1 Mwenye che Daudi paŵaliji nkutama ku nyuumba jakwe ja uchimwene, nombe Ambuje Akunnungu ali ankombolesye kukola chitendewele ni ŵammagongo wakwe kulikose, 2 mwenye che Daudi ŵansalile jwakulondola jwa Akunnungu che Natani kuti, "Nnole, uneji ngutama mu nyuumba jetaŵikwe ni itela ya mielesi, nambo lisanduku lya lilangano lya Ambuje Akunnungu likutama mu lisakasa."

3 Che Natani ŵanjanjile mwenye, "Njaule nkatende chilichose chinkuchiganisya muntima mwenu, pakuŵapo Ambuje Akunnungu ali pamo ni mmwe." 4 Nambo chilo chilachila Ambuje Akunnungu ŵansalile che Natani, 5 kuti "Njaule nkaasalile jwakutumichila jwangu che Daudi kuti ‘Ambuje Akunnungu akuti nnyi: Uli mmwejo timundaŵile uneji nyuumba jakutama? 6 Kutandilila alila lyuŵa panaakopwesye Ŵaisilaeli mu chilambo cha ku Misili mpaka lelojino nganindame mu nyuumba. Nyesile kulikose njitamaga mmasakasa. 7 Kulikose kunyawile ni Ŵaisilaeli, uli apali chilongola julijose jwa lukosyo lwa Isilaeli junanlamulile kuti ŵagose ŵandu ŵangu Ŵaisilaeli junammusisye kuti: Kwachichi nganimundaŵila nyuumba ja itela ya mielesi.’"

8 "Kwayele, munsalile jwakutumichila jwangu che Daudi: Ambuje Akunnungu ŵa machili gose akuti nnyi, ‘Nantyosisye mwitinji kumwachingaga ngondolo, kuti mwatawale ŵandu ŵangu Ŵaisilaeli. 9 Kutandilila katema ko mele pamo ni mmwe kulikose kumwajawile ni naauleje ŵammagongo ŵenu wose paujo penu. Tinantende mme jwankulu mpela achakulu ŵane ŵapachilambo. 10 None tinaape ŵandu ŵangu Ŵaisilaeli pamalo pakutama, ni tinjatamika kweleko kuti akole malo gawogawope gakutama pangali ŵakwasausya sooni. Ni ŵandu ŵachigongomalo ngasiŵaalagasya sooni nti iyaliji kuundanda po, 11 kutandilila katema panaasagwile ŵakulamula kwalongosya ŵandu ŵangu Ŵaisilaeli. Sooni une tinankulupusye ni ŵammagongo ŵenu wosepe. Kupunda ni yeleyo, une Ambuje Akunnungu nguntangachisya kuti tinantaŵile nyuumba. 12 Ndaŵi jitinchiwa ni pitachinsika mmalembe ga achinangolo ŵenu, jumo jwa ŵanache ŵenu jutimummeleche mmwe mwasyene tinjintenda aŵe mwenye pamalo penu, ni une tinjiulimbisya umwenye wakwe. 13 Jwelejo ni jutachitaŵa nyuumba kwaligongo lya liina lyangu ni chitengu chakwe cha umwenye tinjichilimbisya moŵa gose pangali mbesi. 14 Uneji tinjiŵa atatigwe, nombejo tachiŵa mwanangu. Atendaga yangalumbana, tinjinjamuka nti ŵandu yakuti kwajamuka achiŵanagwe ni lubokola. 15 Nambo ngasinantyochesya chinonyelo changu changamala nti inatite pakuchityosya ku che Sauli, junantyosisye paujo penu. 16 Tiinjiulimbisya uŵelesi wenu ni umwenye wenu moŵa gose pangali mbesi. Chitengu chenu cha umwenye tiinjichilimbisya moŵa gose pangali mbesi.’"

17 Che Natani ŵansalile che Daudi indu yose iŵasalilwe ni Akunnungu mu yakuilola yo.

18 Nipele mwenye che Daudi ŵajinjile mu lisaka lyalili ni upagwe wa Ambuje Akunnungu, ŵatemi ni ŵapopesile kwa Ambuje Akunnungu achitiji, "Alakwe Akunnungu ŵali ni ukombole, uneji nduni ni uŵelesi wangu ali ŵani, pakuŵa, nganguŵajilwa kuipochela indu yamundendele uneji ni kuunjimbichisya mpaka apano pandili lelo! 19 Sooni, chindu chi chaliji chamwana pameso pa ŵalakwe Ambuje Akunnungu. Kupunda ni yeleyo mwalanjile ŵandu ŵapaulongo wangu indu yekulungwa mu yaka yejinji yaikwika ni muunosisye indu yankati iŵelesi yejinji yaikuika, ŵalakwe Ambuje Akunnungu. 20 Saleje ichichi yakupunda kukwenu! Pakuŵapo mmweji nkuumanyilila uneji jwakutumichila jwenu. 21 Kwaligongo lya chilanga chenu, ni malinga ni ntima wenu, ntesile yekulu yose yo, kuti une jwakutumichila jwenu ndameje njimanyililaga. 22 Ambuje Akunnungu ŵanli ni machili gose ŵalakwejo nli ŵakulu kwapunda ŵane wose. Nganapagwa Akunnungu jwali mpela malinga ni yanayose ituipikene ni mapilikanilo getu. 23 Sooni ana ŵandu chi pachilambo pano ŵakukombola kwalinganya ni ŵandu ŵenu Ŵaisilaeli, ŵati Akunnungu jwawo ŵajawile kwawombola atyoche ku Misili kuti aŵe ŵandu ŵakwe? Alakwe Akunnungu mwapikaniche pakutendela indu yekulungwa ni yakogoya kwaligongo lya ŵandu ŵenu, ni mwatopwele ŵandu ŵa ilambo ine ni minungu jawo paujo pao. 24 Namose kwalimbisya ŵandu ŵenu Ŵaisilaeli kwaligongo lyenu mwasyene, kuti aŵeje ŵandu ŵenu moŵa gose pangali mbesi, nomwe alakwe Ambuje Akunnungu mmele Akunnungu ŵawo."

25 "Nipele, sambano Alakwe Ambuje Akunnungu, choonde nchitindimisye chilanga chimwasasile nkati une jwakutumichila jwenu ni nkati iŵelesi yangu, mwalimbisye moŵa gose pangali mbesi mpela intite pakulanga. 26 Ni liina lyenu tilichiŵa lyekulungwa moŵa gose, ni ŵandu tachitiji, ‘Ambuje Akunnungu ŵa machili gose ali Akunnungu pa Isilaeli.’ Ni iŵelesi yangu, une che Daudi jwakutumichila jwenu, tiichilimbangana paujo penu moŵa gose. 27 Pakuŵapo alakwe Ambuje Akunnungu ŵamachili gose, Akunnungu jwa ku Isilaeli, muumunukulile une jwakutumichila jwenu, nchitiji, ‘Tinantaŵile nyuumba,’ lyelelyo ni ligongo lyakwe mbatile lung'wanu lwa kummenda mapopelo ga."

28 "Ni sambano, alakwe Ambuje Akunnungu, mmweji nli Akunnungu, katema kose nkutindimisya ilanga yenu, ni muunanjile une jwakutumichila jwenu chelechi chindu chambone chi. 29 Kwayele, ngummenda muupe upile uŵelesi wangu uneji jwakutumichila jwenu kuti utamilisye paujo penu moŵa gose pangali mbesi. Pakuŵapo mmweji Ambuje Akunnungu nnajile yeleyo, sooni kwa upile wenu, uŵelesi wangu tiuchikola upile moŵa gose pangali mbesi."