukosyo lwa Ŵahiti nombe najo ŵaulajikwe.

18 Nipele, che Yoabu ŵampelechele utenga mwenye che Daudi achinsalilaga yosepe iyatendekwe ku ngondo. 19 Che Yoabu ŵansalile jwantenga juŵantumile jo yeleyi, "Patinkamale kunsalila mwenye indu yosepe ya pangondo, 20 mwenye akukombola kutumbila, ni kummusya kuti, ‘Ligongo chichi pamwaputanaga po mwajawile kuŵandichila musi? Nganimmanyililaga kuti akakombwele kunsoma imaje ali mwipupa mwa musi wao? 21 Ana ŵani ŵammuleje che Abimeleki mwanache ju che Yelubesheti? Ana nganaŵa jwankongwe jumo mmusi wa ku Tebesi juŵampatuchisye lisyago kutyochela mu lipupa, ni lyammuleje che Abimeleki? Ligongo chichi mwajawile kuŵandichila lipupa?’ Mmwejo nkaasalile yelei, ‘Namose jwakutumichila jwenu che Ulia jwa lukosyo wa Ŵahiti nombejo awile.’ "

22 Jwantenga jula ŵatyosile. Paŵaiche ŵansalile che Daudi yanayose iŵasalilwe ni che Yoabu kuti asale. 23 Jwantenga ŵansalile che Daudi, "Achammagongo ŵetu ŵatupundile machili, ŵatyosile paasa musi ni kutugungumuchila pakulanguka. Nambo uweji twaatopwesye mpaka ku nnango wa musi wao. 24 Nipele ŵakukuta mikunje ŵatusomile imaje uweji ŵakutumichila ŵenu kutyochela pepupa. Ŵakutumichila ŵampepe aulajikwe. Namose jwakutumichila jwenu che Ulia jwa lukosyo lwa Ŵahiti, nombejo awile." 25 Che Daudi ŵansalile jwantenga jula kuti, "Nkaasalile che Yoabu yelei, ‘Chele chindu chi chikansausya pakuŵapo chiwa ngachikusagula, pangondo mundu jwalijose jula akuwa. Nlimbichile kulimbana ni ŵandu ŵa musi wo mpaka patimuusumule.’ Nkaasalile che Yoabu yeleyo kuti mwalimbisye ntima."

26 Che Batisheba ŵankwakwe che Ulia jwa lukosyo lwa Ŵahiti paŵapilikene kuti che Ulia aulajikwe, ŵalisile kwa malumbo kwalilila ŵankwakwe. 27 Gali gamasile moŵa ga kulila malilo gala che Daudi ŵannyichisye che Batisheba mu nyuumba jakwe, ni ŵaliji ŵankwakwe. Jwankongwe jo ŵammelechele mwanache jwannume, nambo Ambuje Akunnungu ngananonyelwa ni iŵaitesile che Daudi yo.