2 Samuel 13

Che Amunoni akunkamulila che Tamali alumbugwe

1 Ni yaliji che Abusalomu mwanache jwa che Daudi ŵakwete alumbugwe juŵaliji jwakusalala kwannope, liina lyakwe ŵaŵilanjikwe che Tamali. Nombe mwanache jwine ju che Daudi liina lyakwe che Amunoni, ŵannonyele che Tamali. 2 Che Amunoni chaakolele chakugona ni che Tamali mwakwichila kuŵa jwakulwala kwaligongo lya che Tamali alumbugwe, pakuŵapo che Tamali ŵaliji jwangaonegana ni jwannume, ni yaoneche kuti ili yakulimba kwa che Amunoni kwatendele chachilichose. 3 Nipele, che Amunoni ŵakwete mbusangagwe liina lyakwe che Yonadabu mwanache jwa che Shimea, mpwakwe che Daudi. Che Yonadabu jo ŵaliji mundu jwakwete umanyilisi nnope wa pachilambo. 4 Che Yonadabu ni ŵammusisye che Amunoni kuti, "Mmweji nli mwanache jwa mwenye, ligongo chichi nkuganda ni kuloleka jwangasangalala kila lyuŵa? Ana ligongo chichi ngankuusalila une?"

Che Amunoni ŵanjanjile kuti, "Une ngunnonyela che Tamali nlumbugwawo achimwene jwangu che Abusalomu."

5 Che Yonadabu ŵansalile che Amunoni, "Njaule nkagone pachindanda penu, nkalambuchisye kulwala. Atati ŵenu pataiche kunnola, mwasalile kuti, ‘Choonde nkaasalile che Tamali nlumbwangu kuti aiche kukuundelechela chakulya kuti une ndye. Aiche kukuundelechela chakulya cho kunokuno, uneji ndili nkulola, sooni nsyene jo andisye.’" 6 Kwayele, che Amunoni ŵajendelechele kugona pachindanda, achilitesyaga akulwala. Mwenye paŵajawile kunnola, che Amunoni ŵansalile kuti, "Choonde nkaasalile che Tamali nlumbwangu kuti aiche akuno, kuti andelechele makalikali une njilolaga, ni sooni nsyene jo andisye."

7 Kwayele, che Daudi ŵapeleche utenga kwa che Tamali juŵaliji mu nyumba ja chimwenye kunsalila kuti "Njaule ku nyuumba ja achimwene jwenu che Amunoni, nkaatelechele chakulya." 8 Kwayele che Tamali ŵajawile ku nyuumba ji che Amunoni, achimwene jwakwe, ni ŵansimene ali agonile. Ŵajigele utandi, ŵawunyile ni ŵakolosisye mikate ni ŵajiteleche che Amunoni achilolaga. 9 Nipele che Tamali ŵajityosisye mikate jo mu chiteleko kuti ŵaape che Amunoni, nambo che Amunoni ŵakanile kulya, ŵatite kila mundu akopoche paasa, ni ŵanawose ŵakopweche. 10 Nipele, che Amunoni ŵansalile che Tamali, "Sambano mumbelechele mikate jo ku chuumba kwangu kuti mundisye." Che Tamali ŵajigele mikate jiŵajiteleche jo ni kujijausya ku chuumba kwa che Amunoni achimwene jwakwe. 11 Paŵapaga mikate jo, che Amunoni ŵankamwile che Tamali ni ŵansalile kuti, "Nnyiche kungone ni une."

12 Nambo che Tamali jo ŵansalile kuti, "Ngwamba achimwene, ngasimuunganganichisya. Chindu chanti yeleyi ngachikusachilwa kupanganyikwa pa Isilaeli. Nkatenda chindu chakuloŵela chi. 13 Kwa uneji ngangukombola kujipilila soni ji. Ni kwa mmwejo, chimme jumo mwa ŵandu ŵangalumbana ni ŵakuloŵela pa Isilaeli. Nipele, uneji ngunchondelela, nkunguluche ni mwenye pakuŵapo ngankanya kuunomba une." 14 Nambo che Amunoni nganasaka kwapikanila che Tamali, ni pakuŵapo ŵampundile machili, ŵankamulile che Tamali jo, ni ŵagonile najo.

15 Nipele, che Amunoni ŵammenjile che Tamali nnope. Ŵammenjile kupunda ni muŵannonyelaga kuundanda. Che Amunoni ŵansalile che Tamali kuti, "Ntyoche njaule."

16 Che Tamali ŵanjanjile kuti, "Ngaŵa yeleyo achimwene, ungalumbana wa kuuminga wu chiuŵe wekulungwa kupunda ni imuundendele yi."

Nambo che Amunoni nganasaka kwapikanila. 17 Ni ŵammilasile jwanchanda juŵantumichilaga, ŵansalile kuti, "Muntyosye jwankongwe ju paujo pangu. Ni nnango mbugale ni njinjili." 18 Che Amunoni ni jwanchanda jula ŵakopweche paasa ni kuugala nnango ni njinjili.

Che Tamali ŵaliji awasile mwinjilo weleu wa makono gamaleu, wetotele ulembo, mwelemu ni muŵawalilaga ŵanache achakongwe ŵa mwenye ŵaŵaliji achiŵaŵalipe. 19 Nipele, che Tamali ŵalitasile liwu muntwe, ŵapapwile mwinjilo wakwe ula, ŵaŵisile makono gakwe pantwe, nipele ŵatyosile achililaga kwakunyanyisya. 20 Che Abusalomu achimwene jwakwe ŵammusisye, "Uli, che Amunoni achimwene jwenu agonile ni mmwe? Sambano mmyalale alumbu ŵangu, ŵelewo ali achimwene jwenu. Yeleyi nkalaga nayo muntima." Nombe che Tamali ŵatamaga ku nyuumba kwa che Abusalomu ali nkusupuka mpela mundu jwakuwilwa.

21 Mwenye che Daudi paŵapilikene chele chindu cho ŵatumbile kwannope. 22 Che Abusalomu ŵanchimile che Amunoni kwannope, ni nganaŵecheta nawo chindu chilichose, ligongo ŵanjalwisye che Tamali alumbugwe.

Che Abusalomu Akummulaga che Amunoni

23 Pali papite yaka iŵili, katema ŵaŵakataga manyunya ga ngondolo ŵa che Abusalomu paŵaliji ku Baali Hasoli chiŵandi ni mpika wa ku Efulaimu, che Abusalomu ŵaalaliche ŵanache ŵachilume wosepe ŵa mwenye kwaula kweleko. 24 Che Abusalomu ŵajawile kwa mwenye che Daudi, ni ŵansalile, "Mwenye, une jwakutumichila jwenu ngwaula ku masengo ga kwakata manyunya ngondolo ni ŵandu ŵangu. Ni ngwaŵenda ŵalakwe mwenye ni ŵakamusi ŵenu nnyicheje tukamulangane ni une."

25 Mwenye ŵanjanjile kuti, "Ngaŵa yeleyo, mwanangu, tukajaula ŵanawose, tukaika kunlemela." Atamose kuti che Abusalomu ŵalinjile kwanyenga atatigwe kuti ajaule, mwenye ŵakanile, nambo ŵampele upile kuti indu ikaajendele yambone. 26 Pelepo che Abusalomu ŵansalile, "Iŵaga ngankwaula, nipele mwaluhusu mpwangu che Amunoni tujaule nawo." Mwenye ŵajanjile kuti, "Ana ligongo chichi ajaule pamo ni mmwe?" 27 Nambo che Abusalomu ŵapundile kunchondelela mwenye, ni kumbesi mwenye ŵakundile kuti che Amunoni ni achiŵanagwe ŵachilume wose ajaulanje. 28 Che Abusalomu ŵalajisye ŵandu ŵakwe kuti, "Munnolechesye che Amunoni patang'we divai ni kukolelwa kwannope, nansalilaga kuti, ‘Mumpute che Amunoni,’ nipele mumpute ni kummulaga. Nkajogopa. Uli, nganiŵa une junampele ulamusi wu? Nlimbangane ni kukola lunda." 29 Kwayele, ŵakutumichila ŵa che Abusalomu ŵantesile che Amunoni mpela iŵatite kusalilwa ni che Abusalomu, nipele ŵanache ŵachilume ŵane ŵa mwenye ŵatyosile kila mundu ŵakwesile mu nyumbu jwakwe ni kuutuka.

30 Ali bado mwitala, che Daudi ŵasalilwe kuti ŵanache ŵakwe wose aulajikwe ni che Abusalomu, nganasigalila namose jumo. 31 Mwenye che Daudi ŵajimi, ŵapapwile yakuwala yao kwa kusupuka ni ŵagonile pasi. Namose ŵakutumichila ŵakwe wose ŵaŵaliji ajimi chiŵandi nawo ŵapapwile yakuwala yao. 32 Nambo che Yonadabu, mwanache jwa che Shimea mpwakwe che Daudi ŵansalile kuti, "Ambuje ŵangu, nkaganisya kuti achiŵanagwenu wose aulajikwe. Che Amunoni jikape ni jwaulajikwe. Gelega che Abusalomu ŵagapanjile kugatendekanya chitandilile akala katema che Amunoni paŵankamulile che Tamali nlumbugwe. 33 Kwayele, ambuje ŵangu, nkaganisya muntima mwenu kuti ŵanache ŵenu ŵanawose awile. Che Amunoni jikape ni jwaulajikwe." 34 Nambo che Abusalomu ŵaliji autwiche. Nombe jwanchanda juŵaliji samu jawo kulindilila, papopo ŵauweni mpingo wekulungwa wa ŵandu alinkuluka ku chitumbi pa litala lyakutyochela ku Holonaimu. 35 Che Yonadabu ŵansalile mwenye kuti, "Nnole, ŵanache ŵenu mwenye ali apano, iŵele mpela une jwakutumichila jwenu indite kunsalila." 36 Namala pe jwakutumichila jula kuŵecheta, ŵanache ŵachilume ŵa mwenye ŵajinjile, ŵatandite kulila kwakunyanyisya. Mwenye ni ŵakutumichila ŵakwe wose, ŵalisile ligogo.

37 Nambo che Abusalomu ŵautuchile kwa che Talimai mwanache jwa che Amihudi, mwenye jwa musi wa ku Geshuli. Mwenye che Daudi ŵalisile malilo ga che Amunoni mwanagwe kwa moŵa gamajinji. 38 Che Abusalomu paŵautuchile ku Geshuli, ŵatemi kweleko kwa yaka itatu. 39 Mwenye che Daudi pakumala matanga ga kuwililwa ni che Amunoni, ŵatandite kulajila kwawona che Abusalomu mwanagwe.

Bíblia Online

Veja também

Oração para pedir a Deus que aumente a fé quando o coração está cheio de dúvida

Como o amor de Deus cura as dores de relações passadas?