1 Che Selemani paŵamasile kujitaŵa nyuumba ja Ambuje Akunnungu pamo ni nyuumba jao ja chimwenye ni paŵamasile kuitendekanya yose iŵaisachile kuitenda, 2 nipele, Ambuje Akunnungu, ŵankopochele kaaŵili, nti iŵatite pakunkopochela ku Gibeoni kula. 3 Ambuje Akunnungu ŵaasalile, "Mbilikene kupopela kweni ni indu immendile. Najitesile jikundikwe kwa mapopelo aji Nyuumba jimundaŵile ji kuti ŵandu alipopelele liina lyangu apano moŵa gose pangali mbesi. Tinajigose ni kujilola moŵa gose. 4 Mwandumichilaga mwakulupilichika ni kwa ntima wakulungamika mpela che Daudi atati ŵenu, ni kugajitichisya malajisyo gangu ni malamusi gangu ni makanyo gangu gose, 5 tinachilimbisye chitengu chenu cha umwenye pachanya pa Ŵaisilaeli moŵa gose pangali mbesi, mpela inatite pakwalanga che Daudi atati ŵenu panatite, ngaasoŵa mundu mu uŵelesi wenu jutatamile chitengu cha umwenye mu Ŵaisilaeli. 6 Nambo mmwe pane uŵelesi wenu alegaka kunguya une ni kuleka kugajitichisya malamulo ni makanyo gangu ganampele, mwajaulaga kujipopelela minungu jine, 7 nipele, tinaatopole ŵandu ŵangu Ŵaisilaeli mu chilambo chinaapele, tinajikane Nyuumba jinaajitesile jiŵe pamalo papakundikwe kwa kuumbopelela une. Ŵandu ŵa ilambo ine taachanyosya ni kwaseka. 8 Nyuumba ji tijigumuche ni kuŵa masame, namose nyuumba ji jili jambone, kila mundu jutapite chiŵandi tatojime ni kusimonga achitiji, ‘Ana kwachichi Ambuje Akunnungu atesile yele kwa chilambo chi ni kwa nyuumba ji?’ 9 Ŵandu tajanje, ‘Pakuŵa ŵaalesile Ambuje Akunnungu ŵao uŵaakopwesye achambuje ŵao kutyoka ku chilambo cha ku Misili, akamulene ni minungu jine kujipopelela, lyele ni ligongo lyakwe Ambuje Akunnungu ŵaichisye ŵanyawo mambulunga gose ga.’"

10 Payamasile yaka ishilini jati mwenye che Selemani ŵataŵile asila nyuumba siŵili sila. Nyuumba ja Akunnungu ni nyuumba jakwe ja chimwenye, 11 mwenye che Selemani ŵaapele che Hilamu mwenye jwa ku Tilo, misi ishilini mu chilambo cha ku Galilaya, ligongo che Hilamu ŵampelechelaga mwenye che Selemani mbao sya mielesi ni mibeloshi pamo ni sahabu malinga ni iŵaisakaga katema paŵataŵaga. 12 Che Hilamu ŵatyosile ku Tilo ni kwaula kujilola misi jo, nambo nganaŵajilwa najo. 13 Che Hilamu ŵausisye che Selemani, "Achimwene, ana jeleji jili misi jantiuli jimumbele ji." Lyele ni ligongo misi jo jikuŵilanjikwa Kabuli mpaka lelo. Kabuli malumbo gakwe misi jangalimate 14 Mwenye che Hilamu ŵampelechele che Selemani mpela kilo elufu tano sya sahabu.

15 Ajiji jili ngani nkati mwenye che Selemani iŵatite pakwakanganichisya ŵandu kupanganya masengo ga kujitaŵa Nyuumba ja Akunnungu ni nyuumba jakwe ja chimwenye ni musi wa ku Milo, ni lipupa kusyungula musi wa ku Yelusalemu ni misi ja ku Hasoli ni ku Megido ni ku Geseli. 16 Mwenye jwa ku Misili, ŵausumwile musi wa ku Geseli ni kuuchoma mooto, ŵauleje Ŵakanaani ŵaŵatamaga mu musi wo. Kanyuma mwali ju che Falao paŵalombekwe ni Mwenye che Selemani, mwenye jwa ku Misili ŵaapele mwali jwakwe musi wo uŵe ntuka wakwe pa ulombela. 17 Che Selemani ŵautaŵile sooni musi wa ku Geseli ni musi wa ku Beti Holoni wa kwiŵanda. 18 Sooni ŵataŵile misi ja ku Baalati ni ku Tamali misi jijaliji mu ukweti ku chilambo cha ku Yuda. 19 Sooni ŵataŵile misi jose jakugosela indu yakwe, ni misi jakuŵika mutuka syakwe syakukwekwelemya, ni misi jakutama ŵakwela falasi, ni indu iŵasakaga kutaŵa ku Yelusalemu ni ku Lebanoni pamo ni mu chilambo chachili mu ulamusi ŵakwe. 20 Ŵandu ŵane ŵaŵasigalile ŵajumi pasikati ja Ŵaamoli ni Ŵahiti ni Ŵapelisi ni Ŵahifi ni Ŵayebusi, wose ŵanganaŵa Ŵaisilaeli, 21 pamo ni ŵa uŵelesi wao, nganaulajikwa ni Ŵaisilaeli, mwa ŵelewo che Selemani ŵaatendekasisye masengo gakwakwanganichisya mpaka lelo. 22 Che Selemani nganantenda namose Muisilaeli jwajulijose kuŵa kapolo. Nambo ŵele ni ŵaŵaliji ŵangondo ŵakwe ni ŵakutumichila ŵakwe ni achakulu ŵa ŵangondo ni achakulu ŵa mutuka syakwe sya ngondo ni ŵakwela falasi ŵakwe. 23 Nombe paliji ni ŵakutumichila achakulu ŵakwimilila masengo gakukanganichisya ga che Selemani, ŵaliji mia tano na hansini, ŵaŵajimilile ŵandu uŵapanganyaga masengo.

24 Mwali ju che Falao ŵatyosile ku musi u che Daudi ni kwaula kutama ku nyuumba jakwe nsyene jiŵatawilwe ni che Selemani, nipele che Selemani ŵataŵile musi wa ku Milo.

25 Che Selemani ŵatyosaga mbopesi sya kutinisya ni mbopesi syakutama kwa chitendewele katatu pachaka, pa chilisa chiŵaataŵile Ambuje Akunnungu achitutumisyaga ubani pamo ni mbopesi syo. Yeleyo ni iŵatite kumalisya masengo ga kutaŵa Nyuumba.

26 Sooni che Selemani ŵapanganyisye meli syejinji ku Esioni Gebeli, jajili chiŵandi ni musi wa ku Eloti, mbwani ja Bahali ja Shamu ku chilambo cha ku Edomu. 27 Nombe mwenye che Hilamu ŵaatumile ŵandu ŵakwe ŵandu ŵakukombola yambone kupanganya masengo ga mumeli kuti apanganye masengo pamo ni ŵakutumichila ŵa che Sulemani. 28 Ŵapite ku chilambo cha Ofili ni kuuja ni sahabu mpela kilo elufu kumi na nne ni kwaichisya mwenye che Selemani.