1 Pakumala yeleyo, mwenye che Nahashi jwa Ŵaamoni ŵawile, ni mwanagwe jwakuŵilanjikwaa che Hanuni ŵaliji mwenye pamalo pa atatigwe. 2 Mwenye che Daudi ni ŵatite, "Tinantendele indu yambone che Hanuni, mwanache ju che Nahashi mpela muŵandendele atatigwe indu yambone." Kwayele, che Daudi ŵatumile ŵantenga kuti akantulasye che Hanuni ligongo lya chiwa cha atatigwe. Ni ŵantenga ŵa che Daudi ŵala paŵaiche mu chilambo cha Ŵaamoni, 3 achakulu ŵa Ŵaamoni ŵansalile ambuje jwawo che Hanuni kuti, "Ana nkuganisya kuti che Daudi pakuntumichisya ŵandu ŵakuntulasya akunchimbichisya atatigwenu? Ana che Daudi nganaatuma aŵa ŵandu ŵa kukwenu kuti aulolesye ni kuuchilichisya musi nipele ausumule?"

4 Nipele, che Hanuni ŵaakamwile ŵantenga ŵa che Daudi ŵala ŵaamyosile ndewu upande umo, ni sooni ŵapapwile yakuwala yao pasikati kutandilila kungongo mpaka paasi, nipele ŵaalesile ajauleje. 5 Che Daudi paŵasalilwe yeleyi, ŵatumile ŵandu akasimane nawo, ligongo ŵanyawo yakamwile soni nnope. Mwenye ŵasalile kuti, "Ntameje kaje ku Yeliko, mpaka sili simesile ndewu syenu, pele ni mmujeje kumusi."

6 Ŵaamoni paŵaiweni kuti ŵaachimikasisye che Daudi, ŵakodisisye ŵangondo ŵa Ŵaalamu elufu ishilini ŵaakwenda wapasi kutyochela ku Betilehobu ni ku Soba; sooni mwenye jwa ku Maaka pamo ni ŵandu elufu moja, ni kutyochela ku Tobu ŵangondo elufu kumi na mbili.

7 Nombe che Daudi piŵapikene ŵantumile che Yoabu, ni mpingo wose wa ŵangondo ŵakukombola kujiputa ngondo. 8 Ŵaamoni ŵatyosile ni kuliŵika chile kwa ngondo pa nnango wa musi ku Laba, musi wao wekulu. Nombe Ŵaalamu kutyochela ku Soba ni ku Lehobu ni ŵandu kutyochela ku Tobu ni ku Maaka ŵalipanjile peuto pakulanguka.

9 Che Yoabu paŵaiweni kuti ngondo jili jakulimba paujo ni chakunyuma, ŵaasagwile ŵangondo ŵampepe ŵamachili kwannope ŵa Ŵaisilaeli, ni ŵaaŵisile pa ulongosi wakwe kuti aputane ni Ŵaalamu ŵaŵaliji pamalo pakulanguka. 10 Ŵangondo ŵane ŵaŵasigalile ŵala ŵaaŵisile pa ulongosi wa mpwakwe che Abishai, nombejo ŵaapanjile kuti aputane ni Ŵaamoni. 11 Che Yoabu ŵansalile che Abishai kuti, "Iŵaga Ŵaalamu akuumbunda machili, timungamuchisye nambo iŵaga Ŵaamoni akumpunda machili tiiche kukunkamuchisya. 12 Nambo mme ŵakukalamuka! Tuputane chilumelume kwaligongo lya ŵandu ŵetu ni kwaligongo lya misi ja Akunnungu jwetu, nombe Ambuje Akunnungu atupanganyichisye yakuiwona kuti ili yambone kukwakwe."

13 Nipele che Yoabu ni ŵandu ŵakwe ŵasejele chammbujo kwagungumuchila Ŵaalamu, ni Ŵaalamu ŵautwiche paujo pao. 14 Ŵaamoni paŵaiweni kuti Ŵaalamu autwiche, nombe nawo ŵambutwiche che Abishai ni kwinjila mmusi. Che Yoabu ŵalesile kuputana ni Ŵaamoni ni kuuja ku Yelusalemu.

15 Nambo Ŵaalamu paŵaiweni kuti ŵaalepele Ŵaisilaeli, ŵasongangenye mipingo jao ja ŵangondo pamo. 16 Mwenye che Hadadeseli ŵalajisye kuti akaajigale Ŵaalamu ŵaŵaliji pesi ja lusulo lwa Efulate, ŵaajausye ku Helamu achilongoswaga ni che Shobaki jwankulu jwa mpingo wa ngondo wa che Hadadeseli. 17 Che Daudi paŵapilikene yeleyo, ŵaasongangenye pamo Ŵaisilaeli wose, ŵajombweche lusulo lwa Yolodani ni kwaula mpaka ku Helamu kuŵaliŵisile chile Ŵaalamu kuputana ngondo ni che Daudi, ni ŵatandite kuputana najo. 18 Nambo Ŵaalamu ŵautwiche paujo pa Ŵaisilaeli. Che Daudi ni ŵandu ŵakwe ŵauleje Ŵaalamu mia saba ŵaŵaliji nkwendesya mutuka sya ngondo, ni ŵakwela falasi elufu alobaini. Sooni ŵammulesye che Shobaki jwankulu jwa ngondo jwao, nombejo ŵawilile papopo. 19 Katema mamwenye wose ŵaŵantumichilaga che Hadadeseli paŵaiweni kuti apundikwe pangondo ni Ŵaisilaeli, ŵasosile kwilana mu chitendewele ni Ŵaisilaeli, ni ŵaliji ŵakutumichila ŵa Ŵaisilaeli. Kwayele Ŵaalamu ŵajogwepe ni nganiŵaakamuchisya sooni Ŵaamoni.