1 Reis 3

Che Selemani akuŵenda apegwe luunda

1 Che Selemani ŵalombele mwali jwa Falao jwa ku Misili, kwayele ŵajilene. Ŵannyichisye mwali jo ku Musi u che Daudi mpaka paŵamasile kutaŵa nyuumba jao ni Nyuumba ja Ambuje Akunnungu ni lipupa lya kuusyungula musi wa Yelusalemu.

2 Pa moŵa go, ŵandu ŵatyosyaga mbopesi mmatumbi, pakuŵa Nyuumba ja Akunnungu jaliji nganijitaŵikwe. 3 Che Selemani nombe ŵaanonyele nnope Ambuje Akunnungu, ŵakuiye malajisyo gose gaŵasalilwe ni che Daudi atati ŵao, nambo ŵatyosyaga mbopesi syakutinisya ni kututumisya ubani petumbi.

4 Katema kampepe, Mwenye ŵapite ku Gibeoni kukutyosya mbopesi, pakuŵa lyaliji liuto lyakumanyika nnope lyalili ni chilisa cha kutyochesya mbopesi. Kweleko che Selemani ŵatyosyaga mbopesi sya kutinisya elufu moja pachanya chilisa cho. 5 Pa chilo cho, Ambuje Akunnungu ŵankopochele che Selemani ali mu sagamisi ni kwasalila, "Mmende chachilichose chinkuchisaka ni une tinampe." 6 Che Selemani ŵajanjile, "Mmwe mwalosisye wema wekulungwa jwakutumichila jwenu atati ŵangu che Daudi, pakuŵa ŵaliji jwambone paujo penu ni ŵantumichilaga mwakulupilichika ni kupanganya indu yankuisaka. Nomwe, mwalosisye unonyelo wenu, mwapele mwana jwakutama pa chitengu chao cha umwenye mpela yaili lelo jino. 7 Alakwe Ambuje Akunnungu, Akunnungu ŵangu, mundesile jwakutumichila jwenu mme mwenye pamalo pa che Daudi atati ŵangu. Nambo une ndili jwanchanda nganingola luunda. 8 Jwakutumichila jwenu ndili pasikati ja ŵandu ŵamwasagwile aŵe ŵandu ŵenu, ŵandu achajinji ŵangaikukomboleka kuŵalanjika. 9 Kwayele ngummenda mumbe une jwakutumichila jwenu luunda, ngombole kwalongosya ŵandu ŵenu yambone ni manyilile ichinyile kulekanganya indu yambone ni yangalumbana. Pakuŵa nduni jwakukombola kwalongosya ŵandu ŵenu ŵaali ŵajinji ŵa?"

10 Chele chindu chaŵendile che Selemani chaanonyelesye nnope Ambuje Akunnungu. 11 Nipele, Ambuje Akunnungu ŵaasalile, "Pakuŵa mmendile luunda kuti mwalongosye ŵandu kwagoloka, nganimumenda nkole umi weleu pane mme jwachipanje, pane kuŵenda kuti ŵammagongo ŵenu awe, 12 nipele, nguntendela yele immendile yo. Chinampe luunda mwakupunda ni umanyilisi kwati nganatyochele mundu jwakwete akanaŵe mmwe ni ngaapagwa mundu jutakole pamalo pa mmwe. 13 Kupunda yeleyo chinampe indu yanganimumende, tinjimpa chipanje ni tinchimbichikwe mu umi wenu wose, ngasapagwa mwenye jutachiŵa mpela mmwe. 14 Iŵaga tinlikuye litala lyangu ni kukamula malajisyo gangu mpela iŵatesile atati wenu che Daudi, nipele, chinantende ntame moŵa gamajinji."

15 Che Selemani ŵajimwiche ni kwimanyilila kuti jaliji sagamisi. Ŵausile ku Yelusalemu ni kwima paujo pa Lisanduku lya Lilangano lya Ambuje Akunnungu, ŵatyosisye mbopesi syakutinisya ni mbopesi sya kutama kwa chitendewele. Nipele ŵaakolochesye chindimba cha yakulya ŵakutumichila ŵakwe wose.

Che Selemani akulamula magambo gakusausya

16 Nipele pa lyuŵa limo achakongwe ŵaŵili ŵachigwagwa ŵaajaulile mwenye ni kwima mbujo mwakwe. 17 Jumo jwa achakongwe wo ŵatite, "Ambuje ŵangu une ni njangu ju tukutama mu nyuumba jimo. Naligopwele mwanache jwannume tuli wosepe. 18 Pakumala moŵa gatatu nombe njangu ŵaligopwele mwanache jwannume. Paliji pangali mundu jwine twaliji uwewepe mu nyuumba mo. 19 Mwanache jwa njangu jo ŵawile chilo, ligongo ŵangonele. 20 Njangu ŵajimwiche pasikati chilo, ŵanjigele mwanangu luli luundokotele lugono ni kungoneka pa liŵele pakwe ni mwanache jwammwe jula ŵangoneche pa liŵele lya une. 21 Panajimwiche kuninkucha njisakaga kuti nanjonjesye, natojime awile. Nambo kundaŵi panannolechesye ammatii! Nganaŵa mwanangu junammeleche."

22 Nambo jwankongwe jwine jula ŵatite, "Ngwamba, mwanache jwanjumi ali jwangu jwawile ju ali jwenumwe," Ni jwankongwe jwandanda jula ŵagombelechesye, "Ngwamba! mwanache jwammwe jo ali jwenumwe, jwali jwanjumi ali jwangune." Kwayele ŵakangene paujo pa mwenye.

23 Nipele mwenye che Selemani ŵatite, "Kila mundu akuti mwanache jwanjumi ali jwakwe ni jwammwe nganaŵa jwakwe." 24 Nipele mwenye che Selemani ŵalajisye kuti ŵaichisye lipanga! Nipele ŵaichisye lipanga paujo pa mwenye, 25 mwenye ŵatite, "Munkatanye ipande iŵili mwanache jwanjumi jo, chipande chimo mumpeje jumo ni chine mumpeje mundu jwine." 26 Achikulugwe mwanache jwali jwanjumi ŵammonele chanasa mwanache jo, ni ŵansalile mwenye, "Choonde, mwenye ngummenda mumpeje njangu jwele mwanache jwali jwanjumi jo, nkammulaga."

Nambo jwankongwe jwine jula ŵatite, "Ngwamba! Mwanache akaŵa jwangu namose jwakwe. Munkatanye ipande iŵili." 27 Nipele mwenye ŵalamwile, "Nkammulaga mwanache jo! Mwape jwankongwe jwasachileje kuti mwanache aŵe jwanjumi, anjigale, pakuŵa ali achikulugwe nsyenesyene."

28 Ŵandu wose ŵa ku Isilaeli paŵapikene yatite kulamula mwenye magambo go ŵanjogwepe mwenye, pakuŵa ŵaiweni kuti ŵana luunda lwa Akunnungu, ni kuti alamwile kwa chigolochelo.

Bíblia Online

Veja também

Oração para pedir a Deus que aumente a fé quando o coração está cheio de dúvida

Como o amor de Deus cura as dores de relações passadas?