1 Che Selemani ŵatandite kutaŵa Nyuumba ja Akunnungu pa chaka cha mia nne na semanini, pakumala Ŵaisilaeli kutyoka ku chilambo cha ku Misili. Ŵataŵile pa chaka cha ncheche cha kutawala kwa che Selemani mu Isilaeli, pa mwesi waaŵili uwaŵilanjikwe mwesi wa Sifu. 2 Nyuumba ja Akunnungu jiŵajitaŵile che Selemani jaliji nchileu futi tisini ni nchijipi futi selasini ni lisusa lyakwe futi alobaini na tano. 3 Lupenu lwambujo lwa Nyuumba ja Akunnungu lwaliji chanchileu futi kumi na tano kutyochela palutandilile mpaka palumelele, ni nchijipi futi selasini. 4 Ŵagakolosisye madilisha chamunkati gawoneche gamakulungwa nambo chapasa galiji gamwana. 5 Che Selemani ŵataŵile yuumba yaili ni ipagala itatu, yalumbikene ni mapupa ga Nyuumba ja Akunnungu kutandilila chamumbalati kumo mpaka mbalati jine. 6 Kila chuumba cha paasi chanchijipi kwaliji ni futi nane, ni chuumba cha pasikati kwaliji ni futi tisa, ni yuumba ya kwinani chanchijipi kwaliji ni futi kumi. Yuumba yaili ni ipagala itatu ila yalekangene chanchijipi, ligongo mwenye che Selemani ŵapungwisye chipimo cha lipupa lya paasa kusyungula nyuumba kuti lipupa lya paasi likamuchisye chuumba cha pachanya pakwe, pangasachilwa njanamila syaakamulila yuumba yo.

7 Nyuumba jo jataŵikwe ni maganga gagasepekwe chile kukoko kugajigalikwe, nganipapikanika lisegwe lya nyundo pane liŵago namose chindu cha chisyano pajataŵikwaga Nyuumba jo. 8 Nnango wakwinjilila ku yuumba ya paasi yaili mumbali kusyungula lipupa, waliji chakulujenda kwa Nyuumba ja Akunnungu, kwaliji ni ngasi syakwinjilila ku yuumba ya pasikati ni kutyochela pelepo ngasi jajendelechele mpaka ku yuumba ya penani. 9 Nipele che Selemani ŵamalisisye kutaŵa Nyuumba ja Akunnungu. Ŵajiwimbile Nyuumba jo kwa nyango sya mielesi ni pachanya pakwe lati sya mielesi. 10 Yele yuumba iŵaitaŵile kusyungula Nyuumba ja Akunungu yaliji ni lisusa lya futi nane kila chuumba, nombeyo ŵailumbikenye ni Nyuumba ja Akunnungu kwa nyango sya mielesi. 11 Ambuje Akunnungu ŵansalile che Selemani, 12 "Iŵaga tingakamulichisye malamusi gangu ni malajisyo gangu gose, chinjintendela indu yose inaalanjile atati ŵenu che Daudi. Nkati aji nyuumba jinkujitaŵa ji, 13 uneji chinjiŵa pasikati ja ŵandu ŵangu Ŵaisilaeli, ni ngasinaaleka ng'oo." 14 Nipele, che Selemani ŵajitawile Nyuumba jakwapopelela Akunnungu ni ŵamalisisye.

15 Mapupa gose gamunkati mpaka pedali ŵaunichile kwa mbao sya mielesi, ni paasi ŵaunichile kwa mbao sya mibeloshi. 16 Chuumba cha pasikati chachikuŵilanjikwa Peuto Papakundikwe kwannope kwa kwapopelela Akunnungu, chaliji chakunyuma kwa nyuumba ja Akunnungu, ni uleu wakwe waliji futi selasini. Chaunichilwe kwa mbao sya mielesi kutandilila paasi mpaka padali. 17 Chuumba cha mbujo pa Peuto Papakundikwe kwannope kwa kwapopelela Akunnungu chaliji ni uleu wa futi sitini. 18 Munkati mwa Nyuumba jo kwaliji ni mbao sya mielesi sisyaunichile mmapupa, syesepekwe itumba ni uluŵa wetumbuche. Mose mose mwaliji mweuniche kwa mbao sya mielesi nganiliwoneka namose liganga limo.

19 Mu che chuumba cha Peuto Papakundikwe kwannope kwa kwapopelela Akunnungu cho, che Selemani ŵaŵisile Lisanduku lya lilangano lya Ambuje Akunnungu. 20 Chele chuumba cha Peuto Papakundikwe kwannope kwa kwapopelela Akunnungu, chaliji ni uleu wa futi selasini, ni chanchijipi futi selasini ni lisusa lya futi selasini, nombe chasalalikwe kwa sahabu jakusalala. Iyoyo peyo che Selemani ŵakolosisye chilisa kwa mbao sya mielesi. 21 Che Selemani ŵasalalisye chamunkati mwa Nyuumba ja Akunnungu kwa sahabu jakusalala. Ŵajikoleche mikufu jijasalalikwe kwa sahabu paujo pa Peuto Papakundikwe kwannope kwa kwapopelela Akunnungu. 22 Nipele mapupa gose ga munkati ŵagaunichile kwa sahabu, iyoyo ŵachiunichile kwa sahabu chilisa chichaliji Peuto Papakundikwe kwannope kwa kwapopelela Akunnungu.

23 Ŵakolosisye kwa mbao sya miseituni yepanganyikwe iŵili yaili ni mapapiko, kila chepenganyikwe chaliji ni lisusa lya futi kumi na tano, ŵaiŵisile yepanganyikwe yo Peuto papakundikwe kwannope kwa kwapopelela Akunnungu. 24 Kila lipapiko limo lya chepanganyikwe lyaliji ni uleu wa futi nane, ni uleu wakutyochela lipapiko limo mpaka liine waliji futi kumi na tano. 25 Ni chepanganyikwe chine chaliji ni uleu wa futi nane, yepanganyikwe yose yaliji yakulandana ni yaliji ni ukulu wakulandana. 26 Lisusa lyao lyaliji futi kumi na tano. 27 Che Selemani ŵaiŵisile yepanganyikwe yo mu chuumba cha Peuto Papakundikwe kwannope kwa kwapopelela Akunnungu mu Nyuumba ja Akunnungu, mapapiko gawo gali gamatambasukule. Lipapiko lya chepanganyikwe chimo lyakwaiye lipupa limo akuno lipapiko lya chepanganyikwe chine lyakwaiye lipupa line, mapapiko gao gane gakwayene pasikati ja Peuto Papakundikwe kwannope kwa kwapopelela Akunnungu. 28 Yepanganyikwe yo ŵaiunichile kwa sahabu.

29 Mapupa gose ga kila chuumba mu Nyuumba ja Akunnungu, ŵasepile yepanganyikwe yaili ni mapapiko ni mitende ni uluŵa wetumbuche. 30 Namose paasi pa kila chuumba mu Nyuumba ja Akunnungu, ŵaunichile kwa sahabu.

31 Pakwinjilila Peuto Papakundikwe nnope kwa kwapopelela Akunnungu, ŵakolosisye minango kwa mbao sya miseituni. Ukulu wa nnango ŵajinjile kasano ka ukulu wa chuumba. 32 Pa minango jiŵili ja miseituni jo, ŵasepile yepanganyikwe yaili ni mapapiko ni mitende ni uluŵa wetumbiche, ŵaisalalisye yepanganyikwe yo kwa sahabu jakusalala. 33 Iyoyopeyo ŵakolosisye miimo ja milango jakwinjilila mu Nyuumba ja Akunnungu. Uleu wa muimo umo wa nnango wajinjile kacheche ka ukulu wa chuumba chimo. 34 Kwaliji ni milango jiwili jakutambasukuka jijakolochekwe kwa miboleshi, kila nnango umo wakwete bawaba sisyautendekasisye nnango upindiche. 35 Pa minango jo ŵalembesye kwa kusepa yepanganyikwe yaili ni mapapiko ni mitende ni maluŵa getumbuche, yose ŵaipachile sahabu. 36 Ŵataŵile lutenje kusyungula Nyuumba ja Akunnungu lwati mapupa gakwe gagaŵiche katatu ni gataŵikwe kwa magaga gagasepekwe, pachanya pa maganga go ŵaŵisile mbao sya mielesi. 37 Nsingi wa Nyuumba ja Ambuje Akunnungu wataŵikwe pa mwesi waaŵili waukuŵilanjikwa Sifu, pa chaka cha ncheche cha utawala wa mwenye che Selemani. 38 Nyuumba ja Akunnungu jamasile kutaŵikwa pa chaka cha kumi na moja pa mwesi wa Buli yaani mwesi wa nane, ni masengo galiji gamalile mpela iŵatite kulajisya che Sulemani. Che Selemani ŵajitaŵile Nyuumba ja Akunnungu jo kwa yaka saba.