1 Che Nadabu ni che Abihu ŵanache ŵachilume ŵa che Haluni, kila mundu ŵajigele sepetu jakwe ŵaŵisile mooto ni kutaga ubani, ni ŵantyochesye Ambuje Akunnungu mooto wangakundikwa, wangaukwilana ni malajisyo ga Ambuje Akunnungu. 2 Nipele wakopochele mooto paujo pa Ambuje Akunnungu, waajonasile achachanda ŵala, ni ŵawile paujo pa Ambuje Akunnungu. 3 Pelepo che Musa ŵansalile che Haluni, "Chindu chachikopochele chi chikusalichisa achila chaasasile Ambuje Akunnungu, paŵatite, ‘Kwa aŵala ŵaakundumichila akusachilwa kuunjimbichisya une kwannope pakuŵa uneji ndili jwakwanili mu yose yosepe, paujo pa ŵandu wose chinjimbichikwe.’ " Che Haluni ŵamyalele jii.

4 Nipele che Musa ŵaaŵilasile che Mishaeli ni che Elisafani, ŵanache ŵachilume ŵa che Usieli, njomba ŵao che Haluni ni kwasalila ajise kukutola malilo ga achapwawo Peuto Papaŵichikwe pajika kwaligongo lya Akunnungu ni kusijausya kwakutalichila paasa pa chigono. 5 Nipele ŵaichenje, ŵajigele malilo ga achapwao ni kugajausya kwakutalichila, paasa pa chigono ali awasile iwalo yao, mpela che Musa iŵatite kwalajisya.

6 Nipele che Musa ŵasalile che Haluni ni achiŵanagwe ŵaŵasigalile, che Eleasali ni che Isamali, "Ngasinneka umbo syenu pangasamula namose nganintotokola yakuwala yenu kulila kwamalumbo, mwatendaga yeleyo chimbwe ni Ambuje Akunnungu tachiutumbilila nsongangano wose. Nambo achalongo ajenu ni Ŵaisilaeli wosepe akukombola kulila kwamalumbo kwaligongo lya aŵala ŵati Ambuje Akunnungu ŵaauleje kwa mooto. 7 Ngasintyoka paasa pa Lisakasa lya Kusimanilana, nkaika kuwa, ligongo njitiliilwe mauta gakuntesya mme ŵakutumichila ŵa Ambuje Akunnungu." Che Haluni ni achiŵanagwe ŵatesile mpela che Musa iŵatite kwasalila.

8 Nipele Ambuje Akunnungu ŵansalile che Haluni, 9 "Pankwinjila mu Lisakasa lya Kusimanila, mmwe ni achiŵana ŵenu ngasing'wa divai namose chakukolelwa chachili chose, mwatendaga yeleyo chimbwe. Lilamulo li, chiliŵe lya moŵa gose pangali mbesi pa iwelesi yenu. 10 Mkusachilwa kulekanganya pasikati indu yaiŵichikwe pajika kwaligongo lya Akunnungu ni yakawaida ni pasikati indu yangakundikwa paujo pa Akunnungu ni yaikukundikwa paujo pa Akunnungu. 11 Nkusachilwa mwajiganye Ŵaisilaeli malamulo gose ginansalile kwalitala li che Musa."

12 Che Musa ŵaasalile che Haluni ni achiŵanagwe ŵachilume ŵasigalile, yaani che Eleasali ni che Itamali, "Njigalanje mbua ja mbopesi ja nafaka jajisigalile kuumila mu mbopesi syakupegwa Ambuje Akunnungu ni mooto, nlyeje pangataga amila pachiŵandi ni chilisa pakuŵa jelejo jiŵichikwe pajika kusyenesyene kwaligongo lya Akunnungu. 13 Chinlile Peuto Papaŵichikwe pajika kwaligongo lya Akunnungu pakuŵa yeleyo ili yenu ni achiŵana ŵenu mu mbopesi syakupegwa Ambuje Akunnungu ni mooto. Yeleyo ni yanamulikwe ni Ambuje Akunnungu. 14 Nambo mmwe ni ŵanache ŵenu achalume ni achakongwe, nkukombola kulya aila idali yenyakule mwinani ni kujelasya ni aila iiga yetyosekwe. Tinlile Peuto Papakundikwe kwa kwapopelela Akunnungu. Indu yo mpegwilwe kuŵa yenu ni uŵelesi wenu kuumila mu mbopesi sya chitendewele sya Ŵaisilaeli. 15 Chiiga chachikutyochekwa ni chidali chachikunyakulikwa mwinani ni kujelasya chaichenawo pampepe ni mbopesi sya mauta syasikutyochekwa ni mooto, kuti inyakulikwe mwinani paujo pa Ambuje Akunnungu kuŵa mbopesi jakunyakulikwa mwinani. Yeleyo chiŵe yenu pampepe ni achiŵana ŵenu, lili liunjili lyenu lyakawaida, mpela Ambuje Akunnungu yatite kulamula."

16 Nipele che Musa ŵalolechesye yambone mbusi jimo jiŵatyochekwe mbopesi ja kulechelesya sambi, ni ŵamanyilile kuti ŵamasile kutinisya pa mooto. Kwapele ŵaatumbilile kwannope che Eleasali ni che Itamali, achiŵanagwe che Haluni ŵaŵasigalile ni kwausya, 17 "Kwachichi nganinlya mbopesi ja kulechelesya sambi, mu Lisakasa lya Kusimanilana? Mbopesi jo jiŵichikwe pajika kwaligongo la Akunnungu. Akunnungu ampele ŵanyamwe masengo ga kuityosya ileŵo ya nsongangano wose kwa kwatendela ujilanyo paujo pa Ambuje Akunnungu. 18 Sooni pakuŵa miasi jakwe nganijiichiswa peuto papaŵichikwe pajika kwaligongo lya Akunnungu, mwasachilwe kulila mbusi jo mu Lisakasa lya Kusimanilana mpela indite pakunlajisya."

19 Che Haluni ŵanjanjile che Musa "Nnole, lelo atyosisyenje mbopesi syao sya kulechelesya sambi ni mbopesi syakutinisya paujo pa Ambuje Akunnungu, namose yeleyo indu yi imbatile! Uli, Ambuje Akunnungu ikaanonyele iŵaga ngaalile mbopesi jakulechelesya sambi jajityosekwe lelo?" 20 Che Musa paŵapilikene yeleyo, ŵaikundile.