1 Ambuje Akunnungu ŵansalile che Musa, "Mwasalile ŵambopesi, ŵanache ŵa che Haluni, kuti akapagwa jwambopesi jwalijose pasikati jao juchalitesye jwangakundikwa kwa kwapopelela Akunnungu kwa kugakwaya malilo ga mundu jwalijose mwa achalongo achinjakwe, 2 ikaŵe malilo go gali ga nlongo njakwe jwakuŵandikana, yaani achikulugwe pane atatigwe pane mwanache jwakwe pane mpwakwe 3 pane nlumbugwe jwanganalombekwa jwakutama nawo, kwaligongo lya ŵanyawo akukombola kulitenda ŵangakundikwa kwa kwapopelela Akunnungu. 4 Nambo ngakusachilwa kulitesya jwangakundikwa kwa kwapopelela Akunnungu nsyene kwaligongo lya achalongo ŵasimene ku ulombela.

5 "Ŵambopesi akasamyola lupala muntwe mwao pane kuchenyendela ndeu syao pane kulikatanya nembo pa chiilu pao kulosya kuti akulila kwa malumbo. 6 Akusachilwa aŵeje ŵaliŵiche pajika kwaligongo lya Akunnungu jwao ni akalisakasya liina lya Akunnungu jwao. Pakuŵa ŵanyawo ni ŵakupeleka mbopesi sya kutinisya pa mooto kwa Ambuje Akunnungu, chaakulya cha Akunnungu jwao. Kwaligongo lyo akusachilwa aŵeje ŵaliŵichile pajika kusyenesyene kwaligongo lyangu. 7 Jwambopesi akalombela jwankongwe jwalijalwisye kwa chigwagwa pane jwankongwe jwangaŵa mwalimwalipe pane jwankongwe jwapegwilwe talaka ni ŵankwakwe, pakuŵa ŵambopesi ali ŵaŵichikwe pajika kusyenesyene kwaligongo lya Akunnungu jwao. 8 Nkusachilwa mwalole kuŵa ŵaŵichikwe pajika kusyenesyene kwaligongo lya Akunnungu, pakuŵa ŵelewo ni ŵakwausya mbopesi ja chakulya kwa Akunnungu jwenu. Ali ŵaŵichikwe pajika kusyenesyene kwaligongo lya Akunnungu pakuŵa uneji Ambuje Akunnungu ngwanile mu yoseyosepe, ni sooni ni jungwaŵika pajika ŵandu aŵe upaande wangu. 9 Mwali jwa jwambopesi alijalusyaga kwa kutenda chigwagwa, ni kwataga soni atatigwe, aulajikwe kwakwatinisya pa mooto.

10 "Jwambopesi jwankulu jwali pasikati ja achalongo achinjakwe, jwajitililwe mauta mu ntwe wakwe ni kuŵichikwa pa jika kuti awale nguo syeŵichikwe pajika kwa kuwalikwa ni ŵaakuntumichila Akunnungu, akaleka pangasamula umbo muntwe wakwe pane kupapula yakuwala yakwe kulosya kuti akulila kwa malumbo. 11 Akajinjila mwamuli ni malilo, akalitesya jwangakundikwa kwa kwapopelela Akunnungu, namuno jwawile jo ali atatigwe pane achikulugwe. 12 Akalisakasa lisakasa lyeŵichikwe pajika kwaligongo lya Akunnungu jwakwe kwa kwaula kugachenjeuchila malilo, pakuŵa aŵichikwe pajika kwaligongo lya Akunnungu kwa kwajitilila mauta ga Akunnungu jwao. Uneji ndili Ambuje Akunnungu. 13 Jwankongwe jwakusachilwa kulombela jwambopesi jwankulu aŵeje mwalimwalipe. 14 Akalombela jwankongwe jwawililwe ni ŵankwakwe pane jwankongwe jwapegwile talaka pane jwankongwe jwachigwagwa. Nambo alombele mwalimwalipe kutyochela mu lukosyo lwakwe, 15 kuti ngasiŵaatesya achiŵanagwe akakundikwa pasikati ja ŵandu ŵakwe, uneji ndili Ambuje Akunnungu junammisile pajika kwaligongo lyangu."

16 Ambuje Akunnungu ŵansalile che Musa, 17 ŵasalile che Haluni kuti "Pangali mundu jwalijose mu uŵelesi wenu jwali jwalemele jutachiika kutyosya mbopesi ja yakulya kwa Akunnungu jwakwe. 18 Mundu jwalijose jwalemele akaŵandichila kwa une kutyosya mbopesi. Kutandilila mundu jwangalola pane jwangajenda pane jwalemele kumeso pane mundu jwakwete chiwalo cheleu kupunda yaikuti kusachilwa. 19 Mundu jwatemeche nkono pane lukongolo, 20 mundu jwakwete chibiyongo pane mundu jwanjipi mwakulemala pane mundu jwakwete ng'ala mmeso mwakwe pane mundu jwakwete upele pane yakuimbila pachiilu pakwe pane mundu jwali mpuli. 21 Mundu jwalijose jwalemele mu uŵelesi wa jwambopesi che Haluni akasejelela kutyosya mbopesi syetosekwe kwa Akunnungu kwa kutinisya pa mooto, pakuwa alemele akaŵandichila kundyochesya uneji Akunnungu chakulya. 22 Mundu jo akukombola kulya yakulya yaikutyosekwa kwa une Akunnungu jwakwe, yakulya yeŵichikwe pajika kusyenesyene kwaligongo lya Akunnungu ni yakulya yeŵichikwe pajika kwaligongo lya Akunnungu. 23 Nambo kwaligongo lya kulemala kwakwe, akaŵandichila ng'o pa nguo ja lusasa namose pa chilisa, akaika kulichembulusya lisakasa lyaliŵichikwe pajika kwaligongo lyangu. Uneji ndili Ambuje Akunnungu jungwatenda aŵe ŵangu nansyene."

24 Nipele che Musa ŵaasalile che Haluni ni achiŵanagwe ni ŵandu wose ŵa ku Isilaeli indu yose.