1 Pagapitile moŵa gamajinji panganya ula, pa chaka chaatatu Ambuje Akunnungu ŵaasalile che Elia kuti, "Njaule nkalilosye kwa mwenye che Ahabu, none tinajitende ula jinye pachilambo." 2 Nipele, che Elia ŵapite kulilosya ku che Ahabu.

Katema ko kwaliji ni sala jakunuunga nnope ku Samalia. 3 Che Ahabu ŵaaŵilasile che Obadia jwakutumichila jwa nyuumba jakwe ja chimwenye. Che Obadia ŵaliji mundu jwakwachimbichisya Ambuje Akunnungu kwannope. 4 Che Yesebeli paŵaulagaga ŵakulondola ŵa Ambuje Akunnungu, che Obadia ŵaajigele ŵakulondola mia moja, ŵaasisile mu mbugu siŵili, kila mbugu ŵakulondola hansini. Ŵaapelechelaga yakulya ni meesi. 5 Nipele che Ahabu ŵaasalile che Obadia, "Twende tukalole mwamuli ni tusulo ni mwamuli ni uliŵa pachilambo pa. Pane chiikomboleche kugapata manyasi ga kulisisya falasi ni mbunda falasi, kuti ikamala kuwa yose." 6 Nipele, ŵachigawenye chilambo kuti akombole kupita mose. Che Ahabu ŵapite cha upande umo ni che Obadia ŵasyungulile cha upande wine.

7 Che Obadia ali chiŵela mwitala, ŵasimene ni che Elia. Che Obadia ŵaamanyilile, ŵaakotamile mpaka paasi achitiji, "Ana mwe ndi che Elia mmbuje jwangu?" 8 Che Elia ŵaajanjile, "Elo, ndili une. Njaule nkaasalile mwenye jwenu che Ahabu kuti une che Elia ndili apano."

9 Che Obadia ŵausisye, "Ana neŵile ichichi mpaka nsache une mulajikwe ni che Ahabu? 10 Ngulumbila kwa Ambuje Akunnungu, Akunnungu ŵenu wajumi, Mwenye che Ahabu ŵaatumile ŵandu akansose ku ilambo yose. Katema kose mwenye pane ŵandu ŵa ilambo fulani ŵatiji nganitwawone akuno, che Ahabu ŵaatendaga alumbile kuti isyene nganammona mmwe. 11 Nombe mmwe sambano nkusalila nyaule kukwasalila kuti ndi apano! 12 Ngogopa kuti natyoka pe une, mbumu jwa Ambuje Akunnungu tachinjausye kwangangukumanyilila. Najaulaga kukwasalila che Ahabu kuti ndi apano, nombejo asosoga paangampata, chamulaje. Namose yeleyo une jwakutumichila jwenu ngunchimbichisya Ambuje Akunnungu chitandilile mu uchanda wangu. 13 Ana nganimpikana kuti che Yesebeli paŵaulagaga ŵakulondola ŵa Ambuje Akunnungu, une naasisile ŵakulondola mia moja mu mbugu siŵili, kila mbugu ŵakulondola hansini, ni kwapelechelaa yakulya pamo ni meesi? 14 Sambano nkuti nyaule kwa mwenye jwangu che Ahabu kukwasalila kuti, ‘Che Elia ali apano.’ Che Ahabu chamulaje!" 15 Che Elia ŵatite, "Ngunnumbilila kwa Ambuje Akunnungu, Akunnungu ŵajumi, ŵelewo ungwapopelela, leo jino chinalilosye paujo pa mwenye."

16 Nipele, che Obadia ŵajawile kusimana ni che Ahabu, ni kwasalila kuti che Elia aoneche. Nombe che Ahabu ŵapite kukuonegana ni che Elia. 17 Che Ahabu paŵammweni che Elia, ŵaasalile, "Amati! Ana ni mmwe unkwalagasya Ŵaisilaeli?" 18 Che Elia ŵaajanjile, "Ngaŵa une jungwalagasya Ŵaisilaeli. Nambo mmwe ni ulongo wa atati ŵenu, pakuŵa nnesile kugakuya malajisyo ga Ambuje Akunnungu ni kujipopelela minungu Baali. 19 Sambano, mwalamule ŵandu wose ŵa ku Isilaeli tusimane pa chitumbi cha Kalimeli. Iyoyopeyo, mwaichisye ŵakulondola ŵa minungu Baali mia nne na hansini ni aŵala ŵakulondola mia nne ŵa Ashela nnungu jwankongwe, ŵaakulyanga pamo ni che Yesebeli."

20 Nipele, che Ahabu ŵatumile utenga kwa ŵandu wose ŵa ku Isilaeli ni kwasonganganya ŵakulondola wose pamo, pa chitumbi cha Kalimeli. 21 Che Elia ŵajimi paujo pa ŵandu ni kuti, "Chaakachi chichitenda maamuzi kuti ŵani ŵali Akunnungu ŵenu? Naga Ambuje Akunnungu, ali Akunnungu munkuye jwelejo, ni iŵaga nnungu Baali ali Akunnungu, nipele, munkuye jwelejo." Nambo ŵandu wose ŵaliji jii. 22 Pelepo che Elia ŵaasalile, Uneji jikape ni jusigalile jwakulondola jwa Ambuje Akunnungu, nambo ŵakulondola ŵa nnungu Baali alinji mia nne na hansini. 23 Ayaga, ntuichisye mikambaku jiŵili ja ng'ombe. Ŵakulondola ŵa nnungu Baali asagule nkambaku umo, ausikite ni kuukatanya ipandeipande, aŵiche pa sasu pangakolesya mooto. None jwakwe chinaujigale nkambaku wine wo, chinausikite ni kuukatanya ipandeipande ni kuuŵika pa sasu pangakolesya mooto. 24 Nipele mpopele kwa lina lya nnungu jwenu, none chimbopelele kwa lina lya Ambuje Akunnungu. Juchajanje kwa mooto, jwele ali Akunnungu jwa usyene.

Pelepo ŵandu wose ŵajanjile, "Elo, nsasile yambone." 25 Nipele che Elia ŵaasalile ŵakulondola ŵa nnungu Baali, "Nlisagulile nkambaku umo wa ng'ombe, mummiche chile kaje, pakuŵa ŵanyamwe ntupile nnope. Mummilanje nnungu jwenu nambo nkakolesya mooto." 26 Kwayele ŵakulondola ŵa nnungu Baali ŵaujigele nkambaku wa ng'ombe juŵasagwile ni kummika chile. Nipele ŵatandite kummilanga Baali kutyochela kundaŵi mpaka muusi, ni kugulukaguluka ali nkutyala kuchisyungula chilisa chiŵachikolosisye akuno achitiji, "Alakwe Baali ntujanje." Nambo ngapagwa juŵajanjile namose ngapagwa chachilichose chichatyochele.

27 Katema ka lyuŵa pa ntwe, che Elia ŵatandite kwatendela chipongwe achitiji, "Mumpopelele kwa kunyanyisya nnope! Ŵele ngati ali nnungu, komboleka ali mu nganisyo syakunonopa, pane apite kuchoŵela, pane ali mu ulendo. Panepa lwatopele lugono, nkaajimusye!" 28 Ŵakulondola ŵa nnungu Baali ŵala ŵapopelele kwa kunyanyisya nnope akuno ali nkulikapakapa mu chiilu kwa ipula ni lwembe malinga ni masyoŵelo gawo kwika mwa kwilima miasi. 29 Ŵajendelechele kummilanga nnungu Baali mpaka muusi katema ka kutyosya mbopesi, nambo ngapagwa juŵajanjile namose ngapagwa chachilichose chichatyochele.

30 Nipele che Elia ŵaasalile ŵandu wose, "Nsejelele akuno." Ŵandu ŵala ŵansojelele. Nipele che Elia ŵachitaŵile sooni chilisa cha Ambuje Akunnungu, achila chichagumulikwe. 31 Ŵagajigele maganga kumi na mbili, kila liganga limo kwa lukosyo lumo lwa ŵana ŵa che Yakobo. Ambuje Akunnungu ŵansalile che Yakobo, "Timmilanjikwe liina lyenu Isilaeli." 32 Kwa maganga go che Elia ŵaataŵile Ambuje Akunnungu chilisa. Ŵasosile nkolola kusyungula mumbali mwa chilisa, waukukombola kwinjila meesi lita kumi na nne. 33 Nipele, ŵaŵisile sasu yambone pa chilisa pala, ŵaukatenye nkambaku wa ng'ombe ula ipandeipande, nipele ŵaiŵisile pachanya pa sasu. Nipele, ŵaasalile, "Nguumbasye meesi mmitala ncheche nkajitile pa mbopesi ja kutinisya jo ni pa sasu si." Ŵandu ŵala ŵatesile yeleyo. 34 Nipele ŵaasalile, "Njitile kaaŵili." Nombewo ŵatesile kaaŵili. Sooni ŵaasalile, "Ntende kaatatu." Nombewo ŵatesile kaatatu. 35 Meesi gala gajilime mose kusyungula chilisa chila ni kugumbala mu nkolola mula.

36 Pawaiche muusi katema ka kutyosya mbopesi, jwakulondola che Elia ŵasejelele pa chilisa, ŵapopesile achitiji, "Alakwe Ambuje Akunnungu, Akunnungu ŵa che Ibulahimu ni che Isaka ni Islaeli achambuje ŵetu, mwalosye lelo ŵandu ŵa kuti, mmwe ndi Akunnungu ŵa Isilaeli ni kuti une ndili jwakutumichila jwenu, ndesile yeleyi kwa kusalilwa ni mmwe. 37 Munyanje, alakwe Ambuje Akunnungu, munyanje kuti ŵandu ŵa aimanye kuti mmwe Ambuje Akunnungu ndi Akunnungu ni kuti amanyilile yakuti ŵalakwejo ni jumwatesile mitima jao jimmujile soni."

38 Papopo, Ambuje Akunnungu ŵatulwisye mooto, mooto ula ŵatinisye mbopesi jakutinisya jila ni sasu ni maganga gala pamo ni litaka lyakwe. Iyoyo ŵagajumwisye meesi gose gagaliji mu nkolola. 39 Ŵandu wose paŵaiweni yeila, ŵaligwisisye manguku achitiji, "Ambuje Akunnungu ali Akunnungu, Ambuje Akunnungu ali Akunnungu."

40 Nipele che Elia ŵaalajisye wandu, "Mwakamule ŵakulondola wose ŵa nnungu Baali. Ngasimunneka namose jumo atile!" Pelepo ŵaakamwile ŵakulondola ŵala, nombe che Elia ŵaapeleche ku kasulo ka Kishoni ni kwasikita kweleko.

41 Nipele, che Elia ŵansalile mwenye che Ahabu, "Njaule nkalye ni kung'wa. Pakuŵa ngujipikana kulindima kwa ula jajikulungwa." 42 Nipele, che Ahabu ŵapite ku kulya ni kung'wa, nombe che Elia ŵakwesile pachanya pa chitumbi cha Kalimeli, kweleko ŵatindiŵele ni kukotama mpaka paasi ni kuuŵika ntwe wakwe pasikati ja malungo gakwe. 43 Che Elia ŵantumile jwakutumichila jwakwe, "Njaule nkalole cha ku bahali." Jwakutumichila jula ŵapite kukulola, paŵausile ŵasalile, "Nganinachiwona chilichose." Nombe che Elia ŵasalile mala saba ajaule akalole. 44 Pawapite kaasaba, jwakutumichila jula ŵausile ni kwasalila, "Nguliwona liunde lyamwana nti ligasa lya mundu lilinkutyochela ku bahali."

Che Elia ŵaasalile, "Njaule nkaasalile che Ahabu aŵiche chile mutuka jakwe jakukwekwelemya ni falasi, atuluche jikanaŵe ula kwasiŵila."

45 Palapala patyochele liunde wii, mbungo japujile, janyele ula jekulungwa. Che Ahabu ŵakwesile mu mutuka jakwe jakukwekwelemya ni falasi, ŵapite ku Yesileeli. 46 Machili kutyoka kwa Ambuje Akunnungu gaichilile che Elia, ŵalitaŵile mgolole wao mchiuno, ŵautwiche mmbujo mwa mutuka jakukwekwelemya ji che Ahabu kwinjila ku musi wa ku Yesileeli.