1 Nipele ku Gileadi ko ŵapali mundu jumo jwangalumbana, liina lyakwe che Sheba mwanagwe che Bikili, jwalukosyo lwa Benyamini. Nipele che Sheba ŵagombile lipenga ni kuti, "Uwe ŵangali chetu mu umwenye wa che Daudi, sooni nganitukola chindu mwa mwanache jwa che Yese. Ŵanyamwe ŵandu ŵa ku Isilaeli, kila mundu agambe kwaula ku lisakasa lyakwe!" 2 Kwayele, ŵandu wosepe ŵa ku Isilaeli ŵannesile che Daudi, ŵankuiye che Sheba mwanache jwa che Bikili. Nambo ŵandu ŵa ku Yuda ŵasigalile kuŵa ŵakukulupichika ni ŵankuiye mwenye che Daudi kutandilila ku lusulo lwa Yolodani mpaka mmusi wa ku Yelusalemu.

3 Mbesi, che Daudi ŵaiche ku nyuumba jao ku Yelusalemu. Ŵaajigele ilanga yakwe likumi ŵaŵaalesile kuti ajilolele nyuumba jakwe, ŵaaŵisile ku nyuumba jimo ni kwaŵika ŵakulindilila, ŵaapele yakulya, nambo nganagona nawo. Kwayele ilanga wo ŵaaugalile mu nyuumba mo mpaka mmoŵa ga chiwa chawo, ni ŵatemi mpela achakongwe ŵaŵililwe ni achiŵankwawo.

4 Nipele, mwenye ŵansalile che Amasa kuti, "Mumilanjile ŵandu wose ŵa ku Yuda pa moŵa gatatu ga, ni mmwe mwasyene nnyicheje." 5 Nipele, che Amasa ŵajawile kwaŵilanga ŵandu ŵa ku Yuda. Nambo nganachelenga kuuja pa katema kakasachilwe ni mwenye. 6 Pelepo che Daudi ŵansalile che Abishai kuti, "Sambano che Sheba mwanache jwa che Bikili tatuichisye masausyo gamakulungwa kupunda che Abusalomu. Njigale ŵangondo ŵangu munkuye che Sheba jo akaika kwinjila mu misi jajili ni likome ni kutoloka, tukaawona sooni." 7 Che Abishai ŵatyosile ali pamo ni che Yoabu, ni ŵakulindilila ŵa mwenye pamo ni ŵakukombola kuputana ngondo wose, ŵatyosile ku Yelusalemu kwaula kwakuilisya che Sheba mwanache jwa che Bikili. 8 Paŵaiche pa lwala lyekulungwa kwele ku Gibeoni ko, che Amasa ŵatyosile kwachingamila. Che Yoabu ŵaliji awasile yakuwala ya pangondo, ni pachanya pa chakuwala cho kwaliji ni nkaanda mu chiunu mwakwe uwakamulile ligonelo lilyaliji ni chipula chekulungwa. Che Yoabu paŵaliji nkuŵandichila, lipanga lila lyakopweche mu ligonelo lyakwe ni kugwilila paasi. 9 Che Yoabu ŵansalile che Amasa, "Ana nli chenene nlongo njangu?" Pelepo che Yoabu ŵankamwile ndewu che Amasa jula ni nkono wakwe wakunlyo kulitenda nti akwakumba. 10 Nambo che Amasa nganachiiwona chipula chichaaliji mmakono mwa che Yoabu. Nipele, che Yoabu ŵansomile che Amasa pa lutumbo ni chipula chila, matumbo gakwe gasolotweche ni ŵagwile paasi. Che Amasa ŵawile pangali che Yoabu kwasoma sooni.

Nipele che Yoabu ni che Abishai mpwakwe ŵajendelechele kwakuilisya che Sheba mwanache jwa che Bikili. 11 Mundu jumo jwa mpingo wa che Yoabu ŵaiche ni kwima chiŵandika ni chiilu chi che Amasa, achitiji, "Jwajulijose jwakunsaka che Yoabu ni jwajulijose jwakunsaka che Daudi, ŵaakuye che Yoabu!" 12 Che Amasa ŵawile ali ajosile miasi jakwe ali agonile pasikati ja litala lyekulungwa. Kwayele kila mundu juŵapitile pelepo, paŵammweni ŵajimi. Nambo ajula mundu paŵaiweni kuti ŵandu wosepe ŵaiche ni kwima pelepo, ŵachityosisye chiilu chi che Amasa pa litala pala, ŵachijawisye kwitinji ni kuchiunichila ni nguo. 13 Paŵautyosisye nteembo wa che Amasa pa litala pala, ŵandu wosepe ŵajendelechele kwakuya che Yoabu ŵaŵankuilisyaga che Sheba mwanache jwa che Bikili.

14 Che Sheba ŵapitile mu ngosyo syosepe sya ku Isilaeli mpaka musi wa ku Abeli Beti Maaka. Ŵandu wosepe ŵaŵatamaga malo ja Ŵabikili ŵanonyelwe ni ŵankuiye. 15 Ŵangondo wosepe ŵaŵaliji pamo ni che Yoabu ŵajawile kungumuchila che Sheba ali mu mmusi wa ku Abeli Beti Maaka mo. Ŵaunjiche litaka chiŵandi ni lipupa nti malo jakwelela, nipele ŵatandite kugumula lipupa ni kugwisya paasi. 16 Nipele, jwankongwe jumpepe juŵaliji ni lunda ŵapikaniche kutyochela mmusi ali nkuti, "Mpilikanile! Mpilikanile! Mwasalile che Yoabu aiche kuti ngunguluche nawo." 17 Che Yoabu ŵajawile chiŵandika ni jwankongwe jo, nombe jwankongwe jo ŵammusisye, "Ana mmweji ni che Yoabu?"

Che Yoabu ŵajanjile, "Elo ni uneji."

Jwankongwe jula ŵansalile, "Mumbilikanile uneji jwakutumichila jwenu."

Che Yoabu ŵansalile, "Elo ngumpikanila." 18 Jwankongwe jula ŵansalile kuti, "Kalakala ko ŵandu ŵatiji, ‘Mwalechanje akaŵende ushauli ku musi wa ku Abeli.’ Yeleyi ni iŵatiji kumalisya magambo gao. 19 Uneji ndili jumo mwa aŵala ŵakusaka chitendewele ni chikulupilichiko mu Isilaeli. Sambano mmwe nningwa wenu kuujonaga musi wauli mpela achikulu pa Isilaeli. Ana ligongo chi nkusaka kuujonanga musi wauli wakwe Ambuje Akunnungu?" 20 Che Yoabu ŵajanjile, "Ngwamba, une ngangusosa kuulyulyunganya nsinda wu atamuno kuujonanga. 21 Intite kusala ngaŵa isyene! Nambo mundu jumo kutyochela ku matumbi ga ku Efulaimu jwakuŵilanjikwa che Sheba mwanache jwa che Bikili atandite kungalauka mwenye che Daudi. Muntyosye kukwangu jwele mundu jo, ni une tinjityoka mmusi wenu." Jwankongwe jo ŵansalile che Yoabu kuti, "Ntwe wakwe tinjiuponyela kukwenu kupitila pa likumba." 22 Pelepo jwele jwankongwe jo ŵapite kwa ŵandu wose ali ni ushauli wakwe wa lunda, nombewo ŵankatile ntwe che Sheba mwanache jwa che Bikili ni kuchijasila kwa che Yoabu. Kwayele che Yoabu ŵagombile lipenga kulosya kuti ngondo jimasile, ni ŵandu ŵakwe ŵatyosile mu musi mo, kila mundu ŵajawile ku nyuumba kwakwe. Nipele che Yoabu ŵausile kwa mwenye che Daudi, ku musi wa ku Yelusalemu.

23 Che Yoabu ŵaliji jwankulu jwa mpingo wose wa ŵangondo wa ku Isilaeli. Che Benaya mwanache jwa che Yehoyada ŵaliji jwankulu jwa ŵakulindilila wa mwenye. 24 Che Adolamu ŵaliji chilongola jwa aŵala ŵakupanganya masengo gakukanganichisya, che Yehoshafati mwanache jwa che Ahiudi ŵaliji jwakugosa ikumbuchisyo yaindu yayakopochelaga paumwenye. 25 Che Shausha ŵaliji jwakulemba jwa mwenye, che Sadoki ni che Abiasali ŵaliji ŵambopesi. 26 Nombe che Ila jwa musi wa ku Yaili ŵaliji jwambopesi jwaŵatumichilaga che Daudi jikape.