1 Pa lyuŵa limo che Yeloboamu ŵajimi mungulugulu mwa chilisa kuti atutumisye ubani. Nipele mundu jwa Ambuje Akunnungu jwaiche pelepo pa Beseli kutyochela ku Yuda ni utenga wa Akunungu. 2 Mundu jo ŵasasile achila chasalilwe ni Akunnungu kuti achisale, ni ŵanyanyisye achitiji, "Mmwe chilisa, chilisa! Ambuje Akunnungu akuti, ‘Chapagwe mwanache jwakuŵilanjikwa Yosia mu uŵelesi wa che Daudi. Jwele tachaulaga ŵambopesi ŵaakupeleka mbopesi kumatumbi, ŵaakututumisya ubani pelepa, ni maupa ga ŵandu tagatinisye pachanya penu.’" 3 Lyuŵa lilalila mundu jula ŵatyosisye chimanyisyo achitiji, "Achi chili chimanyisyo chaasasile Ambuje Akunnungu kuti, lyuŵa lichichigumuche chilisa chi ni liwu lyalili pachanya pakwe tilimwasiche, pelepo chinchimanyilila kuti Ambuje Akunnungu aŵechete ni une."

4 Mwenye che Yeloboamu paŵapilikene achila chiŵaŵechete mundu jwa Akunnungu paŵanyanyisye ni kusala ngani ja chilisa cha ku Beseli, ŵanlosisye chala achitiji, "Munkamule jwele." Papopo nkono uŵaugolwesye ula wakangamele ni nganakombola sooni kuupinda. 5 Papopo chilisa chila chagumwiche ni liwu lyamwasiche malinga ni liloŵe lya Akunnungu liŵachisasile mundu jwa Akunnungu jula. 6 Nipele mwenye che Yeloboamu ŵansalile mundu jwa Akunnungu jula, "Choonde mwachondelele Ambuje Akunnungu, Akunnungu ŵenu kuti name nkono wangu wu."

Nipele mundu jwa Akunnungu jula ŵampopele Ambuje Akunnungu ni nkono wa mwenye jula waujilile mpela uwaliji kuundanda. 7 Pelepo mwenye ŵansalile mundu jwa Akunnungu jula, "Twende kunyuumba jangu tukalye, ngampe ni ntuuka kwa aila imuumbanganyichisye." 8 Nambo mundu jwa Akunnungu jula ŵanjanjile, "Namose nkaambele nusu ja chipanje chenu, nganyaula pamo ni mmwe atamuno ngalya pane kung'wa meesi pamalo pano, 9 pakuŵa Ambuje Akunnungu ŵanamwile kuti ngasilya pane kung'wa meesi pamalo pano, namose kuuja kwa litala linaiche nalyo." 10 Kwayele mundu jula ŵajawile achipitaga litala liine, nganauja kwa litala liwaiche nalyo pakwika ku Beseli.

11 Katema ko kwaliji ni jwakulondola jwaachekulwipe juŵatamaga ku Beseli. Achiŵanagwe ŵachilume ŵaiche ni kwasalila indu yose iŵaitesile mundu jwa Akunnungu kwele ku Beseli ko. Sooni ŵansalile indu yose iŵaasalile mwenye che Yeloboamu. 12 Atati ŵao ŵausisye, "Ana apite litala chi?" Ŵanache ŵakwe ŵala ŵaalosisye litala lyajawile mundu jwa Akunnungu jwa ku Yuda jula. 13 Nipele ŵaasalile ŵanache ŵakwe kuti, "Mumichile chile mbunda jo." Ŵammisile chile, nombejo ŵakwesile pa mbunda jila, 14 ŵankuiye mundu jwa Akunnungu jula ni kunsimana ali atemi kuusi kwa chitela cha mwaloni. Nipele ŵausisye, "Ana mmwe ndi mundu jwa Akunnungu jwakutyochela ku Yuda?" Nombejo jwatite, "Elo ni uneji." 15 Jwakulondola jwanchekulu jula ŵatite, "Twende kumusi tukalye," 16 Nambo mundu jwa Akunnungu jula ŵatite, "Ngangombola kuuja ni mmwe namose kwinjila mu nyuumba jenu pane kulya chakulya namose meesi ni mmwe peuto pa. 17 Pakuŵa Ambuje Akunnungu ŵanganyisye kulya chakulya pane kungwa meesi peuto pa, namose kuujila kwa litala linapitile pakwika akuno." 18 Jwakulondola jwanchekulu jula ŵansalile "Noneji ndili jwakulondola mpela mmwe. Ambuje Akunnungu aŵechete ni une kwa litala lya katumetume jwakwe jwakwinani kuti ‘Mumbusye kumangwenu kuti akalye chakulya ni kung'wa meesi.’" Nambo jwakulondola jwanchekulu jula ŵasasile unami. 19 Nipele jwakulondola jwanchekulu jula ŵausile kumangwao pamo ni mundu jwa Akunnungu jula, ŵalile ni kung'wa nao.

20 Paŵaliji ali nkulya, Ambuje Akunnungu ŵansalile jwakulondola jwanchekulu jula, 21 nombejo ŵanyanyisye kunsalila ajula mundu jwa Akunnungu juŵatyochele ku Yuda jula, "Ambuje Akunnungu akuti, nganinjitichisya liloŵe lyao ni nganingakuya malajisyo gaŵampele Ambuje Akunnungu, Akunnungu ŵenu. 22 Pamalo pakwe mbusile peuto pano, nlile ni kung'wa peuto paŵansalile kuti nkalya namose kung'wa pelepo. Kwayele chiilu chenu ngachisichikwa ku lilembe lya achambuje ŵenu." 23 Nipele, mundu jwa Akunnungu jula paŵamasile kulya ni kung'wa, jwakulondola jwanchekulu juŵankalibisye ŵammichile chile mbunda ajula mundu jwa Akunnungu, ni ŵatyosile.

24 Mundu jwa Akunnungu paŵaliji mwitala ŵasimene ni lisimba, lisimba lyambuleje mundu jula ni kugaleka malilo gakwe petala, mbunda ja mundu jo ni lisimba ŵajimi chiŵandi ni malilo gala. 25 Ŵandu paŵapitaga pele ni kuchiwona chiilu cha mundu jwammwe mwitala, ni lisimba lili lijimi chiŵandi ni chiilu chila, ŵapite kukwasalila ŵandu ŵa musi uŵatamaga jwakulondola jwanchekulu jula. 26 Jwakulondola jwanchekulu jula paŵapikene ngani jila ŵatite, "Jwele ni mundu jwa Akunnungu jwanganalijitichisya liloŵe lya Ambuje Akunnungu! Ambuje Akunnungu alitumile lisimba kukwagungumuchila ni kwaulaga, malinga ni liloŵe lya Ambuje Akunnungu ilyatite pakusala." 27 Pele jwakulondola jwanchekulu jula ŵaasalile achiŵanagwe, "Mumichile chile mbunda." Nombewo ŵammichile chile. 28 Jwakulondola jwanchekulu jula, ŵapite ni kugasimana malilo ga mundu jula gali gagonile mwitala, mbunda ni lisimba ajiminji pachiŵandi pakwe. Lisimba lila nganalya chiilu cha mundu jula namose kujigunguluchila mbunda jila. 29 Nipele jwakulondola jula ŵagajigele malilo ga mundu jwa Akunnungu jula ni kugaŵika pa mbunda jakwe, ŵagajawisye ku Beseli, kweleko ŵaalili ni kugasika. 30 Nipele, ŵansichile mu lilembe lyakwe nsyene, pele jwele ni achiŵanagwe ŵalisile malilo achitiji, "Iii! Ŵanyamweee!" 31 Paŵamasile kunsika, jwakulondola jula ŵaasalile achiŵanagwe, "Pachimwe une chimusiche mu lilembe lilili mwasichikwe mundu jwa Akunnungu, maupa gangu chingaŵiche mumbali mwa maupa gakwe. 32 Pakuŵa, achila chiŵasasile paŵanyanyisye nkati chilisa cha ku Beseli kwa liloŵe lya Akunnungu ni malo gakutyochesya mbopesi ga ku matumbi ga Samalia, chiikopochele isyene."

33 Pakumala kukopochela yeleyo, che Yeloboamu mwenye jwa ku Isilaeli nganaleka kuitendekanya indu yangalumbana. Ŵaaŵisile sooni ŵandu ŵanganaŵa Ŵalawi atumichile peuto pakutyochesya mbopesi. Ni mundu jwajulijose juŵasachileje kuti aŵe jwambopesi, ŵammisile aŵe jwambopesi jwa pamalo pakutyochesya mbopesi pachanya pa matumbi. 34 Kwaligongo lya sambi ji ntundu wa che Yeloboamu wamasile.