1 Nipele jwakulondola che Elia jwakutyochela ku Tishibi jajili mmusi wa ku Gileadi ŵansalile mwenye che Ahabu, "Ngulumbila kwa Ambuje Akunnungu, Akunnungu jwa ku Isilaeli ŵali ŵajumi, junguntumichila, ngakupagwa ni mangame namose ula ngajinya, kwa yaka yimpepe mpaka pachisale une jinye." 2 Nipele Ambuje Akunnungu ŵasalile che Elia kuti, 3 "Ntyoche pelepa njaule kungopochelo lyuŵa nkalisise kweleko pa kasulo ka Keliti kakali kungopochelo lyuŵa kwa lusulo lwa Yolodani. 4 Kweleko ching'we meesi ga kasulo ko, sooni nagalamwile makungulu gannyichisisye yakulya kweleko." 5 Nipele che Elia ŵajitichisye iŵasalilwe ni Ambuje Akunnungu, ŵapite kutama mungulugulu kasulo ka Keliti kakali kungopochelo lyuŵa kwa lusulo lwa Yolodani. 6 Makungulu gannyichisyaga nkate ni nyama kundaŵi ni ligulo, ni ŵang'waga meesi ga kasulo ko. 7 Nambo pagapitile moŵa gampepe, kasulo kala kajumwile pakuŵa nganijinyaga ula pa chilambo.

8 Nipele Ambuje Akunnungu ŵaasalile che Elia, 9 "Ntyoche njaule ku Salepita jajili chiŵandi ni ku Sidoni nkatame kweleko. Naalajisye jwankongwe jwaŵililwe ni ŵankwakwe jwakutama kwele ampeje chakulya." 10 Nipele, che Elia ŵapite ku Salepita. Paŵaiche pa nnango wekulungwa wa musi ula, ŵasimene ni jwankongwe jwaŵililwe ni ŵankwawo ali nkusosa sasu. Che Elia ŵammilasile jwankongwe jo ni kunsalila, "Choonde mbe meesi ng'we." 11 Jwankongwe jula paŵajaulaga kwajigalila meesi, che Elia ŵatite, "Choonde mumbe ni chipande cha nkate nombe." 12 Jwankongwe jo ŵajanjile, "Ngulumbila kwa lina lya Ambuje Akunnungu, Akunnungu ŵanjumi, nganingola nkate wauliwose. Ngwete katandi kakuteleka kamo pe mu chiŵiga ni tuuta mu chuupa. Pelepa nyiiche kukusosa sasu nyaule kumusi kukuteleka chakulya kuti tulye ni mwanangu nipele tuweje." 13 Che Elia ŵaasalile, "Nkajogopa. Njaule ntende mpela insasile. Nambo mungolochesye kaje une kankate kwa utandi unkwete ni kunyichisisya, nipele nlikolochesye nkate wenu ni wa mwanagwenu. 14 Pakuŵa, Ambuje Akunnungu, Akunnungu wa ku Isilaeli akuti, ‘Utandi wauli mu chiŵiga chenu ngaupunguka namose mauta gagali mu chuupa ngagamala, mpaka Ambuje Akunnungu patajiichisye ula pachilambo.’" 15 Nipele, jwankongwe jula ŵajawile ni kutenda mpela muŵaŵechetele che Elia. Kwayele kwaliji ni yakulya yakwakwana kwa ŵanawose, moŵa gose. 16 Utandi uŵaliji mu chiŵiga nganiupunguka namose mauta ga muchupa nganigamala, malinga ni Ambuje Akunnungu iŵansalile che Elia.

17 Pagapitile moŵa gampepe, mwanache jwa jwankongwe jula jwalwasile mpaka ŵajasiche. 18 Jwankongwe jula ŵammusisye che Elia, "Ana mmwe mundu jwa Akunnungu kwa chichi mundendele yele? Nnyiche kukungumbusya sambi jangu ni kuumulajila mwanangu?"

19 Che Elia ŵaasalile, "Mumbe mwanagwenu," ŵanjigele mwanache jula pantima pa achikulugwe ni kwaula najo ku chuumba cha mwinani chiŵagonaga nsyene che Elia ni kummika pachindanda. 20 Pelepo, ŵaalilile Ambuje Akunnungu kwa kunyanyisya achitiji, "Alakwe Ambuje Akunnungu, Akunnungu jwangu, kwa chichi mwatendele yangalumbana jwankongwe jwawililwe ni ŵankwakwe jwambochele ju, ni kwaulajila mwanagwao?" 21 Nipele che Elia ŵalijongwele pachanya mwanache jula katatu akuno achapopelela Ambuje Akunnungu achitiji, "Alakwe Ambuje Akunnungu, Akunnungu ŵangu, choonde muntende mwanache ju apumule sooni." 22 Ambuje Akunnungu ŵapikene kupopelela kwa che Elia, mwanache jula jwasyuchile, ni jwatandite kupumula soni. 23 Che Elia ŵammuchisye mwanache jula achikulugwe paasi ni kunsalila, "Nnole! mwanagwenu ali jwanjumi." 24 Pelepo jwankongwe jula ŵansalile che Elia, "Sambano naimanyi kuti mmwe nli mundu jwa Akunnungu ni yakuti yaasasile Ambuje Akunnungu kwa litala lya kang'wa jenu gali gasyene."