1 Kwaliji ni mundu liina lyakwe che Naboti jwakutyochela ku Yesileeli juŵakwete ngunda wa misabibu ku Yesileeli, chiŵandi ni nyumba ja chimwenye ji che Ahabu mwenye jwa ku Samalia. 2 Lyuŵa limo che Ahabu ŵansalile che Naboti, "Mumbe ngunda wenu wa misabibu mbande liponda pakuŵa ngunda wo uli chiŵandi ni nyuumba jangu ja chimwenye. Une chinampe ngunda wine wa sabibu pane mwasakaga chinampe mbiya jajilijose jichimuusalile". 3 Nambo che Naboti ŵanjanjile che Ahabu, "Ngunda wu naupatile kwa achachekulu wangu kuŵa wangu, Ambuje Akunnungu aanganye kumpa mmwejo." 4 Nipele che Ahabu ŵapite kumangwao ili yachimile ni kusupuka ligongo lya iŵasasile che Naboti mundu jwakutyochela ku Yesileeli kuti "Nganampa ngunda unaupatile kwa achachekulu ŵangu." Ŵaligoneche pachindanda, ŵagalauchile kwikumba ni kukana kulya.

5 Che Yesebeli ŵankwao che Ahabu ŵanjaulile ni kwausya, "Kwachichi nkusupuka kwanti yele, kwika mwakana kulya?" 6 Nombe che Ahabu ŵanjanjile, "Ngungulwiche ni che Naboti mundu jwa ku Yesileeli naasalile aasumichisye ngunda wakwe wa misabibu pane naape ngunda wine wa misabibu pamalo pa wele. Nambo akanile kumba ngunda wo." 7 Pelepo che Yesebeli ŵankwawo che Ahabu ŵaasalile, "Yeleyi ni inkuti kutenda mmweji junli mwenye jwa Isilaeli jose? Njimuche nsangalale, ndye! Une tinampe ngunda wa misabibu u che Naboti jwa kutyochela ku Yesileeli!"

8 Nipele che Yesebeli ŵalembile ikalata kwa liina li che Ahabu ni kuiŵika chimanyisyo cha mwenye. Ŵaipeleche ikalata yo kwa ilongola ni achakulu ŵakutama ni che Naboti ku Yesileeli. 9 Mu ikalata yo ŵalembile nyi, "Ngombe ngulantwe, mwasalile wandu lyuŵa lyakutaŵa. Mwasonganganye ŵandu pamo, muntamiche che Naboti malo ga kuchimbichikwa pasikati ja ŵandu. 10 Nipele mwajigale ŵandu ŵaŵili ŵachigongomalo atame achiloleganaga ni che Naboti nombewo ŵaalambuchisye che Naboti kuti akwalwesya Akunnungu ni mwenye. Nipele munkoposye paasa nkaaponyele maganga mpaka awe."

11 Nipele ilongola ni achachekulu ŵa musi wa ku Yeseleeli ŵatesile muŵaŵechetele che Yesebeli mu ikalata iŵapelechele. 12 Ŵagombile ngulantwe ja kutaŵa, ŵaasonganyisye ŵandu, ŵantamiche che Naboti pa malo gakuchimbichikwa pasikati ja ŵandu. 13 Nipele awala ŵandu ŵaŵili ŵachigongomalo ŵala ŵatemi achiloleganaga ni che Naboti ni kwaŵechetela yaunami achitiji, "Che Naboti ŵalwesisye Akunnungu ni mwenye." Pele ŵankopwesye paasa musi ŵamponyele maganga mpaka ŵawile. 14 Nipele wapeleche utenga ku che Yesebeli achitiji, "Che Naboti aputikwe ni maganga mpaka awile."

15 Che Yesebeli paŵapikene kuti che Naboti awile kwa kuputwa ni maganga, ŵansalile che Ahabu, "Che Naboti ajasiche. Sambano njaule nkaujigale ngunda wa misabibu wa che Naboti jwa ku Yesleeli uŵakanile kunsumichisya ula uŵe wenu." 16 Che Ahabu paŵapikene kuti che Naboti ajasiche, ŵapite kukuujigala ngunda wa misabibu u che Naboti.

17 Nipele Ambuje Akunnungu, ŵansalile che Elia jwakulondola jwa ku Tishibe, 18 "Ntyoche njaule nkasimane ni che Ahabu mwenye jwa ku Isilaeli jwaakutama ku Samalia. Chimwasimane ku ngunda wa misabibu u che Naboti akusaka aujigale uŵe wakwe. 19 Mwasalile kuti Ambuje Akunnungu akuti nyi, ‘Mmuleje mundu ni kuchijigala chipanje chakwe.’ Nipele mwasalile kuti Ambuje akunnungu akuti nyi, ‘Apala pamalo mbwa pasyalapite miasi ja che Naboti, pele mbwa chisilapite miasi jenu.’"

20 Che Ahabu paŵasimene che Elia ŵausisye, "Mmwe jwammagongo jwangu mungamwile!"

Che Elia ŵajanjile, "Elo nankamwile, pakuŵa mmwe mmwamuwe mwasyene kwapanganyichisya yachigongomalo Ambuje Akunnungu. 21 Kwayele Ambuje Akunnungu akuti, ‘Chinanyichisye limbulunga ni kunjonanga mmwe ni jwannume jwalijose jwa pannango wenu, juŵe kapolo pane jwalechelelwe ajaule. 22 Ŵandu ŵa panlango wenu chinatendele mpela inatendele ŵandu ŵa pannango u che Yeloboamu mwana ju che Nebati ni mpela ŵandu ŵa pannango u che Baasha mwana ju che Ahiya, pakuŵa mundumbilisye kwa kwatendekasya Ŵaisilaeli atende sambi.’ 23 Sooni kwagamba che Yesebeli, Ambuje Akunnungu asalile kuti, ‘Mbwa chijitaune chiilu chi che Yesebeli pa musi wa Yesileeli pepa. 24 Mundu jwalijose jwa pannango wenu juchawilile pa musi chachiligwa ni mbwa, ni juchawilile mmingunda, chachiligwa ni ijuni.’"

25 Nganapagwe mundu mpela che Ahabu juŵalityosisye kwatendela yachigongomalo Ambuje Akunnungu mpela che Ahabu juŵanyenjekwe ni che Yesebeli ŵankwawo. 26 Ŵatesile ugongomalo nnope kwa kuipopelela inyago mpela iŵatesile Ŵaamoli. Ŵaamoli ali ŵandu ŵaŵaŵinjikwe ni Ambuje Akunnungu katema Ŵaisilaeli paŵajinjilaga mu chilambo. 27 Che Ahabu paŵapikene maloŵe go ŵapapwile minjilo jakwe ŵawete magunia ni kutaŵa. Ŵagonaga ali aliunichile magunia ni ŵajendaaga ali nkusupuka. 28 Nipele Ambuje Akunnungu ŵansalile jwakulondola che Elia jwa musi wa ku Tishibe, 29 "Ana nnyiweni che Ahabu yatite kulitulusya paujo pangu? Nipele pakuŵa alitulwisye ngangwapelechela limbulunga ali jwanjumi nambo tinaajonanje ŵapannago wakwe kate pachatawale mwanagwe."