1 Ambuje Akunnungu ŵaasalile che Musa, 2 ŵasalile che Haluni ni achiŵanagwe kuti "Asilolechesye chenene mbopesi syeŵichikwe pajikwa syati Ŵaisilaeli akusiŵika pajika kwaligongo lyangu, kuti akaika kulisakasya liina lyangu lyalikwanile mu yoseyosepe. Une ndili Ambuje Akunnungu. 3 Ŵasalile kuti, iŵaga jumo pa iŵelesi yenu yose, chaŵe jwangakundikwa kwa kwapopelela Akunnungu, asiŵandichilaga mbopesi syeŵichikwe pajika ni Ŵaisilaeli kwaligongo lyangu une Ambuje Akunnungu, mundu jo aŵichikwe kwakutali ni une. Une ndili Ambuje Akunnungu.

4 "Jwannume jwalijose mu uŵelesi u che Haluni aŵaga ni ulwele waukwambuchisya pane waakopokaga usakwa waukuichiswa ni ulwele kumasisimilo, akalya indu yeŵichikwe pajika kwaligongo lya Akunnungu mpaka pachaŵe jwakukundikwa kwa kwapopelela Akunungu. Sooni mundu jo taŵe jwangakundikwa kwa kwapopelela kwa kugakwaya malilo pane mundu jwasikunkopoka mbeju sya chilume, 5 pane achikwayaga chinyama chachikukwaŵa chachikuntendekasya akakundikwa kwa kwapopelela Akunnungu, pane ankwayaga mundu jwalijose juchantendekasye aŵe jwangakundikwa kwa kwapopelela Akunnungu, ungakundikwa wauliwose wa kwapopelela Akunnungu. 6 Jwambopesi jwalijose jwakwaiye chindu chanti yeleyo chaŵe jwangakundikwa kwa kwapopelela Akunnungu mpaka ligulo. Sooni ngasalya mbopesi jajiŵichikwe pajika kwaligongo lya Akunnungu mpaka ajoje kaje ni meesi. 7 Lyuŵa palikutiŵila chaŵe jwasalele ni pakumala pelepo akukombola kulya mbopesi jeŵichikwe pajika kwaligongo lya Akunnungu, pakuŵa yeleyo ili yakulya yao. 8 Jwambopesi akalya nyama ja chinyama chachiwile chisyene pane cheulajikwe ni chinyama chijakwe, atendaga yeleyo chaŵe jwangakundikwa kwa kwapopelela Akunnungu. Une ndili Ambuje Akunnungu.

9 "Ŵambopesi akusachilwa agakamulichisye malajisyo gangu, Iŵaga ngatenda yeleyo chaŵe ni ileŵo ni kuwa, kwa kuganyelusya malajisyo go. Une ndili Ambuje Akunnungu jungwaŵika pajika ŵandu wo aŵe kwaligongo lyangu.

10 "Mundu jwati ngaŵa jwa pauŵelesi wa ŵambopesi ngakuŵajilwa kulya mbopesi jeŵichikwe pajika kwaligongo lya Akunnungu, namose jwannendo jwakwe pane jwakutumichila jwakwe. 11 Nambo kapolo jwa jwambopesi jwele jwansumile pane jwapagwilwe mu nyuumba mwakwe akukombola kulya yakulya yaakupegwa jwambopesi jo. 12 Iŵaga mwali jwa jwambopesi akulombekwa ni mundu jwangaŵa jwambopesi, akalya yakulya yeŵichikwe pajika kwaligongo lya Akunnungu. 13 Nambo iŵaga mwali jwa jwambopesi jo ali jwakuwililwa ni ŵankwakwe pane apegwilwe talaka pangaleka mwanache ni ausile kwa atatigwe ni kutama nawo mpela iŵaliji kuundanda, pelepo akukombola kulya yakulya ya atatigwe yo. Namose yeleyo, mundu jwangakola luusa ngaakombola kulya chachilichose pa chakulya cho.

14 "Mundu jwine alyaga mbopesi jeŵichikwe pajika kwaligongo lya Akunnungu pangaimanyilila, nipele mundu jo chalipichisye mbopesi jo kwa jwambopesi, chajonjechesye liunjili limo pa maunjili nsano pa ndalama ja mbopesi jo. 15 Ŵambopesi akasichembulukasya mbopesi syeŵichikwe pajika kwaligongo lya Akunnungu syatyosisye Ŵaisilaeli kwa Ambuje Akunnungu, 16 pakwakunda wandu wo kulya syele mbopesi yeŵichikwe pajika kwaligongo lya Akunnungu ni kwatesya aŵe ŵakuleŵa ni sooni kwatenda alipichisye. Une ndili Ambuje Akunnungu jungwaŵika pajika aŵe upaande wangu."

17 Ambuje Akunnungu ŵansalile che Musa, 18 ŵasalile che Haluni ni achiŵanagwe ŵachilume ni Ŵaisilaeli wose kuti mundu jwalijose mu mpingo wenu pane jwannendo jwakutama mu Isilaeli atyosyaga mbopesi jakutinisya pa moto, jiŵe mbopesi jakwanilisya nasili pane mbopesi jakupeleka kwa kusaka kwakwe, 19 kuti Ambuje Akunnungu ajipochele jele mbopesi jo, mpelecheje ng'ombe jankambaku, pane ngondolo tonde pane mbusi tonde, siŵeje syangalemala. 20 Nkaikanacho chachilichose chachilemele kwa Ambuje Akunnungu pakuŵa ngachipochelwa kwa upoche wenu. 21 Mundu apelekaga mbopesi ja chitendewele kwa Ambuje Akunnungu, jiŵeje ng'ombe pane ngondolo pane mbusi kwa kukwanilisya nasili pane mbopesi jakupeleka kwakusaka kwakwe, jikaŵa ni chilema chachilichose pakuti Ambuje Akunnungu ajipochele. 22 Nkapeleka kwa Ambuje Akunnungu chinyama chachilichose changalola, pane chelemale, pane chekatiche chiŵalo, pane chachikwete ilonda yakukoposya uwou pa chiilu pakwe, pane chachikwete ulwele wakunyanya pane chachikwete iŵengwa pachilu pakwe. Nkaityosya inyama yo kuŵa mbopesi jakutinisya ni mooto pa chilisa cha Ambuje Akunnungu. 23 Ng'ombe pane ngondolo jajikwete chiŵalo chimo cheleu pane chejipi kupunda ni yajikuti kusachilwa nkukombola kujityosya mbopesi jinkupeleka kwakusaka kwenu, nambo chinyama cho nkachityosya mbopesi jakukwanilisya nasili. 24 Nkachityosya mbopesi chinyama chati kumasisimilo kwakwe kwekate pane kwekasikwe pane kuulala. Nkatenda yeleyo mu chilambo chenu mwachinsyene.

25 Namose nkapochela kutyochela kwa achalendo chinyama chati yeleyo ni kundyochesya une Akunnungu jwenu nti chakulya. Inyama yo ngaikundikwa pamalo penu pakuŵa ilemele.

26 Ambuje Akunnungu ŵansalile che Musa, 27 "Katema pajikuŵelekwa ng'ombe pane ngondolo pane mbusi, kaanache ko akasakatyosya kwa mamagwe kwa moŵa saba. Nambo kutandilila lyuŵa lya nane ni kwendelechela ikomboleka kukatyosya kwa Ambuje Akunnungu nti mbopesi jakutinisya pa mooto. 28 Nambo nkajisinga ng'ombe pane ngondolo ni mwanache jwakwe pa lyuŵa limo. 29 Pankwatyochesya Ambuje Akunnungu mbopesi ja kwatogolela, njityosye kwanti itijikundikwe pamalo penu. 30 Chikusachilwa chiligwe pa lyuŵa lilyolyo, pangasigasya chindu chachilichose mpaka kundaŵi kwakwe. Une ndili Ambuje Akunnungu.

31 "Ngakamulisye malajisyo gangu ni kugakuya. Une ndili Ambuje Akunnungu. 32 Nkalisakasya liina lyangu lyalikukwanila mu yoseyose, nambo liŵe liina lyakuchimbichikwa pasikati pa ŵandu ŵa ku Isilaeli. Une ndili Ambuje Akunnungu jungummika pajika mme upaande wangu, 33 ni sooni junankopwesye ku chilambo cha ku Misili kuti me Akunnungu jwenu. Uneji ndili Ambuje Akunnungu."