1 Mwenye che Daudi paŵachekulwipe kwannope ŵakutumichila ŵakwe ŵammunichilaga shuka, nambo nganapataga ntukuta. 2 Kwayele ŵakutumichila ŵakwe ŵansalile, "Alakwe ambuje tunsosele mwalimwali pe kuti ataameje ni mmwe angose, agoneje ni mmwe kuti ampeje ntukuta."

3 Nipele, ŵasosilesosile mwali jwakutindigala mu Isilaeli mose, ni ŵampatile mwali liina lyakwe che Abishagi jwa nsinda wa ku Shunami, ni ŵanjawisye kwa mwenye. 4 Mwali jo jwaliji jwakutindigala nnope, ŵangosile mwenye ni kuntumichila ni kugona nawo nambo mwenye nganaonegana nawo.

5 Pamoŵa go che Adonia mwana ju che Daudi, achikulugwe ŵaliji che Hagiti, ŵatandite kuligambaga nsyene kuti chachiŵa mwenye. Ŵaŵisile chile mutuka sya ngondo syakukwekwelemwa ni falasi ni ŵakwela falasi ni ŵandu hansini ŵaalongolele chambujo alinkuutukanga. 6 Nambo che Daudi atati ŵao nganiŵakalipila namose kanandi. Che Adonia ŵasalele nnope, nombe ŵaliji mpwakwe che Abusalomu. 7 Che Adonia ŵaanyenjile che Yoabu ni jwambopesi che Abiasali nkati ukotopasyo wakwe, che Yoabu achikulugwe ŵaliji che Seluya, ni ŵanyawo ŵakundile kukamulana nawo. 8 Nambo jwambopesi che Sadoki ni che Benaya mwana ju che Yehoyada ni che Natani jwakulondola jwa Akunnungu ni che Shimei ni che Lei ni ŵakulindilila ŵakwe che Daudi nsyene, ŵele nganankamuchisya che Adonia.

9 Lyuŵa limo che Adonia ŵatyosisye mbopesi ja ngondolo ni ilango ni ilango yakunakana pa liganga lya Soheleti lyalili chiŵandi ni uliŵa wa Eni Logeli. Ŵaalaliche ku chindimba cha mbopesi jo achapwakwe wose, yaani ŵanache ŵa mwenye che Daudi ni ŵakutumichila ŵa mwenye wose, ŵangondo ŵa lukosyo lwa Yuda, 10 nambo che Nasani jwakulondola jwa Akunnungu ni che Benaya ŵakulindilila ŵakwe che Daudi nsyene ni che Selemani mpwakwe nganiŵaalalika.

11 Nipele che Nasani ŵaajaulile che Batisheba achikulugwe che Selemani kukwausya, "Ana nganimpikana kuti che Adonia jwali achikulugwe che Hagiti alitesile nsyene mwenye ni che Daudi mwenye jwetu ngakujimanyilila ngani ji? 12 Sambano naga nkusaka muuwombole umi wenu ni umi wa mwanagwenu che Selemani ngunsalila yeleyi, 13 njanguye mwajaulile che Daudi nkaasalile, ‘Ana, alakwe mwenye nganimunumbilila une jwakutumichila jwenu nchitiji che Selemani mwanagwenu chatawale pa mmwe ni kutamila chitengu changu cha umwenye? Iŵele uli sano che Adonia aŵele mwenye?’" 14 Che Nasani ŵajendelechele kusala kuti, "Ndi nkuŵecheta ni mwenye, une chinyinjile ni kwasalila kuti gunkugasala gali gausyene."

15 Nipele, che Batisheba ŵanjaulile mwenye ku chuumba chao. Katema ko mwenye ŵaliji achekulwipe nnope ni che Abishagi jwa nsinda wa ku Shunami ŵaliji nkwagosa mwenye. 16 Che Batisheba ŵatindiŵele ni kunkotamila mwenye, ni mwenye ŵausisye, "Ana, nkusaka chichi?" 17 Batisheba ŵajanjile, "Ambuje ŵangu, mwanumbilile une jwakutumichila jwenu Ambuje Akunnungu, Akunnungu ŵenu achipikanaga, kuti, ‘Che Selemani mwanagwenu tachiŵa mwenye pa une ni tachitamila chitengu changu cha umwenye.’ 18 Nambo, sambano che Adonia aŵele mwenye, ni mmwe mwenye ambuje jwangu ngankuchimanyilila chachilichose nkati yele. 19 Atyosisye mbopesi sya ilango ni ilango syamwana yakunakana ni ngondolo syejinji, ni ŵaalaliche ŵanache ŵenu wose ŵa chilume, ni che Abiasali jwambopesi ni che Yoabu jwankulu jwa ŵangondo, nambo che Selemani jwakutumichila jwenu, jwele nganaalalikwa. 20 Alakwe mwenye, ambuje ŵangu, Ŵaisilaeli wose akunnolela mmwe mwasalile mundu chi juchatamile chitengu chenu cha umwenye pamalo pa mmwe. 21 Naga ngantenda yele, pachinchiwa alakwe ambuje ŵangu, une ni mwanangu che Selemani, chatuŵalanjile ŵakuleŵa." 22 Nipele, che Batisheba paŵajendelechelaga kuŵecheta ni mwenye, che Natani jwakulondola jwa Akunnungu ŵaiche. 23 Mwenye ŵasalilwe kuti, "Che Natani jwakulondola jwa Akunnungu aiche, ali pelapa." Nipele che Natani ŵajinjile munkati paujo pa mwenye, ŵatindiŵalile ni kwakotamila. 24 Che Natani ŵausisye, "Uli, alakwe mwenye, mwatite kuti che Adonia chatawale pamalo penu ni kuchitamila chitengu chenu cha umwenye? 25 Pakuŵa lelo jino ŵapite kukupeleka mbopesi, asikite ilango yejinji ni ilango yakunakana ni ngondolo syejinji, nombewo ŵaŵilasile ŵanache wose ŵachilume ŵa mwenye ni achakulu ŵa ngondo ni che Abiasali jwambopesi jwa Akunnungu. Ŵanawose wo akulyanga ni kung'wa paujo pa che Adonia achitiji, ‘Nkole umi wejinji mwenye che Adonia!’ 26 Nambo une jwakutumichila jwenu atamuno jwambopesi che Sadoki ni che Benaya mwana jwa Yehoyada ni che Selemani jwakutumichila jwenu nganatulalika. 27 Uli, yele nnyikundile alakwe mwenye, pangatusalila uweji ŵakutumichila ŵenu kuti mundu chi juchatame pa chitengu chenu cha umwenye pamalo pa mmwe?"

28 Nipele mwenye che Daudi ŵajanjile ni kuti, "Mumilanjile che Batisheba apano." Che Batisheba ŵaiche ni kwima paujo pa mwenye. 29 Nipele mwenye ŵasalile, "Kusyene mpela Ambuje Akunnungu yatite kuŵa ŵajumi, ŵelewo ŵamombwele kutyochela mmasauko gose, 30 mpela munaŵisile chilanga kwenumwe pananlumbilile Ambuje Akunnungu ŵa Isilaeli achipikanaga kuti, ‘Mwanagwenu che Selemani ni jutaŵe mwenye pamalo pa une ni kuchitamila chitengu changu cha umwenye,’ ni ichindende lelo jino." 31 Nipele che Batisheba ŵaatindiŵalile ni kwakotamila mwenye achitiji, "Ambuje ŵangu, mwenye che Daudi akole umi wa moŵa gose pangali mbesi!" 32 Nipele mwenye che Daudi ŵatite "Mumilanjile che Sadoki jwambopesi ni che Natani jwakulondola jwa Akunnungu ni che Benaya mwana ju che Yehoyada." Nombe ŵanyawo ŵaiche ni kwima paujo pa mwenye. 33 Nipele mwenye ŵaasalile, "Mwajigale ŵakutumichila ŵangu nlongane nawo nkaakwesye che Selemani mwanangu pa mbunda falasi jwangu, munjausye ku uliŵa wa ku Gihoni. 34 Kweleko jwambopesi che Sadoki ni che Natani jwakulondola jwa Akunnungu, akaajitilile mauta ga miseituni pantwe kwaŵika pajika kuti aŵe mwenye jwa ku Isilaeli. Nipele ngombe lipenenga ni kunyanyisya nchitiji, ‘Mwenye akole umi wa moŵa gose pangali mbesi!’ 35 Ŵanyamwe chinkuyeje chapanyuma pakwe, paakwika kutama pa chitengu changu cha umwenye. Jwelejo taŵe mwenye pa une, pakuŵa ni junansagwile aŵe mwenye jwa Ŵaisilaeli ni Ŵayuda." 36 Pelepo che Benaya mwana ju che Yehoyada ŵajanjile, "Elo, ni Ambuje Akunnungu, Akunnungu jwa mwenye jwangu nombejo achitende chindu cho chikopochele. 37 Mpela Ambuje Akunnungu muŵaŵelele pamo ni mwenye jwangu, iyoyo aŵeje pamo ni che Selemani, ni kuukwesya umwenye wakwe kuti uŵe ŵakuupunda umwenye wa ambuje ŵangu mwenye che Daudi." 38 Kwayele che Sadoki jwambopesi ni che Natani jwakulondola jwa Akunnungu ni che Benaya mwana ju che Yehoyada pamo ni mipingo jiŵili ja ŵakulindilila ŵa mwenye che Daudi kutyochela ku Pelesi ni ku Keleti, ŵatulwiche ŵanawose, ŵankwesisye che Selemani pachanya pa mbunda falasi jwa che Daudi ni kunjausya ku uliŵa wa ku Gihoni. 39 Che Sadoki jwambopesi, ŵajigele mu Lisakasa lyeŵichikwe pajika kwaligongo lya Akunnungu nzengo wauli ni mauta ga miseituni, ni kwajitilila che Selemani. Nipele ŵagombile ikolilo ni ŵandu wose ŵanyanyisye, "Akole umi wa moŵa gose pangali mbesi mwenye che Selemani!" 40 Nipele ŵandu wose ŵankuiye che Selemani ali nkugomba mapenenga ni kunyanyisya kwa kusangalala nnope ni chilambo chatenganyiche ligongo lya lisegwe lyao. 41 Nipele che Adonia pamo ni achalendo ŵakwe ŵapikene yeleyo ali amasile chindimba cha yakulya. Nombe che Yoabu paŵapilikene lipenenga ŵausisye, "Ana lisegwe lyanti yele ityochele ichichi pamusi pa?" 42 Akanaŵe kumalichisya kuŵecheta, che Yonatani mwana ju che Abiasali jwambopesi ŵaiche. Nombe che Adonia ŵansalile, "Njinjile, pakuŵa mmwejo nli mundu jwambone, ngukulupilila kuti nnyiche nawo utenga wambone." 43 Pelepo che Yonatani ŵajanjile, "Ngwamba, ligongo mwenye che Daudi ambuje ŵetu antesile che Selemani kuŵa mwenye. 44 Mwenye che Daudi ŵaatumile pamo ni che Sadoki jwambopesi ni che Natani jwakulondola jwa Akunnungu ni che Benaya mwana ju che Yehoyada pamo ni mipingo jiŵili ja ŵakulindilila ŵa mwenye che Daudi kutyochela ku Keleti ni ku Pelesi, ni ŵanyawo ankwesisye pachanya pa mbunda falasi jwa mwenye. 45 Nipele ŵapite ku uliŵa wa ku Gihoni ni kweleko che Sadoki jwambopesi ni che Natani jwakulondola, ŵanjitilile mauta kuti aŵe mwenye. Sambano akuujangana achisangalalaga ni sangalala jao jinkujipikana jijenela pa musi wose. 46 Kwayele che Selemani atamile chitengu cha umwenye. 47 Kupunda yeleyo, ŵakutumichila ŵa mwenye ŵaiche kukwapa upile ambuje ŵetu mwenye che Daudi achitiji, ‘Akunnungu ŵenu alitende liina lya che Selemani lipikaniche kulipunda lina lyenu, ni kuutenda umwenye wao uŵe wekulu kuunda umwenye wenu.’ Nombe mwenye ŵakoteme ali pachindanda chakwe, 48 ŵapopesile achitiji, ‘Alapikwe Ambuje Akunnungu ŵa ku Isilaeli, jwambele lelo jino jumo mwa achiŵanangu jwakutama pa chitengu changu cha umwenye, ni andesile jwanjumi mpaka lelo jino kuti nagawone gelega.’"

49 Nipele achalendo wose ŵa che Adonia ŵatojime kwannope, ŵapwilingene kila mundu ni litala lyakwe. 50 Nombe che Adonia, pakuŵa ŵaajogwepe che Selemani ŵautuchile ku Lisakasa lyeŵichikwe pajika kwaligongo lya Ambuje Akunnungu ni kukamula misengo ja chilisa kuti akaulajikwa. 51 Che Selemani ŵapikene kuti che Adonia ŵaliji nkwajogopa nikuti autuchile ku Lisakasa lyeŵichikwe pajika kwaligongo lya Ambuje Akunnungu ni kukamulila misengo ja chilisa achitiji, "Mwenye che Selemani, aanumbilile lelo kuti ngaamulaga une jwakutumichila jwakwe."

52 Mwenye che Selemani ŵajanjile, "Iŵaga ali jwakukulupilichika, nipele ngasinammulasya. Nambo nawonaga kuti akwete chigongomalo, kusyene chawe." 53 Nipele, mwenye che Selemani ŵatumile ŵandu ŵaaŵilanje che Adonia pachilisa pala ŵaajaulile. Nombe che Adoniya ŵaiche ni kutindiŵala ni kwakotamila mwenye che Selemani. Nombe che Selemani ŵaasalile, "Njaule kumangwenu."