1 Mwenye che Ahabu ŵaasimulile che Yesebeli ŵankwawo yose iŵaitesile che Elia ni yatite pakwaulaga ŵakulondola ŵa minungu Baali kwa lipanga. 2 Che Yesebeli ŵatumile utenga ku che Elia achitiji, "Ngulumbila kuti kusyene tinammulaje, kutandilila sano mpaka malaŵa katema mpela kanokano iŵaga nganime kummulaga, minungu jimbute ni jimulaje." 3 Che Elia ŵajogwepe ni ŵatisile kuti akaulajikwa, wapite ku Beli Sheba ku musi wa Yuda kuŵannesile jwakutumichila jwakwe. 4 Che Elia ŵajesile lwendo lwa lyuŵa limo mu ukweti. Ŵaiche ku chitela, ŵatemi pachiwilili pa chitela cho achipopelaga kuti awe, kwakuti, "Sambano ikwanile. Ambuje Akunnungu, njigale umi wangu, pakuŵa une nganima jwambone kwapunda achachekulu ŵangu."

5 Nipele che Elia ŵagonile kuusi chitela cho pelepo wagonile lugono. Papopo katumetume jwa Akunnungu ŵajimwisye ni kunsalila, "Njimuche nlye." 6 Che Elia ŵalolite kosekose ŵauweni nkate wechome pa makala ni chuupa cha meesi chiŵandi ni ntwe wakwe. Nipele ŵalile, ŵang'wele ni kugona sooni. 7 Katumetume jwa kwinani jwa Akunnungu jula jwannyichilile kaaŵili, ŵankwaiye ni kwasalila, "Njimuche nlye, iŵaga ngantenda yele ulendo wenu tiuŵe wakulimba." 8 Che Elia ŵajimwiche, ŵalile ni kung'wa. Paŵakwete machili ŵajesile ulendo wa moŵa alobaini musi ni chilo mpaka ku Sinai chitumbi cha Akunnungu.

9 Kweleko ŵajinjile mu mbugu ni ŵagonile mwelemo chilo cho.

Papopo Ambuje Akunnungu ŵausisye, "Ana che Elia nkutenda ichichi apano?" 10 Che Elia ŵajanjile, "Nalityosisye kusyene kukwenu ni kutumichila ŵalakwe jika, alakwe Ambuje Akunnungu, Akunnungu wandi ni machili gose. Ŵandu ŵa ku Isilaeli akaanile Lilangano lyenu, agumwile ilisa yenu ni kwaulaga ŵakulondola ŵenu kwa lipanga. Sigalile jikape jundi jwanjumi, sambano akuusosa kuti amulaje!"

11 Ambuje Akunnungu ŵansalile, "Njaule paasa nkajime pa chitumbi paujo pangu une Ambuje Akunnungu, pakuŵa une maandichile kupita pelepo." Nipele Ambuje Akunnungu ŵapitile, mbungo jekulungwa japujile ni kupalula chitumbi chila ni kugakasanya maganga. Nambo Ambuje Akunnungu nganapagwa mu mbungo jo. Mbungo pajamasile kwaliji ni chindendemesi nambo Ambuje Akunnungu nganaŵa mu chindendemesi cho. 12 Pachapite chindendemesi kwatyochele mooto. Nambo Ambuje Akunnungu nganapagwa mmoto wo. Moto pawamasile kapikaniche kaloŵe kakusongona. 13 Che Elia paŵakapikene kaloŵe ko, ŵaliunichile kumeso ni ngolole wakwe, ŵajile kwima pa nnango wa mbugu. Pelepo ŵalipikene liloŵe lila lichasalilaga, "Che Elia nkutenda ichichi apano?" 14 Che Elia ŵajanjile, "Nalityosisye kusyene kukwenu ni kutumichila ŵalakwe jika, alakwe Ambuje Akunnungu, Akunnungu wandi ni machili gose. Ŵandu ŵa ku Isilaeli akaanile Lilangano lyenu, agumwile ilisa yenu ni kwaulaga ŵakulondola ŵenu kwa lipanga. Sigalile jikape jundi jwanjumi, sambano akuusosa kuti amulaje!"

15 Ambuje Akunnungu ŵansalile, "Mmuje kwa litala limwapite pakuika akuno ni njaulempaka ku ukweti wa ku Damesiki. Mwaikaga mwataje mauta che Hasaeli aŵe mwenye jwa ku Silia. 16 Iyoyo peyo munjitilile mauta Che Yehu mwana ju che Nimishi aŵe mwenye jwa ku Isilaeli. Nombe munjitilile mauta che Elisha mwana ju che Shafati jŵa ku Abeli Mehola, aŵe jwakulondola pamalo penu. 17 Nipele mundu jwalijose juchakulupuche kuulajikwa ni lipanga u che Hasaeli, che Yehu tammulaje, ni jutakulupuche kuulajikwa ni lipanga lya che Yehu, che Elisha tammulaje. 18 Nambo naalesile ŵandu elufu saba ŵali ŵajumi pa Isilaeli, ŵanganiŵajinamila ni kwapopelela Baali namose kuchikomasya kwa unonyelo chinyago chakwe."

19 Che Elia ŵatyosile pelepo, ŵasimene ni che Elisha mwana ju che Shafati. Che Elisha ŵaliji nkulima kwa ng'ombe ishirini na nne syasikulima siŵilisiŵili. Nambo che Elisha ŵasilongosyaga asila ng'ombe siŵili sisyaliji panyuma. Nipele che Elia ŵapitile chiŵandi ni che Elisha, ŵausile ngolole wakwe ni ŵambwasisye che Elisha. 20 Pele che Elisha ŵasilesile ngombe sya kulima sila, ŵammutuchile che Elia ni kwasalila, "Muneche kaje ngaalanje atati ŵangu ni achikulu ŵangu, nipele nankuye." Che Elia ŵajanjile, "Njaule! kwani une nanlekasisye?"

21 Che Elisha ŵalechelele che Elia, ŵausile ŵasijigele ng'ombe syakwe siŵili sila ŵasisikite ni kuteleka nyama kwa aila itela iŵataŵililaga ng'ombe paŵalimaga, ŵapele ŵandu kulya. Nipele ŵatyosile ŵankuiye che Elia ni kuŵa jwakutumichila jwao.