1 Mwenye che Selemani ŵaanonyele achakongwe achajinji ŵachilendo. Ŵalombele mwali jwa Falao ni achakongwe wa Chimoabu ni wa Chiamoni ni wa Chiedomu pamo ni wa Chisidoni ni wachihiti. 2 Achakongwe ŵa kutyoka ilambo ine yati Ambuje Akunnungu wakanyisye Waislaeli kuti akalombela achitiji, "Ngasinnombela kukwao atamuno ŵanyawo ngasyalombela kukwenu pakuŵa achakongwe ŵa ilambo ine wo tachingalausya mitima jenu ni kujipopelela minungu jao." Nambo che Selemani ŵaanonyele nnope achakongwe wo. 3 Che Selemani ŵalombele achakongwe mia saba achiŵali ŵa chimwenye, ni ilanga mia tatu. Achakongwe wose wo ŵangalawisye ntima. 4 Ligongo che Selemani paŵapundaga kuchekulupa, achakongwe wo ŵaupitikwisye ntima wakwe, ŵatandite kujipopelela minungu jine, ni nganaŵa jwakukulupilichika kwa Ambuje Akunnungu, Akunnungu ŵakwe, mpela muŵaŵelele che Daudi atati ŵao. 5 Che Selemani ŵampopelele Ashitaloti nnungu jwachikongwe jwa Ŵasidoni, ni ŵankuiye Milikomu nnungu juŵaliji uchimwa wa Ŵaamoni. 6 Kwayele che Selemani ŵantendele yachigongomalo Ambuje Akunnungu, nganiŵakuya Ambuje Akunnungu kwa ukulupilichiko mpela iŵaŵelele che Daudi atatigwe. 7 Ku chitumbi chichaliji chakungopochelo lyuŵa kwa Yelusalemu, che Selemani ŵataŵile pakuntyochesya mbopesi Kemoshi nnungu juŵaliji uchimwa wa Ŵamoabu ni peuto pakwatyochesya mbopesi Moleki nnungu juŵaliji uchimwa wa Ŵaamoni. 8 Iyoyopeyo ŵaataŵile achiŵankwawo ŵa chilendo wose peuto pa kutinichisya ubani ni pa kutyochesya mbopesi sya minungu jao.

9 Nipele Ambuje Akunnungu, Akunnungu jwa ku Isilaeli ŵaatumbilile che Selemani, ligongo ŵaalesile ŵelewo ŵaali Ambuje Akunnungu wa ku Isilaeli uŵakopochele kaŵili. 10 Namuno Ambuje ŵankanyisye che Selemani kujipopelela minungu jine, che Selemani nganajitichisya achila chiŵasalilwe ni Ambuje Akunnungu. 11 Kwayele Ambuje Akunnungu ŵansalile che Selemani, "Pakuŵa nnesile kwamelepe lilangano lyangu ni malajisyo gangu ganampele, chinansumule umwenye wenu, ni kumpa jumo mwa ŵakutumichila ŵenu. 12 Namose yeleyo, kwa ligongo lya atati ŵenu che Daudi, ngandenda yeleyo katema ka umi wenu, nambo tinjiusumula umwenye pa katema katachitawala mwanagwenu. 13 Ngasiisumula umwenye wose, nambo chinaalechele lukosyo lumo kwa ligongo lya jwakutumichila jwangu che Daudi, ni kwa ligongo lya Yelusalemu musi usagwile kuti uŵe wangu."

14 Nipele, Ambuje Akunnungu ŵantekasisye che Hadadi juŵatyochele mu ntundu wa chimwenye wa ku Edomu aŵe jwammagongo jwa che Selemani. 15 Pa moŵa go, che Daudi paŵaputanaga ni ŵandu ŵa ku Edomu, che Yoabu jwankulu jwa ŵangondo ŵakwe, ŵapite kukwaasika ŵaŵaulajikwe pangondo. Kweleko ŵaauleje achalume wose ŵaŵaliji ku Edomu. 16 Che Yoabu ni Ŵaisilaeli ŵatemi ku Edomu kwa miesi sita, mpaka paŵamasile kwaulaga achalume wose ŵa kweleko. 17 Nambo che Hadadi ali chiŵela jwanchanda, ŵautuchile ku Misili pamo ni Ŵaedomu ŵane ŵaŵantumichilaga atatigwe. 18 Che Hadadi ni achinjakwe ŵatyosile ku Midiani ni kwaula ku Palani. Kweleko ŵaajigele achalume ŵane ni kwaula nao ku Misili, kwa Falao mwenye jwa ku Misili, Falao ŵampele che Hadadi nyuumba ni migunda pamo ni yakulya. 19 Falao ŵaanonyele kwannope che Hadadi ni kwapa nlambagwe alombele, mpwakwe ŵankwakwe mwenye jwachikongwe che Tapenesi. 20 Jwankongwe jo ŵammelechele che Hadadi mwanache jwannume, ŵammilasile liina lyao Genubati. Genubati ŵalelitwe ni che Tapenesi mu nyuumba ja uchimwene pamo ni ŵanache ŵa mwenye.

21 Che Hadadi paŵaliji ku Misili ŵapikene kuti che Daudi ajasiche ni che Yoabu jwankulu jwa ŵangondo nombe ajasiche. Nipele ŵansalile mwenye jwa ku Misili, "Choonde angunde kuti muje kumangwetu." 22 Nambo mwenye jwa ku Misili ŵausisye, "Nkosile kupata chindu chilichose apano kwika mwakuganichisya kuuja kumangwenu?" Che Hadadi ŵajanjile, "Ngapagwa chingosile, muuneche nyaule."

23 Nombe Akunnungu ŵantendekasisye che Lesoni mwana ju che Eliada aŵe jwammagongo ju che Selemani. Che Lesoni ŵaliji ammutwiche mwenye jwakwe che Hadadeseli jwa ku Soba. 24 Katema che Daudi paŵauleje ŵangondo ŵa ku Soba, che Lesoni ŵasongangenye ŵandu ŵachiswamba, ni nsyenejo ŵaliji chilongola jwa mpingo wo. Che Lesoni ni ŵandu ŵala ŵatemi ku Damesiki ni che Lesoni ŵatendekwe mwenye jwa ku Damesiki. 25 Che Lesoni ŵaliji jwammagongo jwa Ŵaisilaeli katema kose ka umi wa che Selemani, che Lesoni ŵaapele masauko kwannope Ŵaisilaeli mpela yatesile che Hadadi. Kwayele che Lesoni ŵaanyembulwisye Ŵaisilaeli, ni ŵatawele kwele ku Silia ko.

26 Che Yeloboamu mwana ju che Nebati jwa lukosyo lwa Efulaimu kutyochela ku Seleda, juŵaliji jwakutumichila ju che Selemani, ni achikulugwe juŵaliji jwakuŵililwa ni ŵankwakwe, ŵaŵilanjikwe che Selua. Nombe che Yeloboamu ŵangalawiche mwenye. 27 Ajiji jili ngani jiŵaatendekasisye che Yeloboamu angalauche mwenye che Selemani: Che Selemani paŵachenjeukaga kututila litaka palichemba ku Milo ni kutaŵa sooni mapupa ga ku Yelusalemu musi wa che Daudi atatigwe, 28 che Yeloboamu jwaliji mundu jwamachili ni juŵapanganyaga masengo kwannope. Che Selemani paŵaiweni nchanda jo yakuti kuchalila paakupanganya masengo gakwe, ŵammisile aŵe jwakwimilila masengo gakukanganichisya gose ga malo gaŵatamaga ŵandu ŵa lukosyo lwa manase ni wa lukosyo lwa Efulaimu, ŵanache ŵa che Yusufu. 29 Lyuwa limo che Yeloboamu paŵatyokaga ku Yelusalemu, mwitala ŵasimene ni che Ahiya, jwakulondola jwa Akunnungu juŵatamaga ku Shilo, ali awalile nkogo wasambano. Wose ŵaŵili ŵaliji jika mmigunda. 30 Papopo che Ahiya ŵausile nkogo wakwe wasambano ula, ni kuupapulanya ipande kumi ni iŵili. 31 Nipele ŵansalile che Yeloboamu, "Njigale ipande likumi, pakuŵa yeleyi ni yakuti Ambuje Akunnungu, Akunnungu ŵa ku Isilaeli, ‘Ngwasumula umwenye che Selemani, none ngumpa mmwejo ŵandu ŵa ngosyo likumi. 32 Nambo chinaalechele che Selemani lukosyo lumo, kwa ligongo lya chilanga chinaŵisile ni che Daudi, mundu juŵandumichile yambone ni kwa ligongo lya Yelusalemu, musi usagwile kuti uŵe wangu pasikati ja misi ja ngosyo syose sya Ŵaisilaeli kuŵa musi wati ŵandu ŵangu ambopeelele. 33 Tindende yeleyo ligongo che Selemani anesile, akujipopelela minungu jachilendo; Ashitaloti nnungu jwachikongwe jwa ŵandu ŵa ku Sidoni, ni Kemoshi nnungu jwa Ŵamoabu ni Milikomu nnungu jwa Ŵaamoni. Che Selemani nganaanyitichisya une, nganagakamula makanyo gangu namose malajisyo gangu mpela mukamwile che Daudi atati ŵao. 34 Namose yeleyo ngangwasumula che Selemani umwenye wose, nambo tinaatende ajendelechele kuŵa mwenye moŵa gose ga umi ŵakwe, kwa ligongo lya che Daudi jwakutumichila jwangu junansagwile, pakuŵa ŵakuiye makanyo gangu ni malajisyo gangu. 35 Kwayele tinaasumule mwanagwe umwenye wo ni kumpa mmwe ngosyo likumi mme mwenye jwao, 36 nambo tinaalechele mwanache ju che Selemani lukosyo lumo pe, kuti paŵeje ni chisukulu chi che Daudi jwakutumichila jwangu, jutatawale pa Yelusalemu musi usagwile kuti paŵe malo ga kumbopelela. 37 Chinantende mmwe che Yeloboamu mme mwenye jwa ku Isilaeli, ni mmwe chintawale mpela inkuti kusaka. 38 Mwajitichisyaga yanayose ingunsalila ni kutama inguti pakusaka, ni kuitendekanya yaili yambone paujo pangu, kwa kukamula malamulo ni malajisyo gangu mpela iŵatendaga che Daudi jwakutumichila jwangu, chinjiŵa pamo ni mmwe. Tinjintenda mme mwenye jwa ku Isilaeli ni kuutenda umwenye wenu uwe wakulimba mpela munaatendele che Daudi. 39 Chinjiujamuka uŵelesi u che Daudi ligongo lya sambi jatesile che Selemani, nambo ngaŵa kwa moŵa gose.’ "

40 Nipele che Selemani ŵasachile kummulaga che Yeloboamu, nambo che Yeloboamu ŵautuchile kwa che Shishaki mwenye jwa ku Misili, ŵatemi kweleko mpaka paŵajasiche che Selemani.

41 Ngani sine si che Selemani ni yose yaipanganyisye ni luunda lwakwe ilembekwe mu chitabu cha Ipanganyo i che Selemani. 42 Che Selemani ŵatawele Isilaeli jose kwa yaka alobaini, ali nkutama ku Yelusalemu. 43 Che Selemani ŵajasiche, ŵasichikwe mu Musi wa che Daudi atatigwe. Che Lehoboamu mwana ju che Selemani ŵatawele pamalo pakwe.