1 Nipele Ambuje Akunnungu ŵantumile jwakulondola che Natani ku che Daudi. Che Natani ŵanjaulile che Daudi, ŵansalile kuti, "Ŵapali achalume ŵaŵili pa musi umo. Jumo ŵaliji jwachipanje ni jwine ŵaliji jwakulaga. 2 Jwachipanje jula ŵakwete ngondolo syasijinji ni ng'ombe syasijinji nnope. 3 Nambo jwakulaga jula nganakola chindu chine chilichose ikaŵe kangondolo kankolo kamope, kele kaŵasumile. Kangondolo ko ŵakagosile nombeko kakusile munyuumba jakwe pamo ni achiŵanagwe. Ngondolo jo ŵajilisyaga chakulya chilachila nti chichalyaga ni kujing'wesya mu chikombe chakwe nsyene.Ŵagonaga ali akapakete pa makongolo gakwe. Kaliji mpela mwanache jwakwe jwankongwe. 4 Palyuŵa limo jwachipanje jula ŵasime ni jwannendo. Nipele jwachipanje jula nganasaka kwigala jumo mwa ngondolo syakwe nsyene pane ng'ombe jakwe, kuti ansinjile jwannendo jwakwe. Pamalo pakwe ŵajawile ni kujigala ngondolo ja jwakulaga jula, ni kunsinjila jwannendo jwakwe." 5 Che Daudi paŵapilikene ngani sya mundu jwachipanje jo, yaachimile kwannope. Ni ŵansalile jwakulondola che Natani kuti, "Ngulumbila kwa Ambuje Akunnungu ŵajumi kuti mundu jwatesile yeleyo akuŵajilwa kuwa! 6 Akusachilwa anlipe mundu jwakulaga jo kangondolo ko, sooni pa kangondolo ko awuchisye ŵananche ŵane ŵangondolo ncheche, pakuŵapo atesile chindu changalumbana ni nganakola chanasa!"

7 Jwakulondola che Natani ŵansalile che Daudi, "Mmweji ni mundu jo! Sambano mpilikane, chelechi ni chakusala Ambuje Akunnungu, Akunnungu jwa ku Isilaeli, ‘Nanjitilile mauta mme mwenye pa Ŵaisilaeli ni nankulupwisye mmakono mu che Sauli. 8 Nampele umwenye wa mmbuje gwenu ni achiŵali ŵakwe, aŵe achiŵankwenu sooni nantesile mme mwenye jwa ŵandu ŵa ku Isilaeli ni ŵa ku Yuda. Yeleyo ikaliji ngaikukwana nganjonjechesye nnope mwakupunda yeleyo. 9 Ligongo chichi, nlinyosisye liloŵe lyangu uneji Ambuje Akunnungu ni kuitenda yakusakala yi paujo pangu? Mummuleje che Ulia jwa lukosyo lwa Ŵahiti, ni lipanga, munjigele ŵankwakwe kuntenda ŵankwenu. Mwatendekasisye Ŵaamoni ammulaje Ulia jo pangondo! 10 Kwayeleyo, pakuŵa muunyosisye une ni munjigele jwankongwe ju che Ulia jwa lukosyo lwa Ŵahiti aŵe ŵankwenu, maulago ngagatyoka pa uŵelesi wenu.’ 11 Gelega ni gaakusala Ambuje Akunnungu, ‘Nnole, tinangwisisye masausyo pannango wenu mwasyene. Tinaajigale achiŵankwenu nchilolaga kumpa jwapachiŵandi penu, nombejo tachigona nawo muusi mbee. 12 Mmweji mwatesile yeleyo kwa chisyepela, nambo uneji tinachitende chelecho muusi mbee Ŵaisilaeli wose achilolaga.’"

13 Nipele, che Daudi ŵansalile che Natani, "Naaleŵele Ambuje Akunnungu." Che Natani ŵansalile che Daudi, "Ambuje Akunnungu annechelesye sambi jenu, nomwe ngammwa. 14 Nambo, pakuŵa kwakupanganya yeleyo mwatesile ŵammagongo ŵa Ambuje Akunnungu alosye manyosyo, mwanache jutimummeleche tachiwa." 15 Nipele che Natani ŵausile kunyuumba kwakwe.

Ambuje Akunnungu ŵamputile mwanache juŵaŵelechele che Daudi ku che Batisheba ŵankwakwe che Ulia jwa lukosyo lwa Ŵahiti, nombejo ŵalwasile nnope. 16 Che Daudi ŵapopesile kwa Akunnungu kuti mwanache alame. Ŵataŵile kulya ni ŵajawile kuchuumba kwakwe, ni chilo chose ŵagonile paasi. 17 Ŵakutumichila achakulu ŵa mu nyuumba mo ŵankuiye ni kunchondelela ajimuche, nambo ŵakanile, ni nganalya chakulya chilichose pamo nawo. 18 Pakumala chijumaa chimo, mwanache jo jwawile. Ŵakutumichila ŵa che Daudi ŵajogwepe kwasalila kuti mwanache awile, pakuŵapo ŵapelaga kuti, "Mwanache jo paŵaliji jwanjumi, twakungulwiche nawo, nambo nganatupikanila. Sambano chitwasalile chinauli kuti mwanache jwakwe awile? Panepa taliulasye."

19 Che Daudi paŵaweni ŵakutumichila ŵakwe akusogoda, ŵaimanyilile kuti mwanache ajasiche. Kwayele ŵaausisye kuti, "Uli, mwanache ajasiche?" Nombe ŵanyawo ŵajanjile, "Elo! Ajasiche." 20 Nipele, che Daudi ŵajimi kutyochela paasi pala, ŵajosile, ŵalipachile mauta ni kuwala nguo sine. Nipele ŵajawile ku nyuumba ja Ambuje Akunnungu ni kwapopelela. Nipele ŵausile ku nyuumba jakwe ni paŵasachile chakulya, ŵampele, nombejo ŵalile. 21 Pelepo ŵakutumichila ŵakwe ŵausisye kuti, "Ana chelechi chili chindu chi chinkuchipanganya chi? Mwanache paŵaliji jwanjumi mmwejo mwataŵile ni kwalilila. Nambo paajasiche, njimi ni kulya chakulya." 22 Che Daudi ŵajanjile, "Isyene mwanache paŵaliji jwanjumi nataŵile ni kulila. Natesile yeleyo ligongo naganisisye kuti, ‘Ana ŵani akwimanyilila? Panepa Ambuje Akunnungu akangolele chanasa kuti mwanache aŵe jwanjumi.’ 23 Nambo sambano ajasiche, kwachichi ndaŵe? Uli, uneji ngukombola kummusya pachilambo? Palyuŵa limo tinyaule kwele kwajawile ko, nambo jwelejo ngakombola kuuja kukwangu."

24 Pelepo che Daudi ŵantusisye ntima che Batisheba ŵankwakwe. Ŵagonile nawo, nombejo ŵakwete chitumbo ni kuligopola mwanache jwannume, ni che Daudi ŵammilasile Selemani. Ambuje Akunnungu ŵannonyele mwanache jo, 25 ni ŵantumile jwakulondola che Natani ku che Daudi kuti ammilanje mwanache jo Yedidia, malumbo gakwe jwakunonyelwa ni Ambuje Akunnungu.

26 Katema ko, che Yoabu ŵaugungumuchile musi wa ku Laba musi wa Ŵaamoni, nombejo ŵausumwile wele musi wa uchimwene wo. 27 Che Yoabu ŵatumile utenga ku che Daudi waukuti, "Naugungumuchile musi wa ku Laba, ni une ngamulile uliwa wao. 28 Sambano mwasonganye mipingo jose ja ŵangodo jajisigele, nkaŵiche chigono kuusyungula musi wo ni kuusumula. Nangaŵa yeleyo, nausumulaga une tiuŵilanjikwe kwa liina lyangu." 29 Kwayele che Daudi ŵaasonganyisye mipingo ja ŵangondo jose, ŵajawile ku Laba, ŵaugungumuchile ni kuusumula musi wo. 30 Kutyochela pantwe wa chinyago cha nnungu Moleki jwa Ŵaamoni, che Daudi ŵajigele chindu mpela singwa cha sahabu chachili ni utopele wa kilogilamu salasini na tano; ni nkati mwakwe mwaliji ni liganga lya ndalama. Che Daudi ŵajigele liganga lyo ni ŵaliŵisile mu chindu chakwe chachili mpela singwa. Sooni ŵajigele indu yejinji nnope mu mmusi wo. 31 Sooni ŵaajigele ŵandu ŵa mmusi wo ŵaaŵisile apanganye masengo kwa kutumia misumeno ni sululu ni maŵago ni kwatesya apanganye masengo pa litanuli lya matofali. Yeleyo ni iŵaitesile misi jinajose ja Ŵaamoni. Mbesi jakwe che Daudi ni ŵandu wose ŵausile ku Yelusalemu.