2 Reis 4

Che Elisha akunkamuchisya jwankongwe jwaŵililwe ni ŵankwawo

1 Nipele jwankongwe jumo pasikati ja achiŵankwawo mpingo wa ŵakulondola ŵanjaulile che Elisha, ŵansalile, "Jwakutumichila jwenu ŵankwangu ajasiche, nomwe nkwimanyilila kuti jwanchimbichisyaga Ambuje Akunnungu. Nambo sambano mundu juŵandaiji aiche kukujigala achiŵanangu ŵaŵili aŵeje achikapolo ŵakwe."

2 Che Elisha ŵammusisye, "Ndende ichichi pakunkamusya? Musalile, nkwete ichichi kumangwenu?"

Jwankongwe jula jwatite, "Une jwakutumichila jwenu nganingola chilichose ikaŵe kachupa ka mauta."

3 Che Elisha ŵaasalile, "Njaule kwa ŵakutama chiŵandi ni mmwe nkajasime yoombo yejinji yangali indu, nkajasima yoombo kanandi. 4 Nipele njinjile munkati, nliugalile mmwe ni achiŵana ŵenu, mpungulile mauta go mu yoombo yo. Choombo chankuchigumbasya nchiŵicheje pambali."

5 Jwankongwe jula ŵapite kumangwakwe, ŵaliugalile ni achiŵanagwe. Achiŵanagwe ŵannyichisyaga yoombo nombejo ŵapungulilaga mauta. 6 Payagumbele yoombo yose ŵansalile mwanagwe, "Mumbe choombo chine." Mwanagwe jula ŵanjanjile, "Yose igumbele." Papopo mauta gala galesile kukopoka. 7 Pelepo jwankongwe jula jwanjaulile mundu jwa Akunnungu ni kunsalila ngani jo. Mundu jwa Akunnungu jula ŵansalile, "Njaule nkagasumisye mauta go nkalipile madeni genu. Mauta gachigasigalile go chintumiye ni ŵanache ŵenu."

Che Elisha akunsyusya mwanache jwa jwankongwe jwa ku Shunami

8 Lyuŵa limo che Elisha ŵapite ku Shunami kuŵatamaga jwankongwe jumo jwachipanje. Jwankongwe jo ŵannaliche che Elisha kulya chakulya. Kutandilila lyuŵa lyo, che Elisha paŵajaulaga ku Shunami ŵalyaga kwa jwelejo. 9 Jwankongwe jula jwansalile ŵankwawo, "Kusyene aju mundu jwakwika pamangwetu moŵa gose, ali mundu jwa Akunnungu. 10 Mbaya twataŵile chuumba chamwana kwigolofa, tuŵiche chindanda ni mesa ni chitengu ni lumuli kuti atameje mwelemo kila paakwika kukwetu."

11 Lyuŵa limo che Elisha paŵaiche ku Shunami ŵajinjile ku chuumba chakwe kukugona. 12 Ŵansalile che Gehasi jwakutumichila jwakwe, "Mummilanjile jwankongwe Mshunami jo." Paŵammilasile ŵaiche ni kwima paujo pa che Elisha. 13 Che Elisha ŵansalile che Gehasi, "Munsalile jwankongwe jo tuiweni yatite kuchenjeuka kwa ligongo lyetu. Sambano akusaka twapanganyichisye ichichi? Pane akusaka twaŵendele chilichose kwa mwenye pane kwa jwankulu jwa ŵangondo."

Jwankongwe ŵajanjile, "Une ngutama yambone ni ŵandu ŵangu, akukombola kuumba chachilichose chinguchisaka."

14 Che Elisha ŵatite, "Uli, twatendele ichichi?" Che Gehasi ŵajanjile, "Nganakola mwanache jwannume, ni ŵankwakwe achekulwipe."

15 Che Elisha ŵansalile, "Mwaŵilanje." Nombejo ŵammilasile. Jwaiche ni kwima pannango. 16 Che Elisha ŵansalile, "Pachaka, katema kanokano, chimpakate mwanache jwannume." Jwankongwe jula jwajanjile, "Ngwamba, ambuje ŵangu! Alakwe mundu jwa Akunnungu ngasimumba chilolelo changaŵa chisyene une jwakutumichila jwenu!" 17 Nambo jwankongwe jula jwakwete chitumbo ni kuligopola mwanache katema kalakala chaka chaaŵili chakwe nti iŵasasile che Elisha.

18 Mwanache jwakusile. Lyuŵa limo ŵanjaulile atatigwe, juŵaliji pamo ni ŵakugungula yakulya. 19 Ŵansalile atatigwe, "Ntwe wangu! Ntwe ukumboteka!" Atatigwe ŵansalile jwakutumichila, "Munjausye kwa achikulugwe." 20 Jwakutumichila jula paŵannyichisye kwa achikulugwe, mwanache jula jwatemi pa makongolo ga achikulugwe mpaka muusi, nipele ŵajasiche. 21 Achikulugwe ŵanjigele mwanache jula ni kungoneka pachindanda cha mundu jwa Akunnungu, ŵaugele nnango ni kutyoka. 22 Nipele ŵammilasile ŵankwakwe, ŵansalile, "Mumbe jwakutumichila jumo ni mbunda jimo, kuti najaulile mundu jwa Akunnungu kwa chitema, nipele chimuje." 23 Ŵankwakwe ŵammusisye, "Kwachichi nkwajaulila lelo? Lelo ngaŵa lyuŵa lya kuwoneka kwa mwesi pane Lyuŵa lya Kupumulila." Jwankongwe jo ŵanjajile, "Nkaikosya." 24 Ŵaŵisile chakutamila pangongo wa mbunda ni kukwela ni kunsalila jwakutumichila, "Njiutusye mbunda, ngasimwatondosya kuutuka pangansalila." 25 Nipele ŵatyosile, ŵapite mpaka ku chitumbi che Kalimeli kuŵaliji che Elisha.

Che Elisha paŵamweni alinkwika kwakutalichila ŵansalile che Gehasi jwakutumichila jwakwe, "Nnole akwika jwankongwe jwa ku Shunami! 26 Choonde ntende chitema nkanchingamile, mwausye Ana mmweji nli chenene? Ana ŵankwenu ali chenene? Ana mwanagwenu ali chenene? Ana indu ine ili chenene?" Jwankongwe jula jwajanjile, "Tuli chenene." 27 Jwankongwe jula paŵaiche kwa mundu jwa Akunnungu ku chitumbi kula, jwajineme kugakamula makongolo ga che Elisha. Che Gehasi ŵaiche kukuntyosya nambo che Elisha ŵatite, "Munneche, ali pa ipwetesi yekulungwa, nambo Ambuje Akunnungu aasisile une chindu cho." 28 Jwankongwe jula jwatite, "Uli, ambuje ŵangu nammendile mwanache? Ana nganinansalila kuti ngasimumba chilolelo changaŵa chisyene?"

29 Che Elisha ŵansalile che Gehasi, "Nlimbe ntima, njigale lubokola lwangu njaule chitema. Nkajima kukomasya mwasimanaga ni mundu mwitala pane mundu annamuchilaga nkaajanga. Njaule mpaka ku nyuumba nkaluŵiche lubokola lwangu pausyo pa mwanache jo."

30 Jwankongwe ŵansalile che Elisha, "Kusyene, mpela Ambuje Akunnungu yatite kuŵa ŵajumi ni mpela mmwe yantite kuŵa ŵajumi, ngangunneka." Kwayele che Elisha ŵatyosile, ŵalongene ni jwankongwe jula. 31 Che Gehasi ŵalongolele mbujo, paŵaiche ŵaluŵisile lubokola lwa che Elisha pausyo pa mwanache, nambo nganichikopochela chindu chilichose chachikulosya umi. Ŵausile ni kusimana ni che Elisha ni kunsalila, "Jwanchanda nganajimuka."

32 Che Elisha paŵaiche pa nyuumba pala ŵajinjile jikape ku chuumba chakwe, ŵagaweni malilo ga jwanchanda gala gali pachindanda. 33 Nipele ŵaugele nnango ni kumpopelela Ambuje Akunnungu. 34 Ŵakwesile pachindanda ni kuligoneka pachanya mwanache jula, akuno kang'wa jakwe jili pachanya pa kang'wa ja jwanchanda ni meso gakwe gali pachanya pa meeso ga jwanchanda, makono gakwe nombe galiji pachanya pa makono ga jwanchanda. Paŵalijongwele pachanya pa jwanchanda, chiilu cha jwanchanda jula chatandite kukola ntukuta. 35 Che Elisha ŵajimi ni kwendajenda mu chuumba mula, nipele ŵaujile sooni pachindanda ni kuligoneka ilaila pachanya jwanchanda jula. Jwanchanda jula ŵasemukwile mala saba ni kuwunukula meeso. 36 Che Elisha ŵammilasile che Gehasi nikwasalila akaaŵilanje achikulugwe nchanda ju. Achikulu ŵala paŵaiche, che Elisha ŵansalile, "Nkanjigale mwanagwenu." 37 Achikulu jula ŵajinjile munkati ŵatindiŵele ni kukotama mpaka paasi paujo pa che Elisha, ŵanjigele mwanagwe ni kutyoka paasa.

Che Elisha akutendekanya yakusimosya ine

38 Che Elisha ŵausile ku Giligali, ni kweleko kwaliji ni sala ku chilambo chose. Lyuŵa limo ali asimene ni mpingo wa ŵakulondola, ŵansalile jwakutumichila jwakwe, "Nkaŵiche chiulugo chekulungwa, mwatelechele ŵakulondola." 39 Jumo jwao jwatyosile jwapite ku migunda kukukaŵa liponda. Kwele ŵausimene ntepo wa mangumbondo, ŵakaŵile mangumbondo ŵagumbesye mu nguo jakwe ni kugajigala. Paŵaiche nago ŵakatenyekatenye ni kutumbuchisya mu chiulugo, nachiŵamuno ngapagwa ŵaŵagamanyilile. 40 Ŵaagaŵile ŵandu chakulya chila, nambo paŵapasisye ŵangumilile che Elisha, "Alakwe mundu jwa Akunnungu chakulya chi chichituulaje!" Nganakombolanga kulya. 41 Che Elisha ŵalajisye ŵapelechele utandi, ŵautasile mu chiteleko ni kwasalila, "Mwagaŵile ŵandu alye." Ŵandu ŵala ŵalile pangali chakwaŵenga.

42 Kanyuma ŵaiche mundu jumo kutyochela ku Baali Shalisha, ŵannyichisye che Elisha mikate ishilini jekolosye ni milimbu ja shayili, pamo ni masache ga ngano jasambano, mwigunia. Che Elisha ŵansalile che Gehasi ŵaape ŵandu alye. 43 Che Gehasi ŵanjanjile, "Chingombole chinauli kwagaŵanyichisya ŵandu mia moja chakulya chi?" Che Elisha ŵatite, "Mwapeje alye, pakuŵa Ambuje Akunnungu akuti, tachilya ni kwikuta mpaka taleche." 44 Kwayele jwakutumichila jula ŵatesile iŵasalilwe, ŵapele ŵandu, ni ŵalile ni kwikuta mpaka kuleka mpela liloŵe lya Ambuje Akunnungu lilyaŵechete.

Bíblia Online

Veja também

Oração para pedir a Deus que aumente a fé quando o coração está cheio de dúvida

Como o amor de Deus cura as dores de relações passadas?