1 Mwenye che Selemani ŵaasimanisye paujo pakwe, akula ku Yelusalemu achachekulu ni ilongola wose ŵa ngosyo ni achakulu ŵa mitundu ja Ŵaisilaeli, kuti aliichisye Lisanduku lya Lilangano lya Ambuje kutyochela ku Sayuni yaani musi u che Daudi. 2 Ŵandu wose ŵa ku Isilaeli ŵasongangene kwa mwenye che Selemani katema ka chindimba cha mwesi wa Esanimu yaani mwesi wa saba. 3 Achachekulu wose wa Ŵaisilaeli paŵaiche, ŵambopesi ŵajigele Lisanduku lya Lilangano. 4 Ŵalawi ni ŵambopesi ŵalisamisye Lisanduku lya Lilangano ni lisakasa lya kusimanilana pamo ni yoombo yose yaikundikwe kwa kwapopelela Akunnungu iyaliji mu lisakasa lyo. 5 Mwenye ni nsongangano wose wa Ŵaisilaeli ŵasongangene mbujo mwa Lisanduku lya Lilangano, nombe ŵambopesi ŵatyosisye mbopesi syesijinji sya ngondolo ni ng'ombe syangaŵalanjikwa. 6 Ŵambopesi ŵaiche nalyo Lisanduku lya Ambuje mpaka peuto pakwe nkati mwa Nyuumba ja Akunnungu, Peuto Papakundikwe kwannope kwa kwapopelela Akunnungu, elo kuusi kwa mapapiko ga inyago ya yepanganyikwe. 7 Mapapiko ga inyago ya yepanganyikwe yo yatambalukuswile mapapiko gao pachanya papaŵichikwe Lisanduku lya Lilangano ni itela yakwe yakunyakulila. 8 Itela yakunyakulila Lisanduku lyo yaliji yeleu nnope kwati yawonekaga kutyochela Peuto Papakundikwe kwannope kwa kwapopelela Akunnungu, mbujo mwa chuumba cha munkati, nambo ngawa chapaasa pa Peuto Papakundikwe kwannope kwa kwapopelela Akunnungu, nombeyo ili kweleko mpaka lelo. 9 Mwaliji mwangali chindu mu Lisanduku lyo ikaŵe maganga gaŵili gagasepekwe nti ibao yati che Musa ŵaiŵisile ku Holebu kula, apala Ambuje Akunnungu paŵaŵisile chilanga ni Ŵaisilaeli paŵatyosile ku Misili.

10 Yaliji, ŵambopesi paŵaliji nkutyoka Peuto Papakundikwe kwannope kwa kwapopelela Akunnungu, papopo liunde lyagumbele mu Nyuumba ja Ambuje Akunnungu. 11 Ŵambopesi nganakombola kupanganya masengo gao ligongo lya liunde lyo, pakuŵa lumbili lwa Ambuje Akunnungu lwagumbele mu nyuumba jakwe. 12 Pelepo che Selemani ŵapopele achitiji;

"Ŵalakwe Ambuje Akunnungu mwatite chintame mu chipi totolo.

13 Sambano une nantaŵile Nyuumba jakusalala,

paŵe pamalo penu pachintame moŵa gose pangali mbesi."

14 Nipele nsongangano wose wa Ŵaisilaeli paŵajimi pelepo, che Selemani ŵaagalauchile ni kwapa upile, 15 achitiji, "Alapikwe Ambuje Akunnungu, Akunnungu ŵa Ŵaisilaeli, jwati kwa machili gao atindimisye chilanga chiŵapele atati ŵangu che Daudi, paŵatite, 16 ‘Kutyochela panaakopwesye ŵandu ŵangu Ŵaisilaeli ku chilambo cha Misili, nganiisagula musi wauliwose mu ngosyo sya Ŵaisilaeli kuti ndaŵilwe nyuumba jitambopelele, nambo nansagwile che Daudi aŵe mwenye pa ŵandu ŵangu, Ŵaisilaeli.’" 17 Che Selemani ŵajendelechele kuŵecheta achitiji, "Atati ŵangu che Daudi ŵasachile kwataŵila Nyuumba, Ambuje Akunnungu, Akunnungu ŵa Ŵaisilaeli, 18 nambo Ambuje Akunnungu ŵansalile atati jwangu che Daudi, ‘Pakuŵa mwasachile kuundaŵila Nyuumba une, mwatesile yambone kusaka kuchitendekanya chindu chi. 19 Nambo ngaŵa mmwe uchimundaŵile. Mwana gwenu jutimmeleche ni juchandaŵile nyuumba jo.’"

20 "Ambuje Akunnungu atindimisye chilanga chiŵaŵisile, pakuŵa ndili mwenye pamalo pa atati ŵangu che Daudi, sambano ndamile chitengu cha umwenye cha Isilaeli, mpela ila iŵatite pa kulanga Ambuje Akunnungu, nombe ndaŵile Nyuumba jakwapopelela Ambuje Akunnungu, Akunnungu jwa Isilaeli. 21 Mmomo miisile liuto paakuŵika Lisanduku lya Lilangano lyalili ni maganga gagalembekwe malamusi ga Ambuje Akunnungu gaŵagatesile ni achambuje ŵetu paŵakopwesye ku chilambo cha Misili."

22 Nipele che Selemani ŵajimi paujo pa chilisa cha Ambuje Akunnungu, nsongangano wose wa Isilaeli ali nkwalolechesya, ŵanyakwile makono gakwe kwinani, 23 ŵatite, "Alakwe Ambuje Akunnungu, Akunnungu ŵa Isilaeli nganapagwa Nnungu mpela mmwe mwinani kwinani, namose paasi pa chilambo. Mmwe nkugosa Lilangano lyenu, kwatendela indu yambone ŵakutumichila ŵenu, ŵakunjitisya mmwe kwa mitima jao jose. 24 Ntindimisye chilanga chimwachiŵisile kwa jwakutumichila jwenu che Daudi atati ŵangu, kusyene kwa ukombole wenu, agala gamwalanjile lelo jino ngatindimisye. 25 Sambano, alakwe Ambuje Akunnungu, Akunnungu wa ku Isilaeli, choonde ntindimisisye aila imwalanjile jwakutumichila jwenu che Daudi pamwasalile kuti ‘Chinkole mundu mu uŵelesi ŵenu, juchatamile chitengu cha umwenye cha Isilaeli, naga uŵelesi ŵenu chaaŵe ŵakukulupilichika mu ipanganyo yao paujo pangu mpela intesile mmwe.’ 26 Sambano, Ambuje Akunnungu ŵa ku Isilaeli, ngunchondelela, ntindimisye yose imwalanjile atati ŵangu che Daudi, jwakutumichila jwenu."

27 "Nambo usyene, uli Ambuje Akunnungu chatame pa chilambo? Kwinani namose kwinani kwakuli kwinani nnope ngakomboleka kunkwana mmwe, sambano chinkombole uli kutama mu aji nyuumba jendoni jindaŵile ji? 28 Nambo alakwe Ambuje Akunnungu, Akunnungu ŵangu mpikane chiingumpopelela ni kuumbanganyichisya chiingummenda lelo jino, une jwakutumichila jwenu. 29 Mjigose Nyuumba ji, chilo ni muusi, apa pamalo pamwatite kuti, ‘Liina lyangu tilitame pamalo pa kuti ŵaandu aambopelele.’ Mumbikanile une pangupopela njilolaga pamalo pa. 30 Muumbikanile pangupopela ni sooni mwapikanile ŵandu ŵenu ŵa Isilaeli paakumpopelela, naga chapopelele ali agalauchile ku Nyuumba ji. Ntupikane patukumpopelela kutyochela kwele kwinani kunkutama, ni mwatupikanaga ntulechelesye."

31 "Mundu annewelaga njakwe, ni kusachilwa kuti alumbile, aikaga kulumbila paujo pa chilisa chenu, chachili mu Nyuumba ji, 32 choonde Ambuje Akunnungu, mpikane kutyochela kwinani ko, mmwe mwasyene mwaalamule wakutumichila ŵenu. Ajula junkumbona kuti aleŵile munnamule malinga ni chaleŵile, ni ajula jwanganaleŵa munnechelesye ni kulosya kuti kusyene ali jwakulupilichika."

33 "Iŵaga ŵandu ŵenu Ŵaisilaeli, aputikwe na ŵammagongo ŵao kwaligongo lya sambi syantendele mmwe, alekaga sambi ni kujigalauchila nyuumba ji ni kulilapa liina lyenu, apopelelaga ni kunchondelela kuti mwakolele chanasa, 34 nipele mwapikanile kutyochela kwinani, nkaalechelele ŵandu ŵenu Ŵaisilaeli sambi syao ni kwausya ku chilambo chimwapele achambuje ŵao."

35 "Iŵaga njisiŵile ula jikanya ligongo ŵandu ŵenu antendele sambi mmwe, pachapopelele achilolechesyaga nyuumba jenu ji, ni kulijitichisya lina lyenu, ni kusileka sambi syao pankwajamuka 36 choonde mwapikanile kutyochela kwele kwinani ko ni kwalechelela sambi sya ŵakutumichila ŵenu, ŵandu ŵenu Ŵaisilaeli. Mwajiganye litala lyambone lya kutama ni kujinyesya ula pachilambo chimwapele ŵandu ŵenu chiŵe chao."

37 "Iŵaga lisi lijumwile mwakwika kulepela mimela kumela pane ula janyaga jejinji ni kutendekasya yakula kuwola pane iŵaga ilwele ya kogoya yijenele kwa wandu. Katema kane iŵaga mimela jililikwe ni sombe pane mawungu. Iŵaga ŵandu ŵenu aputikwaga ni ŵammagongo ŵao pa misi jao pane iŵaga ilwele ijenele chitema kwa ŵandu, 38 choonde ngapikane mapopelo galigose gachapopelele ŵandu ŵenu Ŵaisilaeli. Kila mundu agamanyaga malagasyo ga muntima mwao, ampopelelaga akuno ali agolwesye makono gakwe kulosya ku Nyuumba ji; 39 nipele, mumpikanile kutyochela kwele kwinani kunkutama ko, nkalechelele, nkaape kila mundu yakuti kuŵajilwa, pakuŵa mmwemwe pe ni unkumanyilila yaili mmitima ja ŵandu wose, 40 kuti anjitichisyanje katema kose kaakutama pa chilambo chimwapele achambuje ŵetu."

41 "Kwanti iyoyo jwannendo jwanganaŵa jumo jwa ŵandu ŵenu Ŵaisilaeli, nambo aiche kutyochela ku chilambo chatalika ligongo apilikene indu yekulungwa intesile, 42 pakuŵa ŵandu tachipikana nkati indu yekulungwa intesile ni machili genu ni ukombole wenu, mundu jo apopelelaga akuno alinkulolechesye ku nyuumba ji, 43 nipele, choonde mumpikanile kutyochela kwele kwinani kunkutama ko, nkaatendele chachilichose chaakummenda jwannendo jo, kuti ŵandu ŵa ilambo yose alimanyilile lina lyenu ni kunjitichisya nti yaakutenda ŵandu ŵenu Ŵaisilaeli. Nombe aimanyilile kuti aji Nyuumba jindaŵile ji, pali pamalo pakumpopelela ŵalakwejo."

44 "Ŵandu ŵenu patajauleje kukuputana ngondo ni ŵammagongo ŵao, papalipose kuchimwajausye, patachimpopela alakwe Ambuje Akunnungu, achilolaga ku musi umuusagwile ni nyuumba jindaŵile kwa kumpopelela ŵalakwe, 45 nipele mumbikane chingumpopelela ni kuumbanganyichisya chingummenda kutyochela kwele kwinani ko nkaakombolesye kupunda pa ngondo."

46 "Iŵaga ŵandu ŵenu antendele sambi, pakuŵa ngapagwa mundu jwangaakutenda sambi, ni mmwe mwatumbilaga ni kwatenda aputikwe ni ŵammagongo ŵao ni kujigalikwa kuŵa mateeka ku chilambo cha ŵammagongo ŵao, iŵe chiŵandi pane kwatalichila; 47 mwapikanile iŵaga tagalausye mitima jao ni kummenda kuti mwalechelele achitiji ‘Tutesile sambi, tuleŵile, tutesile yachigongomalo’, 48 iŵaga chammujile kwa mitima jao jose ali mu chilambo chajigalikwe mateka, ni kupopelela akuno achilolaga ku chilambo chao ni ku chilambo chimwapele achambuje ŵao pane mmusi unsagwile pane ku Nyuumba jindaŵile kwaligongo lyenu, 49 nipele, ngunchondelela mwapilikanile kutyochela kwele kwinani kunkutama ko, chaakummenda ni chaakunchondelela ni mwakolele chanasa. 50 Nkaalechelele ŵandu ŵenu sambi syantendele ni ileŵo yao yantendele mmwe, nkaatende ŵandu ŵaŵaakamwile ŵaakolele chanasa, 51 pakuŵa ŵelewo ali ŵandu ŵenu, kusyene ali ŵandu ŵenu umwakopwesye ku chilambo cha ku Misili ku chipala."

52 "Nkalilole lipopelo lya jwakutumichila jwenu che Selemani, ni mapopelo ga ŵandu ŵenu Ŵaisilaeli, mwapikanileje paakummenda mwakamuchisye. 53 Ligongo mwasagwile ŵanyaŵa kuŵa ŵandu ŵenu kutyochela ku ŵandu ŵa ilambo yose, mpela imwatite pakusala kwa litala lya jwakutumichila jwenu che Musa, katema ŵalakwejo, Ambuje Akunnungu, pamwakopwesye achambuje ŵetu ku chilambo cha ku Misili."

54 Che Selemani paŵamasile kwapopelela Ambuje Akunnungu paujo pa chilisa cha Ambuje Akunnungu, ŵajimwiche apala paŵatindiŵele ali ajongwele makono gao mwinani. 55 Ŵajimi ni kwapa upile nsongangano wose wa Ŵaisilaeli, kwa kunyanyisya achitiji, 56 "Alapikwe Ambuje Akunnungu, juŵatesile ŵandu ŵakwe Ŵaisilaeli apumulile mpela iŵatite pakulanga. Atindimisye ilanga yakwe yose iŵailanjile kwa litala lya jwakutumichila jwakwe che Musa. 57 Ambuje Akunnungu, Akunnungu ŵetu aŵe pamo ni uwe mpela iŵaliji ni achambuje ŵetu, akatuleka namose kutukana uweji. 58 Jwele ajitende mitima jetu jaakulupilile ŵelewo, kuti tujende mmatala gakwe gose ni kugakamula makanyo ni malajisyo ni malamulo gaŵapele achambuje ŵetu. 59 Maloŵe gangu gambopele paujo pa Ambuje Akunnungu, Akunnungu ŵetu, gaŵe chiŵandi ni Ambuje Akunnungu, muusi ni chilo. Nombewo aang'ose une jwakutumichila jwakwe ni ŵandu ŵakwe Ŵaisilaeli kuti akole yaikuŵajilwa kila lyuŵa, 60 kuti ŵandu wose ŵa pachilambo aimanyilile yakuti Ambuje Akunnungu ali Akunnungu jikape, ni yakuti nganapagwa jwine. 61 Ŵanyamwe mme ŵakukulupilichika kwa Ambuje Akunnungu, Akunnungu ŵetu, ntame kwa kugakuya malajisyo gakwe ni kwitichisya makanyo gakwe mpela inkuti kutenda lelo jino."

62 Nipele, mwenye che Selemani pamo ni Ŵaisilaeli wose ŵaŵaliji pamo nao ŵaatyochesye Ambuje Akunnungu mbopesi. 63 Che Selemani ŵaatyochesye Ambuje Akunnungu mbopesi sya kutama kwa chitendewele, ng'ombe elufu ishilini na mbili ni ngondolo laki moja ni elufu ishilini. Yeleyo ni iŵatesile mwenye ni ŵandu wose ŵa ku Isilaeli, pakujitenda Nyuumba jo jiŵe kwa ligongo lya Ambuje Akunnungu. 64 Lyuŵa lilyolyo mwenye ŵalitesile lipesa lyalili pasikati ja lutenje lwaluli mbujo mwa Nyuumba jo liŵe kwa ligongo lya Ambuje Akunnungu, pelepo ni paŵatyosisye mbopesi syakutinisya ni mbopesi sya magowolo ni mbopesi sya mauta ga inyama ni mbopesi sya chitendewele. Ŵatesile yeleyo ligongo chilisa cha shaba chichaliji paujo pa Ambuje Akunnungu, chaliji chamwana nganichikwanila kwa mbopesi syose syo.

65 Nipele, che Selemani ni Ŵaisilaeli wose pamo ni ŵandu kutyochela ku Lebo Hamati chakumpoto mpaka ku kasulo ka Misili chakulujenda, ŵatesile chindimba pa nyuumba ja Akunnungu pala kwa moŵa saba, ni ŵajonjechesye moŵa gane saba. Kwaliji ni nsongangano wekulungwa. 66 Pa lyuŵa lya nane mmoŵa saba gaŵajonjechesye gala, che Selemani ŵalangene ni ŵandu. Ŵanyawo ŵampele upile mwenye ni kuujangana mmasakasa gao ali nkusangalala ni kusengwa mmitima jao kwaligongo lya indu yambone iŵaitesile Ambuje Akunnungu, ku che Daudi jwakutumichila jwakwe ni Ŵaisilaeli wose.