1 Ambuje Akunnungu ŵansalile che Yehu mwana ju che Hanani nkati che Baasha kuti, 2 "Mmwe che Baasha mwaliji mundu jwangamanyika, nambo une nantesile kuŵa chilongola jwa ŵangu ŵa ku Isilaeli. Sambano ntesile sambi mpela jiŵatesile che Yeloboamu, mwatendekasisye ŵandu ŵangu Ŵaisilaeli atende sambi ni kundumbilikasya ligongo lya sambi syao. 3 Nipele tinamjonanje mmwe ni ŵapannango wenu wose mpela inaatendele Wapannango u che Yeloboamu mwana ju che Nebati. 4 Mundu jwalijose jwa pannango wenu juchawilile pa musi, mbwa chachinlya, ni juchawilile kumigunda ijuni chiinlye."

5 Ipanganyo ine ya mu umwenye wa che Baasha ni yose iŵaitesile ni ntima wakwe wangajogopa, yose ilembekwe mu chitabu cha chikumbuchisyo cha mamwenye wa ku Isilaeli. 6 Che Baasha ŵajasiche ni ŵansichile ku Tilisa, che Ela mwanagwe ŵaliji mwenye pamalo pao. 7 Sooni Ambuje Akunnungu waŵechete ni che Yehu mwana ju che Hanani nkati che Baasha ni ŵapannango wakwe, kwaligongo lya sambi siŵaatendele Ambuje Akunnungu. Ŵaatumbilisye Ambuje Akunnungu kwa ipanganyo yakwe pakuŵa ŵatesile mpela che Yeloboamu ni sooni ŵaauleje ŵandu wose ŵapannango wa che Yeloboamu.

8 Pa chaka cha ishilini na sita cha kutawala kwa che Asa mwenye jwa ku Yuda, che Ela mwana ju che Baasha ŵatandite kutawala ku Isilaeli ali nkutama ku Tilisa. Ŵatawele yaka iŵili. 9 Che Simli juŵaliji jwakutumichila jwa mwenye che Ela juŵajimililaga nusu ja mutuka sya mwenye syakukwekwelemya ni falasi, ŵaatendele malindi ga kummulaga mwenye che Ela. Lyuŵa limo mwenye che Ela ali Kutilisa ku nyuumba ji che Alisa ŵang'wele ni kukolelwa. Che Alisa ŵaliji jwakwimilila nyuumba ja chimwenye. 10 Nipele, che Simili ŵajinjile munkati ni kummulaga mwenye che Ela. Nipele che Simili ŵaliji mwenye pamalo pakwe. Yeleyo yakopochele pa chaka cha ishilini na saba paŵatawalaga che Asa mwenye jwa Yuda.

11 Natanda pe kutawala, che Simili ŵauleje ŵandu wose ŵa pannango wa che Baasha, nganiŵalechela namose jwannume jumo jwa pannango wa che Baasha, aŵeje jwannongo jwakwe atamuno mbusangagwe. 12 Kwayele che Simili ŵauleje ŵapannango wose u che Baasha mpela Ambuje Akunnungu iŵansalile che Baasha kwa litala li che Yehu jwakulondola jwa Akunnungu. 13 Yele yose yakopochele kwaligongo lya chigongomalo chiŵatesile che Baasha ni che Ela mwanagwe che Ela. Ŵaatendekasisye Ŵaisilaeli atende sambi. Ŵantumbilisye Ambuje Akunnungu, Akunnungu ŵa ku Isilaeli, kwa kuipopelela inyago ya minnungu jao. 14 Ipanganyo ine ya mu umwenye wa che Ela ni yose iŵaitesile ilembekwe mu chitabu cha chikumbuchisyo cha mamwenye wa ku Isilaeli.

15 Pa chaka cha ishilini na saba cha kutawala kwa che Asa mwenye jwa ku Yuda, che Simili ŵatawele ku Isilaeli ali nkutama ku Tilisa kwa moŵa saba. Katema ko ŵangondo ŵa Ŵaisilaeli ŵaliji ataŵile chigono kuusyungula musi wa ku Gibetoni wa Ŵafilisiti. 16 Waislaeli paŵapikene kuti che Simili ammuleje mwenye, pelepo ŵammisile che Omili jwankulu jwa ŵangondo aŵe mwenye jwa Isilaeli lyuŵa lilyolyo ku chigono kula. 17 Nipele che Omili ni ŵangondo ŵakwe ŵatyosile ku Gibetoni kwaula kukwaputa ŵandu ŵa musi wa ku Tilisa. 18 Che Simili paŵaiweni kuti musi wao ujigalikwe, ŵajinjile mu chuumba cha nkati nnope mwa nyuumba ja chimwenye, ŵajichomile mooto nyuumba jo ni nsyene ŵawilile mmomo. 19 Yele yakopochele ligongo lya sambi siŵatesile, ŵaatendele yachigongomalo Ambuje Akunnungu, ŵatesile sambi mpela iŵaitesile che Yeloboamu ni kwatendekasya Ŵaisilaeli atende sambi. 20 Ipanganyo ine ya mu umwenye wa che Simili ni yose iŵaitesile ni malindi gakwe, ilembekwe mu chitabu cha chikumbuchisyo cha mamwenye wa ku Isilaeli.

21 Che Samili paŵajasiche nipele ŵandu ŵa ku Isilaeli ŵasapulene makuga gaŵili; likuga limo ŵansachile che Tibini mwana ju che Ginati aŵe mwenye, ni likuga line ŵansachile che Omili aŵe mwenye. 22 Kumbesi ŵaŵamsachile che Omili ŵaapundile aŵala ŵaŵamsachile che Tibini. Che Tibini ŵajasiche, che Omili ŵaliji mwenye. 23 Che Omili ŵatandite kutawala pa chaka cha selasini na moja cha kutawala kwa che Asa mwenye jwa ku Yuda. Che Omili ŵatawele yaka kumi na mbili, yaka sita ŵatawele ali nkutama ku Tilisa. 24 Ŵakasumile chikwesya cha Samalia kutyochela kwa che Shemeli kwa ntengo wa ipande elufu sita ya feza, ŵataŵile musi pachanya pakwe ni kuuŵilanga Samalia kuti wandu ŵaakumbuchile che Shemeli asyene chikwesya cho.

25 Che Omili ŵaatendele yachigongomalo Ambuje Akunnungu, ŵatesile sambi kwannope kwapunda mamwenye wose ŵaŵaalongolele. 26 Pakuŵa ŵatesile sambi mpela iŵaitesile che Yeloboamu mwana ju che Nebati, ŵantumbilisye Ambuje Akunnungu, Akunnungu jwa ku Isilaeli kwa kwatendekasye Ŵaisalaeli atende sambi kwa kuipopelela inyago ya minungu. 27 Ipanganyo ine ya mu umwenye wa che Omili ni yose iŵaitesile ni iŵatite kuŵa jwakulimbangana, ilembekwe mu chitabu cha chikumbuchisyo cha mamwenye wa ku Isilaeli. 28 Che Omili paŵajasiche ŵansichile ku Samalia, che Ahabu mwanagwe ŵaliji mwenye pamalo pakwe.

29 Pa chaka cha selasini na nane cha kutawala kwa che Asa mwenye jwa ku Yuda, che Ahabu mwana ju che Omili ŵatandite kutawala ku Isilaeli. Ŵatawele ku Isilaeli yaka ishilini ni mbili ali nkutama ku Samalia. 30 Che Ahabu mwana ju che Omili ŵaatendele yachigongomalo Ambuje Akunnungu kwapunda mamwenye ŵane ŵaŵaalongolele. 31 Sooni nachiŵamuno ŵakuiye yachigongomalo mpela iŵaitesile che Yeloboamu mwana ju che Nebati, che Ahabu ŵapundisye kutenda chigongomalo kwa kulombela che Yesebeli mwali ju che Etibaali mwenye jwa Ŵasidoni ni kutanda kumpopelela nnungu Baali. 32 Ŵaataŵile nnungu Baali Nyuumba jakumpopelela kwele ku Samalia ko, ni mu Nyuumba mo ŵataŵile chilisa. 33 Nombe che Ahabu ŵakolosisye chinyago cha Ashela nnungu jwankongwe ni kupunda kwatumbilisya Ambuje Akunnungu, Akunnungu jwa ku Isilaeli, kwapunda mamwenye wose wa ku Isilaeli ŵaŵaalongolele. 34 Katema kaŵataŵalaga che Ahabu, che Hieli jwakutyochela ku Beseli, ŵataŵile sooni musi wa ku Yeliko. Che Hieli ŵaŵililwe ni mwanagwe jwachilume jwakwitiwo juŵaŵilanjikwe che Abilamu katema kaŵaŵikaga nsingi wa musi wa ku Yeliko, iyoyo ŵaŵililwe ni mwanagwe jwa chiwango juwawilanjikwe che Sekebu, ŵajasiche katema kaŵaŵikaga minango ja musi wo. Yeleyo yakopochele mpela ilaila Ambuje Akunnungu iwatite kwasalila che Yoshua mwana jwa che Nuni.