1 Che Yoabu ŵasalilwe kuti mwenye ŵaliji nkulila ni kulila kwa malumbo kwaligongo lya chiwa chi Abusalomu. 2 Kwayele, sangalala ja kupunda kwa lyuŵa lyo kwagalawiche kuwa kulila kwa malumbo ŵangondo wose ŵa che Daudi, pakuŵa pa lyuŵa lyo ŵangondo ŵapikene kuti mwenye akwalilila kwa malumbo che Abusalomu. 3 Kwayele, pa lyuŵa lyo, ŵandu ŵajinjile mmusi ali jii mpela ŵandu ŵakuuja mmusi jili jakwete soni pa kuutuka ku ngondo. 4 Mwenye ŵaliunichile kumeso ni kulila kwa kunyanyisya achitiji, "Kulaga kwenu mwanangu che Abusalomu! Kulaga kwenu che Abusalomu mwanangu! Mwanangu!" 5 Pelepo che Yoabu ŵajinjile mu nyuumba ja mwenye, ŵansalile, "Lelo jino ntutasile soni ŵakutumichila ŵenu ŵanawose ŵati tuukulupwisye umi wenu, umi wa ŵanache ŵenu achalume ni umi wa ŵanache ŵenu achakongwe, ni umi wa achakongwe ŵenu ni umi wa ilanga yenu. 6 Ŵalakwe jo nkwanonyela aŵala ŵaakunchima ni kwachima aŵala ŵaakunnonyela. Ntulosisye pangasisika lelo jino kuti ilongola ŵa ngondo ni ŵakutumichila ŵenu nganaŵa chindu kukwenu. Nguiwona kuti lelo, che Abusalomu akaŵe chiŵela ŵajumi, ni uweji ŵanawose tukawile, mmwejo nkasangalele. 7 Sambano njime nkopoche paasa nkakunguluche ni ŵakutumichila ŵenu maloŵe gakwalimbisya mitima. Pakuŵa uneji ngulumbilila kwa liina lya Ambuje Akunnungu kuti naga nganjaula wosepe tiŵatile chilo chino. Ni chelechi tichiŵe changalumbana kwannope kukwenu kupunda yangalumbana yose yinsimene nayo kutandilila kuuchanda wenu mpaka lelo jino." 8 Nipele, mwenye ŵatyosile ŵajawile, ŵatemi pamalo pakwe chiŵandika ni nlango. Ŵandu wosepe paŵasalilwe kuti mwenye ali pannango, ŵanawose ŵanjaulile.

Katema ko, Ŵaisilaeli wose aŵala ŵaŵankuyaga che Abusalomu ŵatilile kila mundu kumangwakwe. 9 Ŵandu ŵa ngosyo syosye sya Ŵaisilaeli ŵaliji nkukangana achinsyenepe, achitiji, "Mwenye che Daudi ŵatuwombwele kwa ŵammagongo ŵetu, sooni ŵatukulupwisye kwa Ŵafilisiti. Nambo sambano achiutwiche chilambo, kwautuka che Abusalomu. 10 Sooni che Abusalomu utwanjitilile mauta kuti aŵe mwenye jwetu, sambano aulajikwe ku ngondo. Sambano ligongo chi ngatukukungulichila yankati kummusya che Daudi aŵe mwenye?"

11 Mwenye che Daudi ŵatumile utenga kwa ŵambopesi che Sadoki ni che Abiasali kuti, "Mwaausye achachekulu ŵa ku Yuda kuti ‘Ligongo chi ŵanyawo akukaŵa kwaula kukwajigala mwenye kuti aujile ku kunyuumba jao ja chimwenye? Pakuŵa indu yakuiŵecheta Ŵaisilaeli wosepe inyichilile une mwenye. 12 Mwanya nli achalongo achinjangu, mwanya nli ŵakuŵelekana ni une, ligongo chi nkukaaŵa kummusya mwenye?’" 13 Sooni che Daudi ŵalajisye maloŵe gakwasalila che Amasa kuti, "Uli mmweji nganimma nlongo njangu jwakuŵelekana? Akunnungu amulaje iŵaga kutandilila lelojino ngasinantenda mmwejo kuŵa jwankulu jwa ŵangondo ŵangu pamalo pa che Yoabu." 14 Kwayele, mwenye che Daudi ŵajitesile mitima ja ŵandu wose ŵa ku Yuda jakunde kwanti ŵaliji ni nningwa umo. Ŵanjauchisye utenga waukuti, "Mmuje pamo ni ŵakutumichila ŵenu wosepe." 15 Nipele, mwenye ŵaiche pa lusulo lwa Yolodani ni ŵandu wosepe ŵa ku Yuda ŵaiche mpaka ku Giligali kukwachingamila mwenye ni ŵanjombosye pa lusulo lwa Yolodani.

16 Che Shimei mwanache jwa che Gela, jwa lukosyo lwa Benyamini mundu kutyochela ku Bahulimu, ŵajangwiye kwaula pamo ni ŵandu ŵajinji kuti ŵaachingamile mwenye che Daudi. 17 Che Shimei ŵajawile pamo ni Ŵabenjamini elufu moja. Che Siba jwakutumichila jwa paulongo wa che Sauli, pamo ni ŵanache ŵakwe kumi na tano ni ŵakutumichila ishilini, ŵajawile kwakwanguya ku lusulo lwa Yolodani mwenye che Daudi akanaiche. 18 Nipele, ŵajombweche lusulo kwapelechesya ŵapaulongo wa mwenye komboka ni ŵatesile kila chindu chiŵaisachile mwenye.

Mwenye che Daudi paŵaŵandichile komboka lusulo lwa Yolodani, che Shimei mwanache jwa che Gela ŵaiche ni ŵatindiŵele ni kukotama mpaka paasi paujo pa mwenye kulosya uchimbichimbi. 19 Ni ŵansalile mwenye kuti, "Choonde ambuje ŵangu mwenye, nkaamalanjila kuti ngwete chileŵo atamuno nkachikumbuchila chileŵo chinatesile alila lyuŵa limwakopokaga mmusi wa ku Yelusalemu. Ngummenda yeila nkaiŵika muntima mwenu. 20 Pakuŵapo uneji jwakutumichila jwenu nguimanyilila kuti natesile sambi. Lyeleli ni ligongo nyiiche lelo jino, ndili jwaandanda pa lukosyo lwa Yusufu, kukunchingamila mmwe mwenye ambuje ŵangu." 21 Pelepo che Abishai mwanache jwa che Seluya ŵatite, "Uli che Shimei ngakusachilwa kuulajikwa, pakutipala ŵannwesile mundu jwati Ambuje Akunnungu ansagwile kwa kunjitilila mauta?" 22 Nambo che Daudi ŵaasalile che Abishai ni che Yoabu nkulugwe kuti, "Ŵani ansalile kuti muungamuchisye? Uli nkusakanga kuunyichisya masauko? Uneji ni jundi mwenye jwa ku Isilaeli, ni ngapagwa mundu julijose pasikati ja Ŵaisilaeli juchaulajikwe lelojino." 23 Nipele mwenye ŵansalile che Shimei kuti, "Ngammulajikwa." Mwenye ŵanlumbilile che Shimei.

24 Che Mefibosheti chisukulu chi che Sauli, ŵajawile nombejo kunchingamila mwenye che Daudi. Kutandilila alila lyuŵa mwenye paŵakopweche mu Yelusalemu mpaka paŵausile mu chitendewele, che Mefibosheti nginagulula ngongolo, nginamyola ndewu, ni sooni nginachapa yakuwala yao. 25 Nipele yaliji paŵaiche kutyochela ku Yelusalemu kwachingamila mwenye che Daudi, che Daudi ŵammusisye, "Che Mefibosheti, ana ligongo chichi nganinjaula pamo ni une?" 26 Che Mefibosheti ŵajanjile, "Alakwe mwenye ambuje ŵangu, mpela inkuti kumanyilila, uneji ndili jwalemele. Nansalile jwakutumichila jwangu kuti, ‘Mundandichile chakutamila pa mbunda jangu kuti ngwele nyaule pamo ni mwenye, nambo jwakutumichila jwangu ŵang'alawiche.’ 27 Sambano anamanile kwa ŵalakwe ambuje ŵangu mwenye. Nambo ŵalakwe ambuje ŵangu mwenye nkuchimanyilila chindu chakutenda mpela katumetume jwa kwinani jwa Akunnungu yakuti kumanyilila. Ntendeje chilichose chinkuchiwona kuti chili chambone kukwenu. 28 Pakuŵa ŵapaulongo wosepe ŵa atati ŵangu ŵaliji ŵandu ŵaŵaŵajilwe kuwa paujo penu, alakwe mwenye ambuje ŵangu. Mwamisile uneji jwakutumichila jwenu pasikati ja ŵandu ŵaŵalyaga pa mpasa wenu. Uli une nguŵajilwa kulichenjela paujo penu ŵalakwe mwenye?" 29 Mwenye ŵansalile, "Nkaasalila mwakupunda nkati indu yenu mwasyene. Uneji masile kulamula kuti mmwejo pamo ni che Siba tingaŵane lisi li che Sauli." 30 Nambo che Mefibosheti ŵansalile mwenye kuti, "Munkunde che Siba jikape ajigale lisi lyose. Uneji ingwanile kuti alakwe mwenye ambuje ŵangu mbusile kumusi kwa chitendewele."

31 Che Basilai mundu jwa ku Gileadi ŵaiche kutyochela musi ku Logelimu. Ŵajawile pamo ni mwenye ku lusulo lwa Yolodani kuti ŵaapelechesye mpaka peesi ja lusulo. 32 Che Basilai ŵaliji achekulwipe kwannope, ŵaliji ni yaka semanini. Nombe che Basilai ŵaliji nkupeleka yakulya kwa mwenye pa moŵa giŵatamaga mwenye wo ku Mahanaimu, pakuŵa jweleju jwaliji mundu jwakusichila kwannope. 33 Nipele, mwenye che Daudi ŵansalile che Basilai, "Tujaule ŵanawose ku Yelusalemu ni une jwakwe tingampe indu itiyinsoŵe." 34 Nambo che Basilai ŵansalile mwenye kuti, "Mwenye, nganingola yaka yejinji, pakuti nyaule ni mmwejo ku Yelusalemu. 35 Uneji lelojino ngwete yaka semanini. Uli, ngukombola kulekanganya indu yambone ni yangalumbana? Uli uneji jwakutumichila jwenu ngukombola kumanyilila kunong'a kwa yakulya pane yakung'wa? Uli uneji ngukombola kupikanila yambone liloŵe lya ŵakwimba achalume pane achakongwe? Ligongo chichi une jwakutumichila jwenu ngaŵe nsigo wakuntopela kwa ŵalakwe mwenye ambuje ŵangu? 36 Uneji jwakutumichila jwenu tinyomboche ni mmwejo lusulo lwa Yolodani ni kumpelechesya kwa lwendo lwejipi. Ligongo chichi, mwenye andipe ntulilo wekulungwa wanti yeleyo? 37 Ngummenda, mungunde uneji jwakutumichila jwenu muje, kuti mwilile ku musi wangu, chiŵandika ni lilembe lya atati ŵangu ni achikulu ŵangu. Nambo aju jwakutumichila jwenu che Kimuhamu, munkunde ajomboche pamo ni mmwe mwenye ambuje ŵangu, ni mumpanganyichisye chilichose chinkuchiwona chili chambone."

38 Mwenye ŵansalile, "Che Kimuhamu tajaule ni une, ni tinantendele chilichose chachili chambone kukwenu. Ni chilichose chichinsache nantendele, tinantendele." 39 Pelepo ŵandu wosepe ŵajombweche lusulo lwa Yolodani ni mwenye nombe ŵajombweche. Mwenye ŵagolwesye makono ni kwakupata che Basilai ni kwapa upile, ni che Basilai ŵausile kumangwakwe.

40 Mwenye ŵajombweche ni ŵajawile mpaka ku Gileadi, ni che Kimuhamu ŵalongene nawo. Ŵandu wosepe ŵa ku Yuda ni nusu ja ŵandu ŵa ku Isilaeli ŵampelechesye mwenye. 41 Nipele, ŵandu wosepe ŵa ku Isilaeli ŵaiche kwa mwenye ni kunsalila, "Ligongo chichi achalongo achinjetu ŵandu ŵa ku Yuda akuliwona kuti akwete chigolochelo chakunjigala ni kumpelechesya ŵalakwe pampepe ni ŵapannango wenu ni ŵandu ŵenu wose, kunjombosya lusulo lwa Yolodani?"

42 Ŵandu ŵa ku Yuda ŵajanjile ŵandu ŵa ku Isilaeli kuti, "Twatesile yeleyo ligongo, mwenye ŵa ali nlongo njetu nsyenesyene. Kwachichi nkutumbila kwaligongo lya chindu chi? Ana uweji tulile chilichose pa katema kalikose chakuti mwenye atupele? Pane ŵelewo atupele ntuuka uliwose?"

43 Ŵandu ŵa ku Isilaeli ŵaajanjile ŵandu ŵa ku Yuda kuti, "Uweji ni utukuŵajilwa kuti che Daudi aŵe mwenye jwetu mala kumi kumpunda mwenye. Ligongo chi mwatunyosisye? Ana uweji ngaŵa ni utwaliji ŵandanda kuŵecheta kuti mwenye ŵetu auje sooni?"

Nambo ŵandu ŵa ku Yuda ŵaŵechete kwa maloŵe gakalipa nnope kwapunda Ŵaisilaeli.