1 Che Selemani ŵataŵile nyuumba jakwe ja chimwenye kwa yaka kumi na tatu, ni kumalisya. 2 Jimo mwa nyuumba siŵataŵile kwaliji ni nsana uwaŵilanjikwe litinji lya Lebanoni. Uleu wakwe waliji futi mia moja na hansini, chanchijipi futi sabini na tano ni lisusa lya futi alobaini na tano. Jaliji jitaŵikwe pachanya pa misitali ncheche ja njanamila sya mielesi, ni nyango syekoleche pa njanamila sya mielesi chakwinani. 3 Ŵapagele kwa nyango sya mielesi, sisyagonile pa njanamila alobaini na tano. Kila nsitali kwaliji ni nyango kumi na tano. 4 Kwaliji ni madilisha gatatu gagaŵichikwe pa misitali jitatu, gaŵichikwe pa mapupa gaŵili kwakulolegana. 5 Minango jose jaliji ni ukulu wakulandana, ni felemu ja gele madilisha gagakulolegana go yaliji ni ukulu wakulandana.

6 Ŵataŵile nyuumba jine jijaŵilanjikwe Nsana wa Njanamila wati uleu wakwe waliji futi sabini na tano ni nchijipi futi alobaini na tano. Mbujo mwa nsana wo ŵataŵile lupenu lulwakopweche chapasa ni pachanya pa asila chanamila sila ŵapagele.

7 Iyoyo che Solomoni ŵataŵile chuumba cha kuŵika chitengu cha umwenye, muŵalamulilaga magambo ga ŵandu. Mwelemu sooni mwaŵilanjikwe nsana wakulamulila magambo. Ŵausalalisye kwa mbao sya mielesi kutyochela paasi mpaka padali.

8 Nyuumba jakutama asyene jaliji chapanyuma pa Nsana wa Kulamulila, nombejo jataŵikwe mpela nyuumba sine. Sooni che Selemani ŵataŵile nyuumba jakulandana ni nsana ula kwaligongo lya mwali jwa mwenye jwa ku Misili, juŵaliji ŵalombele.

9 Majumba gose go gataŵikwe kwa maganga gambone kutandilila pa nsingi mpaka mwinani, maganga gagasepekwe malinga ni ukulu uwasachilwe ni kusepekwa mosemose. 10 Nombe nsingi wataŵikwe kwa maganga gamakulungwa gambone, gane galiji ni uleu wa futi kumi na mbili, ni gane chanchijipi futi kumi na tano. 11 Pachanya pa nsingi pataŵikwe ni maganga gambone gagasepekwe kwa ipimo iyasachilwe, ni kuŵika mbao sya mielesi.

12 Lutenje lwa nyuumba ja mwenye lwasyunguchikwe ni mapupa gagaliji ni misitali jitatu ja maganga gagasepekwe ni pachanya pa kila msitali umo paŵichikwe mbao sya mielesi, mpela yautite lutenje lwa munkati mwa Nyuumba ja Ambuje Akunnungu.

13 Nipele mwenye che Sulemani ŵatumile ŵandu akaaŵilanje che Hulamu kutyochela ku Tilo. 14 Che Hulamu jwaliji mwana jwa jwankongwe jwawililwe ni ŵankwawo, jwa lukosyo lwa Nafutali ni atati ŵao jwaliji mundu jwa ku Tilo, mundu ju ŵasyanaga shaba. Che Hulamu ŵaliji mundu jwa luunda ni jwa umanyilisi, juŵakombolaga kwannope pa kupanganya masengo gose ga shaba. Nipele, ŵaiche kwa mwenye che Selemani, ni ŵaapanganyichisye masengo gakwe gose.

15 Che Hulamu ŵasyanile iimila iŵili ya shaba, kila chiimila chaliji ni uleu wa futi ishilini na saba ni ntungulu wakwe futi kumi na nane. 16 Nombe ŵakolosisye singwa siŵili sya shaba jenyelendwisye, lisusa lya singwa jimo lyaliji futi nane, ŵasiŵisile pachanya iimila yo. 17 Nipele ŵaluchile nyau siŵili syesalalisye kwa mikufu jijaluchikwe ni kuiŵika pachanya pa iimila yo. 18 Sooni ŵakolosisye isogosi iyaoneche mpela makomamanga kwa shaba jenyelenyendusye mu misitali jiŵili kusyunguchisya kila lwau kusalalisya indu mpela singwa iyaliji pachanya pa iimila. 19 Indu mpela singwa iyaliji pa mitwe ja iimila paujo pa lupenu, yasalalikwe kwa maluŵa gagakumela mmesi gagakuŵilanjikwa mbata, lisusa lyakwe lyaliji futi sita. 20 Indu mpela singwa yo yaliji pa mitwe pa iimila iŵili, nombe yaliji pachanya pa matungulu gagakopochele chiŵandi ni nyau sila. Paliji ni makomamanga mia mbili mu misitali jiŵili kusyungula kila singwa.

21 Che Hulamu ŵaiŵisile iimila ila pakwinyilila pa Nyuumba ja Akunnungu. Chiimila chiŵachiŵisile kunchiji chaŵilanjikwe Boasi ni chiimila chiŵachiŵisile kundyo chaŵilanjikwe Yakini. 22 Indu mpela singwa iyaliji pachanya iimila yaliji ni uoneche wa maluŵa ga mbata.

Kwayele masengo gakukolosya iimila gamasile.

23 Che Hulamu ŵasyanile shaba ŵakolosisye nkambo uwaŵilanjikwaga bahali, uwaliji chanchijipi futi nane ni uleu kutyochela mbali jimo mpaka mbali jiine futi kumi na tano. Kusyungulila nkambo wose futi alobaini na tano. 24 Kuusi kwa mumbali mwakwe kwaliji ni misitali jiŵili ja indu mpela itumba iyakolechekwe kwa kunyelenyendusya shaba, yakolochekwe kusyungula nkambo wo ni kila futi jimo kwaliji ni itumba sita. Matumba go gaakolochekwe kumo ni ntala wo. 25 Nkambo wo waŵichikwe pachanya pa inyago ya sahaba ya ng'ombe syankambaku kumi na mbili, ng'ombe sitatu syalolite kumpoto ni sitatu kumaswelelo kwa lyuŵa ni sitatu kulujenda ni sitatu kungopochelo lyuŵa, akuno kunyuma kwao kuli kujigele nkambo wo. 26 Kandapala kwa magomo ga nkambo wo kwaliji inchi tatu, kwalandene ni chikombe, ni sooni kukang'wa kwakwe kwalandene ni mbata. Ntala wo wagumbalaga meesi lita mpela elufu alobaini.

27 Che Hulamu nombe ŵapangenye matololi kumi ga shaba, kila tololi lyaliji ni uleu wa futi sita, chanchijipi futi sita ni lisusa futi nne ni nusu. 28 Matololi go gakolochekwe yeleyi: kwaliji ni ipande ya shaba iyakamulene ni mafelemu ga shaba iyaliji ni ukulu wakulandana. 29 Pasikati pa ipande ya shaba iyakamulene ni mafelemu go, kwaliji ni inyago iyawoneche mpela lisimba, ni ng'ombe syankambaku ni yepanganyikwe yaili ni mapapiko. Paasi ni penani pa inyago yo kwaliji ni yakusalalisya ya shaba. 30 Kila tololi lyaliji ni matungulu ncheche ga shaba ni yakamulila ya shaba yakutendekasya matungulu gajende ni pa kila ndumba kwaliji ni chindu chaakamulila ntala. Pa kila chipaande cha shaba ŵalembile lembile yakusalalisya ya uluŵa wepote. 31 Kwaliji ni felemu kukangwa kwa ntala ni sooni kwaliji ni chindu chaakamulila ntala chichatyochele ku litololi kwaula ku ntala. Uleu kutandilila pa litololi kwaula chakwinani waliji futi moja na nusu ni kwaula chapasi futi mbili na nusu. Kusyungula kila litololi ŵasyanile indu yakusalalisya. 32 Matungulu ncheche go galiji kuusi kwa mapapi, yakukamulila litungulu limo ni liine yaliji yelumbikanye ni litololi lisyene, ni lisusa lya kila litungulu lyaliji futi mbili na lobo. 33 Matungulu go galiji mpela matungulu ga mutuka sya ngondo syasikukwekwelemya ni falasi, ni chisyano chachikukamulila litungulu limo ni liine ni pamalo papakulumbikanya litungulu ni chisyano ni sipoku, yanayose yasyanikwe kwa shaba. 34 Mu ndumba nchenche sya litololi mwaliji ni chikamulilo chimochimo iyalumbukenye litololi ni litungulu. 35 Pachanya pa kila litololi kwaliji ni chindu cha duala cha shaba ni lisusa lyakwe lyaliji inchi tisa. Yakamulila litololi ni chindu cha duala cho yakamulene ni litololi lisyene. 36 Pa kila chakamulila ni pa mapapi ga kila litololi, che Hulamu ŵasalalisye kwa kusepela inyago ya yepanganyikwe yaili ni mapapiko ni lisimba ni itela ya mitende. Ŵasalalisye kwa kusyunguchisya indu mpela singwa. 37 Yele ni che Hulamu iŵatite pakukolosya matololi kumi kwa kusyana shaba. Matololi gose galandene kila chindu.

38 Nombe che Hulamu, ŵakolosisye mitala kumi ja shaba, ntala umo kwa litololi limo. Kila ntala waliji chanchijipi futi sita, ni jakombwele kugumbula meesi mpela lita mia nane semanini. 39 Ŵaŵisile matololi nsano chakunchiji ni nsano gane chakulyo kwa nnango wakwinjilila pa Nyuumba ja Akunnungu. Ni aula nkambo uwaŵilanjikwe bahali ŵauŵisile chapaujo kwa kunlyo kwa nnango wakwinjilila pa Nyuumba ja Akunnungu.

40 Iyoyo peyo, che Hulamu ŵakolosisye iŵiga ni indu yakumbila liiu pamo ni mabakuli ga mwana. Yeleyi ni iyatite che Hulamu kumalichisya masengo gaŵalajichiswe ni mwenye che Selemani nkati Nyuumba ja Ambuje Akunnungu. 41 Sooni ŵakolosisye iimila iŵili ni indu mpela singwa iŵili yailandene ni bakuli iyaŵichikwe pa mitwe pa iimila ni nyau siŵili kwa ligongo lya kusalalisya mitwe jiŵili jajili pa mitwe pa iimila yo; 42 ni isogosi yaili mpela makomamanga mia nne ligongo lya nyau siŵili syo, misitali jiŵili ja isogosi yaili mpela makomamanga kwa kila lwau kuti isalalisye indu mpela singwa siŵili yaili pa mitwe pa iimila. 43 Iyoyo peyo ŵakolosisye matololi kumi pamo ni mitala kumi pachanya pa matololi syo, 44 ni nkambo wekulungwa wa shaba uwaŵilanjikwe bahali uŵaŵichikwe chakunyuma kwa inyago ya ng'ombe syankambaku kumi na mbili. 45 Nipele ŵagumbile iŵiga ni indu yakumbila liiu pamo ni mabakuli ni yoombo yose iyaliji mu Nyuumba ja Ambuje Akunnungu yati che Selemani ŵannajisye che Hulamu aikolosye, yaliji ya shaba jakung'alima. 46 Mwenye ŵalajisye kuti ikolochekwe yose yo ku lichemba cha Yolodani, papali ni lilongo, liuto lyalili pasikati ja Sukoti ni Saletani. 47 Mwenye che Selemani nganapima yoombo yose pakuŵa yaliji yejinji nnope, kwayele chisilo cha shaba nganichimanyika.

48 Iyoyo peyo che Selemani ŵalajisye kuti indu yose iyaliji mu Nyuumba ja Ambuje Akunnungu ikolochekwe kwa sahabu: Chilisa ni mesa kwa ligongo lya mikate jakuŵika paujo pa Akunnungu, 49 ni yakuŵichila lumuli nsano iyaŵichikwe chakundyo ni nsano chakunchiji paujo pa peuto papakundikwe kwa kwapopelela Akunnungu, ni uluŵa ni lumuli ni yakatila tambi. 50 Iyoyo ŵakolosisye ikombe ni yakatila tambi ni mabakuli ni iteso yakutajila ubani ni mapale gakupalila mooto, ni bawaba kwa ligongo lya minango ja chuumba cha munkati nnope yaani Peuto Papakundikwe kwakwapopelela Akunnungu ni kwa ligongo lya minango ja pa nsana wa Nyuumba ja Akunnungu. Yoseyo yakolochekwe kwa sahabu jakusalala.

51 Kwayele mwenye che Selemani ŵamalisisye kolosya indu yose kwaligongo lya Nyuumba ja Akunnungu. Nipele ŵaiichisye aila indu iŵaiŵisile pajika che Daudi atati gwe kwaligongo lya Ambuje Akunnungu, indu yo yaliji ikolochekwe kwa madini ga feza ni sahabu ni indu ine ya ntengo wekulungwa. Nipele ŵaŵisile indu yo mu mbiko ja Nyuumba ja Akunnungu.