1 Mwenye jwankongwe jwa ku Sheba, paŵapikene ngani si che Selemani ligongo lya kutaŵa nyuumba ja Ambuje Akunnungu, ŵaiche kuti ŵalinje kwakwausya mausyo gakusausya. 2 Ŵaiche ku Yelusalemu ali alongene ni ŵandu achajinji, pamo ni ngamia ŵaŵajigele yakununjila ni sahabu syejinji ni maganga ga ndalama jajikulungwa. Paŵaiche ku che Selemani ŵammusisye indu yose iyaliji muntima ŵao. 3 Nombe che Selemani ŵanjanjile mausyo gose, nganilipagwa namose liusyo limo lyakulimba lilyaalemile. 4 Mwenye jwankongwe jula, paŵapilikene luunda lu che Selemani ni kujiwona nyuumba ja chimwenye jiŵajitaŵile, 5 ni yakulya yaili pamesa jao ni ŵakutumichila ŵakwe yatiteje kutama kwakusichila ni ŵakutumichila yatiteje kuŵala mikogo jao pamo ni ŵaakulumisya yakulya ni ŵakwapa yakung'wa ni mbopesi sya kutinisya siŵasityosyaga pa Nyuumba ja Ambuje Akunnungu, ŵasimosile nnope.

6 Nipele, ŵansalile mwenye, "Yose inaipikene ku chilambo changu nkati masengo genu ni luunda lwenu ili isyene! 7 Nambo nganingombola kugakulupilila mpaka panyiiche kukulola nansyene. Kusyene aila imbilikene ili yamwana, luunda lwenu ni ipanje yenu ipundile ni aila inaipikene. 8 Akwete upile ŵandu ŵenu, nombe akwete upile ŵakutumichila ŵenu ligongo akupilikana luunda lwenu moŵa gose! 9 Ajinichilwe Ambuje Akunnungu, Akunnungu ŵenu jwanonyelwe ni mmwe, ni jwaammisile pa chitengu cha umwenye cha Isilaeli! Ligongo Ambuje Akunnungu achinonyele chilambo cha ku Isilaeli moŵa gose pangali mbesi, kwayele ansangwile mmwe mme pwenye kuti nlamuleje kwa chigolochelo ni ntendekanye aila yaikwanonyelesya."

10 Nipele mwenye jwankongwe jula ŵampele mwenye che Selemani kilo elufu nne sya sahabu ni yakununjila yejinji ni maganga ga ndalama jekulungwa. Yakununjila yejinji yo iŵaiche nayo mwenye jwankongwe kwa mwenye che Selemani iyatite kuŵa yejinji nganatyochele sooni mundu jwine kwikanayo.

11 Meli sya mwenye che Hilamu syajigele sahabu kutyochela ku Ofili, nombe syaichisye itela yejinji ya misandali ni maganga ga ntengo wekulungwa. 12 Mwenye che Selemani ŵatumie itela yo kwa kukolochesya iimila yaakamulila ku Nyuumba ja Akunnungu ni ku nyuumba jakwe ja chimwenye, nombe ŵatumie kukolochesya ing'wenyeng'wenye ni bango kwa ligongo lwa ŵaŵajimbaga. Itela yanti yeleyo nganakopochela sooni mundu juŵaiichisye mpaka lelo.

13 Nombe mwenye che Selemani ŵaapele mwenye jwankongwe jwa ku Sheba ili yose iŵalajile ni iŵaiŵendile, pamo ni mituka jine jati mwenye che Selemani ŵaapele malinga ni ntima wao wa kupeleka. Nipele mwenye jwankongwe jula jwausile ku chilambo chao pamo ni ŵakutumichila ŵakwe.

14 Kila chaka mwenye che Selemani, ŵapochelaga mpela kilo elufu ishilini na mbili sya sahabu. 15 Iyoyo peyo ŵapochele sahabu kutyochela kwa ŵamalonda ŵakulungwa ni ŵamalonda ŵakutinyanya indu ni kutyochela kwa mamwenye wose wa ku Alabia ni ŵakutumichila ŵa ilambo ya ku Isilaeli.

16 Mwenye che Selemani ŵakolosisye indu yakulisiŵila pantima yekulungwa mia mbili, kila chimo ŵaunichile kilo mbili ja sahabu jakusalala. 17 Iyoyo peyo ŵakolosisye indu yakulisiŵila pantima yamwana mia tatu, kila chimo waunichile sahabu mpela kilo moja na nusu. Mwenye ŵaiŵisile mu nyuumba jijaŵilanjikwe litinji lya Lebanoni.

18 Iyoyopeyo ŵakolosisye chitengu cha umwenye chekulungwa, kwa meno ga ndembo, ni ŵachiunichile ni sahabu jakusalala. 19 Chitengu cho chaliji ni ngasi sita. Pachanya chakunyuma kwaliji kuŵichikwe mduwala ni kuŵikwa lipesa lya kuŵichila makono mu mbande syose, ni inyago iŵili ya masimba ili ijimi kila chimo mumbali mwa mwakuŵichila makono. 20 Nombe kwaliji ni inyago kumi na mbili ya masimba ili ijimi pa syele ngasi sita syo, gaŵili kwa kila ngasi, limo chaaku ni liine chakwine. Chitengu chanti yele nganichipanganyikwe mu umwenye wauliwose.

21 Yoombo yose yakungwela i che Sulemani yaliji ya sahabu, ni yoombo yose iyaliji mu nyuumba ja mwikonde ja Lebanoni yaliji ya sahabu jakusalala. Nganichipagwa chindu chichapanganyikwe kwa feza, pakuŵa feza jawonekanaga kuti jili ja ndalama jamwana katema ka che Sulemani. 22 Pakuŵa mwenye che Selemani ŵaliji ni meli syesijinji sya malonda mu bahali sisyajaulaga pamo ni meli si che Hilamu. Kamo pa yaka itatu meli sya ku Talishishi syo syaichisye sahabu ni mbiya ni misengo pamo ni majani ni itumbili.

23 Kwayele mwenye che Selemani ŵaapitile kwa chipanje ni luunda mamwenye wose ŵa pachilambo. 24 Ŵandu ŵa pachilambo wose ŵasosaga kusimana ni che Selemani, alupikane luunda lwao lwapegwilwe ni Akunnungu. 25 Pa kila chaka jwalijose ŵannyichisye ntuuka: Yoombo ya sahabu ni nguo ni yakumenyanilana ni yakununjila ni falasi ni mbunda falasi.

26 Che Selemani ŵasonganganye mutuka syakukwekwelemya ni falasi ni ŵakwela falasi, nombejo ŵakwete mutuka elufu moja na mia nne ni ŵakwela falasi elufu kumi na mbili, ŵaŵaŵisile ku Yerusalemu kuŵatamaga mwenye ni mu misi jajili ni mwakugosela mutuka syakukwekwelemya falasi 27 Ku Yelusalemu ko mwenye che Selemani ŵagatesile madini ga feza gaŵe ga kawaida nti maganga, ni mbao sya mielesi syaliji syejinji mpela mikuju jajili ku itumbi ya ku Yuda iyatite kuŵa jejinji. 28 Che Selemani ŵalajisye falasi kutyochela ku Misili ni ku Kue, kwati ŵamalonda ŵakwe ŵasumaga kutyochela kwa ŵandu ŵa ku Kue. 29 Mutuka jimo jakukwekwelemya ni falasi, Ŵasumaga kutyochela kumisili kwa kilo saba sya madini ga feza ni falasi jimo kwa kilo mbili sya madini ga feza. Ŵamalonda ŵa mwenye iyoyo peyo ŵasumisyaga mutuka ni falasi kwa mamwenye wose ŵa Ŵahiti ni ŵa ku Silia.