1 Pa chaka cha ishilini na saba cha utawala wa che Yeloboamu mwana jwa che Yoashi mwenye jwa ku Isilaeli, che Asalia mwana jwa che Amasia ŵatandite kutawala chilambo cha ku Yuda. 2 Ŵatendekwe mwenye ali ni yaka kumi na sita. Ŵatawele ku Yuda kwa yaka hansini na mbili achitamaga ku Yelusalemu. Achikulugwe ŵaliji che Yekolia jwa ku Yelusalemu. 3 Ŵapangenye yambone paujo pa Ambuje Akunnungu malinga ni yose iŵaitesile che Amasia atatigwe. 4 Namose yeleyo pamalo pati ŵapopelela pamatumbi nganapajonanga, ni ŵandu ŵajendelechelaga kutyosya mbopesi ni ku kutinisya ubani pelepo. 5 Ambuje Akunnungu ŵanjamwiche che Asalia, ŵakwete matana mpaka paŵawile, nombe ŵatemi mu nyuumba ja jika. Che Yotamu mwanagwe ni juŵajimilile indu yose ya munyuumba ja chimwenye ni kuchitawala chilambo.

6 Indu ine iyatendekwe pa katema ka utawala wa che Asalia ni indu iŵaitesile, yose ilembekwe mu chitabu cha chikumbuchisyo cha mamwenye ŵa ku Yuda. 7 Che Asalia ŵawile ni kusichikwa chiŵandi ni malembe ga achambujegwe mamwenye, mu musi u che Daudi, ni che Yotamu mwanagwe ŵatawele pamalo pakwe.

8 Pa chaka cha selasini na nane cha utawala wa che Asalia mwenye jwa ku Yuda, che Sekalia mwana jwa che Yeloboamu ŵaliji mwenye jwa ku Isilaeli, ŵatawele ku Isilaeli kwa miesi sita achitamaga ku Samalia. 9 Nombejo ŵatesile ugongomalo paujo pa Ambuje Akunnungu mpela ŵaŵannongolele iŵatesile. Nganasileka sambi siŵatesile che Yeloboamu mwana jwa che Nebati juŵatendekasisye Ŵaisilaeli alyungasiche. 10 Che Shalumu mwana jwa che Yabeshi ŵatesile malindi ga kwaulaga che Sekalia. Ŵangungumuchile paujo pa ŵandu ni kummulaga, nipele che Shalumu wo ŵatawele pamalo pakwe.

11 Indu ine iyatendekwe pa katema ka utawala wa che Sekalia ni indu iŵaitesile, yose ilembekwe mu chitabu cha chikumbuchisyo cha mamwenye ŵa ku Isilaeli.

12 Kwayele liloŵe lya Ambuje Akunnungu liŵalisasile nkati che Yehu lyamalile, paŵatite kuti, "Uŵelesi ŵenu chatawale ku Isilaeli mpaka chipago cha ncheche."

13 Pa chaka cha selasini na tisa cha utawala wa che Asalia mwenye jwa ku Yuda, che Shalumu mwana jwa che Yabeshi ŵaliji mwenye jwa ku Isilaeli, ni ŵatawele ku Isilaeli kwa mwesi umo pe achitamaga ku Samalia. 14 Nipele che Menahemu mwana jwa che Gadi ŵatyosile ku Tilisa kwaula ku Samalia ni kweleko ŵangungumuchile che Shalumu mwana jwa che Yabeshi ni kummulaga, nipele ŵatawele pamalo jakwe. 15 Indu ine iyatendekwe pa katema ka utawala wa che Shalumu ni malindi gakwe gaŵatesile, ni iŵatite kwigala umwenye kwa machili, yose ilembekwe mu chitabu cha chikumbuchisyo cha mamwenye ŵa ku Isilaeli. 16 Pa katema kala che Menahemu ŵatyosile ku Tilisa ni kungungumuchia kila mundu juŵaliji ku Tapua pamo aŵala ŵaŵatamaga malo jachiŵandi ni musi wo, ligongo ŵaliji akanile kwaugulila nnango kuti ajinjile mmusi mo. Kwayele ŵaujonasile musi wa ku Tapua ni kwatumbula achakongwe ŵaali ni itumbo wose.

17 Pa chaka cha selasini na tisa cha utawala wa che Asalia mwenye jwa ku Yuda, che Menahemu mwana jwa che Gadi ŵaliji mwenye jwa ku Isilaeli, ŵatawele ku Isilaeli kwa yaka kumi achitamaga ku Samalia. 18 Ŵatesile chigongomalo paujo pa Ambuje Akunnungu moŵa gose ga umwenye wakwe, ŵakuiye chisyasyo chi che Yeloboamu mwana jwa che Nebati juŵaatendekasisye Ŵaisilaeli alyungasiche. 19 Nipele che Pulu mwenye jwa ku Ashulu ŵachigungumuchile chilambo cha ku Isilaeli nombe che Menahemu ŵaapele kilo elufu selasini na nane sya madini ga feza kuti ŵaakamusye kuulimbisya umwenye wakwe pa chilambo cha Isilaeli. 20 Che Menahemu ŵapatile madini ga feza go kwa kwalipisya ŵachipanje ŵa ku Isilaeli nsongo wa nusu kilo ja madini ga feza kwa kila mundu. Che Menahimu ŵampele mwenye jwa ku Ashuru madini go. Nipele che Pulu nganatama ku Isilaeli nambo ŵausile ku chilambo chakwe.

21 Indu ine iyatendekwe pa katema ka utawala wa che Menahemu ni indu iŵaitesile, yose ilembekwe mu chitabu cha chikumbuchisyo cha mamwenye ŵa ku Isilaeli. 22 Che Menahemu ŵawile, ni che Pekahia mwanagwe ŵatawele pamalo pakwe.

23 Pa chaka cha hansini cha utawala wa che Ahasia mwenye jwa ku Yuda, che Pekahia mwana jwa che Menahemu ŵaliji mwenye jwa ku Isilaeli. Ŵatawele ku Isilaeli kwa yaka iŵili achitamaga ku Samalia. 24 Ŵatesile ugongomalo paujo pa Ambuje Akunnungu, nganauleka ugongomalo ŵa che Yeloboamu mwana ju che Nebati, juŵatendekasisye Ŵaisilaeli alyungasiche. 25 Jumo jwa ŵangondo ŵakwe achakulu jwakuŵilanjikwa che Peka mwana ju che Lemalia, ŵatesile malindi gakwaulaga che Pekahia. Ŵaajigele ŵandu hansini kutyochela ku Gileadi pamo ni nsyenejo, ŵammuleje che Pekahia pamo ni che Aligobu ni che Alia, ku nyuumba ja chimwenye ku Samalia ko. Kwayele che Peka ŵaliji mwenye pamalo pakwe.

26 Indu ine iyakopochele pa katema ka utawala wa che Pekahia ni indu iŵaitesile, yose ilembekwe mu chitabu cha chikumbuchisyo cha mamwenye ŵa ku Yuda.

27 Pa chaka cha hansini na mbili cha utawala wa che Asalia mwenye jwa ku Yuda, che Peka mwana jwa che Lemalia ŵaliji mwenye jwa ku Isilaeli. Ŵatawele ku Isilaeli kwa yaka ishilini achitamaga ku Samalia. 28 Ŵatesile ugongomalo paujo pa Ambuje Akunnungu. Nganauleka ugongomalo wa mwenye che Yeloboamu mwana jwa che Nebati juŵatendekasisye Ŵaisilaeli alyungasiche.

29 Katema ka utawala wa che Peka mwenye jwa ku Isilaeli, che Tigilati Pileseli, mwenye jwa ku Ashulu ŵaiche ni kujijigala misi ja ku Iyoni ni ku Abelibeti Mahaka ni ku Yanoa ni ku Kadeshi ni ku Hasoli. Sooni ŵajijigele misi ja ku Gileadi, ni ku Galilaya pamo ni chilambo chose cha ku Nafutali ni kwasamichisya ŵandu wosepe ku Ashulu.

30 Pa chaka cha ishilini cha utawala wa che Yotamu mwana jwa che Asalia mwenye jwa ku Yuda, che Hoshea mwana jwa che Ela ŵatesile malindi gakwaulaga che Peka mwana jwa che Lemalia, nipele ŵammuleje, ni che Hoshea ŵatawele pamalo pao. 31 Ipanganyo ine iyakopochele pa utawala wa che Peka ni indu yose iŵaitesile, yose ilembekwe mu chitabu cha chikumbuchisyo cha mamwenye ŵa ku Isilaeli.

32 Pa chaka chaaŵili cha utawala wa che Peka mwana ju che Lemalia mwenye jwa ku Isilaeli, che Yotamu mwana ju che Asalia ŵatandite kutawala ku Yuda. 33 Ŵaliji ni yaka ishilini na tano paŵatandite kutawala. Ŵatawele ku Yuda kwa yaka kumi na sita achitamaga ku Yelusalemu. Achikulugwe ŵaŵilanjikwaga che Yeshula mwali ju che Sadoki. 34 Che Yotamu ŵatesile indu yakwanonyelesya Ambuje Akunnungu mpela che Asalia atatigwe. 35 Nambo pamalo pati ŵapopelelaga pamatumbi nganapagumula ni ŵandu ŵaajendelechele kutyosya mbopesi syakutinisya ni kutinisya ubani kweleko. Che Yotamu ŵatawile sooni nnango wa chakumpoto kwa Nyuumba ja Ambuje Akunnungu.

36 Indu ine iyakopochele pa utawala wa che Yotamu ni indu iŵaitesile, yose ilembekwe mu chitabu cha chikumbuchisyo cha mamwenye ŵa ku Yuda. 37 Katema ka utawala wa che Yotamu, Ambuje Akunnungu ŵatandite kwajausya che Lesini jwa ku Alamu ni che Peka mwenye jwa ku Isilaeli kuti akachingumuchile chilambo cha ku Yuda. 38 Che Yotamu ŵawile ni kunsika mmalembe ga mamwenye ku musi u che Daudi. Che Ahasi mwanagwe ŵatawele pamalo pakwe.