1 Pagapite moŵa gamajinji, che Abusalomu ŵaŵisile chile mutuka jakukwekwelemwa ni falasi pamo ni ŵandu hansini kuti ŵaalongolele. 2 Che Abusalomu ŵasyoŵelele kwimuka kundaŵipe ni kwaula kwima ku litala lyalikwaula ku nnango wa musi. Mundu jwalijose juŵaliji ni ligambo lilyasachile kuti alipeleche kwa mwenye kuti likalamulikwe kweleko, che Abusalomu ŵammilanga mundu jo pambali ni kummusya, "Nkutyochela musi chi?" Mundu jo ajilaga kuti atyochele musi fulani wa lukosyo lwa ku Isilaeli, 3 che Abusalomu ŵansalilaga kuti, "Magambo genu gali gausyene. Nambo ngapagwa mundu jwakwima pamalo pa mwenye kumpikanila." 4 Sooni, che Abusalomu ŵansalilaga kuti, "Ikaŵe kuti ŵasagwile uneji kuti me jwakulamula jwa ku Isilaeli, kila mundu jwakwete magambo pane isausyo iliyose, akaiche kwa uneji, noneji ngaalamwile yele yaakuti ili isyene yo." 5 Kupunda ni yeleyo, mundu jwalijose juŵaiche kwa che Abusalome ni kwajinamila kwa uchimbichimbi, che Abusalomu ŵankamwile ni makono gakwe ni kwakumbata. 6 Nipele, mwelemo ni muŵatendelaga che Abusalomu kwa Ŵaisilaeli wose ŵaŵaikaga kwa mwenye kuti ŵalamulile. Pakutenda yeleyo, che Abusalomu ŵatesile Ŵaisilaeli ŵajinji ankunde mmitima jao.

7 Pali papite yaka ncheche, che Abusalomu ŵaasalile mwenye kuti, "Choonde mungunde nyaule ku Hebuloni ko kuti ngatende inalumbilile kwa Ambuje Akunnungu, 8 pakuŵa une jwakutumichila jwenu, panatemi akula ku Geshuli mu chilambo cha ku Lamu, nalumbilile kwa Ambuje Akunnungu njitiji iŵaga Ambuje Akunnungu tachimmusya kumusi ku Yelusalemu, nipele tinjapopelela Ambuje Akunnungu kwele ku Hebuloni ko." 9 Nombe Mwenye ŵansalile kuti, "Njaule mu chitendewele." Che Abusalomu ŵatyosile kwaula ku Hebuloni. 10 Nambo che Abusalomu ŵatumile utenga kwachisyepela ku ngosyo syose sya ku Isilaeli, waukuti, "Papopo patimpikane kusona kwa lipenga, njileje kuti, ‘Che Abusalomu atendekwe kuŵa mwenye kwele ku Hebuloni ko!’" 11 Che Abusalomu paŵajawile ku Hebuloni ko, ŵajawile ni ŵandu mia mbili ŵaŵaalaliche kutyochela ku Yelusalemu. Nombe ŵanyawo ŵajawile kweleko kwa nningwa wambone, mwangamanyilila chindu chilichose nkati ukotopasyo wa che Abusalomu. 12 Che Abusalomu paŵaliji nkutyosya mbopesi, ŵatumile utenga ku musi wa ku Gilo kwaŵilanga che Ahitofeli, juŵatamaga ku musi wa ku Gilo, juŵankamuchisyaga mwenye che Daudi kulamula indu. Kwayele malindi wa che Abusalomu wapatile machili, ni ŵandu ŵaŵalongene ni che Abusalomu ŵajonjesyeche.

13 Jwantenga ŵaiche ni kunsalila che Daudi kuti, "Mitima ja Ŵaisilaeli jikukamulangana ni che Abusalomu!"

14 Nipele, che Daudi ŵaasalile ŵakutumichila ŵakwe ŵaŵaliji pamo nawo mu mmusi wa ku Yelusalemu kuti, "Njisangane, tuutuche, nangaŵaga yeleyo ngapagwa jutalame. Tujanguyeje kutyoka, che Abusalomu akukombola kwika pelepa kwa chitema ni kummulaga kila mundu mu musi wu."

15 Ŵakutumichila wose ŵa mwenye ŵanjanjile mwenye jula kuti, "Uweji ŵakutumichila ŵenu tuli chile kupanganya chachili chose chinkuchisaka alakwe mwenye." 16 Nipele, mwenye ŵatyosile pamo ni ŵandu ŵa munyuumba jakwe ni ŵakutumichila ŵakwe wose, nambo ŵaalesile ilanga yakwe likumi ajigose nyuumba ja chimwenye.

17 Mwenye ŵatyosile pamo ni ŵandu ŵakwe wose. Nambo ŵajimi kanandi paŵaichenje pa nyuumba jajili kumbesi musi. 18 Ŵakutumichila ŵakwe wose, pamo ni Ŵakeleti ni Ŵapelesi ŵaŵaliji ŵakulindilila ŵakwe, ni Ŵagiti wose mia sita, ŵaŵankuiye mwenye che Daudi kutyochela ku musi wa ku Gati ŵapitile paujo pa mwenye achinnongolelaga. 19 Nipele, mwenye che Daudi paŵammweni che Itai jwa lukosyo lwa Ŵagiti, ŵansalile, "Ligongo chichi nomwe ntyosile pamo ni uweji? Mmuje nkatame ni jwele mwenye che Abusalomu. Pakuŵa mmwejo nli jwannendo akuno, sooni mmweji mbutwiche kutyochela kumangwenu. 20 Mmweji nnyiche akuno liiso. Ana lelo nantende mme mundu jwakwendajenda pamo ni uweji, akuno ngangukumanyilila kungwaula? Mmuje kumangwenu pamo achalongo achinjenu. Nombe Ambuje Akunnungu antendele indu yambone ni mwakulupilichika kwakwe."

21 Nambo che Itai ŵanjanjile mwenye, "Ngulumbila kwa Ambuje Akunnungu ŵajumi ni kwa alakwe ambuje ŵangu mwenye, palipose pachimme, iŵaga mu chiwa pane mu umi, niuneji jwakutumichila jwenu time papopo."

22 Nipele, che Daudi ŵansalile che Itai, "Mwambone, twende basi." Nipele che Itai Mgiti ŵapitile nsyene jo pamo ni achalume ŵaŵaliji nawo pamo ni ŵanache ŵao. 23 Che Daudi paŵaliji nkupita pamo ni ŵandu ŵakwe, ŵandu wose ŵaŵasigalile mu chilambo mo ŵalisile kwa kunyanyisya. Mwenye che Daudi ŵajombweche lichemba lya Kidiloni pamo ni ŵandu wose, ni ŵajawile mwipululu.

24 Che Sadoki nombe najo ŵaliji papopo pamo ni Ŵalawi wose ali ajigele Lisanduku lya Lilangano lya Ambuje Akunnungu. Ŵatusile paasi Lisanduku lya Akunnungu lyo, nombe jwambopesi che Abiasali ŵatyosisye mbopesi mpaka ŵandu wose paŵamasile kukopoka mu musi ŵa ku Yelusalemu. 25 Nipele mwenye ŵansalile che Sadoki, "Nlijigale Lisanduku lya Lilangano lya Ambuje Akunnungu nliusye mu musi. Naga Ambuje Akunnungu taachingunda, tachimusya apano, ni kuundesya naliwone sooni Lisanduku lya lilangano pamo ni pamalo pano paakutama. 26 Nambo iŵaga Ambuje Akunnungu ngakunonyelwa ni une, nipele, uneji ndili chile, ambanganyichisye chachilichose chakuchiona kuti chili chambone kukwakwe." 27 Mwenye che Daudi ŵansalile sooni jwambopesi che Sadoki, "Mmweji nli jwakwiwona yakwiwona, munjigale mwanagwenu che Ahimaasi ni che Yonatani mwanache jwa che Abiasali mmujangane kumusi mu chitendewele. 28 Une tingalindilile pa yakombochela kwele ku chipululu mpaka pachimuusalile indu yaikuti kwendelechela." 29 Kwayele che Sadoki ni che Abiasali ŵaliusisye Lisanduku lya Lilangano lya Ambuje Akunnungu mu musi ku Yelusalemu ni kutama mmomo.

30 Nambo che Daudi ŵajendelechele ni ulendo, ŵakwesisye chikwesya cha Miseituni akuno ali nkulila, nganawala ilatu, ni ali aunichile nguwo ku ntwe kulosya kuti akusupuka. Nombe ŵandu wose ŵaŵaliji pamo nawo ŵaunichile mitwe jawo ni ŵaliji nkukwesya chikwesya akuno ali nkulila. 31 Kele katema ko, che Daudi ŵasalilwe kuti che Ahitofeli ŵaliji pamo ni ŵakugalauka ŵaŵaliunjile ni che Abusalomu. Pelepo che Daudi ŵapopesile achitiji, "Alakwe Ambuje Akunnungu, chachilichose ngunchondelela, ngagalausye maloŵe ga che Ahitofeli gaŵansalile che Abusalomu gaŵe gangali mate."

32 Che Daudi paŵaiche pachanya chikwesya, peuto paŵasyoŵelele kwapopelela Akunnungu, mundu jumo liina lyakwe che Hushai jwakutyochela ku Aliki ŵaiche kukunchingamila, yakuwala yakwe ili yepapule ni ali alitasile luundu mu ntwe wakwe. 33 Che Daudi ŵansalile kuti, "Mwajaulaga pamo ni une chimundopele. 34 Nambo mmwejo timungamuchisye une naga nkuwujila ku musi wa ku Yelusalemu, kweleko nkaasalile che Abusalomu kuti ‘Alakwe mwenye une time jwakutumichila jwenu, mpela inatite kuŵa jwakutumichila kwa atati ŵenu kuundanda ko.’ Kwakutenda yeleyo timungamuchisye une ni kugakanila maloŵe gatakaŵechete che Ahitofeli ku che Abusalomu. 35 Ŵambopesi che Sadoki ni che Abiasali taŵe pamo nomwe mu mmusi! Nipele, chachilichose chichimpikane ku nyuumba ja mwenye, mwasalile ŵambopesi che Sadoki ni che Abiasali. 36 Nnole ŵanache ŵawo ŵaŵili achalume, che Ahimaasi mwana jwa che Sadoki ni che Yonatani mwana jwa che Abiasali, alinji pamo nao. Chachilichose chichimpikane tinchatuma aiche kukuumanyisya." 37 Nipele, che Hushai mmbusanga jwa mwenye che Daudi, ŵausile ku Yelusalemu katema che Abusalomu paŵaliji nkwinjila mu musi.