1 Reis 2

Che Daudi akwapa che Selemani malajisyo

1 Che Daudi paŵaŵandichile kuwa, ŵaŵilasile che Selemani mwanagwe ni kwapa malajisyo gambesi achitiji, 2 "Mwanangu une awuwu uli ulendo. Nlimbe ntima ni kuŵa ni ntima wangali woga. 3 Ngakamulisye gaakunlajisya Ambuje Akunnungu, Akunnungu ŵenu, ntendeje gaakugasaka ni kukamula malajisyo gakwe ni makanyo gakwe, kugachimbichisya malamusi gao mpela yaitite pakulembekwa mu malajisyo ga che Musa, kuti indu yose injendele uchenene, ni kukola upile kwakulikose kuchinjaule. 4 Mwaajitichisyaga Ambuje Akunnungu, nombewo chakwanilisye lilangano lyao liŵalitesile kwa une paŵaasalile kuti, ‘Iŵaga uŵelesi wenu taachitama yakutikusachilwa, ni iŵaga takamulisye malajisyo gangu kwa mitima jao jose, nganlepela kukola mundu jwakutamila chitengu cha umwenye cha Isilaeli.’

5 "Iyoyo mmwe mwasyene, nkwimanyilila achila chiŵandesile che Yoabu mwana ju che Seluya, iŵatendele achakulu ŵa ngondo ŵaŵili ŵa Isilaeli yaani che Abuneli mwana ju che Neli ni che Amasa mwana ju che Yeseli. Ŵaauleje katema ka chitendewele mpela ila kwaliji ni ngondo. Ŵauleje ŵandu ŵanga chileŵo, ni sano taalalatilwe kwa chindu chaatesile, ni kwamuchikwa chileŵo chakwe. 6 Mmwejo nkuchimanyilila chindu chakwatendela, nambo nkaaleka achekulupe, ni nkaaleka awe kwa chitendewele.

7 "Nambo mwatendele yawema ŵana ŵa che Balisilai jwa ku Gileadi ni kwagosa, mwaleche aŵeje mwa aŵala ŵakulya pampepe ni mmwe. Pakuwa ŵangamwisye panantilaga akuluŵenu che Abusalomu. 8 Iyoyo, nkumbuchile kuti apali che Shimei mwana ju che Gela kutyochela mu lukosyo lwa Benjamini kutyochela musi wa ku Bahulimu, juŵanwesisye kwa kuundukana kwannope panajaulaga ku Mahanaimu. Paŵatuluchile kukusimana ni une akula ku Yolodani, naalumbilile Ambuje Akunnungu achipikanaga, natite kuti ngasinambulaga. 9 Nambo mmwe nkanneka panganjamuka. Nkwete luunda, nkuchimanyilila chakwatenda, namose ali jwanchekulu mwaulaje."

Chiwa chi che Daudi

10 Nipele che Daudi ŵawile ni ŵansichile mu musi u che Daudi. 11 Che Daudi ŵaliji mwenye jwa ku Isilaeli kwa yaka alobaini. Ŵatawele yaka saba ku Hebuloni ni yaka selasini na tatu kwele ku Yelusalemu ko. 12 Nipele che Selemani ŵaliji mwenye ni ŵatemi pa chitengu cha umwenye chi che Daudi atatigwe, ni umwenye wakwe waliji wakulimbangana kwannope.

Chiwa chi che Adonia

13 Nipele che Adonia achikulugwe ŵaliji che Hagiti ŵanjaulile che Batisheba achikulu ŵa che Selemani. Che Batisheba ŵausisye, "Ana nnyichile ichichi?"

Che Adonia ŵajanjile, "Une iiche kwa chitendewele." 14 Che Adonia ŵajendelechele kuŵecheta, "Chipali chindu chingusaka nkunsalila."

Nombe che Batisheba ŵajanjile, "Mmechete."

15 Che Adonia ŵatite, "Mmwe nkwimanyilila kuti umwenye wu waliji wangune. Ŵaisilaeli wose ŵanolaga une nti mwenye jwao. Nambo indu yagalawiche ni umwenye aujigele mpwanga, ligongo Ambuje Akunnungu ŵasachile iŵeje yeleyo. 16 Sambano ngusaka nammende chindu chimo, choonde ngasimunganila."

Che Batisheba ŵatite, "Ayaga nchisale."

17 Che Adonia ŵatite, "Choonde mummende mwenye che Selemani ambe che Abishagi jwa musi wa ku Shunami, nombele kuti aŵe ŵankwangu, pakuŵa nguimanyilila kuti ngajakunkanila mmwe." 18 Che Batisheba ŵanjanjile, "Yambone une chingaŵechete ni mwenye kwa ligongo lyenu."

19 Nipele, che Batisheba ŵajaulile mwenye che Sulemani kukukunguluchila ngani ji che Adonia. Mwenye ŵajimi kuti ŵaapochele achikulugwe. Ŵaajinamile kulosya luchimbichimbi, nipele ŵatemi pa chitengu chao cha umwenye. Ŵalajisye chitengu chine cha umwenye atamile achikulugwe, nombejo achikulugwe ŵatemi chakundyo kwa mwenye. 20 Che Batisheba ŵaasalile mwenye, "Ngwete chindu chamwana chakummenda, choonde ngasimunganila."

Mwenye ŵaasalile, "Nchisale chinkuchisaka achikulu ŵangu, pakuwa ngasinankanila." 21 Achikulugwe ŵatite, "Munneche che Adonia ŵalombe che Abishagi kutyochela ku Shunami." 22 Mwenye che Selemani ŵausisye achikulugwe, "Kwachichi mummendele che Adonia ŵaalombele che Abishagi jwa ku Shunami kuti aŵe ŵankwakwe? Akuŵenda yeleyo pakuŵa akuusaka umwenye, nkumbuchile kuti jwelejo ali achimwene jwangu, nombejo ali ni che Abiasali jwambopesi ni che Yoabu achikulugwe ŵaliji che Seluya, ŵanawose alumbikene!" 23 Nipele mwenye che Selemani ŵaalumbilile Ambuje Akunnungu achipikanaga achitiji, "Akunnungu amulaje iŵaga che Adonia ngaawa kwaligongo lya chindu chaaŵendile chi! 24 Sambano, mpela Ambuje Akunnungu yakuti kutama, juŵamisile ni kunimbisya mu umwenye u che Daudi atati ŵangu. Nombe ambele umwenye une ni uŵelesi wangu mpela iŵatite pakulanga. Kusyene ngulumbila lelojino che Adonia tawe!" 25 Nipele che Selemani ŵalamwile che Benaya mwana ju che Yehoyada akaaulaje che Adonia nombe che Benaya ŵajawile ni kumputa Adonia mpaka ŵawile.

Che Abiasali akutopolwa ni che Yoabu akuwa

26 Nipele, mwenye che Selemani ŵansalile che Abiasali jwambopesi, "Njaule ku migunda jenu jjijili ku Anatoti. Mmwejo nkuŵajilwa kuwa, nambo ngangummulaga sano jino, pakuŵa mwaligosaga Lisanduku lya Ambuje Akunnungu pamwaliji ni atati ŵangu che Daudi, ni sooni gansimene masauko gagasimene atati ŵangu." 27 Nipele che Selemani ŵalekasisye che Abiasali ngasaŵa jwambopesi jwa Ambuje Akunnungu, kuti limalile liloŵe liŵaŵechete Ambuje Akunnungu, ku Shilo kula nkati che Eli ni uŵelesi wao.

28 Che Yoabu paŵapilikene ngani jo, ŵautuchile ku Lisakasa lyeŵichikwe pajika kwaligongo lya Ambuje Akunnungu ni kujikamula misengo ja chilisa kuti akaulajikwa, ligongo jwelejo ŵakamulene ni che Adonia nambo nganakamulana ni che Abusalomu. 29 Mwenye che Selemani ŵapikene kuti che Yoabu autuchile ku Lisakasalya lyeŵichikwe pajika kwaligongo lya Ambuje Akunnungu ni kwima mumbali mwa chilisa. Nipele che Selemani ŵantumile che Benaya mwana ju che Yehoyada, ni ŵansalile, "Njaule nkaaulaje." 30 Nipele che Benaya ŵajinjile ku Lisakasa lya Ambuje Akunnungu ni kwasalila che Yoabu, "Mwenye akuti njise paasa."

Che Yoabu ŵajanjile "Ngwamba! Une chimwilile panopano."

Nombe che Benaya ŵausile kukwasalila mwenye, yajanjile che Yoabu. 31 Mwenye che Selemani ŵanlamulile che Benaya kuti, "Ntende mwaŵechete che Yoabu. Mumbulaje ni kunsika, kuti mundyochesye une ni uŵelesi wose u che Daudi sambi ja kuulaga ŵandu ŵangali chileŵo jiŵajitesile che Yoabu. 32 Ambuje Akunnungu chiŵauchisye che Yoabu kwa kwaulaga ŵele ŵandu ŵaŵili ŵaŵaliji ŵambone kumpunda jwelejo. Ŵauleje ni upanga che Abineli mwana ju che Neli jwankulu jwa ŵangondo ŵa ku Isilaeli, ni che Amasa mwana ju che Yeseli jwankulu jwa ŵangondo ŵa ku Yuda, pangaimanyilila atati ŵangu. 33 Kwayele che Yoabu chajamuchikwe, ni kwamukwa ko chikujendelechele kwa uŵelesi wakwe moŵa gose pangali mbesi. Nambo, ku che Daudi ni uŵelesi ŵakwe ni nnango ŵakwe ni pa chitengu chakwe cha umwenye, Ambuje Akunnungu taachatenda atame kwa chitendewele moŵa gose pangali mbesi."

34 Nipele, che Benaya mwana ju che Yehoyada ŵajinjile mu Lisakasa lyeŵichikwe pajika kwaligongo lya Ambuje Akunnungu ni kummulaga che Yoabu, ŵansichile ku ngunda wa che Yoabu nsyene wauli chiŵandi ni ukweti. 35 Mwenye ŵammisile che Benaya mwana ju che Yehoyada aŵe jwankulu jwa ŵangondo pamalo pa che Yoabu ni che Sadoki aŵe jwambopesi pamalo pa che Abiasali.

Chiwa chi che Shimei

36 Nipele mwenye ŵalajisye kuti aŵilanjikwe che Shimei, nombe paŵaiche ŵansalile, "Nlitaŵile nyuumba jenu pa Yelusalemu papapa, ntame pelepo, nkajaula kwakulikose kula. 37 Pakuŵa lyuŵa lichintyoche ni komboka kasulo ka Kidiloni, kusyene chimmwe, ni chiwa cho chichiŵe chakulisachila mwasyene."

38 Che Shimei ŵajanjile, "Chinsasile chili chambone. Jwakutumichila jwenu chatende mpela insasile ŵalakwe mwenye." Nipele che Shimei ŵatemi ku Yelusalemu moŵa gamajinji.

39 Payamasile yaka itatu, achikapolo ŵaŵili ŵa che Shimei ŵatolochele ku che Akishi mwana ju che Maaka, mwenye jwa ku Gati. Che Shimei paŵapikene kuti achikapolo ŵao ali ku Gati, 40 ŵakwesile mbunda jao, ŵapite ku Gati ku che Akishi kukwasosa achikapolo ŵakwe. Kweleko ŵaasimene ni kwausya kumangwakwe. 41 Mwenye che Selemani ŵapikene kuti che Shimei ŵatyosile ku Yelusalemu, ŵapite ku Gati ni kuuja, 42 pelepo mwenye ŵammilasile che Shimei ni kwasalila, "Ana nganinanlumbisya Ambuje Akunnungu achipikanaga kuti, lyuŵa lichintyoche kwaula paasa pa Yelusalemu, kusyene chimmwe? Ni mmwe mwatite, ‘Chinsasile chili chambone, chindende iyoyo.’ 43 Kwachichi nganinchigosa chilumbilo chenu kwa Ambuje Akunnungu ni nganinjitichisya malajisyo ganampele?" 44 Mwenye ŵajendelechele kwasalila che Shimei, "Nkuumanyilila ugongomalo umwatendele atati ŵangu che Daudi, ni sambano Ambuje Akunnungu tanjamuche ligongo lya yeleyo. 45 Nambo Ambuje Akunnungu chambe upile une ni taachiulimbisya umwenye u che Daudi moŵa gose pangali mbesi." 46 Pelepo mwenye che Selemani ŵaalamwile che Benaya mwana ju che Yehoyada, nombejo ŵajawile ni kumputa che Shimei ni ŵammuleje. Kwaligongo lya yeleyo umwenye u che Selemani walimbangene.

Bíblia Online

Veja também

Oração para pedir a Deus que aumente a fé quando o coração está cheio de dúvida

Como o amor de Deus cura as dores de relações passadas?