1 Ambuje Akunnungu ŵaasalile, "Nkalipanganyichisya inyango pane kwimika inyago yakusepa pane lusonga pane liganga lyesepe mu chilambo chenu ni kutindiŵala kuikotamila. Uneji ndili Ambuje Akunnungu, Akunnungu ŵenu. 2 Nkamulichisye moŵa gangu gakupumulila ni kupachimbichisya peuto pangu papaŵichikwe pajika kwaligongo lya une Akunnungu. Uneji ndili Ambuje Akunnungu.

3 "Iŵaga nkugakamulichisya makanyo gangu ni kulilolechesya kugajitichisya malajisyo gangu, 4 chinjimpa ula kwa katema kakwe, kuti litaka lisogosye yakulya ni itela isogosye isogosi. 5 Kuputukula yakulya yenu chikwendelechele mpaka katema ka kugungula sabibu, nombe kugungula sabibu kwenu chikujendelechele mpaka katema ka kupanda mbeju, ni ŵanyamwe chinlye ni kwikuta, ni kutama kwa chitendewele mu chilambo chenu.

6 "Chinannyichisye chitendewele mu chilambo kuti ngoneje yambone panganjogoya mundu jwalijose. Chinaiŵinje inyama yachikali mu chilambo mwenu ni ngajipagwa ngondo mwelemo. 7 Chimwaŵinje ŵammagongo ŵenu, ni kwaulaga kwa lipanga. 8 Wandu nsano ŵa kukwenu chiŵaŵinje ŵammagongo ŵenu mia moja ni ŵandu mia moja ŵa kukwenu chiŵaŵinje ŵammagongo ŵenu elufu kumi. Ŵammagongo ŵenu chaulajikwe kwa lipanga paujo penu. 9 Chinaatendele lusagu ni kwatesya mmeleche ni konjecheka, none chinaligose lilangano lyangu litindimile. 10 Chinchiŵa nli nkulya yakulya ya chipiti mpaka chinchiityosya yakulya ya chipiti yo, mu ngokwe kuti yakulya ya sambano ipate malo. 11 Chindame pasikati ŵanyamwe, ni une ngasinanneka. 12 Chinjiŵa pasikati jenu melepe meje Akunnungu jwenu, ni ŵanyamwe chimme ŵandu ŵangu. 13 Uneji ndili Ambuje Akunnungu, Akunnungu ŵenu, junankopwesye mu chilambo cha ku Misili kuti nkajendelechela kuŵa achikapolo ŵao. Nambusile makongwa ga ukapolo kuti njendeje mwakugopoka."

14 Ambuje Akunnungu ŵatite, "Iŵaga ngamumbilikanila ni kugakuya malajisyo gose go, 15 iŵaga chingakane makanyo gangu ni kugachima malamusi gangu ni kuleka kuipanganya yose inanlamulile kuipanganya mu lilangano lyangu, 16 chinjinjamuka mwanya. Tinjinnyichisya indu yakogoya mwachisisimuchile, chilwele chakukosomola kwakukulungwa kwakugandisya chilu, ni kukolela mooto kwa chilu kwakukugatesye meso ungalola ni kulepela kupumula uchenene. Chinchipanda mbeju syenu nambo ngangowola chindu ligongo ŵammagongo ŵenu tachimpunda pa ngondo, nipele tachilya yakulya yenu. 17 Une chinjinleka, nipele ŵammagongo ŵenu tachimpunda pa ngondo, ŵandu ŵaakunchima tachintawala, ni ŵanyamwe chinchigamba kuutuka pangali kose mundu jwaakumbutusya.

18 "Iŵaga ngankumbilikanila nli nnyiweni yakogoya yosepe yi, chinjichuluya kasano ni kaŵili majamuko gakumpa wanyamwe. 19 Chinjichityosya chibuli chenu chachikuntesya nlifune, tinjikutende kumaunde kwakuumula mpela chisyano ni litaka chiliŵe lyakuumula nnope mpela madini ga shaba. 20 Natamuno mwalimbichilaga kulima, machili genu chigachipita iyiyipeyi, ligongo litaka ngalimela yakulya ni itela ngaisogola isogosi.

21 "Iŵaga tinjendelechele kutenda umagongo ni une, ni kukana kuumbilikanila, chinjichuluya kasano ni kaŵili malagasyo gakumpa ŵanyamwe malinga ni winji wa sambi syenu. 22 Chinjiituma inyama yakogoya pasikati jenu, nombe yo chiichitauna ŵanache ŵenu ni kunjonanjila ilango yenu, ni kuntenda mme ŵakunandupa, namose ngasapagwa ŵandu ŵachapite mmatala genu.

23 "Iŵaga ngankumujilanga une ndili nampele majamuko ga ipwetesi yose yi ni nkwendelechela ni umagongo wenu ni une, 24 une nansyene chindende umagongo ni ŵanyamwe ni kuchuluya kunlagasya kasano ni kaŵili ligongo lya sambi syenu. 25 Chinjinnyichisya ngondo kuti naliuchisye chisasi kwa kuleka kuipanganya yose inangene ni ŵanyamwe mu lilangano lyangu. Iŵaga nkuutuchila mmisi kukuukulupusya umi wenu kungondo, chinjiichisya ilwele yakogoya pasikati jenu, ichiintende nlijausye kwa ŵammagongo ŵenu ni kukamulwa. 26 Chinjiutyosya upate wa mikate jenu, achakongwe likumi chaachiteleka mikate jao pa chisisa chimo ligongo lya kunandupa kwa chakulya. Nipele chachingaŵila mikate kanandi kwa kumpimila, namose patinle nganjikuta.

27 "Iŵaga ngankumbikanila pe une, gali gannyichilile gelego ni kwendelechela ni umagongo wenu ni une, 28 ni une jwakwe pa lutumbilo lwangu chimiche ugongomalo ni ŵanyamwe, ni une nansyene chinjimpa majamuko gakuchuluya kasano ni kaŵili ligongo lya sambi syenu. 29 Chinchilya ŵanache ŵenu ligongo lya sala jajikulungwa. 30 Chinjigajonanga mauto genu gakupopelela gagali pachanya matumbi, ni kugwisya ilisa yenu yakututumichisya ubani ni kujijasila malilo genu pachanya pa inyago ya minungu jenu. Ni une chinjimmenga ŵanyamwe kwannope. 31 Chinjijitesya misi jenu kuŵa masame ni kupajonanga peuto penu papaŵichikwe pajika kwaligongo lyangu ni ngaasangalila sooni ununjile wambone wa mbopesi syenu. 32 Chinjichijonanga chilambo chenu chose kuti ŵammagongo ŵenu ŵataiche kutama mwelemo tachisimonga pataiwone yandite kuchijonanga. 33 Chinjinnyichisya ngondo ni kumpwilinganya pasikati pa ŵandu ŵa ilambo, ni mu chilambo chenu ngasapagwa ŵandu ni misi jenu chijiŵe masame. 34 Pelepo chilambo chichisangalalila Moŵa gakwe ga Kupumulila katema kose pachichiwe changali ŵandu, ni ŵanyamwe nli ku chilambo cha ŵammagongo ŵenu, pelepo chilambo chichipumulile ni kusangalalila Moŵa gakwe ga Kupumulila. 35 Katema kose chilambo pachichiŵe pangali ŵandu, chilambo chichipumulile, kupumulila kwati nganikutyochele pamwaliji nli nkutama mwelemo.

36 "Nkati aŵala achinjenu uchachisigala, chinaatesye aŵe ni woga mu ilambo ya ŵammagongo ŵao kwampaka lilama lya masamba gagakutinganyika ni mbungo chilyatende autuche. Chautuche mpela mundu jwakuutuka ngondo, nipele chachigwa pasi pali pangali mundu jwakwautusya. 37 Tinchikuŵasyana ni kugwisyana mpela ŵandu ŵakuutuka ngondo pali pangali mundu jwalijose jwakummutusya. Kwapele ngankola machili gakuputana ni ŵammagongo ŵenu. 38 Chinchiwila mu ilambo ya ŵammagongo ŵenu, ni ŵanyamwe chachinsika mwelemo. 39 Wampepe mwa ŵanyamwe uchachisigala chajonasiche mu ilambo ya ŵammagongo ŵao kwaligongo lya sambi syao ni kwaligongo lya sambi sya achinangolo ŵao.

40 "Nambo iŵaga chajitichisye sambi syao ni sambi sya achinangolo ŵao, nkati ungakulupichika wao kwa une ni kunganila kwao, 41 kukwandesile meje jwammagongo jwao kwampaka kwajausya ku chilambo cha ŵammagongo ŵao. Iŵaga mitima jao jakulimba jikulitulusya ni kuleka sambi syao, 42 tinalikumbuchile lilangano lyangu linapangenye ni che Abulahamu ni che Isaka ni che Yakobo, ni achila chinalangene nawo nkati chilambo chi. 43 Pakuŵa chachichileka chilambo chao, chilambo cho chichisangalalile moŵa ga kupumulila gakwe katema chili pangali ŵandu. Chajamukwe kwaligongo lya sambi syao, kwaligongo lyakugakana malajisyo gangu ni kugachima makanyo gangu. 44 Namose yeleyo Ŵaisilaeli aŵaga mu chilambo cha ŵammagongo ŵao, une ngasinaakana namose kwachima kwampaka kwajonanga tikitiki ni kulikasa lilangano lyangu ni ŵanyawo. Une ndili Ambuje Akunnungu, Akunnungu ŵao. 45 Nambo kwaligongo lyao, chingumbuchile chilanga chinapangenye ni achinangolo ŵao unaakopwesye mu chilambo cha ku Misili kwa machili gangu, ni mitundu ja ŵandu jili nkulola kuti meje Akunnungu ŵao. Une ndili Ambuje Akunnungu."

46 Gelega ni malajisyo ni makanyo gati Ambuje Akunnungu ŵaapele Ŵaisilaeli pa chitumbi cha Sinai kwa litala li che Musa.