1 Mwenye che Abiya ŵatandite kutawala ku Yuda, pa chaka cha kumi na nane cha kutawala kwa mwenye che Yeloboamu mwana ju che Nebati paŵatawalaga ku Isilaeli. 2 Ŵatawele ku Yelusalemu ko yaka itatu. Achikulugwe ŵaŵilanjikwe che Maaka mwali ju che Abusalomu. 3 Che Abiya ŵatesile sambi silasila siŵasitesile atatigwe, nganaŵa mpela che Daudi ambujegwe juŵaliji ni ntima ŵakulupilichika kwa Ambuje Akunnungu ŵakwe. 4 Pamo ni yeleyo, Ambuje Akunnungu ŵampele che Abiya mwanache jutatawale pamalo pakwe ku Yelusalemu ni kuulimbisya musi wa ku Yelusalemu, kwaligongo lya chilanga cha Akunnungu chiŵaapele che Daudi. 5 Ambuje Akunnungu ŵatesile yeleyo pakuŵa che Daudi ŵatesile yaikwanonyelesya Ambuje Akunnungu, nganaleka kugakamulisya gose gaŵalajiswe ni Ambuje Akunnungu mu umi ŵakwe wose, ikaŵe ngani ji che Ulia, juŵatyochele kwa Ŵahiti. 6 Katema kose ka utawala wa che Abiya kwaliji ni ngondo pasikati ja umwenye u che Lehoboamu ni umwenye u che Yeloboamu.

7 Ipanganyo ine ya mu umwenye wa che Abiya ni yose iŵaitesile ilembekwe mu chitabu cha chikumbuchisyo cha mamwenye wa ku Yuda. Che Abiya ni che Yeloboamu ŵajendelechele kuputana ngondo. 8 Che Abiya ŵajasiche ni ŵasichikwe ku Musi u che Daudi. Che Asa mwanagwe ŵatawele pamalo pakwe.

9 Pa chaka cha ishilini cha kutawala kwa che Yeloboamu mwenye jwa ku Isilaeli, che Asa ŵatandite kutawala ku Yuda, 10 ŵatawele ku Yelusalemu yaka alobaini na moja. Achukulugwe ŵaŵilanjikwe che Maaka mwali ju che Abusalomu. 11 Nipele mwenye che Asa ŵaatendele yaili yambone Ambuje Akunnungu mpela iŵatesile che Daudi ambujegwe. 12 Ŵaatopwele mu chilambo chila ŵachigwagwa wose ŵaŵaliji nkutenda chigwagwa mmalo ga kujityochesya mbopesi minungu jao ni ŵajasile inyago yose iŵaikolosisye achambuje ŵakwe. 13 Che Asa ŵantyochesye che Maaka machili gaŵakwete ga kuŵa achikulugwe mwenye, pakuŵa ŵakolosisye chinyago cha Ashela nnungu jwachikongwe jwaakuchima. Che Asa ŵachikasenyekasenye chinyago cha nnungu Ashela ni kuchichoma mooto mungulugulu mwa lusulo lwa Kidiloni. 14 Namose yeleyo pamalo pakuipopelela inyago nganapagumula, nambo ntima wakwe che Asa wajendelechele kwakulupilila Ambuje Akunnungu mu umi wakwe wose. 15 Ŵaijinjisye mu Nyuumba ja Akunnungu indu yose iyakolochekwe kwa sahabu ni feza, indu yati nsyenejo ni achatatigwe ŵaityosisye kwa ligongo lya Ambuje Akunnungu.

16 Mwenye che Asa jŵa ku Yuda ni mwenye che Baasha jŵa ku Isilaeli, ŵaliji nkuputana ngondo katema kose paŵatawalaga. 17 Che Baasha mwenye jwa ku Isilaeli ŵaputene ni ŵandu ŵa chilambo cha ku Yuda, nipele ŵautesile musi wa ku Lama uŵe ŵakulimbangana kuti mundu jwalijose akatyoka namose kwinjila ku chilambo cha ku Yuda. 18 Nipele mwenye che Asa ŵajigele feza ni sahabu jose jijasigele ku mbiko ja Nyuumba ja Ambuje Akunnungu ni ja mu nyuumba ja mwenye, ŵaapele ŵakutumichila ŵakwe ajausye ku che Beni Hadadi mwana ju che Tabilimoni juŵaliji chisukulu chi che Hesioni mwenye jwa ku Silia juŵatawalaga ku Damesiki achitiji, 19 "Tutende majilano pasikati jangu ni mmwe mpela iyaliji pasikati ja atati ŵangu ni atati ŵenu. Nnole ngunyichisya ntuuka wa feza ni sahabu. Nkutuleje majilano genu ni che Baasha mwenye jwa ku Isilaeli, kuti ŵangondo ŵakwe atyoche mu chilambo changu." 20 Pelepo mwenye che Benihadadi ŵankundile mwenye che Asa, ŵaatumile achakulu ŵa ngondo ŵakwe pamo ni ŵangondo ŵakwe kuti akaputane ni ŵandu ŵa misi ja ku Isilaeli. Nombe ŵangondo wo ŵajisumwile misi ja Iyoni ni Dani ni Abeli Beti Maaka ni malo jajikusungula litanda lya Galilaya pamo ni chilambo chose cha lukosyo lwa Nafutali. 21 Mwenye che Baasha paŵapikene ngani jo ŵalesile kuulimbisya musi wa ku Lama ni ŵajawile kutama ku Tilisa. 22 Nipele mwenye che Asa ŵatyosisye lilamulo lyakuti ŵandu ŵa ku Yuda jose panganneka jwali jose, wose asamisye maganga ga ku Lama ni mbao, indu iŵataŵilaga che Baasha. Che Asa ŵatumiye indu yo kulimbisya misi ja ku Misipa ni ku Geba malo ja lukosyo lwa Benjamini. 23 Ipanganyo ine ya mu umwenye wa che Asa ni yose iŵaitesile ilembekwe mu chitabu cha chikumbuchisyo cha mamwenye wa ku Yuda. Che Asa paŵachekulwipe ŵalwalaga makongolo. 24 Che Asa ŵajasiche, ŵansichile ku malembe ga chimwenye gagali mu Musi u che Daudi. Che Yeoshafati mwanagwe ŵatawele pamalo pakwe.

25 Pa chaka chaaŵili cha umwenye u che Asa jwa chilambo cha ku Yuda, che Nadabu mwana ju che Yeloboamu ŵatandite kutawala ku Isilaeli. Ŵatawele yaka iŵili. 26 Che Nadabu ŵaatendele yachigongomalo Ambuje Akunnungu kwa kutenda mpela iŵatesile atatigwe ni kwatendekasya Ŵaisilaeli atende sambi. 27 Che Baasha mwana ju che Ahiya jwa lukosyo lwa Isakali ŵaatendele malindi che Nadabu ni wammuleje katema che Nadabu ni ŵangondo ŵakwe paŵausyungwile musi wa ku Gibetoni musi wa Ŵafilisiti. 28 Che Baasha ŵammuleje che Nadabu, pa chaka chaatatu chakutawala kwa che Asa mwenye jwa ku Yuda. Baasha ŵatawele ku Isilaeli pamalo pa che Nadabu. 29 Natanda pe kutawala ŵauleje ŵandu ŵa ulongo u che Yeloboamu wose. Nganiŵaleka namose jumo jwanjumi nambo ŵauleje wose malinga ni liloŵe lwa Ambuje Akunnungu liŵasasile kwa litala lya jwakutumichila jwakwe jwakulondola che Ahiya jwa ku Shilo. 30 Yeleyo yatyochele pakuŵa che Yeloboamu ŵaatumbilisye Ambuje Akunnungu, Akunnungu ŵa ku Isilaeli kwa sambi jiŵatesile ni kwa kwatendekasya Ŵaisilaeli atende sambi.

31 Ipanganyo ine ya mu umwenye wa che Nadabu ni yose iŵaitesile ilembekwe mu chitabu cha chikumbuchisyo cha mamwenye wa ku Isilaeli. 32 Mwenye che Asa ni mwenye che Baasha ŵaliji mkuputana ngondo mowa gose ga umi wao.

33 Pa chaka chaatatu cha kutawala ku che Asa mwenye jwa ku Yuda, che Baasha mwana ju che Ahiya ŵatandite kutawala ku Isilaeli kutyochela ku Tilisa. Ŵatawele yaka ishilini na nne. 34 Che Baasha ŵaatendele yachigongomalo Ambuje Akunnungu mpela che Yeloboamu atatigwe iŵaitesile. Ŵatesile sambi ni kwatendekasyea Ŵaisilaeli atende sambi.