1 Palyuŵa limo che Daudi ŵausisye kuti, "Ana kwana mundu jwalijose jwasigalile jwanjumi jwa pa ulongo u che Sauli? Iŵaga apali, ngasachile kwalosya unonyelo kwaligongo lya lilangano linatesile ku che Yonasani."

2 Kwaliji ni jwakutumichila jwa paulongo u che Sauli jwakuŵilanjikwa che Siba. Ŵasalilwe kuti ajaule ku che Daudi. Mwenye che Daudi ŵammusisye kuti, "Ana mmweji nli che Siba?"

Nombejo ŵajanjile, "Elo, ni une jwakutumichila jwenu."

3 Mwenye ŵausisye, "Uli, apali mundu jwajulijose jwasigalile pa ulongo wa che Yonatani kuti naapanganyichisye ya wema wa Akunnungu?"

Che Siba ŵajanjile, "Apali mwanache ju che Yonatani, nambo jwelejo alemele makongolo."

4 Mwenye ŵausisye, "Ali kwapi?"

Che Siba ŵajanjile "Ali ku nyuumba ji che Makili mwanache ju che Amieli kwele ku Lodebali ko." 5 Nipele mwenye che Daudi ŵatumile ŵandu kuti akanjigale, ŵandu wo ŵajile kukunjigala ku nyuumba ji che Makili mwanache ju che Amieli ku Lodebali.

6 Nipele che Mefibosheti mwanache ju che Yonatani, juŵaliji chisukulu chi che Sauli ŵajawile kwa mwenye che Daudi, ŵanjinamile mwenye che Daudi kwapa luchimbichimbi. Che Daudi ŵammilasile, "Che Mefibosheti." Nombejo ŵajanjile, "Ni une, jwakutumichila jwenu."

7 Che Daudi ŵansalile, "Nkajogopa. Uneji tinampanganyichisye ya wema kwaligongo lya atati ŵenu che Yonatani. Alila lisi lyose lilyaliji lya ambuje ŵenu che Sauli ngummuchisya. Nomwe, moŵa gose tinchilya pampasa pangu." 8 Che Mefibosheti ŵanjinamile che Daudi kulosya luchimbichimbi ni kuti, "Uneji ndili mpela mmbwa jewe, ligongo chichi muumbanganyichisye wema uno?"

9 Nipele mwenye che Daudi ŵammilasile che Siba jwakutumichila ju che Sauli, ŵansalile, "Aila ipanje yose i che Sauli ni ŵapaulongo wakwe napele chisukulu cha ambuje jwenu che Sauli. 10 Mmweji ni ŵanache ŵenu ni ŵakutumichila ŵenu timunlimile che Mefibosheti ni tinnyiche nawo magowolo kuti chisukulu cha ambuje ŵenu akoleje chakulya moŵa gose. Nambo nsyene jo tachilya pa mpasa wangu." Che Siba ŵaliji ni ŵanache ŵachilume kumi na tano ni ŵakutumichila ishilini.

11 Nipele che Siba ŵansalile mwenye, "Uneji jwakutumichila, timbanganye kila chindu chichimuusalile." Nipele che Mefibosheti ŵaliji nkulya chakulya pa mpasa wa mwenye nti jumo jwa ŵananche ŵa mwenye. 12 Che Mefibosheti ŵakwete mwanache jwachilume jwannondi jwakuŵilanjikwa che Mika. Ŵandu wosepe ŵapaulongo wa che Siba ŵaliji ŵakutumichila ŵa che Mefibosheti. 13 Kwayele, che Mefibosheti juŵaliji alemele makongolo gawo gose, ŵaliji nkutama ku Yelusalemu, ni kulya chakulya pa mpasa wa mwenye moŵa gosepe.