1 Che Daudi paŵajesile chambujo kanandi kutyochela pachanya chikwesya pala, ŵasimene ni che Siba jwakutumichila jwa che Mefibosheti, ali ni mbunda siŵili syeŵiche chile sili sitwichile mikate mia mbili ni mikate mia moja jekolosye ni sabibu syejumu, ni keki mia moja jekolosye ni isogosi ya tini ni nsaku wekolosye ni lipende umo wetaje divai. 2 Nipele mwenye ŵammusisye che Siba, "Ligongo chi nnyichenawo ayi indu yi?"

Che Siba ŵajanjile, "Mbunda si ni kuti akweleje ŵandu ŵa munyuumba jenu. Mikate ni mikate jekolosye ni isogosi kuti alyeje ŵandu, nombe divai ni kuti ang'wenyeje ŵandu ŵatapele mu chipululu muno." 3 Mwenye ŵammusisye, "Chisukulu cha ambuje ŵenu ali kwapi?"

Che Siba ŵajanjile kuti, "Ŵelewo asigele mu musi ku Yelusalemu ligongo akuganisya kuti ŵandu ŵa ku Isilaeli tachimmuchisya umwenye wa che Sauli anganga ŵao." 4 Mwenye ŵansalile che Siba, "Indu yose iyaliji ya che Mefibosheti sambano eŵele indu yenu." Che Siba ŵajanjile kuti, "Ngutogolela, ambuje ŵangu mwenye, ni une ngunchondelela ngundikwe moŵa gose paujo penu."

5 Katema mwenye che Daudi paŵaŵandichile ku Bahulimu, ŵakopochele mundu jumo jwa paulongo wa che Sauli, liina lyakwe che Shimei mwana jwa che Gela, akuno achilwesaga pangaleka. 6 Ni ŵaliji nkwaponyela maganga che Daudi ni ŵakutumichila ŵakwe atamuno ŵakulindilila wosepe pamo ni ŵangondo ŵaliji ansyungwile che Daudi chakunchiji ni chakunlyo. 7 Che Shimei ŵannwesyaga che Daudi ali nkuti, "Njaule ako! njaule ako! Mmweji mundu jwakuulaga, mundu jwangafai mmwe! 8 Ambuje Akunnungu ammuchichisye ligongo lya ŵandu wosepe ŵa paulongo wa che Sauli umwauleje, ni mwasumwile umwenye wakwe. Sambano Ambuje Akunnungu aupeleche umwenye kwa mwanache jwenu che Abusalomu. Nnole sambano kumala kwenu ni kweleku mmwejo jwakuulaga ŵandu."

9 Pelepo che Abishai achikulugwe ŵaliji che Seluya ŵansalile mwenye che Daudi kuti, "Ligongo chi jwele mundu jwali mpela mmbwa jewe ji jinnwesye mmweji ambuje ŵangu mwenye? Muungunde naajaulile, ni une tinaakate palukosi." 10 Mwenye ŵajanjile, "Ana kwana ichichi pasikati jangu ni ŵanyamwe ŵanache ŵa che Seluya? Iŵaga Ambuje Akunnungu ŵaasalile kuti ‘Mwalwesye che Daudi,’ nduni jwakukombola kuusya kuti ‘Kwachichi nkutenda yeleyo?’" 11 Sooni mwenye che Daudi ŵansalile che Abishai ni ŵakutumichila ŵane wosepe, "Iŵaga mwanache jwangu nansyene akusaka kuumulaga, uli ngaŵa mwakupunda kwa mundu jwa lukosyo lwa Benyamini? Ŵanyamwe munneche anwesye pakuŵa Ambuje Akunnungu ni ŵantumile kuti anwesye. 12 Ikomboleka Ambuje Akunnungu tachilolechesye chilewo changu ni kundipa yambone pa malweso gangugapata lelo jino." 13 Kwayele che Daudi ni ŵandu ŵakwe ŵajendelechele ni ulendo akuno che Shimei ŵaliji nkwakuilisya mungulugulu chikwesya mwakulolegana ni che Daudi, ali nkwalwesya, akuno alinkwaponya maganga ni kwamwasila luundu. 14 Nipele mwenye che Daudi pamo ni ŵandu ŵaŵaliji pamo nawo, ŵaiche ku lusulo lwa Yolodani ali apesilenje. Nipele ŵapumulile pelepo.

15 Katema ko, che Abusalomu ni ŵandu wose ŵa ku Isilaeli ŵajawile mmusi ku Yelusalemu, nombe che Ahitofeli ŵaliji pamo nawo. 16 Che Hushai mundu jwa ku Aliki mbusanga jwa che Daudi, ŵanjaulile che Abusalomu ni ŵansalile, "Mwenye ntameje yaka yejinji! Mwenye ntameje yaka yejinji!" 17 Che Abusalomu ŵammusisye che Hushai, "Uli, au uli unonyelo wenu waukutamilisya kwa mbusanga jwenu che Daudi? Ligongo chi nganinjaula pamo ni mbusanga jwenu?" 18 Che Hushai ŵajanjile, "Ngwamba! Pakuŵapo ajula jwasagulikwe ni Ambuje Akunnungu, ni ŵandu ŵa, ni ŵandu wose ŵa ku Isilaeli, jwelejo ni jwatime pamo najo, sooni tisigale ni jwelejo. 19 Kupunda ni yeleyo, ana ŵani utinaatumichileje? Ana ngaŵa jwelejo mwanache jwa ambuje ŵangu? Nipele mpelaga inaatumichile atati gwenu, iyoyo ni itinantumichile ni mmwe wakwe."

20 Pelepo che Abusalomu ŵansalile che Ahitofeli kuti, "Mumbe ushauli, ana tutende ichichi?" 21 Che Ahitofeli ŵansalile che Abusalomu, "Ngoneje ni ilanga ya atati ŵenu ŵaŵalesile kujilola nyuumba jakwe ja chimwenye. Kanyuma ŵandu wosepe ŵa ku Isilaeli pachapikane kuti mwachimisye atati ŵenu, pelepo ŵandu wosepe ŵaali pamo nomwe tachilimbiswa." 22 Kwayele ŵandu ŵankolochesye che Abusalomu lisakasa pachanya chipagala, nombejo ŵagonile ni ilanga ya atatigwe, ŵandu wosepe ŵa ku Isilaeli ali nkulolechesya. 23 Pa moŵa go, ushauli wauli wose uwakopwesye che Ahitofeli waliji mpela asalilwe ni Akunnungu. Ni ushauli waukopwesye che Ahitofeli wachimbichikwe ni che Daudi ni che Abusalomu.