1 Ambuje Akunnungu ŵaatumbilile sooni Ŵaisilaeli, ŵanyenjile che Daudi, ŵansalile kuti ŵaaŵalanje ŵandu ŵa ku Isilaeli ni ŵandu ŵa ku Yuda. 2 Kwayele, mwenye ŵansalile che Yoabu, ni achakulungwa ŵa mipingo ja ŵangondo ŵaŵaliji pamo nawo, "Njaulangane ku ngosyo syose sya ku Isilaeli kutandilila ku Dani mpaka ku Beli Sheba, nkalembe mena ga ŵandu ŵakuputana ngondo kuti naimanyilile ali ŵalingwa." 3 Nambo che Yoabu ŵanjanjile mwenye kuti, "Ambuje Akunnungu, Akunnungu ŵenu, ŵaajonjechesye Ŵaisilaeli mala mia moja kupunda mwaŵelele sambano, nomwe ambuje ŵangu mwenye nnyiwoneje konjecheka ko ni meeso genu mwasyene. Nambo, ligongo chi alakwe ambuje ŵangu mwenye nkusaka kutenda chele chindu chi?" 4 Nambo chaŵechete mwenye chaliji ni machili kwannope kwa che Yoabu ni achakulu ŵa mipingo ja ŵangondo! Nipele, che Yoabu ni achakulu ŵa mipingo ja ŵangondo ŵatyosile paujo pa mwenye, ŵajawile kwajandika Ŵaisilaeli ŵali ni ukombole wa kuputana. 5 Kuundanda ŵajombweche lusulo lwa Yolodani ni ŵaŵisile chigono ku Aloeli chakulujenda kwa musi kwaula ku kuchiŵata kwaula ku Gadi ni mpaka ku Yaseli. 6 Nipele, ŵajawile ku Gileadi ni ŵajawile ku Kadeshi ku chilambo cha Ŵahiti, nipele ŵajawile ku Dani, ni kutyochela kweleko ŵasyungwile kwaula ku Sidoni. 7 Nipele ŵaiche ku likome lya musi wa ku Tilo, ŵajinjile mu misi jose ja Ŵahivi ni Ŵakanaani. Nipele ŵatyosile kwaula chakulujenda kwa chilambo cha ku Yuda mpaka ku Beli Sheba ko. 8 Piŵamasile kupita mu chilambo chose, ŵausile ku Yelusalemu pakumala miesi tisa na moŵa ishilini. 9 Nipele che Yoabu ŵamjauchisye mwenye chiŵalanjilo cha ŵandu wosepe ŵakukombola kuputana ngondo. Ku chilambo cha Ŵaisilaeli kwapali ni achalume laki nane; ni ku Yuda kwapali ni achalume laki tano. 10 Nambo che Daudi ŵalasile kwannope mu ntima mwakwe pakumala kwaŵalanga ŵandu. Kwayele, che Daudi ŵansalile Ambuje Akunnungu kuti, "Ndesile sambi jekulungwa kwa chindu chimbangenyisye chi. Nambo sano alakwe Ambuje Akunnungu, ngunchondelela muunechelesye uneji jwakutumichila jwenu, pakuŵapo ndesile chindu chakuloŵela kwannope." 11 Kundaŵi kwakwe liloŵe lya Akunnungu lyannyichilile jwakulondola jwa Akunnungu che Daudi juŵaliji jwakulolesya jwa che Daudi kuti, 12 "Njaule ku che Daudi nkaasalile: ‘Yeleyi ni yaakuti kusala Ambuje Akunnungu: Ngumpa kusagula pa iputiko itatu itinjimpa, nomwe nsagule chiputiko chimo chachinjichitenda kukwenu.’" 13 Kwayele, che Gadi ŵanjaulile che Daudi ni kunsalila, "Uli, paŵeje ni sala ja yaka saba mu chilambo mwenu, pane uli, mmweji mwautuche ŵammagongo ŵenu kwa miesi jitatu ali nkunkuilisya, pane kuŵeje ni ilwele yakogoya yakulekanganalekanga pa chilambo pano kwa moŵa gatatu? Sambano nganisye chenene itinjile, ni muusalile kuti ngaasalile ŵandumile wo." 14 Che Daudi ŵajanjile che Gadi kuti, "Ndengwiche malungo. Mmbaya Ambuje Akunnungu wo anyamuche, pakuŵa ali ŵa chanasa kwannope, kupunda kugwilila mmakono mwa ŵandu."

15 Nipele, Ambuje Akunnungu ŵaaichisye Ŵaisilaeli ilwele, kutandilila kundaŵi mpaka pa katema kakaŵichikwe. Ŵandu elufu sabini ŵawile mu chilambo mose kutandilila chakumpoto ku Dani mpaka chakulujenda ku Beli Sheba. 16 Nambo katema katumetume jwa kwinani jwa Ambuje Akunnungu paŵagolwesye nkono wakwe kuti aujonanje musi wa ku Yelusalemu, Ambuje Akunnungu ŵaugalawisye nningwa wakwe. Ambuje Akunnungu ŵansalile jwele katumetume jwakwinani juŵaaulagaga ŵandu jo kuti, "Nneche! Ikwanile; mmusye nkono wenu." Katumetume jwa kwinani jwa Ambuje Akunnungu ŵajimi chiŵandi ni luŵala lwakukuŵitila ngano lwa che Alauna, jwa lukosyo lwa Yebusi. 17 Che Daudi paŵammweni jwele katumetume jwa kwinani juŵaaulagaga ŵandu jo ŵansalile Ambuje Akunnungu kuti, "Nnole, uneji ni jundesile sambi ni kutenda ugongomalo wu! Ŵandu ŵa nganatenda chakulemwa. Ngunchondelela kwannope muunyamuche uneji ni ŵapaulongo wa atati ŵangu."

18 Pa lyuŵa lilyolyo che Gadi ŵanjaulile che Daudi ni ŵansalile kuti, "Nkwesye kanandi, njaule nkaataŵile Ambuje Akunnungu chilisa, ku luŵala lwakukuŵitila ngano lwa che Alauna jwa lukosyo lwa Yebusi." 19 Nipele, che Daudi ŵakwesisye malinga ni liloŵe li che Gadi mpela Ambuje Akunnungu iŵatite pakwasalila. 20 Che Alauna paŵalolite chakwichela ŵammweni mwenye ali nkwaŵandichila ali ni ŵakutumichila ŵakwe, nombejo ŵatyosile, ŵajawile ni kutindiŵala ni kukotama mpaka paasi paujo pa mwenye kulosya uchimbichimbi. 21 Nipele che Alauna ŵammusisye mwenye, "Ligongo chi ambuje ŵangu mwenye muunyichilile uneji jwakutumichila jwenu?"

Che Daudi ŵajanjile, "Iche kukusuma luŵala lwenu lwakukuŵitila ngano kuti naataŵile Ambuje Akunnungu chilisa kuti tauni jajikwamala ŵandu jityoche."

22 Nombe che Alauna ŵansalile che Daudi, "Ambuje ŵangu mwenye, njigale chilichose chinkuchiwona kuti chikunfai ni kutyosya mbopesi. Uneji ngutyosya ngombe si kwaligongo lya mbopesi jakutinisya ni itela yakukuŵitila ngano ni itela ya kwataŵilila ng'ombe paakulima iŵeje sasu. 23 Yelei yose, ngumpa alakwe mwenye. Ngukulupilila kuti Ambuje Akunnungu, Akunnungu ŵenu, tachijikunda mbopesi jenu."

24 Nambo mwenye ŵansalile che Alauna, "Ngwamba! Mmwejo ngamumba chindu chachilichose. Uneji tisume kukwenu kwa ntengo wakwe. Ngangwatyochesya Ambuje Akunnungu, Akunnungu ŵangu, mbopesi jakutinisya janganimbvanganyichisye masengo." Kwayele mwenye che Daudi ŵasumile luŵala lwakukuŵitila ngano ni ngombe kwa ipande hansini ya madini ga feza. 25 Nipele che Daudi ŵaataŵile Ambuje Akunnungu chilisa pamalo po ni kwatyochesya mbopesi sya kutinisya ni sya chitendewele. Nipele Ambuje Akunnungu ŵagajitichisye mapopelo kwaligongo lya chilambo, ni ajila tauni jijaaulagaga Ŵaisilaeli jalesile.