2 Samuel 22

Lujimbo lwakupunda lwa che Daudi

1 Che Daudi ŵaajimbile Ambuje Akunnungu maloŵe ga lujimbo lu pele Ambuje Akunnungu paŵaakulupwisye kutyochela kwa ŵammagongo ŵakwe wose, nombe kutyochela kwa che Sauli. 2 Ŵajimbile yeleyi: Ambuje Akunnungu ali lwala lwangu,

likome lyangu, ni chiwombolo changu.

3 Ambuje Akunnungu, ali lwala lwangu, pamalo pangulijuŵa,

mmwejo nli chakulichinga pantima pangu ni machili ga ukulupusyo wangu,

mmwejo nli likome lyangu ni pamalo pangu pangulijuŵa.

Nkulupusyo jwangu,

nkungulupusya kutyochela kwa ŵandu ŵaukoleko. 4 Ngummilanga ŵalakwejo Ambuje Akunnungu ŵakuŵajilwa kulapikwa

nkuungulupusya kutyochela kwa ŵammagongo ŵangu.

5 Pakuŵa matumbela ga chiwa gasyungulile une,

chikumba mesi cha uwonasi chaanyigele,

6 ngonji sya lilembe syasyungulile une,

itanje ya chiwa yandanjisye. 7 Mu kulaga kwangu naaŵilasile Ambuje Akunnungu,

naalilile Akunnungu ŵangu.

Kutyochela mu nyuumba jakwe ŵapilikene liloŵe lyangu,

kulila kwangu kwaichilile mmapilikanilo gakwe.

8 Chilambo chatetemele ni kutenganyika,

misingi ja kwinani jagwengwelwiche,

ligongo Akunnungu ŵaliji atumbile. 9 Lyosi lyatutumaga mu mbula mwakwe,

mooto wakonanga wakopokaga mkang'wa mwakwe,

makala ga mooto gakolelaga mkang'wa mo.

10 Ŵapapwile liunde ni ŵaiche paasi,

liunde lyakupilila lyaliji ku sajo syawo.

11 Ŵachikwesile chepanganyikwe chachili ni mapapiko ni kuguluka,

ŵajigalikwe pachanya ni mapapiko ga mbungo.

12 Ŵalisyunguchisye chipi kosekose,

chiunichilo chakwe chaliji maunde gakandapala ga ula gagumbele ni mesi.

13 Kutyochela ni kung'alima kwa upagwe wakwe,

maunde gasejele,

janyele ula ja maganga

ni kumesya kwa njasi.

14 Ambuje Akunnungu ŵalindime kutyochela kwinani

Liloŵe lya jwali kwinani nnope lyapikaniche.

15 Ŵaponyisye mipamba ni kwapwilinganya ŵammagongo,

kumesya kwa njasi, ŵammagongo ŵautwiche.

16 Iŵata ya mu bahali yaunukulikwe

misingi ja chilambo jaoneche

Ambuje Akunnungu paŵaakalipilaga ŵammagongo ŵakwe,

kwa mbumu syasikopweche kwa machili mmbula mwakwe.

17 Ambuje Akunnungu ŵagolwesye nkono wao kutyochela mwinani, ŵanyigele,

ŵanjuwile kutyoka pamalo pakusokosya mmesi.

18 Ŵangulupwisye kutyoka kwa ŵammagongo ŵangu jwakwete machili,

ŵele ŵaŵanjimaga une,

pakuŵapo ŵakwete ŵamachili nnope kuumbunda une.

19 Ŵaagungumuchile une pa lyuŵa linaliji pa masausyo,

nambo Ambuje Akunnungu ŵangamuchisye.

20 Ŵanyigele ni kuumika pamalo salama,

ŵangulupwisye ligongo ŵanonyelwe ni une.

21 Ambuje Akunnungu ŵambanganyichisye malinga ni indite kukundikwa paujo pakwe,

ŵambele upile malinga ni ungali chileŵo wangu.

22 Pakuŵapo nagajitichisye malamusi gakwe Ambuje Akunnungu,

ni sooni nganindende yachigongomalo ni kwaleka Akunnungu ŵangu.

23 Ngamulisye malajisyo gakwe gose,

nganineka kugakuya mashalaiti gakwe.

24 Mele jwangali chileŵo paujo pakwe,

nalisiŵilile kuti ngasindenda ileŵo.

25 Ambuje Akunnungu ambele ntuuka malinga ni kukundikwa kwangu paujo pao,

malinga ni ungakola ileŵo paujo pao.

26 Kwa ŵandu ŵakukulupilichika nkulilosya kuŵa ŵakukulupichika,

kwa ŵandu ŵangali chileŵo nkulilosya kuŵa jwangali chileŵo.

27 Mmwejo nli ŵambone kwa ŵandu ŵali ŵambone,

nambo kwa ŵachigongomalo nkulilosya kuŵa ŵakukanila.

28 Nkwakulupusya ŵandu ŵaakulitulusya,

nambo nkwalolechesya ŵandu ŵakulikwesya kuti mwatulusye.

29 Alakwe Ambuje Akunnungu, nli lilanguka lyangu,

Akunnungu ŵangu, nkuumulichila mu chipi

30 Nkuumba machili gakwagungumuchila ŵammagongo ŵangu,

ni machili gakukwela mapupa gawo.

31 Akunnungu, akwalongosya ŵandu kuipanganya indu mwakulungamika,

yose yalanjile Ambuje Akunnungu ili isyene,

ŵelewo ali chakulichinga pantima

kwa ŵandu wose ŵakulijuŵa kukwakwe.

32 Ŵani ŵali Akunnungu ikaŵe Ambuje Akunnungu pe?

Ŵani ŵali lwala pakulijuŵa ikaŵe Akunnungu ŵetu?

33 Akunnungu ni pamalo pangu pakulimba pakulijuŵa,

akuitenda ipanganyo yangu iŵe yakulungamika.

34 Akugalimbisya makongolo gangu mpela ga ngolombwe,

akungombolesya kwima paitumbi.

35 Akunyiganisya makono gangu kuputana ngondo,

akugalimbisya makono gangu kukuta ukunje kwa kulonda.

36 Nkuumba chakulichinga pantima chakuungulupusya,

chikamuchisyo chenu chindesile une me jwankulu

37 Muunyonjechesye litala lyangu,

kuti makongolo gangu nganigatelesya.

38 Naatopwele ŵammagongo ŵangu ni kwaaulaga,

nganimujila panyuma mpaka panaamasile ŵanawose.

39 Naauleje ŵanawose, nganakombola kwima sooni,

ŵagwile paasi pa makongolo gangu.

40 Mwambele machili ga kuputana ngondo,

mwatesile ŵammagongo ŵangu atindiŵale ni kukotama mpaka paasi pa makongolo gangu kulosya uchimbichimbi.

41 Mwatesile ŵammagongo ŵangu agalauche ni kuutuka

ni uneji naajonasile aŵala wose ŵaŵamengaga.

42 Ŵasosile ukamuchisyo, nambo nganapagwa ŵakwakulupusya,

ŵammilasile Ambuje Akunnungu, nambo nganaajanga.

43 Naasyajilesyajile ni ŵaliji mpela luundu,

ni naakanyete ni kwaliŵataliŵata mpela matope mu litala.

44 Mwangulupwisye ni ŵandu ŵangu ŵaŵaagunguluchile,

muundesile me jwakutawala jwa ilambo.

Ŵandu ŵangangwamanyilila sambano akuundumichila.

45 Achalendo akuunyichilila ali nkulitulusya

papopo napikana pe ngani syangu, akuunyitichisya.

46 Achalendo ŵatengwiche,

ŵatyosile mmakome gawo ali nkutetemela.

47 Ambuje Akunnungu ali ŵajumi!

achimbichikwe lwala lwangu!

Akuswe Akunnungu ŵangu, lwala lwa ukulupusyo wangu.

48 Ŵelewo ni ŵakuuchisya ugongomalo kwaligongo lyangu

ni kwaŵika ŵandu ŵa ilambo ine paasi pa ulamusi wangu.

49 Mungulupwisye kutyochela kwa ŵammagongo ŵangu.

Alakwe Ambuje Akunnungu, muungusisye pachanya pa ŵaakunganila

ni kuumbokasya kwa ŵandu ŵakakatima ntima.

50 Kwayele, tinjinlapa ŵalakwe Ambuje Akunnungu

pasikati ja ŵandu ŵa ilambo,

tinjililapa liina lyenu.

51 Akunnungu antesile mwenye jwammisile kuti apunde kwakukulungwa,

Akunnosya chinonyelo chakwe changamala jwelejo jwansagwile,

che Daudi ni iŵelesi yakwe moŵa gose pangali mbesi.

Bíblia Online

Veja também

Oração para pedir a Deus que aumente a fé quando o coração está cheio de dúvida

Como o amor de Deus cura as dores de relações passadas?