1 Che Hilamu mwenye jwa ku Tilo juŵaliji mbusanga jwa mwenye che Daudi, paŵapikene kuti che Selemani ajiitililwe mauta aŵe mwenye pamalo pa che Daudi atatigwe, ŵaatumile ŵantenga ku che Selemani. 2 Nipele che Selemani ŵaatumile ŵantenga ŵala auje ku che Hilamu ni utenga wu; 3 "Nkwimanyilila kuti atati ŵangu che Daudi nganakombola kwataŵila Ambuje Akunnungu, Akunnungu ŵakwe Nyuumba ja kwapopelela, ligongo lya ngondo sya ŵammagongo ŵaŵasyungwile mumbali mose, mpaka Ambuje Akunnungu, paŵaakamuchisye kwapunda ŵammagongo ŵakwe. 4 Nambo sambano, Ambuje Akunnungu, Akunnungu ŵangu, ambele chitendewele mosemose. Nganingola ŵammagongo sooni namose nganima mu chakogoya chakugungumuchilwa. 5 Nipele, ngusaka kwataŵila Ambuje Akunnungu, Akunnungu ŵangu, nyuumba ja kwapopelela, mpela Ambuje Akunnungu iŵatite kwalanjila atati ŵangu che Daudi paŵatite, ‘Mwanagwenu jutinammiche pa chitengu cha umwenye pamalo penu, jwele ni jutataŵe Nyuumba jakumbopelela une.’ 6 Kwayele, mwalajisye ŵandu ŵenu akaangatile itela ya mielesi ja kwele ku Lebanoni. Ŵandu ŵangu tapanganye masengo ni ŵandu ŵenu pa masengo go, noneji tinaalipe ŵandu ŵenu chachilichose chaakuchisaka. Pakuŵa nkwimanyilila yakuti ngapagwa pasikati jetu ŵaakumanyilila yambone kukata itela mpela mwanya Ŵasidoni."

7 Che Hilamu paŵapikene utenga u che Selemani, ŵasangalele kwannope, ŵatite, "Lelo Ambuje Akunnungu alapikwe, pakuŵa ampele che Daudi mwana jwaali ni luunda ŵaatawale ŵandu ŵajinji ŵa." 8 Nipele che Hilamu ŵatumile sooni utenga ku che Selemani achitiji, "Naupochele utenga umumbelechele, noneji chindende yose immendile. Tinannyichisye mbao sya mielesi ni mbao sya itela ya mibeloshi. 9 Ŵandu ŵangu taitulusye isinga kutyochela ku Lebanoni mpaka ku bahali, ni tinagataŵe maunjiliunjili gajajaŵale mmesi mpaka pamalo gatingasale alakwe. Kweleko ŵakutumichila ŵangu tagagopolanye ni ŵamasengo ŵenu tagapochele. Chingummenda alakwe, muumbe yakulya kwaligongo lya ŵandu ŵangu."

10 Kwayele che Hilamu ŵaapele che Selemani isinga yose ya itela ya mielesi ni itela ya misonobali mpela iŵasakaga, 11 nombe che Selemani ŵaapele che Hilamu madebe laki mbili na elufu alobaini ga ngano ni madebe mia mbili ga mauta gambone ga seituni kila chaka. Che Selemani ŵajendelechele kwapanganyichisya che Hilamu yeleyo kila chaka.

12 Ambuje Akunnungu ŵaapele che Selemani luunda mpela iŵalanjile. Paliji ni chitendewele pasikati ja che Hilamu ni che Selemani, ni wosepe ŵawili ŵaŵichelene chilanga.

13 Mwenye che Selemani ŵaasongangenye achalume selasini elufu kutyochela mu Isilaeli kuti apanganye masengo gakulimba gakukanganichiswa. 14 Ŵaagaŵenye ŵandu wo pa mipingo jitatu ja ŵandu elufu kumikumi, ŵapeleche ku Lebanoni mpingo umo pa kila mwesi, ŵatamaga ku Lebanoni mwesi umo ni miesi jiŵili mmangwao. Che Adonilamu ŵaliji ŵakwimilila ŵa ŵandu wo. 15 Che Selemani ŵaliji ni ŵandu ŵakusepa maganga kumatumbi elufu semanini ni ŵandu ŵakutwichila maganga elufu sabini, 16 ŵaŵisile ŵakutumichila elufu tatu na mia tatu, ŵaŵajimililaga masengo go ni kwajimilila ŵakupanganya masengo wose. 17 Mwenye ŵalamwile, gasolekwe maganga gamakulungwa gambone gasepekwe kuti ataŵile nsingi ŵa Nyuumba ja Akunnungu. 18 Yeleyo ni iŵatite ŵamasengo ŵa che Selemani ni ŵa che Hilamu ni Ŵagebali kuŵika chile mbao ni maganga ga kutaŵila Nyuumba ja Akunungu.