1 Ambuje Akunnungu ŵansalile che Musa, 2 mwasalile Ŵaisilaeli, jwankongwe aŵaga ni chitumbo, aligopolaga mwanache jwannume, chaŵe jwangakundikwa kwa kwapopelela Akunnungu kwa moŵa nsano ni gaŵili malinga ni moŵa gakwe ga kulwesi. 3 Mwanache jo chaumbale pa moŵa nsano ni gatatu. 4 Nipele achikulugwe mwanache jo chaŵe jwangakundikwa kwa kwapopelela Akunnungu kwa moŵa selasini na tatu. Kele katema ko, akasakwaya chachilichose chachikukundikwa kwa kwapopelela Akunnungu, atamuno kwinjila peuto papaŵichikwe pajika kwaligongo lya Akunnungu mpaka moŵa ga kuntesya akundikwe kwa mapopelo pachigamalile.

5 Aligopolaga mwanache jwachikongwe, jwankongwe jo chaŵe jwangakundikwa kwa mapopelo kwa ijuma iŵili malinga ni moŵa gakwe ga kulwesi. Chajendelechele mmoŵa ga kuntesya akundikwe kwa kwapopelela Akunnungu kwa moŵa sitini na sita.

6 Moŵa gakwe ga kuntesya akundikwe kwa kwapopelela Akunnungu kwaligongo lya mwanache jwankongwe pane jwannume, pachigamalile, chaichenawo kwa jwambopesi, pannango wa Lisakasa lya Kusimanilana ngondolo jangakomala ja chaka chimo kuŵa mbopesi ja kutinisya ni likandi lya ngunda pane njuŵa kwaligongo lya mbopesi ja kulechelesya sambi. 7 Jwambopesi chaityosye paujo pa Ambuje Akunnungu ni kumpanganyichisya jwankongwe jo ujilanyo paujo pa Ambuje Akunnungu. Kwayele jwankongwe jo chaŵe jwakundikwe kwa kwapopelela Akunnungu kwaligongo lya miasi jakwe jijankopweche. Gelega gali malajisyo gankati jwankongwe jwalijose jwakuligopola mwanache jwannume pane jwankongwe.

8 Iŵaga jwankongwe jo ngakukombola kujityosya ngondolo jangakomala, chaichenawo njuŵa siŵili pane makandi gaŵili ga ngunda, chimo kwaligongo lya mbopesi ja kutinisya ni jiine kwaligongo lya mbopesi ja kulechelesya sambi. Kwakutende yeleyo jwambopesi champanganyichisye jwankongwe jo ujilanyo, nombejo chaŵe jwankundikwe kwa kwapopelela Akunnungu.