2 Samuel 3

1 Nipele japali ngondo kwa moŵa gamajinji pasikati ja ŵandu ŵaŵakamulangene ni ulongo wa che Sauli, ni aŵala ŵaŵakamulangene ni che Daudi. Nambo che Daudi ŵapundile kukola machili kwannope ni upaande wa che Sauli machili gawo gajendelechele kumala.

Ŵanache ŵachilume che Daudi ŵaŵapagwile ku Hebuloni

2 Ŵeleŵa ni ŵanache ŵachilume ŵaŵapagwile ni che Daudi paŵaliji ku Hebuloni malinga ni iŵatite kupagwa: Che Amunoni, jwakwitiwo jwakwe, achikulugwe ŵaliji che Ahinoamu jwakutyochela ku Yesileeli, 3 Che Kileabu jwaaŵili kupagwa, achikulugwe ŵaliji che Abigaili, jwankongwe jwaŵawililwe ni ŵankwakwe che Nabali jwakutyochela ku Kalimeli; ni che Abusalomu, jwaatatu kupagwa, achikulugwe ŵaliji che Maaka, mwali ju che Talimai mwenye jwa ku Geshuli, 4 che Adoniya, jwancheche kupagwa, achikulugwe ŵaliji che Hagiti, che Shefatia, jwansano kupagwa, achikulugwe ŵaliji che Abitali, 5 ni che Itiliyamu jwasita kupagwa, achikulugwe ŵaliji che Egila. Ŵelewo ni ŵanache ŵa che Daudi ŵaŵaŵeleche paŵaliji nkutama ku Hebuloni ko.

Che Abuneli akukamulana ni che Daudi

6 Ngondo pajaliji nkwendelechela pasikati ja ulongo wa che Daudi ni aula ulongo wa che Sauli, che Abuneli ŵapundile kukola machili gamajinji pasikati pa ulongo wa che Sauli.

7 Che Sauli ali ŵajumi ŵakwete chilanga jwakuŵilanjikwa che Lisipa, mwali ju che Ahiya. Nipele che Ishibosheti ŵammusisye che Abuneli, "Ligongo chichi ngonile ni chilanga cha atati ŵangu?" 8 Che Abuneli ŵatumbile kwannope ligongo lya aila yaŵechete che Ishibosheti, ni ŵansalile kuti, "Uli, mmwe nkuganisya kuti une ngupakombola kwagalauka che Sauli? Uli mmwe nkuganisya kuti une ngwatumichila chilambo cha Yuda? Nnole une mele jwakulupilichika kwa ulongo wa che Sauli atati ŵenu, achalongo achinjakwe ni kwa achambusangagwe, ni nangosile kuti che Daudi akampunda mpaka lelo. Kwayele nkuumona kuti ndili jwakuleŵa kwaligongo lya jwankongwe. 9 Ngwapopelela Akunnungu kuti anyamuche iŵaga nganaakamuchisya che Daudi kukola yose yati Ambuje Akunnungu ŵannumbilile. 10 Ambuje Akunnungu ŵanlumbilile che Daudi kuti tachiusamisya umwenye kwa ulongo wa che Sauli ni kwapa ŵelewo. Nombewo tachitawala Isilaeli ni Yuda kutandilila ku Dani mpaka ku Beli Sheba." 11 Che Ishibosheti nganakombola kusala chachilichose, pakuŵa ŵaliji nkwajogopa kwannope che Abuneli.

12 Nipele, che Abuneli ŵaatumile ŵantenga kwa che Daudi, kwele ku Hebuloni ko akaasalile, "Uli, jwakamulile chilambo chi nduni? Ntende lilangano ni une, ni une tinankamuchisye kujitawala Isilaeli jose." 13 Che Daudi ŵajanjile, "Mwambone, tindende lilangano ni mmwe. Nambo ngusaka ntende chindu chimo, patinnyiche muunyichisye ŵankwangu che Mikali mwali ju che Sauli, pelepo ni patutujilane." 14 Sooni che Daudi ŵatumile ŵantenga ku che Ishibosheti mwana ju che Sauli achitiji, "Mumuchisye ŵankwangu che Mikali junalombele kwa misumbu mia moja ja Ŵafilisiti." 15 Nipele che Ishibosheti ŵatumile ŵandu akaajigale che Mikali kwa ŵankwakwe, che Palitieli mwana ju che Laishi. 16 Nambo che Palitieli ŵajawile pamo ni ŵankwakwe akuno ali nkulila litala lyose mpaka kwele ku Bahulimu. Che Abuneli ŵansalile che Palitieli, "Mmuje kumangwenu." Nombejo ŵausile.

17 Che Abuneli ŵaasalile achachekulu ŵa ku Isilaeli kuti, "Kwa moŵa gamajinji mwasachile kuti che Daudi aŵe mwenye jwenu. 18 Sambano, nchitende chele chindu cho, ligongo Ambuje Akunnungu ŵanlanjile che Daudi yeleyi, ‘Kwa nkono wenu mmwe che Daudi jwakutumichila jwangu, tinjakulupusya ŵandu ŵangu Ŵaisilaeli kutyochela kwa Ŵafilisiti ni tinjakulupusya kwa ŵammagongo ŵao ŵane.’" 19 Che Abuneli nombe ŵakungulwiche ni ŵandu ŵa lukosyo lwa Benjamini, nipele ŵajawile mpaka ku Hebuloni kunsalila che Daudi yankati aila yose yalangene kutenda ŵandu wose ŵa ku Isilaeli ni lukosyo lose lwa Benjamini.

20 Che Abuneli paŵanjaulile che Daudi ku Hebuloni, ŵajawile ni ŵandu ishilini, che Daudi ŵaatendele chindimba. 21 Che Abuneli ŵansalile che Daudi, "Sambano uneji tinyaule ni kwasonganya ŵandu wose ŵa ku Isilaeli kwaligongo lyenu mmwe ambuje ŵangu mwenye, kuti akombole kutenda lilangano ni mmwe, kuti mme mwenye jwawo, nomwe timwatawale wose nti inkutikusaka." Che Daudi ŵanlanjile che Abuneli kuti ajaule, nombejo ŵatyosile kwa chitendewele.

Che Yoabu akummulaga che Abuneli

22 Pakumala che Daudi kwalanga che Abuneli kuti ajaule kwa chitendewele, che Yoabu ni ŵandu ŵampepe ŵa che Daudi ŵaiche kutyochela kuŵajile kuputana ngondo, ali ajigele indu iŵasumwile ku ngondo. Kwayele che Abuneli nganaŵa pamo ni che Daudi kwele ku Hebuloni ko pakuŵa che Daudi ŵaliji ŵalanjile ajaule. 23 Che Yoabu paŵausile ali ni ŵangondo wakwe wose uwaliji nawo, ŵasalilwe kuti che Abuneli mwana ju che Neli ŵaliji aiche kukuwonegana ni mwenye che Daudi, nombe mwenye che Daudi ŵaalesile ajaule kwa chitendewele. 24 Che Yoabu ŵanjaulile mwenye ni kunsalila, "Sambano nkutenda ichichi? Nnole che Abuneli ŵaiche kukwenu, kwachichi munnesile ajaule? 25 Uli, nkwimanyilila kuti che Abuneli mwana ju che Neli ŵaiche kukunlambusya? Ŵaiche kuti amanyilile wende wenu ni aila inkuipanganya."

26 Che Yoabu ŵannesile che Daudi ni kwatuma ŵantenga ŵaakuye che Abuneli, nombewo ŵansimene ku chisima chi che Sila ni kummusya, nambo che Daudi nganaimanyililaga chele chindu cho. 27 Che Abuneli paŵausile ku Hebuloni, che Yoabu ŵanjawisye pambali ni nnango nti akusaka kukunguluka nawo kwachisyepela. Pelepo che Yoabu ŵansomile mpamba che Abuneli pa lutumbo ligongo che Abuneli ŵaliji ŵauleje che Asaeli mpwakwe, ni che Abuneli ŵawile. 28 Kanyuma che Daudi paŵapilikene ngani syo ŵatite, "Ambuje Akunnungu akwimanyilila kuti uneji ni umwenye wangu nganitukola maleŵa nkati chiwa chi che Abuneli mwana ju che Neli. 29 Maleŵa ga maulago go gaŵe kwa che Yoabu ni ŵapanyuumba jakwe, ni ŵa paulongo wa atatigwe! Ŵandu ŵapaulongo wa che Yoabu moŵa gose akasoŵekwa ni mundu jwakulwala chipapu, pane jwakulwala matana, pane jwakwenda ni ntindiso, pane kuulajikwa ni lipanga, pane jwakusoŵekwa ni chakulya!" 30 Che Yoabu ni mpwakwe che Abishai ŵammuleje che Abuneli pakuŵapo ŵaliji ŵauleje mpwawo che Asaeli katema ka ngondo kwele ku Gibeoni ko.

Che Abuneli akusichikwa

31 Nipele, mwenye che Daudi ŵalamulile che Yoabu ni aŵala wose uŵaliji pamo nawo, apapulanye yakuwala yao ni kuwala magunia kuti ŵaalilile che Abuneli. Katema ka masiko, mwenye che Daudi ŵajesile panyuma pa lijenesa. 32 Che Abuneli ŵasichikwe kwele ku Hebuloni ko ni mwenye ŵanlilile kwa liloŵe ali mumbali mwa lilembe, sooni ŵandu wose ŵatesile iyoyo peyo. 33 Mwenye che Daudi ŵajimbile alu lujimbo lwa kulila kwa malumbo kwa ligongo li che Abuneli achitiji:

"Uli, iŵele uli mpaka che Abuneli kuwa nti mundu jwakuloŵela?

34 Makono genu nganigataŵikwa.

Ni makongolo genu nganigataŵikwa.

Mbwile nti yakuti kuwa mundu jwangalumbana!"

Nombe ŵandu wosepe ŵatandite kulila sooni.

35 Nipele che Daudi ŵakanile kulya chachilichose pa lyele lyuŵa lya malilo lyo, ni ŵandu wose ŵaiche kukunchondelela kuti alye. Nambo che Daudi ŵalumbilile nikwasalila kuti, "Akunnungu amulaje iŵaga tindye nkate pane chindu chilichose lyuŵa likanaŵe kutiŵila." 36 Ŵandu wose ŵaiweni yeleyo, ni yanonyele. Elo, yosepe iŵatendaga mwenye yanonyelaga ŵandu wosepe. 37 Kwayele, lyuŵa lila, Ŵaisilaeli wose ŵaimanyilile kuti mwenye che Daudi nganakamulangana ni che Yoabu kwaulaga che Abuneli mwanache ju che Neli. 38 Mwenye che Daudi ŵaasalile ŵakutumichila ŵakwe, "Ana ngankwimanyilila kuti lelojino mundu jwankulu ni jwakumanyika kwannope awile pa Isilaeli? 39 Nachiŵamuno uneji ndili mwenye junyitililwe mauta ni Akunnungu, nambo lelojino uneji ndili ndengwiche. Aŵa ŵanache ŵa che Seluya ŵa akuunagasya. Ambuje Akunnungu ŵaalamule ŵandu ŵachigongomalo ŵa kwa ugongomalo watesile."

Bíblia Online

Veja também

Oração para pedir a Deus que aumente a fé quando o coração está cheio de dúvida

Como o amor de Deus cura as dores de relações passadas?