1 Ambuje Akunnungu ŵansalile che Musa kanyuma ka chiwa cha ŵanache ŵaŵili ŵachilume ŵa che Haluni ŵaŵawile paŵajawile paujo pa Ambuje Akunnungu ni kutyosya mooto wangakundikwa ni Ambuje Akunnungu. 2 Ŵaasalile, akasalile akulu ŵawo che Haluni akajinjila mwakusachila nsyene peuto papaŵichikwe pajika kusyenesyene kwaligongo lya Akunnungu, kusyeto kwa nguo jalusasa, paujo pa chiunichilo cha pamalo pa ujilanyo, chichili pachanya pa Lisanduku lya Lilangano, akaika kuwa, pakuŵa ni pangukopochelaga mu liunde pachanya pa chiunichilo cha ujilanyo. 3 Che Haluni chajinjile peuto papaŵichikwe pajika kwaligongo lya Akunnungu ali ni ng'ombe jankambaku jangakomala kwaligongo lya mbopesi ja kulechelesya sambi ni ngondolo tonde ja mbopesi jakutinisya.

4 Chajoje nipele chawale nguo sya chimbopesi: Mwinjilo weswela mbee pamo ni budula jakulongosya munkati jeswela mbee, ni kanzu jeswela mbeechalitaŵe aula mpumbulu weswela ni kuwala chilyemba cheswela. Syelesi sili nguo syeŵichikwe pajika syasikuwalika kwa ligongo lya kwatumichila Akunnungu.

5 Kutyochela kwa Ŵaisilaeli chajigale mbusi tonde siŵili kwaligongo lya mbopesi jakutyosya sambi ni ngondolo tonde jimo kwaligongo lya mbopesi ja kutinisya. 6 Che Haluni chajityosye ng'ombe jankambaku jo kwaligongo lya mbopesi ja kulechelesya sambi syakwe nsyene ni kutenda ujilanyo kwaligongo lyakwe nsyene ni ŵamu nyuumba jakwe. 7 Nipele mbusi tonde siŵili sila chasijigale ni kusiŵika paujo pa Ambuje Akunnungu, pannango wa Lisakasa lya Kusimanilana. 8 Che Haluni chasitendele gudugudu mbusi tonde siŵili sila, mbusi jimo kwaligongo lya Ambuje Akunnungu ni mbusi jine kwaligongo lya kujilechelela jijaule mwitinji. 9 Che Haluni chaichenawo mbusi tonde jati jisagulikwe kwa gudugudu kwaligongo lya Ambuje Akunnungu ni kujityosya mbopesi kwaligongo lya kulechelesya sambi. 10 Nambo ajila mbusi jijasagulikwe kwa gudugudu kuti jiŵe jakujilechelela jijaule chijityosyekwe jili jejumi paujo pa Ambuje Akunnungu, jitumiche kwakutenda ujilanyo ni Akunnungu kwa kujilechelela jijaule mwipululu jili jijigele sambi sya ŵandu.

11 Che Haluni chajityosye mbusi ja mbopesi ja kulechelesya sambi kwaligongo lyakwe nsyene kuti atende ujilanyo kwaligongo lyakwe nsyene ni lya ŵandu wa mu nyuumba jakwe, nombejo tajisikite mbusi jo kuŵa mbopesi jakulechelesya sambi syakwe nsyene. 12 Tajigale sepetu jegumbale makala ga mooto gagakutyochela pa chilisa chichili paujo pa Ambuje Akunnungu, ajigale ni magasa gaŵili ga ubani wesyajesyaje uchenene ni ajinjile nayo kusyeto kwa nguo ja lusasa. 13 Ataje ubani pa mooto paujo pa Ambuje Akunnungu, kuti lyosi lya ubani wo liuwunichile chiunichilo cha ujilanyo kuti jwalakwe jo akaliwona lisanduku lyo, akaika kuwa. 14 Tajigale miasi kanondi ja ng'ombe ja nkambaku jila ni ajimisile ni chaala chakwe paujo pa chiunichilo cha ujilanyo. Amisile sooni miasi jo kasano ni kaŵili ni chala chakwe paujo pa chiunichilo cha ujilanyo.

15 Pakumala yeleyo chajisikite mbusi tonde ja mbopesi ja kulechelesya sambi sya ŵandu, miasi jakwe tajijausye kusyeto kwa nguo ja lusasa, ni tajitende miasi jakwe mpela yatite kujitenda miasi ja ng'ombe jankambaku jila. Chajimisile pachanya chiunichilo cha ujilanyo ni chammbujo kwakwe. 16 Kwakutenda yeleyo chatende ujilanyo kwaligongo lya peuto papaŵichikwe pajika kusyenesyene kwa ligongo lya Akunnungu, kwaligongo lya utindiganyo watesile Ŵaisilaeli ni kwaligongo lya sambi syao syose. Nombejo chatende iyoyo kwa ligongo lya Lisakasa lya Kusimanilana, lyalili pasikati jao ŵele ŵandu ŵangakundikwa kwa kwapopelela Akunnungu. 17 Katema che Haluni pakutenda ujilanyo kwaligongo lyakwe nsyene, ni kwaligongo lya ŵa mu nyuumba jakwe ni kwaligongo lya nsongangano wose wa Ŵaisilaeli, ngasajinjila mundu jwalijose mu Lisakasa lya Kusimanilana mpaka pachamale ni kukopoka. 18 Ali akopweche che Haluni ajaule pachilisa chachili paujo pa Ambuje Akunnungu ni kuchitendela ujilanyo. Tajigale miasi kanondi ja ng'ombe ja nkambaku ni miasi ja mbusi tonde ni kujipakasya misengo jose jijili pa ndumba sya chilisa. 19 Chanyuluchisye miasi jine penani pa chilisa cho ni chala chakwe kasano ni kaŵili, kuti achitenda chiŵe chakusalala ni kuchitenda chitumiche kwaligongo lya Akunnungu pe, kutyochela ni ungakundikwa wa Ŵaisilaeli kwapopelela Akunnungu.

20 Che Haluni amalaga kutenda ujilanyo kwaligongo lya peuto papaŵichikwe pajika kusyenesyene kwaligongo lya Akunnungu, ni Lisakasa lya Kusimanilana ni chilisa, taichenawo mbusi jejumi jila. 21 Che Haluni taŵiche makono gakwe pa ntwe wa mbusi jo ni kusala utindiganyo wose ni ileŵo ya Ŵaisilaeli, ni sambi syao syose, nipele taiŵiche pa ntwe wa mbusi jo. Tajilechele mbusi tonde jo jijaule mwipululu, kwa kusakulilwa ni mundu jwasagulikwe kutenda masengo go. 22 Mbusi tonde jo chijitwichile sambi syao syose mpaka peuto pangali ŵandu, ni mundu jula chajileche jiutuchile mwipululu.

23 Nipele che Haluni tajinjile mu Lisakasa lya Kusimanilana, tawule yakuwala yeswela mbee iŵawete paŵajinjile peuto papaŵichikwe pajika jusyenesyene kwaligongo lya Akunnungu, ni kuileka mmomo. 24 Tajoje meesi peuto papaŵichikwe pajika kwaligongo lya Akunnungu, ni kuwala yakuwala yakwe yakawaida. Nipele takopochele paasa ni kutyosya mbopesi ja kutinisya kwaligongo lyakwe nsyene, ni mbopesi ja kutinisya kwaligongo lya Ŵaisilaeli, nombejo chatende ujilanyo kwaligongo lyakwe nsyene ni kwaligongo lya Ŵaisilaeli. 25 Chagatinisye mauta ga mbopesi jakulechelesya sambi pachanya chilisa. 26 Mundu juŵasagulikwe kujisakulila mbusi jajijigele sambi jula, tachape yakuwala yakwe ni koga, pele ni patajinjile pa chigono. 27 Ng'ombe ni mbusi iyatyosyekwe mbopesi jakulechelesya sambi, yati miasi jao ŵajipeleche peuto papaŵichikwe pajika kusyenesyene kwaligongo lya Akunnungu kukutendela ujilanyo, taijausye paasa pa chigono ni kuitinisya pamo ni mapende gao ni nyama jao ni manyi gao. 28 Mundu juchaitinisye chachape yakuwala yakwe ni koga, pele ni pachajinjile pa chigono.

29 Alili liŵe lilajisyo lyalikutamilisya kukwenu. Pa lyuŵa lya kumi lya mwesi wa nsano ni waaŵili, ŵanyamwe mwachinsyene ni achalendo ŵakutama pasikati jenu ntaŵeje pa lyuŵa lyo ni nkapanganya masengo galigose. 30 Lyele lyuŵa lyo ni lyuŵa lichiutendekwe ujilanyo kwaligongo lyenu kuti antende ŵakukundikwa kwa kwapopelela Akunnungu. Nipele paujo pa Ambuje Akunnungu chimme ŵasalele kutyochela ni sambi syenu ni kukundikwa kwa kwapopelela Ambuje Akunnungu. 31 Lyele chiliŵe Lyuŵa lya Kupumulila kukweni ni ngaŵa kupanganya masengo galigose, ni sooni chintaŵe pa lyuŵa lyo. Lyeleli liŵe lilajisyo lyalikutamilisya moŵa gose pangali mbesi. 32 Jwambopesi jwajitililwe mauta ni kuŵichikwa pajika kuti aŵeje jwambopesi pamalo pa Atatigwe kuŵa Jwambopesi Jwankulu ni juchatendekanye ujilanyo. Tachiwala yakuwala yeswela yaiŵichikwe pajika kwa kuwala paakwatumichila Akunnungu, 33 ni kutendea ujilanyo kwaligongo lya peuto papaŵichikwe pajika kusyenesyene kwaligongo lya Akunnungu, ni kwaligongo lya Lisakasa lya Kusimanilana ni chilisa, ni kwaligongo lya ŵambopesi, ni kwaligongo lya nsongangano wose wa Ŵaisilaeli. 34 Alili chiliŵe lilajisyo lyalikutamilisya moŵa gose pangali mbesi kukwenu. Ujilanyo chiutendekwe kamope pa chaka kwaligongo lya sambi syose sya Ŵaisilaeli. Nipele che Musa ŵatesile yanayose mpela iŵatite pakwalajisya ni Ambuje Akunnungu.