1 Katema ko, che Abiya mwanache jwannume jwa mwenye che Yeloboamu ŵaliji nkulwala. 2 Kwayele che Yeloboamu ŵansalile ŵankwakwe, "Mwale yakuwala iine, nkamanyika kuti nli ŵankwangu, njaule ku Shilo kwakutama jwakulondola che Ahiya juŵatite kuti uneji chime mwenye jwa ku Isilaeli. 3 Mwapelechele mikate kumi ni maandazi gampepe pamo ni chuupa chimo cha uuchi. Jwele chakansalile ichiyasimane mwanagwetu."

4 Nipele, ŵankwawo che Yeloboamu ŵatesile mpela yatite kusalilwa ni ŵankwawo, ŵapite ku Shilo kumangwawo che Ahiya. Katema ko, meeso ga che Ahiya nganigakombolaga kulola yambone ligongo lya kuchekulupa. 5 Nambo Ambuje Akunnungu ŵamasile kwasalila che Ahiya, "Ŵankwawo che Yeloboamu akwika kukummusya ichiyasimane mwanagwe jwakulwala, ni mwe chimwajanje yele ni yele."

Ŵankwakwe che Yeloboamu paŵaiche ŵalitesile mpela mundu jwine. 6 Che Ahiya paŵapilikene ali nkwinjila munkati ŵatite, "Ajinjile munkati ŵankwakwe che Yeloboamu. Kwa chichi nkulitenda mpela ngaŵa mmwe. Ndumikwe kunsalila ngani jangalumbana. 7 Njaule nkaasalile che Yeloboamu kuti yele ni yakusala Ambuje Akunnungu, Akunnungu jwa Isilaeli, ‘Nansagwile pasikati ja ŵandu ni kuntenda chilongola pachanya pa ŵandu ŵangu Isilaeli. 8 Nausumwile umwenye utyoche ku uŵelesi u che Daudi ni kumpa mmwe, nambo nganimma mpela jwakutumichila jwangu che Daudi juŵakamwulisye malajisyo gangu ni kuitendekanya inguisaka kwa ntima wakwe wose ni juŵaitesile indu yambone. 9 Ntesile yangalumbana yejinji kwapunda ŵane wose ŵaŵannongolele. Nlikolochesye minungu jine ni kulikolochesya inyago ja kusyana, mwandendekasisye ndumbile, mbesi jakwe mwanesile. 10 Ligongo lya yele chinaaichisye limbulunga ŵapannango wa che Yeloboamu. Chinjaulaga achalume wose ŵa uŵelesi wa che Yeloboamu pa chilambo chose cha ku Isilaeli, aŵe jwanchanda pane jwanchekulu. Tinaatyosye wose ŵasigalile mu uŵelesi wa che Yeloboamu mpela ila mundu yakuti kukumba manyi mpaka gamale. 11 Jwajulijose jwa pa uŵelesi wa che Yeloboamu jutawilile ku musi, mbwa chisyalye ni juchawilile ku migunda chalilikwe ni ijuni. Une Ambuje Akunnungu ni jungusala yeleyo!’"

12 Che Ahiya ŵansalile ŵankwakwe che Yeloboamu, "Sambano njimuche njaule kumangwenu. Patinnyiche ku musi pe mwanagwenu chawe. 13 Ŵandu wose ŵa ku Isilaeli chalile malilo ni kunsika, pakuŵa jujojo pe kutyochela mu uŵelesi wa che Yeloboamu juchasichikwe. Ligongo jujojo pe mu uŵelesi u che Yeloboamu jwati Ambuje Akunnungu, Akunnungu jwa Isilaeli achiweni chindu chambone kwa jwelejo. 14 Ambuje Akunnungu tammiche mwenye jwine pa Isilaeli jutaaulaje ŵandu ŵa uŵelesi u che Yeloboamu. Yele chiitendekwe kutandilila lelo jino. 15 Ambuje Akunnungu taajamuche Ŵaisilaeli, nombe ŵanyawo chatinganyiche nti linyasi lyalikutinganyika mmesi. Tiŵatyosye mu chilambo chambone chi chiŵapele achatati ŵao ni kwapwilinganya kwakutalichila, peesi ja lusulo lwa Eufulate, pakuŵa ŵatumbilisye Ambuje Akunnungu kwa kulikolochesya inyago ya Ashela, nnungu jwachikongwe. 16 Ambuje Akunnungu tiŵaleche Ŵaisilaeli ligongo lya sambi syasitesile che Yeloboamu ni kwatendekasya Ŵaisilaeli nombe atende sambi."

17 Nipele ŵankwawo che Yeloboamu ŵajimwiche ni kuuja ku Tilisa. Paŵaliŵete pannango mwanache jwajasiche. 18 Ŵaisilaeli ŵalisile malilo ni kunsika mpela Ambuje Akunnungu iŵatite kwasalila jwakutumichila jwakwe jwakulondola che Ahiya.

19 Ipanganyo ine ya mwenye che Yeloboamu ni iyatite kuputana ngondo ni iŵatite kutawala, yose yo ilembekwe mu chitabu cha chikumbuchisyo cha mamwenye ŵa Isilaeli. 20 Che Yeloboamu ŵatawele yaka ishilini na mbili, nipele ŵajasiche, che Nadabu mwanagwe ŵawele mwenye pamalo pakwe.

21 Che Lehoboamu mwana ju che Selemani ŵaliji ni yaka alobaini na moja paŵatandite kutawala ku Yuda, ŵatawele yaka kumi na saba ku Yelusalemu, musi wati Ambuje ŵausagwile pasikati ja misi jose ja ngosyo sya Isilaeli kuti apopelelwe mwelemo. Achikulu ŵa Lehoboamu ŵaŵilanjikwe che Naama jwa kutyochela kwa Ŵaamoni.

22 Ŵandu ŵa ku Yuda ŵaatendele yachigongomalo Ambuje Akunnungu ni kwatumbilisya ligongo lya sambi siŵatesile kupunda sambi sya achachekulu ŵao. 23 Iyoyo peyo ŵapataŵile peuto pa kujipopelela minungu ni imila ya maganga pamo ni inyago ya Ashela pachanya pa kila chikwesya cheleu ni paasi pa kila chitela chachili ni chiulili chekulungwa. 24 Nombe kwaliji ni achalume na achakongwe watendaga chigwagwa mmalo ga kutyochesya mbopesi kwa minnungu, ŵandu ŵatendaga indu iyachimile Ambuje Akunnungu mpela ya ŵandu ŵa ilambo ine, ŵaŵatopolekwe ni Ambuje Akunnungu katema Ŵaisilaeli paŵajinjilaga ku Kanaani.

25 Pa chaka cha nsano cha umwenye u che Lehoboamu, che Shishaki mwenye jwa ku Misili ŵaugungumuchile musi wa Yelusalemu. 26 Ŵajijigele mbiko jose ja Nyuumba ja Ambuje Akunnungu ni mbiko jose ja mu nyuumba ja mwenye. Ŵaijigele indu yose pamo ni yakulisiŵila pantima ya sahabu iŵaikolosisye che Selemani. 27 Che Lehoboamu ŵakolosisye indu ine yakulisiŵila pantima ya shaba ni kuiŵika payaliji yakulisiŵila ya sahabu pala. Ŵapele achakulu ŵa ŵakulindilila ŵa nyuumba ja chimwenye kuti agose. 28 Katema kose mwenye paŵajaulaga ku Nyuumba ja Akunnungu, ŵaakulindilila ŵajigalaga yakulisiŵila pantima yo kwaligongo lya kulisiŵila ni kanyuma ŵausyaga ku chuumba cha ŵaakulindilila.

29 Ipanganyo ine ya mu umwenye che Lehoboamu ni yose iŵaitesile ilembekwe mu chitabu cha chikumbuchisyo ya mamwenye ŵa ku Yuda. 30 Mmoŵa gose go kwaliji ni ngondo, che Lehoboamu ŵamenyanaga ni che Yeloboamu. 31 Che Lehoboamu ŵajasiche ni kusikwa ku malembe ga achachekulu ŵao ku musi u che Daudi. Achikulugwe ŵaŵilanjikwaga che Naama kutyochela kwa Ŵaamoni. Che Abiyamu mwanagwe ŵatawele pamalo pa Lehoboamu atatigwe.