1 Lyuŵa limo mpingo wa ŵakulondola ŵandandaulile che Elisha, ŵatiji, "Malo gatukutama ga ganondipe! 2 Ntukunde tujaule ku lusulo lwa Yolodani tukakate sichi syakutaŵila malo jine patutujenele wose."

Che Elisha Ŵaajanjile "Njaulangane."

3 Mundu jumo jwatite, "Choonde achimwene ajaule pamo ni uweji." Nombejo jwajanjile, "Elo chinyaule ni ŵanyamwe." 4 Nipele ŵajawile pamo nao. Ŵanyawo paŵaiche ku Yolodani ŵatandite kukata itela. 5 Jumo jwao paŵakataga sichi liŵago lyakwe lyakuliche ni kupatuchila mmeesi. Nombejo jo ŵagumisile achitiji, "Ngondo nejo ambuje ŵangu, liŵago lisyene lyakwasima." 6 Che Elisha ŵausisye, "Ligwilile kwapi?" Mundu jula jwalosisye palyagwilile. Che Elisha ŵakatile chitela ni kuchiponyela mmeesi palyagwilile liŵago, papopo liŵago lyajajaŵele. 7 Nipele che Elisha ŵatite, "Ntole." Nipele mundu jula jwatambasukwile nkono ŵakwe, ŵalichuŵile.

8 Kele katema ko mwenye jwa ku Alamu ŵaputanaga ngondo ni Ŵaisilaeli. Nipele mwenye jwa ku Alamu pakumala kwilana ni ŵakamusi ŵakwe ŵatite, "Tinjiŵika chigono changu pamalo pala ni apala." 9 Nambo che Elisha ŵapeleche utenga kwa mwenye jwa ku Isilaeli, kuti alilolechesye akakatanya pamalo pala, ligongo Ŵaalamu aliŵichile chile kupagunguluchila. 10 Kwayele mwenye jwa ku Isilaeli ŵaapeleche ŵangondo ŵakwe chiŵandi ni malo gaŵasalilwe ni che Elisha mundu jwa Akunnungu. Kakajinji che Elisha ŵaakumbusyaga mwenye kuti alilolechesye.

11 Chele chindu cho chantumbilisye kwannope mwenye jwa ku Alamu. Ŵaaŵilasile ilongola ŵa ŵangondo ŵakwe, ŵausisye, "Musalile, ŵaani pasikati jenu jwali upande ŵa mwenye jwa ku Isilaeli?"

12 Jumo jwao ŵajanjile, "Alakwe mwenye, ngapagwa jwaakungalauka. Jwakutenda chelechi ali che Elisha, jwakulondola jwaali ku Isilaeli, akunsalila mwenye jwa ku Isilaeli maloŵe gose gankugasala mmwe, namose nkugaŵecheta ku chuumba chenu chakugona."

13 Mwenye ŵaasalile, "Njaule nkalole kwakutama, kuti naatume ŵandu kukunkamula." Nipele ŵandu ŵausile ni kwasalile kuti che Elisha ali ku Dosani. 14 Kwayele mwenye ŵapeleche ŵangondo ŵaali ni machili pamo ni falasi ni mutuka. Mpingo ŵa ŵangondo ula ŵaiche chilo ku Dosani ni ŵausyungwile musi ula.

15 Malaŵi jakwe kundaŵi, jwakutumichila ju che Elisha paŵajimwiche ni kukopoka paasa, ŵagambile kwawona ŵangondo pamo ni falasi ni mutuka sya ngondo ili isyungwile musi wose. Ŵausile munkati achitiji, "Ngondo nejo ambuje wangu! Ana tututende uli?"

16 Che Elisha ŵatite, "Nkajogopa, pakuŵa waali ni uweji atupile nnope kupunda ŵali pamo ni ŵanyawo." 17 Nipele che Elisha ŵapopesile achitiji, "Alakwe Ambuje Akunnungu mumbugule meeso jwakutumichila jwangu ju alole." Pelepo Ambuje Akunnungu ŵambugwile meeso jwakutumichila jula, nipele ŵaweni kuti ikwesya igumbele falasi ni mutuka sya mooto, yose yo insyungwile che Elisha.

18 Ŵangondo ŵa ku Alamu paŵatandite kutuluka ku chikwesya kwajaulila che Elisha, che Elisha ŵapopesile kwa Ambuje Akunnungu achitiji, "Mwatende ŵandu ŵa aŵeje ŵangalola!" Nipele Ambuje Akunnungu ŵatesile ŵandu ŵala aŵe ŵangalola, mpela iŵapopele che Elisha. 19 Pelepo che Elisha ŵaasalila, "Mpotele litala. Auno ngaŵa musi unkuusaka. Munguye ni uneji tinanjausye kwa mundu junkunsosa." Nombejo ŵaajaŵisye ku Samalia.

20 Najinjila pe ku Samalia che Elisha ŵapopesile achitiji, "Alakwe Ambuje Akunnungu, mwaugule meeso kuti alole." Ambuje Akunnungu ŵajanjile lipopelo lila ni kwaugula meeso. Ŵalisimene ali pasikati ja musi wa ku Samalia. 21 Mwenye jwa ku Isilaeli paŵaweni ŵangondo ŵa ku Alamu ŵausisye che Elisha, "Atati ŵangu uli naulaje ŵandu ŵa?" 22 Che Elisha ŵajanjile, "Ngwamba ngasimwaulaga. Ana chimwaulaje ŵandu umwakamwile pa ngondo kwa lipanga lyenu pane kwa nkuje wenu? Mwapeje yakulya ni meesi kuti alyanje ni kung'wa, nipele mwaleche ajaule kwa ambuje ŵao." 23 Mwenye jwa ku Isilaeli, ŵaakulumichisye chindimba chekulungwa cha yakulya ŵangondo ŵa ku Alamu, paŵamasilenje kulya ni kung'wa ŵalesile ajaule kwa ambuje ŵao. Kutandilila pelepo Ŵaalamu ŵalesile kuchingumuchila chilambo cha Isilaeli.

24 Kanyuma mwenye che Beni Hadadi jwa ku Alamu ŵasongangenye ŵangondo ŵakwe wose, ŵajawile, ŵausyungwile musi wa ku Samalia. 25 Ni jakopochele sala jakununga mu musi wa ku Samalia, pakuŵa musi ula wasyungulikwe ni ŵangondo kwa moŵa gamanji kwika mwa kusumisya ntwe wa mbunda kwa ntengo wa ipande semanini ya feza ni lobo ja chibaba cha manyi ga ngunda ŵasumisyaga kwa ipande nsano ya feza.

26 Lyuŵa limo mwenye jwa ku Isilaeli paŵajendaga pachanya lipupa lya musi, jwankongwe jumo jwammilasile, "Choonde mungamusye, ambuje ŵangu mwenye!"

27 Mwenye ŵanjanjile, "Naga Ambuje Akunnungu ngaakunkamusya, uneji tinankamuchisye chinauli mmwejo? Nganingola ngano jakumpa kutyochela ku luŵala lwa kuputukulila pane nganingola divai kutyochela pamalo ga kuminyila."

28 Nipele ŵammusisye, "Ana chikunsausya chichi?"

Jwankongwe jula wanjanjile, "Jwankongwe ju ŵaasalile kuti, tuntole mwanangu kuti tulye lelo ni malaŵi chitunlye mwanagwe. 29 Nipele twanteleche mwanangu jula ni kunlya. Malaŵi jakwe nansalile tunlye mwanagwe jula, nambo njangu ŵamasile kunsisa!"

30 Mwenye napikana pe maloŵe ga jwankongwe jula, ŵapapwile minjilo jakwe kwa kusupuka. Paŵajendelechele kwenda mwipupa, ŵandu ŵamweni awete magunia chamunkati mwa mwinjilo wakwe ula. 31 Mwenye ŵatite, "Ambuje Akunnungu amulaje, naga che Elisha mwana ju che Shafati, ngaakatikwa ntwe lelo jino!" 32 Katema ko che Elisha ŵaliji atemi mu nyuumba jakwe pamo ni achachekulu.

Mwenye ŵantumile jwantenga akannyichisye che Elisha. Akanaŵe kwika jwantenga jula, che Elisha ŵaasalile achachekulu ŵala, "Jwakuulaga jula annajisye mundu kukumulaga une! Nnole, akanaŵe kwika, mmugale nnango akajinjila. Nombe ambujegwe akukuya panyuma pakwe." 33 Che Elisha akanaŵe kumalisya kuŵecheta, mwenye ŵaiche, ni ŵatite, "Limbulunga li likutyochela kwa Ambuje Akunnungu! Kwachichi une nyendelechele kuulindilila ukamuchisyo wa Ambuje Akunnungu?"