1 Ambuje Akunnungu ŵansalile che Musa, 2 ŵasalile Ŵaisilaeli kuti, "Une ndili Ambuje Akunnungu, Akunnungu ŵenu. 3 Nkatenda indu yakuitenda ŵandu ŵa ku Misili, kwekula kumwatemi kalakala kula, namose nkatenda indu yakuitenda ŵandu ŵa ku Kanaani kuchilambo chingunjausya. Nkaika kuikuya ipanganyo yao. 4 Ŵanyamwe chingakuye malajisyo gangu ni kugakamulisya makanyo gangu. Uneji ndili Ambuje Akunnungu, Akunnungu ŵenu. 5 Kwapele ngakamulichisye malajisyo gangu ni makanyo gangu, pakuŵa mundu jwakuijitichisya indu yo, chaitumie kwaligongo lya utame wakwe. Uneji ndili Ambuje Akunnungu."

6 Sooni, Ambuje Akunnungu ŵaapele malajisyo ga kuti mundu jwalijose akansejelela nlongo njakwe jwakuŵelekana kuti agone nawo. Uneji ndili Ambuje Akunnungu. 7 Nkaatesya soni atati ŵenu kwa kugona ni achikulu ŵenu. Ŵelewo ali achikulu ŵenu, nkagona nawo. 8 Nkaatesya soni atati ŵenu kwa kugona ni jumo jwa achiŵankwakwe. 9 Nkagona ni alumbu ŵenu, Aŵeje alumbu ŵakuŵelekana pane alumbu ŵenu ŵansimene kwa achikulu ŵenu pane atati ŵenu, namose kuti aŵelekwe mu nyuumba jimo pane nganaŵelekwa mu nyuumba jimo ni mmwejo. 10 Nkagona ni chisukulu chenu, ligongo kwa kutenda yeleyo nkulitesya soni mwasyene. 11 Nkagona ni mwali jwa achikulu ŵenu ŵa kuichila, ligongo mwali jo ali alumbu ŵenu. 12 Nkagona ni mati wenu pakuŵa ŵelewo ali nlongo njakwe atati ŵenu. 13 Nkagona ni achikulu ŵenu ŵanandi pane ŵaakulungwa pakuŵa ŵeleo ali achalongo achinjakwe achikuluŵenu. 14 Nkaatesya soni atati ŵenu ŵakulungwa pane ŵanandi kwa kugona ni ŵankwakwe, pakuŵa ŵeleo ali achikuluŵenu. 15 Nkagona ni ŵankwakwe mwanache jwenu pakuŵa ŵeleo ali akwegwenu. 16 Nkagona ni ŵankwakwe mpwenu pakuŵa ŵeleo ali alambenu. 17 Nkagona ni jwankongwe ni mwanagwe, pane chisukulu cha jwankongwe jungonile najo mmwe, pakuŵa ŵanyawo ali achalongo achinjakwe jwankongwe jungonile najo jula, kutenda yeleyo chili chigongomalo chachikulungwa. 18 Nkalombela alumbu jwa ŵankwenu, ŵankwenu ali chiŵela ŵajumi, chelecho chichiichisye umani.

19 Nkagona ni jwankongwe ali pa ulwele wakwe wa chikongwe. 20 Nkagona ni jwankongwe jwa mundu jwapachiŵandi penu ni kulitenda mwasyene jwangakundikwa kwa kwapopelela Akunnungu, kwa jwelejo. 21 Ngasimuntyosya mwanache jwenu jwalijose kuti aŵe mbopesi kwa nnungu jwakuŵilanjikwa Moleki, namose nkalisakasya liina lya Akunnungu ŵenu. Uneji ndili Ambuje Akunnungu. 22 Jwannume akagona ni jwannume njakwe mpela mwakugonela ni jwankongwe, chele chindu cho chili chakuŵagula, nchinyalape. 23 Nkagona ni chinyama, nkaika kulitesya jwangakundikwa kwa kwapopelela Akunnungu; jwannume pane jwankongwe jwajulijose akatenda yeleyo, kweleko kuŵagula.

24 Nkalitesya mwachimisyene kuŵa ŵangakundikwa kwa kwapopelela Akunnungu kwa kuitenda indu yo pakuŵa kwaligongo lya yeleyo ngwatopola ŵandu ŵa ilambo ine ŵaali paujo penu, pakuŵa ŵanyawo akuipanganya yeleyo ni kulisakasya nayo. 25 Ipanganyo yao yachitesile nganinachikunda chilambo cho, ni une Ambuje Akunnungu nachijamwiche kwaligongo lya sambi syao, ni naakanile akatama mu chilambo mo. 26 Nambo ŵanyamwe ni achalendo wose ŵankutama nawo ngakamulichisye malajisyo ni makanyo gangu, nkatenda yausakwa yo. 27 Yausakwa yo ŵaitesile ŵandu ŵaŵatemi pa Kanaani mwanya nganimme kuika, ni kwatesya ŵandu ŵa mchilambo cho akakundikwa paujo pangu. 28 Ni ŵanyamwe mwachitendaga chilambo chi chikakundikwa paujo pangu, tinjintyosya mu chilambo chi mpela inatite pakwatyosya ŵandu ŵaŵatamaga mwelemu mwanya nganimme kuika. 29 Pakuŵa mundu jwalijose juchatende yausakwa yo akusachilwa aŵichikwe pajiika ni ŵandu ŵakwe.

30 Kwayele ngakamulisye malajisyo gangu, "Nkagakuya masyoŵelelo gagaligose ga kuchima gagatendekwe ni aŵala ŵaŵatamaga mchilambo mwanya ngunnaŵe kuika, nkalitesya ŵangakundikwa kwa kwapopelela Akunnungu kwa itendo yo. Uneji ndili Ambuje Akunnungu, Akunnungu ŵenu."