1 Ambuje Akunnungu ŵansalile che Musa, 2 ŵasalile Ŵaisilaeli nkati moŵa ga indimba ya Ambuje Akunnungu gatagatangasye kuŵa misongangano jajiŵichikwe pajika kwaligongo lya Ambuje Akunnungu. 3 Gapali moŵa sita gakupanganya masengo, nambo pa lyuŵa lya saba jili Sabato, yaani Lyuŵa lya Kupumulila. Pa lyele lyuŵa lyo nkapanganya masengo gagali gose nambo nsongangane ni kuumbopelela une. Palipose pachinkatame nkapumulileje kwaligongo lya Ambuje Akunnungu. 4 Yeleyi ili indimba ine ya misongangano maalumu yaiŵichikwe pajika kwaligongo lya Ambuje Akunnungu, gatigasangalilwe pa ndaŵi jakwe kila chaka.

5 Pasaka ja Ambuje Akunnungu jikutanda ligulo pa lyuŵa lya kumi na nne lya mwesi waandanda. 6 Pa lyuŵa lya kumi na tano lya mwesi wo, chindimba cha mikate jangataga amila ni palikutanda, ni ŵanyamwe nlyanje mikate jangataga amila kwa moŵa nsano ni gaŵili. 7 Pa lyuwa lyaandanda nsonganganeje kwaligongo lyangu, ni ŵanyamwe nkapanganya masengo. 8 Mpelecheje mbopesi syenu sya kutinisya kwa Ambuje Akunnungu kwa moŵa nsano ni gaŵili. Ni pa lyuwa lya nsano ni lyaaŵili nsonganganeje kwaligongo lyangu, ni nkapanganya masengo genu.

9 Ambuje Akunnungu ŵansalile che Musa, 10 akunguluche ni Ŵaisilaeli ŵasalile kuti patanjinjile mu chilambo chakwapa Ambuje Akunnungu, ni kugungula magowolo ga mchilambo cho, annyichisye jwambopesi chilingo cha milimbu ja yakulya yao. 11 Pakumala pe Lyuŵa lya Kupumulila, jwambopesi chachinyakule mwinani ni kujelasya chilingo cho paujo pa Ambuje Akunnungu kuti chikundikwe kwaligongo lyenu. 12 Pa lyuŵa lichimpeleche chilingo cha milimbu cho, mpeleche ni mbopesi jakutinisya ni mooto kwa Ambuje Akunnungu, ngondolo tonde ja chaka chimo jangalemala. 13 Pamo ni kangomba siŵili sya utandi wewanganye ni mauta ga seituni, mbopesi jachimumbelechele une Ambuje Akunnungu pa mooto jajili ni ununjile wambone, ni chakung'wa chakwe chichiŵe divai lobo tatu ja lita. 14 Nkalya ng'o yakulya ya milimbu jenu, iŵeje yeŵisi pane yekalanje pane yekolosye nkate mpaka lyele lyuŵa pachimumpelechele une Akunnungu jwenu mbopesi ji. Lyeleli chiliŵe lilajisyo lyakutamilisya kwa iŵelesi yenu palipose pachinkatame.

15 Mmalanje ijuma saba kutyochela kundaŵi kwakwe pakumala kwa Lyuŵa lya Kupumulila jimwaichisye chilingo chakunyakulwa kwa Ambuje Akunnungu. 16 Pa lyuŵa lyaaŵili lya lyele Lyuŵa lyakupumulila lya saba lyo, timmalanjile moŵa hansini, mwanya timwapelechele Ambuje Akunnungu mbopesi ja nafaka ja sambano. 17 Kila nyuumba jiichenawo mikate jiŵili jepalile. Nkate uliwose chachiupanganya ni utandi kangomba siŵili wewanganye ni amila, ni welewo chimumbelechele une Ambuje Akunnungu kuŵa mbopesi ja kunyakulwa mwinani ja milimbu jenu kwa Ambuje Akunnungu. 18 Pamo ni mikate jo chimumbelechele ngondolo tonde saba syangalemala sya chaka chimo ni ng'ombe jankambaku jimo jangakomala ni ngondolo tonde siŵili. Inyama yo chiiŵe mbopesi syakutinisya kwa Ambuje Akunnungu pamo ni mbopesi sya yakulya ni mbopesi sya yakung'wa. Mbopesi jajikutyosyekwa pa mooto jajili ni ununjile wambone waukwanonyela Ambuje Akunnungu. 19 Nipele chimpeleche mbusi tonde jimo kwaligongo lya mbopesi ja sambi ni ngondolo tonde siŵili sya chaka chimo kwaligongo ya mbopesi ja chitendewele. 20 Jwambopesi tanyakule ngondolo siŵili sila mwinani paujo pa Ambuje Akunnungu jiŵe mbopesi ja kunyakulwa, pamo ni nkate wa magowolo gaandanda ni asila ngondolo siŵili. Indu yi ili yeŵichikwe pajika kwa Ambuje Akunnungu, nombeyo chiiŵe yakwe jwambopesi jo. 21 Pa lyuŵa lilyolyo nnechanje masengo genu, nsonganganeje kwaligongo lyangu. Lyeleli chiliŵe lilajisyo lyakutamilisya kwa iŵelesi yenu, palipose pachinkatame.

22 Pachingungule magungulo genu, nkagungula mpaka mumpika mwa ngunda wenu namose nkasonganganya sigasi sya magungulo genu. Yeleyo chinneche kwaligongo lya jwakulaga ni jwannendo. Uneji ndili Ambuje Akunnungu, Akunnungu jwenu.

23 Ambuje Akunnungu ŵansalile che Musa, 24 ŵasalile Ŵaisilaeli kuti pa lyuŵa lyaandanda lya mwesi wa saba chiliŵe lyuŵa lya kupumulila kukwenu, lyuŵa lya chikumbuchisyo lichilitangaswe kwa kusona kwa lipenga ni kusongangana kwaligongo lyangu. 25 Nkapanganya masengo genu pa lyele lyuŵa lyo, ni ŵanyamwe chimpelechele mbopesi sya kutinisya kwa une Ambuje Akunnungu.

26 Ambuje Akunnungu ŵansalile che Musa, 27 kuti lyuŵa lya kumi lya mwesi wa saba lili lyuŵa lya ujilanyo. Pa lyuŵa lyo nsongangane kwaligongo lyangu ni nkalya chachilichose, ni mpeleche mbopesi kwa Ambuje Akunnungu jakutinisya ni mooto. 28 Nkapanganya masengo pa lyuŵa lyo pakuŵa lili lyuŵa lya ujilanyo, ujilanyo waukutendekwa kwaligongo lyenu paujo pa une Ambuje Akunnungu, Akunnungu ŵenu. 29 Mundu jwalijose juchalye pa lyuŵa lyo ngasaŵalanjikwa kuŵa jumo jwa ŵandu ŵa Akunnungu. 30 Ni mundu jwalijose juchapanganye masengo pa lyele lyuŵa lyo chinaaulaje. 31 Nkapanganya masengo ng'o, lyeleli chiliŵe lilajisyo lyakutamilisya kwa iŵelesi yenu, palipose pachinkatame. 32 Chiliŵe kukwenu Lyuŵa lya Kupumulila, nkalya chindu chachilichose. Kutandilila ligulo lya lyuŵa lya tisa lya mwesi mpaka ligulo lya lyuŵa lya kumi, nlikamulisye Lyuŵa lya Kupumulila.

33 Ambuje Akunnungu ŵaasalile che Musa, 34 ŵasalile Ŵaisilaeli kuti pa lyuŵa lya kumi na tano lya mwesi wa saba chitandeje chindimba cha masakasa ni chitendekweje kwa moŵa nsano ni gaŵili. 35 Lyuŵa lyandanda mmoŵa go nsonganganeje kwaligongo lyangu, nkapanganya masengo genu. 36 Kwa moŵa nsano ni gaŵili mpelechanje mbopesi sya kutinisya ni mooto kwa Ambuje Akunnungu, ni pa lyuŵa lya nsano ni lyaatatu nsonganganeje kwaligongo lyangu ni mpelecheje mbopesi jakutinisya ni mooto kwa Ambuje Akunnungu. Uli nsongangano wambesi, nkapanganya masengo genu.

37 Gelega gali moŵa ga chindimba gagasagulikwe kwakwachimbichisya Ambuje Akunnungu, pakusongangana kwaligongo lyangu ni pakupeleka mbopesi sya nafaka, ni mbopesi sya kutinisya, ni mbopesi sya utandi, ni mbopesi syakutinisya ni mbopesi sya yakung'wa syasikusachilwa kila lyuŵa. 38 Mbopesi si sili syakupwatika pa asila sinkutyosya pa Lyuŵa lya Kupumulila lya Ambuje Akunnungu, ni sooni sili syakupatika pa mbopesi syenu sya chachilichose chimmisile nasili, ni mbopesi sinkutyosya kwa kusaka kwenu kwa Ambuje Akunnungu.

39 Kwapele kutandilila lyuŵa lya kumi na tano lya mwesi wa saba pakumala kugungula magungulo genu chintende lyuŵa lyekulungwa lya Ambuje Akunnungu kwa moŵa saba, pa lyuŵa lya ndanda lili lyuŵa lya kupumulila, nombe pa lyuŵa lya nane lili lyuŵa lya kupumulila sooni. 40 Pa lyuŵa lyandanda chinjigale isogosi ya itela yenu yambone, ni nyambi sya itela ya mitende, ni nyambi syasili ni masamba gamajinji, ni nyambi sya itela yaikumela mungulugulu lusulo, ntaŵeje masakasa. Ni ŵanyamwe chinsangalale paujo pa Ambuje Akunnungu, Akunnungu jwenu kwa moŵa saba. 41 Chintende indimba yi kuŵa lyuŵa lyekulungwa kwa Ambuje Akunnungu kwa moŵa saba pa kila chaka. Lyeleli lili lilajisyo lyakutamilisya moŵa gose kwa iŵelesi yenu. Ntendeje chindimba chi pa mwesi wa nsano ni waaŵili. 42 Ntameje mmasakasa kwa moŵa nsano ni gaŵili; Ŵaisilaeli wose atameje mmasakasa mmoŵa go, 43 kuti wosepe ŵaakupagwa mu iwelesi yenu amanyilileje kuti une Ambuje Akunnungu naatesile Ŵaisilaeli atame mmasakasa panaakopwepesye ku chilambo cha ku Misili. Une ndili Ambuje Akunnungu, Akunnungu jwenu.

44 Kwapele che Musa ŵaasalile Ŵaisilaeli indimba yalamulilwe ni Ambuje Akunnungu.