1 Nipele che Lehoboamu ŵajawile ku Shekemu, pakuŵa Ŵaisilaeli wose ŵaliji asongangene kweleko kuti ŵaatende che Lehoboamu kuŵa mwenye. 2 Che Yeloboamu mwana ju che Nebati juŵautuchile ku Misili kwakwajogopa che Selemani paŵapikene kuti che Selemani awile, nipele ŵausilile kutyochela ku Misili. 3 Ilongola wa ngosyo likumi sya kumpoto ŵatumile utenga kukummilanga che Yeloboamu, nipele nsyene jo pamo ni ŵele ilongola ŵa ngosyo likumi ŵanjaulile che Lehoboamu ni kunsalila, 4 "Atati wenu che Selemani ŵatukanganyichisye twapanganyichisye masengo gakunonopa, nipele sambano tukummenda ntupunguchisye masengo go noweji chituntumichile" 5 Che Lehoboamu ŵajanjile, "Njaulangane nkauje kukwangu ntondo." Nipele ŵandu ŵala ŵatyosilenje. 6 Kanyuma che Lehoboamu ŵasachile ushauli wa achachekulu ŵaŵatumichila atatigwe che Selemani paŵaliji jwanjumi. Ŵausisye, "Ana nkuushauli naajanje chinauli ŵandu wa?" 7 Achachekulu ŵaajanjile, "Naga nkusaka kwatumichila uchenene ŵandu ŵa, nkunguluche nawo yambone pankwajanga, nombewo taŵe ŵakutumichila ŵenu moŵa gose."

8 Nambo che Lehoboamu ŵaichembulwisye iŵaŵechete achachekulu, nambo pamalo pakwe ŵatesile iŵaŵechete achachanda ŵa chikuudi chakwe ŵaŵantumichilaga. 9 Ŵausisye, "Wanyamwe nkwiwona uli? Uli twajanje chinauli ŵele ŵandu ŵaakumenda kuti naapunguchisye masengo gakunonopa gaŵapegwilwe ni atati ŵangu?" 10 Aŵala chachanda ŵa chikuudi chakwe ŵaajanjile, "Yeleyi ni ichinjile pa kwajanga, ‘Chaala changu chambesi cha mmakono chili chakwimbala kugapunda mauli ga atati ŵangu.’ 11 Atati ŵangu ŵantendekasisye masengo gakunonopa, nambo une tinantendekasye masengo gakunonopa nnope. Nombe atati ŵangu ŵamputile ni iboko nambo une chinampute kwa lubokola lwa nchongwe."

12 Pakumala moŵa gatatu che Yelobohanu ni ŵandu wose ŵausile ku che Lehoboamu mpela iŵatite pakulangana. 13 Mwenye ŵalesile achila chiŵasalilwe ni achachekulu, ŵaajanjile ŵandu ŵala kwa kwakalipila. 14 Ŵaajanjile muŵaŵechetele achachanda ŵala achitiji, "Atati ŵangu ŵampanganyisye masengo gakunonopa, nambo une chinantendekasye masengo gakunonopa nnope. Atati ŵangu ŵamputile kwa iboko nambo une chinampute kwa lubokola lwa nchongwe."

15 Akunnungu ŵantendekasisye mwenye akaapikanila ŵandu ŵala kuti akombole kukwanilisya liloŵe liŵasalile che Yeloboamu mwana ju che Nebati kwa litala lya che Ahiya jwakulondola jwakutyochela ku Shilo.

16 Ŵaisilaeli wose paŵaiweni kuti mwenye akanile kwapikanila, ŵaasalile, "Nganituŵa umo ni che Daudi, nganitukola chachilichose kutyoka kwa jwele mwana ju che Yese. Mmujangane kumangwenu ŵanya Ŵaisilaeli, mmwe mwanache ju che Daudi njigose nyuumba jenu mwasyene."

Kwa yele ŵandu wose ŵa ku Isilaeli ŵausile kumangwao. 17 Nambo Ŵaisilaeli ŵaŵatamaga ku misi ja ku Yuda, ŵaliji nkutawalikwa ni che Lehoboamu. 18 Mwenye che Lehoboamu ŵantumile che Adolamu jwankulu jwa ŵakwimilila ŵandu ŵaakupanganya masengo gakunonopa gakukanganichisya ŵaajaulile Ŵaisilaeli, nambo Ŵaisilaeli ŵamponyele maganga ni kummulaga. Namose yeleyo, mwenye che Lehoboamu mwakwanguya ŵakwesile mmutuka jao ja kukwekwelemya ni falasi ŵautuchile ku Yelusalemu. 19 Kwayele, kutandilila pele Ŵaisilaeli ŵatandite kwagalauka ŵandu ŵa uŵelesi u che Daudi mpaka lelojino.

20 Ŵaisilaeli paŵapikene kuti che Yeloboamu ausile kutyochela ku Misili, ŵammilasile ku nsongangano ni kuntenda mwenye jwa Isilaeli jose. Lukosyo lwa Yuda pe lwasigaile kuŵa lwakwitichisya kwa uŵelesi u che Daudi.

21 Che Lehoboamu paŵaiche ku Yelusalemu, ŵaasongangenye ŵangondo laki moja na semanini ŵa lukosyo lwa Yuda ni lukosyo lwa Benjamini, aputane ni umwenye wa Isilaeli, ni kuwuchisya sooni umwenye ku che Lehoboamu mwana ju che Selemani. 22 Nambo Ambuje Akunnungu ŵansalile che Shemaya jwakulondola jwakwe, 23 "Mwasalile mwenye che Lehoboamu mwana ju che Selemani ni ŵandu wose ŵa lukosyo lwa Yuda ni lwa Benjamini ni ŵandu ŵane, 24 yakuti uneji Ambuje Akunnungu nguti yeleyi; ‘Nkajaula namose nkaputana ni achalongo achinjenu Ŵaisilaeli. Kila mundu ajaule kumangwao pakuwa ayi indu yi ityochele kukwangu.’" Kwayele ŵalijitichisye liloŵe lya Ambuje Akunnungu, ni ŵausile mmangwawo mpela iŵatite pakulajisya Ambuje Akunnungu.

25 Mwenye che Yeloboamu ŵautaŵile sooni musi wa ku Shekemu ku chilambo cha matumbi cha Efulaimu ni kutama kweleko. Nipele ŵatyosile kweleko, ŵapite kutaŵa musi wa ku Penueli. 26 Che Yeloboamu ŵaganisisye muntima wakwe, "Sambano umwenye chiuujile panyuumba ja mwenye che Daudi, 27 ligongo, iŵaga ŵandu ŵa tajendelechele kwaula kukutyosya mbopesi ku Nyuumba ja Ambuje Akunnungu kwele ku Yelusalemu ko, kweleko mitima jao tijingalauchile ambuje ŵao che Lehoboamu mwenye jwa ku Yuda, ni ŵanyawo tamulaje une."

28 Nipele, paŵausisye ŵandu kuti apanganye ichichi, mwenye ŵapanganyisye inyago iŵili ya ng'ombe syamwana sya sahabu. Ŵaasalile ŵandu, "Ŵanyamwe Ŵaisilaeli, ajiji jili minungu jenu jijankopwesye ku Misili! Kwangali ligongo lya kwaula ku Yelusalemu kukupopelela." 29 Ŵachiŵisile chinyago chimo cha ng'ombe jamwana cha sahabu ku musi wa Beseli ni chine ku musi wa Dani. 30 Kwayele ŵandu ŵatesile sambi pakuŵa ŵapite kuipopelela inyago yo, ŵane kwele ku musi wa Beseli ko ni ŵane kwele ku musi wa Dani. 31 Iyoyopeyo che Yoleboamu ŵatawile peuto pakupopelela ku itumbi ni kwasagula ŵandu ŵakwe aŵe ŵambopesi, ŵandu ŵati nganaŵa ŵa lukosyo lwa Lawi, ŵaŵasachilwe kuŵa ŵambopesi.

32 Nombe che Yeloboamu ŵalajisye kuti lyuŵa lya kumi ni nsano pa mwesi wa nane, liŵe lya chindimba mpela iyatendekwaga ku Yuda. Ŵatyosisye mbopesi ku Beseli ko pa chilisa chiŵachitawile paujo pa inyago ya ng'ombe syamwana siŵasikolosisye. Ŵaaŵisile ŵambopesi peuto pakupelechela mbopesi paŵapataŵile po. 33 Pa lyuŵa lya kumi na tano lya mwesi wa nane, mwesi uwausagwile nsyene, ŵatyosisye mbopesi pa chilisa chiŵachitawile kwele ku Beseli ko. Kwayele ŵaŵisile chindimba cha yakulya kwa ŵandu ŵa ku Isilaeli, nipele ŵakwesile pachilisa kukututumisya ubani.