1 Paŵajasiche mwenye che Ahabu, ŵandu ŵa ku Moabu ŵagalawiche ni ŵakanile kutawalikwa ni Ŵaisilaeli.

2 Ni yaliji, pa lyuŵa limo mwenye che Ahasia ŵaliji agwile kutyochela pachanya pa ligolofa ku Samalia ko, ŵaulele nnope. Kwayele ŵaatumile ŵantenga ajaule ku che Baali Sebubu, nnungu jwa musi wa ku Ekiloni akaausye iŵaga chalame ulwele walinawo pane ngwamba. 3 Nambo katumetume jwakwinani jwa Ambuje Akunnungu ŵansalile che Elia jwa ku Tishibi, ajaule kukusimana ni ŵantenga ŵa mwenye jwa ku Samalia ni kwausya, "Kwachichi nkwaula kwa Baali Sebubu, nnungu jwa ku Ekiloni? Uli nganapagwa Akunnungu pa chilambo cha Isilaeli? 4 Kwayele yeleyi ni yaakuti Ambuje Akunnungu, ‘Ngantuluka pachindanda chingonele, nambo kusyene chimmwe!’"

Nipele che Elia ŵajawile. 5 Ŵantenga ŵala ŵausile kwa mwenye, nombe mwenye ŵausisye, "Kwachichi mmusile?" 6 Ŵajanjile, "Tusimene ni mundu jwatusalile tuuje kukunsalila yakuti Ambuje Akunnungu akuti, ‘Kwachichi nkwatuma ŵantenga kwa Baali Sebubu nnungu jwa Ekiloni? Uli nganapagwa Akunnungu mu chilambo cha Isilaeli? Kwayele ngantuluka pa chindanda chingonele nambo kusyene chimmwe.’" 7 Mwenye ŵausisye, "Mundu juŵaiche kusimana ni ŵanyamwe ni kunsalila yeleyo ŵawoneche chantiuli?" 8 Ŵanyawo ŵajanjile, "Jwaliji awalile mwinjilo wa manyunya ni nkanda wa lipende nchiunu mwakwe." Mwenye ŵatite, "Jwelejo ali che Elia jwa ku Tishibi."

9 Pelepo mwenye ŵantumile jwankulu jwa ŵangondo ni mpingo wakwe wa ŵangondo hansini akannyichisye che Elia. Jwankulu jula ŵanjaulile che Elia ŵansimene atemi pachanya chitumbi, ŵansalile, "Alakwe mundu jwa Akunnungu, mwenye akunnamula ntuluche." 10 Che Elia ŵanjanjile jwankulu jwa ŵangondo hansini jula, "Iŵaga une ndili mundu jwa Akunnungu, mooto utuluche kutyochela kwinani ni kuntinisya mmwe pamo ni ŵandu ŵenu hansini!" Papopo ŵatulwiche mooto kutyochela kwinani, ŵantinisye jwankulu jula ni ŵandu ŵakwe hansini.

11 Mwenye ŵantumile sooni jwankulu jwa ŵangondo hansini akannyichisye che Elia. Nombejo ŵansalile che Elia, "Alakwe mundu jwa Akunnungu, mwenye akunnamula kuti ntuluche chitema!" 12 Che Elia ŵajanjile, "Iŵaga une ndili mundu jwa Akunnungu, mooto utuluche kutyochela kwinani untinisye mmwe pamo ni ŵandu ŵenu hansini!" Papopo watulwiche mooto kutyochela kwinani, wantinisye jwankulu jula ni ŵandu ŵakwe hansini.

13 Sooni mwenye ŵantumile jwankulu jwa mpingo waatatu ni ŵandu ŵakwe hansini. Jwankulu jwaatatu jula ŵakwesile pa chitumbi ni kutindiŵala paujo pa che Elia ni kwachondelela achitiji, "Alakwe mundu jwa Akunnungu choonde muuneche jwanjumi uneji pamo ni ŵandu ŵa, nkatujonanga! 14 Nnole mooto ŵatulwiche kutyochela kwinani waatinisye achakulu ŵaŵili ŵaŵalongolele ni mipingo jao ja ŵandu hansini, nambo sambano choonde, muukolele chanasa umi wangu." 15 Pelepo katumetume jwa kwinani jwa Ambuje Akunnungu ŵansalile che Elia, "Ntuluche njaule nao nkanjogopa." Nipele che Elia ŵajimi ni kutuluka pamo nao mpaka kwa mwenye. 16 Ŵansalile mwenye, "Ambuje Akunnungu akuti, ‘Uli ngapagwa Akunnungu pa Isilaeli mpaka kwatuma ŵantenga akausye kwa Baali Sebubu, nnungu jwa Ekiloni? Kwayele ngantuluka pachindanda chingonile, kusyene chimmwe.’"

17 Kwayele mwenye che Ahasia ŵajasiche mpela Ambuje Akunnungu iŵatite kunsalila che Elia. Pakuŵa che Ahasia nganakola mwana jwannume, nipele che Yolamu achimwene jwakwe jwaliji mwenye pamalo pakwe. Yeleyi yakopochele pachaka chaaŵili cha kutawala kwa che Yeholamu mwana ju che Yehoshafati mwenye jwa ku Yuda.

18 Indu ine iŵaitesile mwenye che Ahasia mu utawala wao, yose ilembekwe mu chitabu cha chikumbuchisyo cha mamwenye ŵa ku Isilaeli.