1 Nipele che Selemani ŵaliji mwenye jwa chilambo chose cha ku Isilaeli. 2 Ŵeleŵa ni ŵaŵaliji ŵakutumichila achakulu:

Jwambopesi ŵaliji che Asalia mwana ju che Sadoki.

3 Ŵakulemba ŵaliji che Eliholefu ni che Ahiya ŵana ŵa che Shausha:

Jwakuŵika ikumbuchisyo ŵaliji che Yehoshafati mwana ju che Ahiludi.

4 Jwankulu jwa ŵangondo ŵaliji che Benaya mwana ju che Yehoyada,

Ŵambopesi ŵaliji che Sadoki ni che Abiasali.

5 Chilongola jwankulu jwa ŵakutumichila wose ŵaliji che Asalia mwana ju che Natani,

Jwakwapa malango mwenye ŵaliji jwambopesi che Sabudi mwana ju che Nasani.

6 Jwakwimilila jwa nyuumba ja mwenye ŵaliji che Ahishali.

Jwakwimilila jwa masengo ga kukanganichiswa ŵaliji che Adonilamu mwana ju che Abida.

7 Che Selemani ŵaasagwile achakulu kumi na mbili ŵa kila wilaya pachilambo chose cha Isilaeli, ŵaŵapelekaga yakulya kwa mwenye ni kwa ŵandu wose ŵaali mu nyuumba ja mwenye. Kila mundu ŵapelekaga chakulya cha mwesi umo kamo pe kwa chaka. 8 Meena ga achakulu kumi na mbili ni gelega:

Che Benihuli ŵaliji jwankulu jwa chilambo cha matumbi cha ku Efulaimu;

9 Che Benidekeli ŵaliji jwankulu jwa misi ja ku Makasi ni ku Shaalibimu ni ku Beti Shemeshi ni ku Eloni Beti Hanani.

10 Che Benihesedi ŵaliji jwakutumichila jwa misi ja ku Aluboti ni ku Soko pamo ni malo ja chilambo cha ku Hefeli.

11 Che Beniabinadabu ŵankwawo che Tafati mwali ju che Selemani ŵaliji jwakutumichila jwa ku Nafati Doli.

12 Che Baana mwana ju che Ahiludi ŵaliji jwakutumichila jwa misi ja ku Taanaki ni ku Megido ni ku Beti Shani kose jijaliji chiŵandi ni musi wa ku Saletani cha kwiŵanda kwa ku Yesileeli, kutandilila ku Beti Shani mpaka ku misi ja ku Abeli Mehola ni musi wa ku Yokimeamu.

13 Che Benigebeli ŵaliji jwakutumichila jwa misi ja ku Lamoti Gileadi pamo ni misinda ja Gileadi jijaliji jakwe che Yaili jwa uŵelesi wa che Manase, nombe ŵaliji jwakutumichila jwa chilambo cha Aligobu jajili ku Bashani chichaliji ni misi sitini jijasyunguchikwe mapupa ni njinjili sya shaba mminango jekulungwa.

14 Che Ahinadabu mwana ju che Ido ŵaliji jwakutumichila jwa musi wa ku Mahanaimu.

15 Che Ahimaasi ŵaliji jwakutumichila jwa malo ja lukosyo lwa Nafutali, jweleju ŵalombele che Basemati mwali ju che Selemani.

16 Che Baana mwana ju che Hushai ŵaliji jwakutumichila jwa malo ja lukosyo lwa Asheli ni musi wa ku Bealoti.

17 Che Yehoshafati mwana ju che Palua ŵaliji jwakutumichila jwa malo ja lukosyo lwa Isakali.

18 Che Shimei mwana ju che Ela ŵaliji jwakutumichila jwa malo ja lukosyo lwa Benjamini,

19 Che Gebeli mwana ju che Uli ŵaliji jwakutumichila jwa chilambo cha ku Gileadi, kuundanda ko chilambo chi watawalikwe ni che Sihoni mwenye jwa Ŵaamoli ni che Ogu mwenye jwa ku Bashani.

Kulekangana ni ŵele ŵakutumichila kumi na mbili wo jwapali mundu jumo juŵaliji chilongola pa chilambo chose cho.

20 Ŵandu ŵa ku Yuda ni Ŵaisilaeli ŵaliji achajinji mpela nsanga wa kumbwani, ŵalyaga ni kung'wa ni kusengwa. 21 Che Selemani ŵatawele mwenye syose kutandilila ku lusulo lwa Efulati mpaka ku chilambo cha Ŵafilisiti kwendelechela mpaka kujili mipika ja chilambo cha ku Misili. Ŵandu ŵa ilambo yose yo ŵaatumichilaga che Selemani ni kulipa nsongo, moŵa gose ga umi wakwe.

22 Yakulya iyasachilwe ni che Selemani ni ŵandu ŵakwe kwa lyuŵa limo yaliji, utandi wesyajiche chenene madebe mia tatu na sitini, ni utandi wangasyajika chenene waliji madebe mia saba na ishilini. 23 Ng'ombe kumi syakunakana syasikutama mwichinga ni ng'ombe ishilini yaikuchingwa ni ngondolo mia moja pamo ni mbaŵala ni ngolombwe ni ndope ni nguku syakunakana. 24 Che Selemani ŵatawele mwenye syose sya kumaswelelo lyuŵa kwa lusulo lwa Eufulate, kutandilila ku Tifisa mpaka ku Gasa ni ŵatemi kwa chitendewele ni ŵandu ŵa ilambo yose iyansyungwile. 25 Katema kose kaŵatawele mwenye che Selemani, Ŵayuda ni Ŵaisilaeli, kutandilila ku Dani mpaka ku Beli Sheba, ŵatemi kwa chitendewele, kila mundu pa ngunda wakwe wa misabibu ni tini. 26 Mwenye che Selemani ŵaliji ni Masakasa elufu alobaini gakugosela mutuka syakwe syakwekwelemya ni falasi ni ŵangondo ŵakwela falasi elufu kumi na mbili. 27 Aŵala ŵakutumichila ŵakwe kumi na mbili kila mundu pa mwesi wakwe, ŵapelekaga yakulya kwa mwenye che Selemani ni kwa ŵandu wose uŵalyaga pamo ni mwenye. Yaikwasoŵa yose iŵaisakaga mwenye ni ŵandu wose uŵalyaga pamo nawo ŵaliji mkupata. 28 Sooni ŵapelekaga shayili ni masamba ga kwapa falasi ni falasi syakukwekwelemya mutuka, kila mundu jwapelakaga pamalo papasachilwe.

29 Akunnungu ŵapele che Selemani luunda ni umanyilisi ni ŵaimanyilile indu yejinji yangaŵalanjika, nti nsanga wa kumbwani. 30 Che Selemani ŵaliji ni luunda kwapunda ŵandu wose ŵali ni lunda ŵa kungopochelo lyuŵa ni kwapunda ŵandu wose ŵali ni lunda ŵa ku Misili. 31 Che Selemani waliji ni luunda lwa kwapunda ŵandu wose, ŵaapundile che Etani Mwesilahi ni che Hemani ni che Kalikoli ni che Dalida ŵana ŵa che Maholi. Ŵapikaniche kwa ŵandu ŵa ilambo ine yose ŵaŵandikene nao. 32 Che Selemani ŵatagwile itagu elufu tatu ni ŵajimbile nyimbo kupunda elufu moja. 33 Ŵakunguluchile nkati ngani sya mimela ni itela yose kutandilila chitela cha mwelesi chachili ku Lebanoni ni Hisopo jajikumela mmapupa. Nombe ŵajiganyisye nkati inyama ni ijuni ni yepanganyikwe yaikukwaŵa ni somba. 34 Ŵandu kutyochela ilambo ine ni mamwenye wose ŵaŵapikene ngani ja luunda lwa che Selemani, ŵaiche kukwapikanila.