1 Nipele ngosyo syose sya ku Isilaeli syanjaulile che Daudi kwele ku Hebuloni ko, ni kunsalila kuti, "Nnole, uweji tuli achalongo ŵenu ŵakuŵelekana. 2 Kuundanda ko che Sauli paŵaliji mwenye jwetu uweji, mmweji ni jumwalongwesye Ŵaisilaeli ku ngondo, ni Ambuje Akunnungu ŵannanjile kuti, ‘Timme jwakuchinga jwa ŵandu ŵangu Ŵaisilaeli, ni timme jwankulu pa Isilaeli.’" 3 Nipele achachekulu wose ŵa ku Isilaeli ŵanjaulile mwenye che Daudi kwele ku Hebuloni ko, nombejo ŵatesile lilangano nawo paujo pa Ambuje Akunnungu, nipele ŵanjitilile mauta che Daudi kuti aŵe mwenye jwa ku Isilaeli. 4 Che Daudi ŵaliji ni yaka salasini paŵatandite kutawala, ni ŵatawele kwa yaka alobaini. 5 Kwele ku Hebuloni ko, ŵaatawele ŵandu ŵa ku Yuda kwa yaka saba ni miesi sita, ni kwele ku Yelusalemu ko ŵaatawele ŵandu ŵa ku Isilaeli pamo ni ŵandu ŵa ku Yuda kwa yaka salasini na tatu.

6 Kanyuma mwenye ni ŵandu ŵakwe ŵajawile ku Yelusalemu kukwagungumuchila Ŵayebusi ŵaŵaliji achinsyene chilambo cho. Nambo Ŵayebusi Ŵanchembulwisye achitiji, "Nganjinjila mu musi mu, pakuŵa namose ŵangalola ni ŵalemele tachinsiŵila." Ŵansalile yeleyo ligongo ŵaganisisye kuti che Daudi ngaakakombole kwinjila mmusi mo. 7 Namose yeleyo, mwenye che Daudi ŵasumwile likome lya Siyoni, ni musi wo waŵilanjikwe, "Musi u che Daudi."

8 Palyuŵa lyo, che Daudi ŵatite, "Mundu jwalijose jutachaputa Ŵayebusi apitile ku nkolola kuti akaapute ŵalemele ni ŵangalola ŵati mbumu jangu jikwachima." Lyelelyo ni ligongo ŵandu akuti, "Ŵangalola ni ŵalemele ngaajinjila mu nyuumba ja uchimwene."

9 Che Daudi ŵatemi ku likome lyo, ni musi wo wauŵilasile "Musi u che Daudi." Che Daudi ŵagumbesye litaka pamalo papaliji ni lichemba kutandilila chakungopochelo lyuŵa kwaula mukanti musi. 10 Nombe che Daudi ŵapundile kukola machili kwannope ligongo Ambuje Akunnungu, Akunnungu jwa ŵangondo ŵa kwinani ŵaliji pamo najo.

11 Nipele, mwenye che Hilamu jwa ku Tilo ŵatumile ŵantenga ku che Daudi, ŵampelechele sooni itela ya mielesi, ni maselemala ni ŵakutaŵa ŵaŵataŵile nyuumba ja uchimwene ji che Daudi. 12 Kwayele, che Daudi ŵamanyilile kuti Ambuje Akunnungu ŵaliji anlimbisye kuti aŵe mwenye jwa ku Isilaeli, ni kuutenda umwenye wakwe uŵe wekulungwa kwaligongo lya ŵandu ŵakwe ŵa ku Isilaeli.

13 Che Daudi paŵatyosile ku Hebuloni ni kwika ku Yelusalemu ŵalombele achakongwe ŵajinji ni kukola ilanga yejinji. Ni ŵaŵeleche ŵanache ŵachilume ni ŵachikongwe ŵajinji. 14 Gelega gali meena ga ŵanache ŵachilume, ŵaŵaŵeleche kwa achakongwe ŵakwe kwele ku Yelusalemu ko: Che Shamua ni che Shobabu ni che Natani ni che Selemani, 15 ni che Ibali ni che Elishua ni che Nefegi ni che Yafia 16 ni che Elishama ni che Eliada ni che Elifeleti.

17 Ŵafilisiti paŵapilikene kuti che Daudi ŵaajitilile mauta aŵe mwenye jwa ku Isilaeli, ŵanawose ŵapite kukwasosa kuti ŵaakamule ni kwajigala, nambo che Daudi paŵapilikene ngani jo, ŵatulwiche kuja kwinjila mu likome. 18 Ŵafilisiti ŵaiche ni kuŵika chigono ku chiŵata cha ku Lefaimu. 19 Nipele, che Daudi ŵammusisye Ambuje Akunnungu, "Uli, nyaule ngaapute Ŵafilisiti? Uli chimuundende naapunde?" Nombe Ambuje Akunnungu ŵansalile che Daudi, "Njauleje, pakuŵapo kusyene tinannetende mwapunde Ŵafilisiti." 20 Nipele, che Daudi ŵakuiche ku Baali Pelasimu, ni kwapunda Ŵafilisiti, nipele ŵatite, "Ambuje Akunnungu apitile pasikati ja ŵammagongo ŵangu nti chikumba meesi." Lyele ni ligongo pamalo po paŵilanjikwe Baali Pelasimu. 21 Ŵafilisiti ŵautwiche, ŵalesile inyago yao, nombe che Daudi ni ŵandu ŵakwe ŵaijigele.

22 Ulendo waaŵili, Ŵafilisiti ŵaiche sooni ni kuŵika chigono ku chiŵata cha Lefaimu. 23 Che Daudi paŵammusisye Ambuje Akunnungu, Ambuje Akunnungu ŵanjanjile kuti, "Nkaagungumuchila nchityochelaga akuno kunli kuno, nambo nsyungule ni kwagungumuchila upaande wine nchityochelaga malo gagakulolegana ni itela ya mibani. 24 Ni patimpikane liloŵe nti misiindo ja sajo kutyochela pa itela ya mibani jo, pelepo nlimbe ntima pakuŵapo une tiiche kulongolela mmbujo mwenu kuti ngaapute ŵangondo ŵa Ŵafilisiti." 25 Nipele, che Daudi ŵatesile mpela iŵasalilwe ni Ambuje Akunnungu, nombejo ŵaaputile Ŵafilisiti kutandilila ku Geba mpaka ku Geseli.