1 Kwaliji ni chitendewele kwa yaka itatu pasikati ja chilambo cha ku Isilaeli ni ku Silia. 2 Nambo pa chaka chaatatu, che Yehoshafati mwenye jwa ku Yuda ŵatulwiche kukwajimajimila che Ahabu mwenye jwa ku Isilaeli. 3 Mwenye che Ahabu jwa ku Isilaeli ŵaasalile ŵakutumichila ŵakwe, "Ana ŵanyamwe ngankwimanyilila kuti musi wa ku Lamoti Gileadi uli jetu? Kwachichi uweji ngatukutenda chachili chose kwaula kuusya kutyoka kwa mwenye jwa ku Silia?" 4 Nipele ŵausisye che Yehoshafati, "Ana chitulongane pamo ni une kukuputana ngondo ku Lamoti Gileadi ko?"

Che Yehoshafati ŵanjanjile, "Elo, chinongane ni mmwe, nombe ŵandu ŵangu ali ŵandu ŵenu, falasi syangu sili falasi syenu." 5 Che Yehoshafati ŵajendelechele kunsalila mwenye jwa ku Isilaeli, "Mwausye kaje Ambuje Akunnungu akuti uli."

6 Nipele che Ahabu ŵasongangenye ŵakulondola mia nne, ŵausisye, "Uli nyaule kukuputana ngondo ku musi wa ku Lamoti Gileadi pane ngajaula?"

Nombewo ŵanjajile, "Njaule! Akunnungu chantende mwapunde."

7 Nambo che Yehoshafati ŵausisye, "Uli, apamo nganapagwa jwakulondola jwine jwa Ambuje Akunnungu jwatukukombola kummusya?"

8 Che Ahabu mwenye jwa ku Isilaeli ŵanjanjile che Yehoshafati, "Apali mundu jumo, che Mikaya mwana ju che Imula. Jwele tukukombola kummusya kuti atusaidie yakusaka Ambuje Akunnungu. Nambo ngwachima nnope, pakuŵa ngaakulondolaga indu yambone kukwangu ikaŵe yangalumbana pe."

Che Yehoshafati ŵatite, "Ngaŵa yambone mwenye kusala kwanti yele."

9 Nipele che Ahabu mwenye jwa ku Isilaeli ŵammilasile jwakutumichila jwao ni wansalile akanjigale chitema che Mikaya mwanache jwa che Imula.

10 Mwenye che Ahabu jwa ku Islaeli ni che Yeoshofati mwenye jwa Yuda ŵaaŵasile minjilo jao ja chimwenye ali atemi mu itengu yao ya chimwenye pa luŵala lwa kuputukulila magungulo, pa nnango wakwinjilila mu Samalia. Ŵakulondola wose ŵaŵalondolaga ŵaliji pamo nawo. 11 Jumo mwa ŵakulondola wo liina lyakwe che Sedekia mwanache ju che Kenaana, ŵalikolochesye nsengo wa chisyano, ŵagombaga achitiji, "Ambuje Akunnungu akuti, ‘Kwa misengo ji chimwatute Ŵasilia ni kwaulaga.’" 12 Ni ŵakulondola ŵane ŵala ŵalondwele kwanti iyoyo achitiji, "Njaule nkaupute Lamoti Gileadi, chimpunde. Ambuje Akunnungu chantende mpunde."

13 Katema ko ajula jwakutumichila juŵatumikwe kukwaŵilanga che Mikaya ŵansalile che Mikaya, "Ŵakulondola wose kwanakamo akwalondolela mwenye kuti tapunde, choonde ni mmwe jwakwe nkatende iyoyo, nkaalondolele yambone." 14 Nambo che Mikaya ŵanjanjile, "Ngulumbila kwa Ambuje Akunnungu jwaali jwanjumi kuti, une chinasalile aila ichaasalile Ambuje Akunnungu pe."

15 Nipele, che Mikaya paŵaiche paujo pa mwenye, mwenye ŵammusisye, "Ana tujaule kukuuputa musi wa ku Lamoti Gileadi pane tukajaula?" Nombewo ŵajanjile, "Njaule chinkapunde. Ambuje Akunnungu chantende muupunde musi wo." 16 Nambo mwenye wasalile, "Ana nanlumbisye kalingwa kuti pankukunguluka ni une pamalo pa Ambuje Akunnungu nsale isyene pe?" 17 Pele che Mikaya ŵajanjile, "Naweni Ŵaisilaeli wose apwilingenye mmatumbi nti ngondolo syangali ŵakuchinga, ni Ambuje Akunnungu ŵatite, ‘Ŵandu ŵa nganakola chilongola, kwayele kila mundu aujangane kumangwakwe kwa chitendewele.’"

18 Che Ahabu Mwenye jwa ku Isilaeli ŵansalile che Yehoshafati, "Uli nganinansalila kuti ngakulondola chindu chilichose chambone chakung'amba une? Ikaŵe yangalumbana pe!" 19 Che Mikaya ŵajendelechele kuŵecheta, "Mpikane yakuti Ambuje Akunnungu; Nammweni Ambuje Akunnungu atemi pa chitengu chakwe cha umwenye kwinani akuno mpingo wa ŵakutumichila wose ŵa kwinani ajimi kwasyungula chakundyo ni chakunchiji kwakwe; 20 Ambuje Akunnungu ŵausisye kuti, ‘Nduni juchannamusye che Ahabu ajaule akaugumuchile musi wa Lamoti Gileadi kuti akaulajikwe?’ Jumo jwaŵechete yele ni jwine yele. 21 Nipele lisoka limo lyajimi paujo pa Ambuje Akunnungu lichitiji, ‘Une chinannambusye,’ 22 Ambuje Akunnungu ŵausisye, ‘Chintende chinauli?’ Nombe lyo lyajanjile, ‘Tinyaule ni kulitenda mbumu jwa unami ni kwatendekasya ŵakulondola ŵa che Ahabu wose asale yaunami.’ Ambuje Akunnungu ŵansalile, ‘Mmwe chinkakombole kwalambusya, njaule nkaalambusyeje.’ "

23 Che Mikaya ŵamalichisye kuŵecheta kuti, "Kwayele Ambuje Akunnungu ŵaatesile ŵakulondola ŵenu wose asale yaunami, nombe Ambuje Akunnungu asasile yangalumbana ichiinsimane mmwe!"

24 Pelepo che Sedekia mwana ju che Kenaana ŵansejelele che Mikaya ni kumputa lijanda pejeje ni ŵausisye, "Kutyochela chakachi Mbumu ja Ambuje Akunnungu jinesile une ni kwika kuŵecheta ni mmwe?"

25 Che Mikaya ŵaajanjile, "Lyuŵa litinjinjile mu chumba cha munkati kukulisisa, pele ni pachimmanyilila."

26 Nipele che Ahabu mwenye jwa ku Isilaeli ŵalajisye, "Munkamule che Mikaya, mwausye ku che Amoni jwankulu jwa musi ni kwa che Yoashi mwana jwa mwenye che Ahabu. 27 Nkaasalile antaŵe mu nyuumba jakutaŵilwa, ŵapeje chipande cha nkate ni meesi kanondi, mpaka pachimuje jwanjumi kutyochela ku ngondo."

28 Che Mikaya ŵatite, "Mwaujaga uchenene, nipele, chimmanyilile yakuti Ambuje Akunnungu nganaŵecheta ni une." Nipele ŵajendelechele kuŵecheta, "Ŵanyamwe ŵandu wose mpilikanile ayi ingusala yi!"

29 Nipele che Ahabu mwenye jwa ku Isilaeli ni che Yehoshafati mwenye ŵa ku Yuda ŵapite kukugungumuchila musi wa ku Lamoti Gileadi. 30 Che Ahabu mwenye jwa ku Isilaeli ŵansalile che Yehoshafati mwenye jwa ku Yuda, "Une chinyinjile mu ngondo pangawalila minjilo ja umwenye nambo mmwe chimwalile minjilo jenu ja umwenye." Kwayele che Ahabu mwenye jwa ku Isilaeli ŵapite ku ngondo pangawalila minjilo ja umwenye.

31 Mwenye jwa ku Silia ŵaalajisye achakulu ŵa ŵangondo ŵakwe selasini ni mbili ŵakwimilila mutuka sya kukwekwelemwa, ŵansalile, "Nkaputana ni mundu jwalijose jwamwana pane jwankulungwa ikaŵe mwenye jwa ku Isilaeli pe." 32 Achakulu ŵa ngondo ŵala paŵamweni che Yehoshafati ŵaganisisye kuti ali mwenye jwa ku Isilaeli, kwayele ŵanjaulile kungungumuchila. Nambo paŵanyanyisye, 33 achakulu ŵa ŵangondo ŵala ŵaimanyi kuti nganaŵa mwenye jwa ku Isilaeli, ŵalesile kwakuichisya. 34 Nambo jwangondo jumo ŵaponyisye mpamba ni pangamanyila mpamba ula ŵansomile mwenye jwa ku Isilaeli pachidali peuto pakulumbikana iŵalo yakwe ya chisyano. Che Ahabu ŵansalile jwakwendesha mutuka jakwe jakukwekwelemya, "Ngalausye mutuka panyuma mundosye pangondo pano, amulesye!" 35 Ngondo jila japundile kukakaŵana akuno mwenye ajegeme mu mutuka jakukwekwelemya ni falasi alinkulolegana ni ŵandu ŵa ku Silia. Miasi jakopokaga paŵaulesye pala, jajilime mpaka munkati mwa mutuka ja kukwekwelemya ni falasi jila. Palyaiche ligulo ŵajasiche. 36 Palyatandaga kutiŵila lyuŵa ngulantwe japikanche pa ŵangondo wose, "Kila mundu auje kumangwakwe, kila mundu auje ku chilambo chakwe!"

37 Che Ahabu ŵajasiche, malilo gawo ŵagajawisye ku Samalia ni kugasika kweleko. 38 Ŵajijosisye ajila mutuka jakwe jakukwekwelemya ku litanda lya ku Samalia, muŵajogaga achakongwe ŵachigwagwa. Nombe mbwa syalapite miasi jakwe, malinga ni muŵaŵechetele Ambuje Akunnungu.

39 Ipanganyo ine iŵaitesile mwenye che Ahabu ni iŵatite pakutaŵa nyuumba jakwe ja chimwenye ni kujisalalisya kwa meeno ga ndembo, pamo ni misi jose jiŵajitaŵile, yose ilembekwe mu chitabu cha chikumbuchisyo cha mamwenye ŵa ku Isilaeli. 40 Che Ahabu paŵajasiche, che Ahasia mwanache jwao ŵatawele pamalo jao.

41 Che Yehoshafati mwana ju che Asa ŵatandite kutawala ku Yuda, pachaka cha ncheche cha kutawala kwa che Ahabu mwenye jwa ku Isilaeli. 42 Che Yehoshafati ŵaliji ni yaka selasini na tano paŵatandite kutawala ni ŵatawele yaka ishilini na tano ku Yelusalemu ko. Achikulu ŵao ŵaŵilanjikwe che Asuba mwali ju che Shilihi. 43 Ŵatesile yambone kwa Ambuje Akunnungu, nti che Asa atatigwe. Nambo nganagumula malo ga mwinani gakupopelela inyago, kwayele ŵandu ŵajendelechela kutyosya mbopesi ni kutinisya ubani mmalo mo. 44 Che Yehoshafati ŵajilene ni che Ahabu mwenye jwa ku Isilaeli atamanje kwa chitendewele.

45 Ipanganyo yose iŵaitesile che Yehoshafati ni iŵatite kupunda, ni iŵatite kuŵa ni ntima wangali woga pangondo, ilembekwe mu chitabu cha chikumbuchisyo cha mamwenye wa ku Yuda.

46 Sooni ŵaatopwele achalume ni achakongwe uŵatendaga chigwagwa pa malo pakupopelela mwinani, ŵaŵasigalile kutyochela katema ka che Asa atatigwe. 47 Ku chilambo cha ku Edomu nganikupagwa mwenye nambo chatawalikwaga ni mundu juŵasagulikwe ni mwenye jwa ku Yuda.

48 Mwenye che Yehoshafati ŵakolosisye meli syakwaula ku Ofili kwikanasyo sahabu, nambo meli syo nganisiika kweleko pakuŵa syatemechetemeche ku Esioni Gebeli ko.

49 Nipele che Ahasia mwana ju che Ahabu ŵaasalile ŵakutumichila ŵakwe, aŵe mu ulendo umo mu bahali pamo ni ŵakutumichila ŵa che Yehoshafati, nambo che Yehoshafati nganakunda. 50 Mbesi che Yehoshafati ŵajasiche ni ŵansichile mmalembe ga achambujegwe ku musi u che Daudi, ni che Yeholamu mwana ju che Yehoshafati ŵatawele pamalo pa atatigwe.

51 Pa chaka cha kumi na saba cha umwenye wa che Yehoshafati mwenye jwa ku Yuda, che Ahasia mwana ju che Ahabu ŵaliji mwenye jwa ku Isilaeli. Ŵatawele Isilaeli yaka iŵili achitamaga ku Samalia.

52 Che Ahasia ŵaatendele yachigongomalo Ambuje Akunnungu, pakuŵa ŵasyasisye iŵaitesile che Ahabu atatigwe ni che Yesebeli achikulugwe, ni iŵaitesile che Yeloboamu mwana ju che Nebati juŵaatendekasisye Ŵaisilaeli atende sambi sya kupopelela inyago. 53 Che Ahasia ŵampopelele nnungu Baali. Ŵantumbilisye Ambuje Akunnungu, Akunnungu jwa ku Isilaeli, ŵatesile ilaila mpela iŵatesile che Ahabu atatigwe.